Tma Dios tuꞌn miꞌn cycꞌulun aj Israel cywitz tilbilal
7
Oc cypon kꞌiꞌne tuꞌn Kman tuj txꞌotxꞌ cꞌoquel te cyetzbile, ex oc cyex tlajoꞌn ke wuk nasyon mas maꞌ ex mas nim cyipun cywitze, ex ake jlu: Ke aj Hetey, ke aj Gergesey, ke aj Amorrey, ke aj Canaán, ke aj Ferezey, ke aj Hevey ex ke aj Jebusey, 2 ex oc cycub tzꞌak ke nasyon lu tuj cykꞌabe tuꞌn Kman Dios; oc tcub cyiꞌj cyuꞌne biꞌx che bajel naj cyuꞌne te jumajx, miꞌn bant tiꞌj jun cyyole cyucꞌil, ex miꞌn tzaj kꞌakꞌan cycꞌuꞌje cyiꞌj. 3 Miꞌn che mojeꞌye cyucꞌil; ex miꞌn txi cykꞌoꞌne cymeꞌjele tuꞌn toc te cyxuꞌjil cycyꞌajal, ax icx cyeye miꞌn tzaj cyiꞌne cymeꞌjel tuꞌn toc te cyxuꞌjil cycyꞌajale, 4 porque ka ma cybinchaye icju, cꞌelel cypaꞌn cyib ke cycꞌwaꞌle tiꞌj Kman cyuꞌn ke txin lu ex oc che cꞌulul cywitz junxitl dios; tuꞌn jlu ctzajel tkꞌoj Kman cyiꞌje, ex jurat che najele tuꞌn. 5 Aju cbantel cyuꞌne cyiꞌj ke xjal lu; cbajel cyxitune ke altar te cꞌulbil cywitz cydios, biꞌx che bajel cybuchine ke abj in che cꞌulun cywitz ex che bajel cytxꞌemine ke tzeꞌ in che cꞌulun cywitz, ex cbajel cypatune ke tilbilal. 6 Porque akeye jun nasyon paꞌmaj tuꞌn Kman Dios tuꞌn cyoque te tecuxix; oꞌcx akeye o che jaw t-scꞌoꞌn cyxol mastl nasyon tuj tcyakil twitz txꞌotxꞌ, tuꞌntzun cyoque te jun nasyon maꞌxix toclen te te.Aju cyoclen aj Israel ex aju tuꞌn tbant cyuꞌn
7 At tgan Kman cyiꞌje ex o che jaw scꞌoꞌne tuꞌn, pero mya tuꞌnju mas nim cybaje cywitz mastl nasyon, porque ax toc akeye mas nicꞌxi cybete cywitz mastl nasyon. 8 O che etz kꞌiꞌne tuꞌn Kman tucꞌil tipumal nimxix, ex o che tzokpete tuꞌn tjakꞌ tcawbil Faraón tuj Ejipt jatum ateꞌtoke te majen; nok tuꞌnju cꞌujlaꞌn keye tuꞌn ex tuꞌn tjapun aju yol tzaj ttziyan cye cyxeꞌchele. 9 Tzꞌelxtzun cynicꞌe tiꞌj jlu, ate Kman Dios jun Dios axix toc, in japun tyol ex cucx ctel tkꞌakꞌbil tcꞌuꞌj cyiꞌj nimcu cyiyjile che ul itzꞌj te tibajxi, akeju in che cꞌujlante te ex in che japun ke tmandamyent cyuꞌn; 10 atzun keju in che el icꞌunte te, in che naj tuꞌn. Atzun in baj cyiꞌj tuꞌn tlaj cybinchben mya baꞌn; mintiꞌ in cub tyoꞌn nim tyemp tuꞌn tcub tkꞌoꞌn cycastiw keju in che el icꞌunte te. 11 Cyjaꞌtzun, japunx cyuꞌne ke mandamyent, ke ley ex ke cawbil in cheꞌx nmaꞌne cyeye jaꞌlo.
