Éxodo 26

Aju tja Dios, xbalun ja

Cjawil tbinchaꞌna ja xbalun cyiꞌj laj xbalun lino, chubemaj ttzeꞌyil, ex tiꞌj nokꞌ ẍkꞌilun queꞌyin, ẍjulin queꞌyin ex cyak queꞌyin, tbanil binchben cye; ex chmoꞌmaj cyilbilal querubín cywitz. 2 Cycyakil ke xbalun lu, junx cyjel echbil cye; cyajlaj var cynukbil, ex cab var cywitz. 3 Slapun oca jweꞌ xbalun, jun ttxlaj juntl. Ax icx che tembil jweꞌtl. 4 Che oquel tkꞌoꞌna takꞌal ẍkꞌilun queꞌyin te t-ẍcyin ttxlaj mancbil xbalun cyiꞌj keju jweꞌ otok che oc slapit. Ax icx che oquel tkꞌoꞌna ttxaꞌn jun xbalun cyiꞌj ke jweꞌtl. 5 Che oquel tkꞌoꞌna 50 takꞌal ttxaꞌn tnejel xbalun ex 50 tiꞌj ttxaꞌn juntl, tuꞌn cycyaj ten ke takꞌal jun tucꞌil juntl. 6 Ax icx binchama 50 ganch kꞌan pwak cytxꞌotxꞌil. Cyuꞌntzun ke ganch lu che oquel tmojbaꞌna ke ttxaꞌn xbalun jun tucꞌil juntl. Cꞌoqueltzun ja xbalun junx tten.

7 Ax icx binchama junlaj xbalun tiꞌj cytzmal chip tuꞌn tjax kꞌot tibaj xbalun ja. 8 Cycyakil ke xbalun lu junx cyjel echbil cye; olaj var cynukbil, ex cab var cywitz. 9 Slapun oca jweꞌ xbalun jun ttxlaj juntl. Ax icx slapun oca kak xbalun jun ttxlaj juntl, ex paktzꞌuꞌn ajtza aju tkakin xbalun twitz tucꞌil. 10 Che oquel tkꞌoꞌna 50 takꞌal tiꞌj ttxaꞌn tnejel xbalun, ex 50 tiꞌj ttxaꞌn juntl. 11 Ax icx binchama 50 ganch kꞌan cꞌuxbil cytxꞌotxꞌil, akeju che oquex tkꞌoꞌna cyuj ke takꞌal ex che oquel tmojbaꞌna ke xbalun jun tucꞌil juntl. Cꞌoqueltzun tmakel junx tten. 12 Atzun ke ttxaꞌn che cyjel ten, che elex joweꞌ tiꞌjxi ja xbalun. 13 Cyjaꞌtzun cmaksetel ja xbalun cyuꞌn ke ttxaꞌn xbalun che cyjel joweꞌ cycabil pacꞌ: Cabe xcꞌachub cyjel joweꞌ jun pacꞌ ex cabe juntl pacꞌ.

14 Binchama jun maksibl te xbalun ja tiꞌj ttzꞌumal ẍneꞌl toc tcꞌaꞌ cyak queꞌyin; ex tibajxi jlu binchama juntl maksibl tiꞌj tzꞌuꞌm tbanilxix.

15 Binchama txkan tzꞌlom tiꞌj tzeꞌ chꞌiꞌx acacia tuꞌn cyoc kꞌot waꞌl cyten tiꞌj ja xbalun. 16 Teyle te junjun tzꞌlom jweꞌ var tnukbil, ex ox xcꞌachub twitz. 17 Cyjel ten cabe t-ẍcyin teyle te junjun tzꞌlom tuꞌn toc mojeꞌ jun tucꞌil juntl. Iclex che tembil cyuꞌne cycyakil ke tzꞌlom tiꞌj ja xbalun. 18 Binchama winkin tzꞌlom tuꞌn cyoc tiꞌj ja xbalun tuj tumlal tnayaj kꞌij; 19 ex cyjakꞌ ke tzꞌlom lu, kꞌon cuba 40 tkꞌukbil sak pwak cytxꞌotxꞌil; che cyjel ten cabe tkꞌukbil tjakꞌ teyle te junjun tzꞌlom tuꞌn cycuꞌx keꞌ cycabil cyẍcyin cyuj.

