2 Tzaj txcoꞌn Bezaleel tuꞌn Moisés, tucꞌix Aholiab ex cycyakil keju attok cynabl tuꞌn cybinchante akꞌuntl tbanilxix, akeju otok tzaj tkꞌoꞌn Kman cynabl ex otok txi cykꞌon cyib tuꞌn cyex cygan tuꞌn cyonin tiꞌj akꞌuntl lu. 3 Xi cycꞌmoꞌn te Moisés ke oyaj otok che ul cyiꞌn aj Israel tuꞌn cyajben tuj tja Dios.

Atzun cye aj Israel, teyle junjun prim cucxtok tul cyiꞌn cyoyaj tuꞌn cyex cygan. 4 Cycyakil keju attok cynabl ex in che akꞌnantok tiꞌj ju attok tajben tiꞌj tja Dios, weꞌ chꞌin akꞌuntl cyuꞌn, 5 ex e jeꞌx kꞌmalte te Moisés cyjaꞌ: Ma tzul cyiꞌn xjal mas nim twitzju at tajben tiꞌj akꞌuntl o tzaj tmaꞌn Kman tuꞌn tbant, che chi.

6 Xitzun t-samaꞌn Moisés tkanil cyxol cycyakil xjal tuj campament, chi cyjaꞌ: Mi jun xinak, mi jun xuꞌj ctzajel tiꞌntl toyaj tiꞌj tja Dios, chi. Cyjaꞌtzun tten o weꞌ tuꞌn tul cyiꞌn xjal cyoyaj. 7 Mya nok oꞌcx otok chmet aju attok tajben tuꞌn tbant akꞌuntl, ax icx otok pon mastl tibaj.

8 Akeju mas attok cynabl tuꞌn cybinchante akꞌuntl tbanilxix, baj cybinchaꞌn ja xbalun cyiꞌj laj xbalun binchamaj tiꞌj nokꞌ lino ex tiꞌj nokꞌ ẍkꞌilun queꞌyin, ẍjulin queꞌyin ex cyak queꞌyin; tcyakil nokꞌ chubemajtok ex tbanil binchben cye, ex biꞌx xi cychmoꞌn cyilbilal querubín cywitz. 9 Cycyakil xbalun lu junx taꞌ echbil cye: Cyajlaj var cynukbil ex cab var cywitz. 10 Oc t-slapun Bezaleel jweꞌ xbalun jun ttxlaj juntl, ax icx e tenba jweꞌtl. 11 E oc tkꞌoꞌn takꞌal ẍkꞌilun che queꞌyin te t-ẍcyin ttxlaj mancbil xbalun cyiꞌj ke jweꞌ otok che oc slapit. Ax icx e oc tkꞌoꞌn takꞌal ttxlaj jun xbalun cyiꞌj ke jweꞌtl. 12 E oc tkꞌoꞌn 50 takꞌal te t-ẍcyin ttxlaj tnejel xbalun ex 50 ttxlaj juntl, tuꞌn tcyaj ten jun twitz juntl. 13 Ax icx baj tbinchaꞌn 50 ganch kꞌan pwak cytxꞌotxꞌil. Cyuꞌntzun ke jlu e oc tmojbaꞌn ke ttxlaj xbalun jun tucꞌil juntl. Octzun ja xbalun te junx tten.

14 Ax icx baj tbinchaꞌn junlaj xbalun tiꞌj cytzmal chip, tuꞌn t-xi licꞌet tibaj ja xbalun. 15 Cycyakil ke xbalun lu junx taꞌ echbil cye: Olaj var cynukbil ex cab var cywitz. 16 E oc t-slapun jweꞌ xbalun jun ttxlaj juntl, ax icx e oc t-slapun kaktl xbalun jun ttxlaj juntl. 17 E oc tkꞌoꞌn 50 takꞌal te t-ẍcyin ttxlaj tnejel xbalun ex 50 ttxlaj juntl. 18 Ax icx tbincha 50 ganch kꞌan cꞌuxbil cytxꞌotxꞌil tuꞌn cyoc mojeꞌ cytxaꞌn xbalun, tuꞌntzun toc te junx tten.