Aju cyꞌiwbil cye keju niman tyol Dios cyuꞌn
12 Ka ma txi cybiꞌne cycyakil ke ley lu, ka ma txi cynimane ex ka ma che japun cyuꞌne, cucxtzun cjapunel tuꞌn Kman Dios aju yol tzaj ttziyan cye cyxeꞌchele, ex cucx ctel tkꞌakꞌbil tcꞌuꞌj cyiꞌje. 13 Oc che cꞌujlanjtzele tuꞌn, che bel cyꞌiwlaꞌne, cchmetel cybaje; che bel cyꞌiwlaꞌn ke cycꞌwaꞌle tucꞌix tcyakil twitz cyawale, cytriwoye, cycꞌaye taꞌl twitz uva, cychiꞌye aseyt, ke tal cywacẍe ex ke tal cyẍneꞌle, atzun tcyꞌiwbil Dios jlu oc cycꞌmaꞌye tuj txꞌotxꞌ tzaj ttziyan cye cyxeꞌchele tuꞌn ttzaj tkꞌoꞌn cyeye. 14 Mas che cyꞌiwlanjtzele cywitz mastl nasyon; mintiꞌ jun xuꞌj miban alin ctel cyxole, ex mi jun xinak miban cꞌwaꞌlin, ax icx cyxol ke cyalune. 15 Mlay takꞌ Kman ambil tuꞌn ttzaj yabil cyiꞌje ex ka txꞌuꞌj yabil, ic tzaꞌn o cyile tej ttzaj cyiꞌj aj Ejipt; nok oꞌcx cxel tkꞌoꞌn Dios yabil lu cyiꞌj cycyakil aj kꞌoj cyiꞌje. 16 Atzun cyeye, biꞌx che bajel naj cycyakil ke nasyon cyuꞌne, akeju che bel tzꞌak tuj cykꞌabe tuꞌn Kman Dios; miꞌn tzaj kꞌakꞌan cycꞌuꞌje cyiꞌj, ex miꞌn che cꞌulune cywitz cydios, porque ake jlu jun cꞌobil te cyeye.
17 Mya yajcu cub cyximane cyjaꞌ: Ke nasyon lu mas nim cybaj kwitz, ¿Tzaꞌn tten tuꞌn kxcyeꞌ cyiꞌj tuꞌn cyex klajoꞌn? Jacu che chiye. 18 Miꞌn che xobe cywitz; cynaꞌntze aju tbincha Kman Dios tiꞌj Faraón ex cyiꞌj cycyakil ke xjal ateꞌtok tuj Ejipt. 19 O cyile ke cꞌixbisabl tzaj cyiꞌj aj Ejipt, ex ke señ, ke binchben nim cyipumal, ex tzaꞌn tten e jeꞌtze tuj Ejipt tuꞌn Kman Dios tuꞌn tipumal nimxix. Icx cbantel tuꞌn Kman cyiꞌj cycyakil ke nasyon in che xobe cywitz. 20 Ax icx ctzajel t-smaꞌn Kman txkan ttxu sichal cyiꞌj, tuꞌntzun cycyim keju otok che cyaj ankꞌin, ex keju otok txi cyewan cyib cywitze. 21 Cyjaꞌtzun miꞌn che jaw luꞌlune cywitz ke jlu, porque at Kman Dios cyxole, aju Dios maꞌ toclen ex xobajilxix. 22 Chebaleꞌ che elex tlajoꞌn Kman ke nasyon lu, ex mya jurat che bel baj cyuꞌne, porque jaculo che chmet nim txcup te tjakꞌ cꞌul ex jaculo che oc tzokpaj cyiꞌje. 23 Che tzajel tkꞌoꞌn Kman Dios ke nasyon lu tuj cykꞌabe, ex biꞌx ctzajel baj cycꞌuꞌj tuꞌn, ocxi cybaj naj cycyakil. 24 Che tzajel tkꞌoꞌn ke cyrey tuj cykꞌabe, ex mlay tzaj naꞌntl cybi cyxol xjal twitz txꞌotxꞌ. Mi jun cxcyeꞌbil cyiꞌje tuj kꞌoj, ocxi cycub baj cycyakil cyuꞌne. 25 Cꞌoquex cypatune ke tilbilal cydios tuj kꞌakꞌ; miꞌn pon cycꞌuꞌje tiꞌj kꞌan pwak ex sak pwak toc cyiꞌj ex miꞌn tzꞌel cyiꞌne jun tiꞌxti cye tuꞌn toc te cyeye, tuꞌntzun miꞌn cycub tzꞌake tuj il tuꞌn jlu, porque icꞌun jlu tuꞌn Kman Dios. 26 Cyjaꞌtzun miꞌn tzꞌocx cykꞌoꞌne tuj cyjaye jun tiꞌxti in ajben cyiꞌj tilbilal, tuꞌntzun miꞌn ttzaj mya baꞌn cyibaje. Cykꞌoꞌnque tcyakil jlu te mya baꞌn, ex cyicꞌun ele, porque banimaj cyiꞌj tuꞌn Dios tuꞌn cynaj te jumajx.