4 Bajtzun t-xpeꞌlin Moisés cabe tzꞌlom abj ic tzaꞌn keju e bant nej. Jaw weꞌ primxix tuj juntl kꞌij, jax twi witz Sinaí ic tzaꞌn otok tma Kman, ex xi tiꞌn ke cabe tzꞌlom abj cyuj tkꞌab. 5 Cuꞌtztzun Kman tuj muj ex atzun cub ten tucꞌil Moisés, ex tuꞌnx tzaj tmaꞌn tbi te Moisés. 6 Icꞌtzun Kman twitz Moisés, in tmaꞌntok cyjaꞌ:

—Akine Jehová, akine Jehová, akine Dios at nim tkꞌakꞌbil ncꞌuꞌje, akine nim in tzꞌeꞌy ncꞌuꞌje, yaj in tzaj ntxꞌuꞌjile, nim ncꞌujlalile, ex axix toc chin yoline. 7 At tkꞌakꞌbil ncꞌuꞌje cyiꞌj nimcu cyiyjil xjal, ex in cub nnajsaꞌne cyil keju in che binchan mya baꞌn, keju cycꞌiꞌ che niman, ex keju in che binchan il; pero in cub nkꞌoꞌne cycastiw keju in che binchan il, ex cpol canun castiw wuꞌne cyibaj ke cycꞌwaꞌl, ke tal cychman ex ke ttxca cychman tuꞌn tlaj cyil cyman, chi Kman.

8 Jurat naj cub ẍmejeꞌ Moisés tejxi tpon tacl tibaj twitz max twitz txꞌotxꞌ ex o cꞌulun te Kman, 9 ex xi tmaꞌn:

—Nman, ka baꞌn ma chin eꞌle tuj twitza, txiꞌya kucꞌile. Masque miban che bin ke xjal lu, pero najsan cuba kbinchbene mya baꞌn ex kile, ex ko tcꞌmoma te tetzbila, chi Moisés.

10 Tzajtzun tmaꞌn Kman cyjaꞌ: Bintza, jaꞌlo cyjel bant tiꞌj nyole cyucꞌil aj Israel. Che bantel binchben nim cyipumal wuꞌne cywitz, akeju naꞌnx cybant cyxol ke mastl nasyon tuj tcyakil twitz txꞌotxꞌ, ex cycyakil aj Israel akeju ateꞌ tucꞌila oc cyilaꞌ wakꞌunbene, porque xobajilxix aju cbantel cyiꞌj wuꞌne.

11 Japunx cyuꞌne aju yol ma txi nmaꞌne cyeye jaꞌlo. Cywitzxe che elex nlajoꞌne ke aj Amorrey, ke aj Canaán, ke aj Hetey, ke aj Ferezey, ke aj Hevey ex ke aj Jebusey.

12 Miꞌn bant tiꞌj jun cyyole cyucꞌil ke xjal najl tuj txꞌotxꞌ jatum che pole, tuꞌntzun miꞌn cyoc te jun tolsabl te cyeye. 13 Che bajel cykꞌuchine ke cy-altar, che bel cybuchine ke abj in che oc cykꞌoꞌn te xjan, ex cbel cytxꞌemine ke tzeꞌ cyoc te tilbilal xuꞌj dios Asera. 14 Miꞌn che cꞌulune cywitz junxitl dios, porque mintiꞌ in cub tuj nwitze tuꞌn cycꞌulune cywitz, ex at nwitze tiꞌj ju xjal in cꞌulun cywitz.

15 Tuꞌntzun jlu, miꞌn bant tiꞌj jun cyyole cyucꞌil ke xjal najl tuj txꞌotxꞌ ma chixin, porque oc cycꞌulun cywitz ke tilbilal ex oc t-xi cykꞌoꞌn chojbil cye, jaculo cheꞌx txcoꞌne cyuꞌn, ex jaculo che waꞌne cyiꞌj ke chojbil in cub cykꞌoꞌn cywitz cydios; 16 ex ka ma che jaw cymojbaꞌne cycyꞌajale cyucꞌil ke cymeꞌjel, ke kꞌapoj lu che xeꞌl cꞌulul cywitz cydios, ex jaculo cheꞌx lpeꞌ cycyꞌajale cyiꞌj cꞌulul cywitz cydios.

17 Miꞌn cub cybinchaꞌne jun cydiose tiꞌj cꞌuxbil in cub ulj tuj kꞌakꞌ.

18 Cbel cyicꞌsaꞌne aju ninkꞌij tiꞌj pan mintiꞌ t-samel tuj tuꞌn tjaw mal tcꞌuꞌj. Wuk kꞌij che waꞌle pan mintiꞌ t-samel tuj ic tzaꞌn o nmaye cyeye. Cbel cyicꞌsaꞌne tuj kꞌij banimaj tiꞌj tuj xjaw te Abib, tuꞌnju atzun xjaw lu e jeꞌtze tuj Ejipt.