19 Tbincha jun maksibl te ja xbalun tiꞌj ttzꞌumal ẍneꞌl toc tcꞌaꞌ cyak queꞌyin, ex tibajxi jlu tbincha juntl maksibl tiꞌj tzꞌuꞌm tbanilxix. 20 E baj tbinchaꞌn txkan tzꞌlom tiꞌj tzeꞌ chꞌiꞌx acacia, akeju waꞌl cyten tuꞌn cyajben tiꞌj ja xbalun. 21 Teyle junjun tzꞌlom, jweꞌ var tnukbil ex ox xcꞌachub twitz. 22 Teyle junjun tzꞌlom at cabe t-ẍcyin tuꞌn tcuꞌx keꞌ jun ttxlaj juntl. Iclex e tenba cycyakil ke tzꞌlom tuꞌn tiꞌj ja xbalun. 23 E baj tbinchaꞌn winkin tzꞌlom tuꞌn cyoc ten tuj tumlal tnayaj kꞌij te ja xbalun. 24 Ax icx e cub tbinchaꞌn 40 cykꞌukbil tzꞌlom sak pwak cytxꞌotxꞌil. Cabe tkꞌukbil tjakꞌ teyle junjun tzꞌlom, tuꞌn cycuꞌx keꞌ cycabil cyẍcyin cyuj. 25 Ax icx tuj juntl pacꞌ ja xbalun, tuj tumlal tbankꞌab kꞌij tbincha winkin tzꞌlom, 26 ex 40 cykꞌukbil sak pwak cytxꞌotxꞌil, tuꞌn cyten cabe tjakꞌ teyle junjun tzꞌlom. 27 Atzun tiꞌjxi ja xbalun, tuj telex kꞌij, e baj tbinchaꞌn kak tzꞌlom 28 ex cabetl tzꞌlom tuꞌn cyoc cyiꞌj ke cabe tbutxꞌ te tiꞌjxi, 29 akeju tuꞌn cymojbet xiꞌynix t-xeꞌ, atzun twiꞌ tuꞌn cyoc mojbet tuꞌn jun argoy. Atzun jlu tbincha cyiꞌj cycabil tzꞌlom cyiꞌj cycabil tbutxꞌ te tiꞌjxi. 30 E banttzun wajxak tzꞌlom ex kaklaj cykꞌukbil sak pwak cytxꞌotxꞌil, cabe tjakꞌ teyle junjun tzꞌlom.

31 Ax icx baj tbinchaꞌn jweꞌ tzeꞌ tiꞌj tzeꞌ chꞌiꞌx acacia, te tkꞌeꞌlil, tuꞌn cyoc ten ke tzꞌlom cyiꞌj tuj jun pacꞌ ja xbalun, 32 jweꞌtl tzeꞌ tuꞌn cyoc ten ke tzꞌlom cyiꞌj tuj juntl pacꞌ ex jweꞌtl tuꞌn cyoc ten ke tzꞌlom cyiꞌj tiꞌjxi ja xbalun tuj telex kꞌij. 33 Baj tbinchaꞌn aju tzeꞌ te tuj tmij, tuꞌn ticꞌx cymij ke tzꞌlom, tuꞌn t-xi keꞌ tiꞌj jun ttxaꞌn ex tuꞌn tpon baj tiꞌj juntl. 34 Oc tloꞌtzin kꞌan pwak cyiꞌj ke tzꞌlom ex e baj tbinchaꞌn ke argoy kꞌan pwak cytxꞌotxꞌil jatum tuꞌn cyex ke tzeꞌ. Ax icx oc tloꞌtzin kꞌan pwak cyiꞌj ke tzeꞌ lu.

35 Baj tbinchaꞌn jun xbalun te makbil, tiꞌj nokꞌ lino chubemaj ttzeꞌyil, ex tiꞌj nokꞌ ẍkꞌilun queꞌyin, ẍjulin queꞌyin, cyak queꞌyin, tbanil binchben te, ex biꞌx xi tchmoꞌn cyilbilal querubín twitz. 36 Baj tbinchaꞌn cyaje tkan tiꞌj tzeꞌ chꞌiꞌx acacia, ex oc tloꞌtzin kꞌan pwak cyiꞌj. Ax icx tbincha ke tganchil kꞌan pwak cytxꞌotxꞌil, ex cyaje cykꞌukbil tkan sak pwak cytxꞌotxꞌil.

37 Ax icx tbincha jun xbalun te makbil ttzi ja xbalun. Baj tbinchaꞌn tiꞌj nokꞌ ẍkꞌilun queꞌyin, ẍjulin queꞌyin ex cyak queꞌyin ex tiꞌj nokꞌ lino chubemaj ttzeꞌyil, ex biꞌx xi tchmoꞌn ke tilbilal twitz. 38 E baj tbinchaꞌn jweꞌ tkan tucꞌix adorn tjax tuj cywiꞌ, ex oc tloꞌtzin kꞌan pwak cyiꞌj. Ax icx tbincha ke tganchil kꞌan pwak cytxꞌotxꞌil, ex tbincha jweꞌ cykꞌukbil tkan kꞌan cꞌuxbil cytxꞌotxꞌil.