20 Ax icx tiꞌj juntl pacꞌ xbalun ja, tuj tumlal tbankꞌab kꞌij, binchama winkin tzꞌlom, 21 ax icx 40 tkꞌukbil sak pwak cytxꞌotxꞌil, tuꞌn cyten cabe tjakꞌ teyle te junjun tzꞌlom. 22 Atzunte tiꞌjxi ja xbalun tuj tumlal telex kꞌij, binchama kak tzꞌlom, 23 ex cabetl tzꞌlom cꞌoquel tkꞌoꞌna cyiꞌj cabe tbutxꞌ te tiꞌjxi, 24 akeju che oquel mojbet xiꞌynix t-xeꞌ, atzun twiꞌ tuꞌn cyoc mojbet tuꞌn jun argoy. Atzun jlu cbantel tuꞌna cyiꞌj cycabil tzꞌlom che oquel cyiꞌj cycabil tbutxꞌ. 25 Cbanteltzun wajxak tzꞌlom ex kaklaj cykꞌukbil sak pwak cytxꞌotxꞌil, cabchak tjakꞌ teyle junjun tzꞌlom.

26 Ax icx binchama jweꞌ tzeꞌ tiꞌj chꞌiꞌx acacia te tkꞌeꞌlil, tuꞌn cyoc ten ke tzꞌlom cyiꞌj tuj jun pacꞌ ja xbalun, 27 jweꞌtl tkꞌeꞌlil tuꞌn cyoc ten ke tzꞌlom cyiꞌj tuj juntl pacꞌ ex jweꞌtl tkꞌeꞌlil tuꞌn cyoc ten ke tzꞌlom tiꞌjxi ja xbalun tuj tumlal telex kꞌij. 28 Aju tkꞌeꞌlil te tuj tmij cxel keꞌ tiꞌj jun ttxaꞌn ex cpol baj tiꞌj juntl. 29 Loꞌtzin oca kꞌan pwak cyiꞌj ke tzꞌlom, ex binchama ke argoy kꞌan pwak cytxꞌotxꞌil jatum tuꞌn cyex ke tkꞌeꞌlil. Ax icx loꞌtzin oca kꞌan pwak cyiꞌj ke tzeꞌ lu. 30 Binchama ja xbalun ic tzaꞌnx tzaj nyecꞌune teya twi witz.

31 Binchama jun xbalun te makbil, tiꞌj nokꞌ ẍkꞌilun queꞌyin, ẍjulin queꞌyin, cyak queꞌyin, ex lino chubemaj ttzeꞌyil, tbanil binchben te ex chmoꞌmaj cyilbilal querubín twitz. 32 Kꞌon oca tganchil kꞌan pwak cytxꞌotxꞌil, ex yobin oca cyiꞌj cyaje tkan, akeju otok che baj tbinchaꞌna tiꞌj tzeꞌ chꞌiꞌx acacia, loꞌtzin oca kꞌan pwak cyiꞌj ex waꞌl cycub ke cyibaj cyaje cykꞌukbil sak pwak cytxꞌotxꞌil. 33 Cjawil tyobina xbalun te makbil cyiꞌj ke ganch; atzun tiꞌjxi xbalun te makbil lu tuj Lugar Xjanxix, cꞌoquex tkꞌoꞌna aju cax te cꞌubl nleye. Cyjaꞌtzun cbel ten aju xbalun te makbil t-xol Lugar Xjan ex Lugar Xjanxix. 34 Aju cax te cꞌubl nleye, aju cꞌoquex tkꞌoꞌna tuj Lugar Xjanxix, cbel tkꞌoꞌna tmaksil tibaj. 35 Atzunju mes cbel tkꞌoꞌna tuj ja xbalun tiꞌjtzi xbalun te makbil ex tuj tumlal tbankꞌab kꞌij, ex cbel tkꞌoꞌna cycubil candil tuj tumlal tnayaj kꞌij twitz mes.

36 Binchama jun xbalun te makbil ttzi ja xbalun; cbantel tuꞌna tiꞌj nokꞌ ẍkꞌilun queꞌyin, ẍjulin queꞌyin, cyak queꞌyin ex lino chubemaj ttzeꞌyil, ex chmoꞌmaj ke twitz. 37 Binchama jweꞌ tkan tiꞌj tzeꞌ chꞌiꞌx acacia tuꞌn tjaw yobit xbalun te makbil ttzi ja xbalun, loꞌtzin oca kꞌan pwak cyiꞌj, ex binchama ke ganch kꞌan pwak cytxꞌotxꞌil, ex jweꞌ cykꞌukbil tkan kꞌan cꞌuxbil cytxꞌotxꞌil.