4 O yolin Moisés cyucꞌil cycyakil aj Israel ex xi tmaꞌn cye cyjaꞌ: Atzun jlu ma tzaj tmaꞌn Kman tuꞌn tbant: 5 E cyjaw chmet ke oyaj te Kman cyxole. Cycyakil keju cyajbil tuꞌn ttzaj cykꞌoꞌn cyoyaj te Kman tuꞌn tcyakil cyanmi, e ttzaj cyiꞌn kꞌan pwak, sak pwak, kꞌan cꞌuxbil, 6 xbalun ẍkꞌilun queꞌyin, xbalun ẍjulin queꞌyin, xbalun cyak queꞌyin, tbanil xbalun lino, ttzmal chip, 7 ttzꞌumal ẍneꞌl toc tcꞌaꞌ cyak queꞌyin, tzꞌuꞌm tbanilxix, tzeꞌ chꞌiꞌx acacia, 8 aseyt tuꞌn tajben cyuj candil, t-samel at tcꞌocꞌjal tuꞌn tcuꞌx kꞌot tuj aseyt aju in ajben oc toc toclen jun xjal, ex tuꞌn tajben te tcꞌocꞌjal storac, 9 ke tal abj ónice ex txkantl tal abj tbanil, tuꞌn toc kꞌot tiꞌj capiẍay nnoꞌc tkꞌoꞌn tnejel pal, ex tiꞌj tal xbalun nnoꞌc ten ttzi t-xuꞌc.

10 Cycyakil keju at cynabl tiꞌj akꞌuntl, che tzajel ex cbantel cyuꞌn tcyakilju o tzaj tmaꞌn Kman: 11 Aju ja xbalun te tja Dios, aju xbalun tuꞌn tjax twiꞌ ex tuꞌn toc tiꞌjele, ke ganch, ke tzꞌlom, ke tzeꞌ te tkꞌeꞌlil, ke tkan ex ke cykꞌukbil tkan; 12 aju cax cꞌubl tley Dios cyucꞌix ke tzeꞌ te tanubl te, aju tmaksil cax ex aju xbalun te makbil tetz twitz; 13 aju mes cyucꞌix ke tzeꞌ te tanubl te, cycyakil ke macbil che ajbel tiꞌj, ex aju pan tuꞌn tcub tkꞌoꞌn twitz Kman; 14 aju cycubil candil, ke macbil che ajbel tiꞌj, ke candil tuꞌn cyspicꞌbante tuj ja ex aju aseyt cꞌajbel cyuj; 15 aju altar tuꞌn tcub patit storac cyucꞌix ke tzeꞌ te tanubl te, ex aju aseyt cꞌajbel oc toc toclen jun xjal, aju storac tbanilxix tcꞌocꞌjal, ex aju xbalun te makbil cbel ttzi ja; 16 aju altar tuꞌn tcub patit chojbil, tucꞌix kꞌan cꞌuxbil xawcꞌin toyꞌ cyjel tjakꞌ chojbil oc tcub patit, ke tzeꞌ te tanubl te ex cycyakil ke macbil che ajbel tiꞌj, ex aju tcubil aꞌ tucꞌix tkꞌukbil; 17 ke xbalun te makbil tiꞌjele peꞌn, ke tkan, ke cykꞌukbil tkan, aju xbalun te makbil cbel ttzi peꞌn; 18 ke stac te tzinbil xbalun tiꞌj tja Dios, ke stac che belex tiꞌjele peꞌn ex ke cꞌalbil cye; 19 ke xbalun che oquel cykꞌoꞌn pal oc cyajben tuj tja Dios, ke xbalun xjansamaj te Aarón aju pal, ex ke cyxbalun tcyꞌajal oc cyajben tuj cyakꞌun te pal.