19 Cycyakil ke tnejel cycyꞌajale, weye ke; ax icx ke tnejel cyal cywacẍe, ke tnejel cyal cyẍneꞌle ex ke tnejel cyal cychipe, ka tman weye ke. 20 Oc tcub tnejel tal jun bur, ka tman, ctzajel cykꞌoꞌne jun tal ẍneꞌl ex ka jun tal chip te t-xel. Katzun miꞌn ma tzaj cykꞌoꞌne, cjawiltzun cytokine tiꞌj tkul tuꞌn tcyim. Ax icx ctzajel cykꞌoꞌne pwak tuꞌn cyclet ke tnejel cycyꞌajale; ax icx miꞌn che ule nwitze ka mintiꞌ jun oyaj kꞌiꞌn cyuꞌne.

21 Kak kꞌij che akꞌnale, atzun tuj twukin kꞌij che ojlale. Ax icx tuj tkꞌijlalil oc tcuꞌx awat awal, ex tuj tkꞌijlalil oc tjaw chmet twitz awal il tiꞌj tuꞌn cyojlane tuj twukin kꞌij.

22 Ax icx cbel cyicꞌsaꞌne aju ninkꞌij oc cyjapun baj ke wuk seman, ex ka aju tkꞌijlalil tnejel twitz cyawale triw, ex cbel cyicꞌsane aju ninkꞌij oc tjaw cychmoꞌne twitz cyawale oc tjapun baj abkꞌi.

23 Ox maj tuj abkꞌi che ul cycyakil xinak aj Israel yecꞌulte cyib nwitze. Akine Cymane ex Cydiose. 24 Cywitzxe che elex nlajoꞌne ke nasyon ateꞌ tuj txꞌotxꞌ jatum che pole, ex cꞌelel nnimsaꞌne cytxꞌotxꞌe. Mi jun cꞌelel kꞌinte cytxꞌotxꞌe oc cyxiꞌye yecꞌulte cyibe nwitze ox maj tuj abkꞌi. Akine Cymane ex Cydiose.

25 Miꞌn tzaj cykꞌoꞌne pan at t-samel tuj tuꞌn tjaw mal tcꞌuꞌj junx tucꞌil tchcꞌel tal alumaj ctzajel cykꞌoꞌne te chojbil, ex miꞌn txi cycꞌuꞌne tuj juntl kꞌij aju cyjel ten tiꞌj chojbil in cub byet tuj Xjan Kꞌij.

26 Ctzajel cyiꞌne tuj njaye aju tnejel twitz cyawale tbanilxix, aju ctzajel tkꞌoꞌn cytxꞌotxꞌe. Akine Cymane ex Cydiose.

Miꞌn jax cytxcoꞌne tal chip tujx taꞌl tim ttxuꞌ, chi Kman.

27 Tzajtzun tmaꞌn Kman te Moisés cyjaꞌ: Tzꞌiban cuba ke yol lu, porque atzun tlocꞌ ju yol ma cyaj bant tiꞌj wuꞌne tucꞌila ex cyucꞌil aj Israel, chi Kman.

28 Tentzun Moisés tucꞌil Kman 40 kꞌij ex 40 konicꞌan. Mintiꞌ o waꞌn ex mintiꞌ o cꞌan. Cub ttzꞌiban cywitz ke tzꞌlom abj aju yol cyaj bant tiꞌj, akeju laj mandamyent. 29 Tej tcuꞌtz Moisés twi witz Sinaí, kꞌiꞌntok ke cabe tzꞌlom abj te ley tuꞌn tuj tkꞌab, ex mintiꞌ baꞌn tuꞌn in koptzꞌajtok twitz tuꞌnju otok yolin tucꞌil Kman. 30 O til Aarón ex cycyakil aj Israel in koptzꞌajtok twitz Moisés, ex tzajtzun cyxobil tuꞌn cypon lakꞌeꞌ ttxlaj. 31 E tzajtzun ttxcoꞌn Moisés; atzunte Aarón ex ke cytijil xjal e ajtz meltzꞌaj tucꞌil, ex o yolin Moisés cyucꞌil. 32 Te tibajxi e ul lakꞌeꞌ cycyakil aj Israel, ex xi tmaꞌn Moisés tcyakilju ley otok tzaj tmaꞌn Kman te twi witz Sinaí. 33 Tej tbaj yolin cyucꞌil, oc tmaksiꞌn twitz tuꞌn jun xbalun.

34 Oc tocxtok Moisés twitz Kman tuꞌn tyolin tucꞌil, nneꞌl tiꞌntok xbalun twitz, ex maxi nnoꞌc tkꞌoꞌn juntl maj ocxi tetz; ex oc tetz in xi tmaꞌntok cye aj Israel aju otok tzaj kꞌmaꞌn te. 35 Oc tilwaj Moisés cyuꞌn aj Israel in koptzꞌajtok twitz, nnoꞌc tmaksiꞌn twitz tuꞌn xbalun, maxi nneꞌl tiꞌn ocxi tocx juntl maj yolil tucꞌil Dios.