20 E ajtzun cycyakil aj Israel cyja, 21 ex cycyakil keju o tzaj cygan tuꞌn cyoyin tuꞌn tcyakil cyanmi, e ul meltzꞌaj kꞌol cyoyaj te Kman, tuꞌntzun tbant aju ja xbalun te mojbabl tibil, ex tcyakilju attok tajben tiꞌj ex cyiꞌj ke xbalun xjansamaj. 22 E ultzun ke xinak ex ke xuꞌj akeju tzaj cygan tuꞌn cyoyin tuꞌn tcyakil cyanmi, ul cyiꞌn caden, tuj ẍcyinbaj, xmulkꞌabaj, tkul kꞌabaj, ex tcyakil wik tiꞌxti kꞌan pwak ttxꞌotxꞌil. Cycyakil ul cyiꞌn cyoyaj kꞌan pwak ttxꞌotxꞌil te Kman. 23 Cycyakil keju attok xbalun ẍkꞌilun queꞌyin cyucꞌil, ul cyiꞌn, tucꞌix xbalun ẍjulin queꞌyin, xbalun cyak queꞌyin, tbanil xbalun lino, ttzmal chip, ttzꞌumal ẍneꞌl toc tcꞌaꞌ cyak queꞌyin ex tzꞌuꞌm tbanilxix. 24 Cycyakil keju otok tzꞌel cypaꞌn sak pwak ex ka kꞌan cꞌuxbil, ul cyiꞌn twitz Kman; ex cycyakil keju attok tzeꞌ acacia cyucꞌil, ul cyiꞌn tuꞌn tajben tiꞌj tja Dios. 25 Ax icx cycyakil xuꞌj baꞌntok che chuben, tzaj cyiꞌn aju nokꞌ otok baj cychuben: Nokꞌ ẍkꞌilun queꞌyin, nokꞌ ẍjulin queꞌyin, nokꞌ cyak queꞌyin ex tbanil nokꞌ lino. 26 Cycyakil xuꞌj tzaj cygan tuj cyanmi ex baꞌn che chuben tiꞌj ttzmal chip, e oc ten chubel te. 27 Ke nejenel tzaj cyiꞌn tal abj ónice ex ke tal abj tbanil, tuꞌn cyoc kꞌot tiꞌj capiẍay nnoꞌc tkꞌoꞌn tnejel pal, ex tiꞌj tal xbalun nnoꞌc ten ttzi t-xuꞌc, 28 cyucꞌix ke tcꞌocꞌjal ex aju aseyt tuꞌn tajben cyuj candil, tucꞌix aseyt tuꞌn tajben oc toc toclen jun xjal, ex ke tcꞌocꞌjal tuꞌn cyajben tuj storac.

29 Cycyakil aj Israel, tzaꞌnx ke xinak ax icx ke xuꞌj, akeju o tzaj cygan tuꞌn t-xi cykꞌoꞌn cyoyaj tuꞌn tbant tcyakilju otok tzaj tmaꞌn Kman te Moisés, tzaj cyiꞌn cyoyaj twitz Kman tuꞌn tcyakil cyanmi.

30 Xitzun tmaꞌn Moisés cye aj Israel cyjaꞌ: Cybintze. Cyxol tiyjil Judá o jaw scꞌoꞌn Bezaleel tuꞌn Kman tuꞌn toc te nejenel tiꞌj akꞌuntl lu; ate Bezaleel tcyꞌajal Uri ex tal tchman Hur. 31 O noj tuj tanmi tuꞌn T-xew Dios, ex o tzaj tkꞌoꞌn tojtzkibl tiꞌj tcyakil akꞌuntl, ex tuꞌn tel tnicꞌ tiꞌj tcyakil txcaj akꞌuntl. 32 ex at tnabl tiꞌj alcyechak tumlal akꞌuntl tuꞌn tbant, ex at tnabl tuꞌn takꞌnan tiꞌj kꞌan pwak, tiꞌj sak pwak ex tiꞌj kꞌan cꞌuxbil, 33 tuꞌn cybaj tbinchaꞌn ke tal abj tbanilxix ex tuꞌn cycub tkꞌoꞌn tuj cykꞌukbil, tuꞌn cybaj tjasoꞌn cyiꞌj tzeꞌ, ex tuꞌn takꞌnan tiꞌj tcyakil wik akꞌuntl tbanilxix, 34 ex o tzaj kꞌoꞌn tnabl tuꞌn t-xi tkꞌoꞌn xnakꞌtzbil cye mastl; ex mya oꞌcx te, ax icx te Aholiab aju tcyꞌajal Ahisamac ex tiyjil Dan. 35 O tzaj kꞌoꞌn nimxix cynabl cabe xjal lu, tuꞌn tbant cyximan tiꞌj tcyakil wik akꞌuntl ex tuꞌn cybinchante tcyakil wik akꞌuntl tbanilxix, tuꞌn cyxi chmet ke tilbilal cywitz xbalun ẍkꞌilun queꞌyin, xbalun ẍjulin queꞌyin, xbalun cyak queꞌyin ex tbanil xbalun lino, ex tuꞌn cycuꞌtz chmet ke xbalun tbanilxix binchben cye.