7 Che tzajel tkꞌoꞌn Kman ke aj kꞌoj tuj cykꞌabe oc cyoc tzokpaj cyiꞌje. Tuj txolin cyten oc cyoc tzokpaj cyiꞌje, pero che elel ok cywitze ex biꞌx cbajel cysputun cyib.

8 Cbel tcyꞌiwlaꞌn Kman aju at tuj cytxꞌutxꞌe ex tcyakilju cbantel cyuꞌne, ex che ankꞌile tuꞌn tuj tzalajbil tuj txꞌotxꞌ ctzajel tkꞌoꞌn cyeye.

9 Ka ma che japun ke tmandamyent cyuꞌne ex ka ma che bete tuj tbe, cucxtzun che tele te jun cꞌloj xjal paꞌmaj te Kman Dios ic tzaꞌnx o tzaj ttziyan cyeye. 10 Cycyakiltzun tnam twitz txꞌotxꞌ oc cyilaꞌ ka cyiꞌje toc tbi Kman, ex che xobel cywitze. 11 Ctzajel tkꞌoꞌn Kman nim t-xtalbil cyeye, ctzajel tkꞌoꞌn nimxix cycꞌwaꞌle, nimxix cyal cyalune ex nimxix twitz cyawale tuj txꞌotxꞌ tzaj ttziyan cye cyxeꞌchele tuꞌn ttzaj tkꞌoꞌn cyeye. 12 Ctzajel tkꞌoꞌn Kman nim tkꞌinumabl cyeye aju at twitz cyaꞌj, ctzajel tkꞌoꞌn jbal twitz cyaꞌj tibaj cytxꞌotxꞌe tujxix tkꞌijlalil, tuꞌntzun tcyꞌiwlaꞌnjtz tcyakil cyakꞌunbene. Cxel cykꞌoꞌne cychꞌex elaꞌ nasyon, atzun cyeye mlay txi cykanine cychꞌexe cye. 13 Che oquel kꞌoꞌne te tnejel tuꞌn Kman, ex mya te mancbil; cucx che tele te maꞌ cyoclene cyxol mastl, ex mlay che oc kꞌoꞌne te chꞌin cyoclene ka ma txi cynimane ex ka ma che japun ke tmandamyent Kman Dios cyuꞌne, akeju in cheꞌx nmaꞌne cyeye jaꞌlo, 14 ka miꞌn ma tzꞌel cypaꞌn cyibe cyiꞌj, ex ka miꞌn ma cheꞌx lpeꞌye cyiꞌj junxitl dios tuꞌn cycꞌulune cywitz.

15 Katzun miꞌn ma txi cynimane Kman Dios, ex ka miꞌn ma che japun cycyakil ke tmandamyent ex ke tley cyuꞌne, akeju in cheꞌx nmaꞌne cyeye jaꞌlo, che tzajeltzun cycyakil ke mya baꞌn lu cyibaje: 16 Ctzajel mya baꞌn cyibaje tuj tnam ex tuj cojbil. 17 Ctzajel mya baꞌn tiꞌj tcyakil twitz cyawale tcuꞌx tuj cychiꞌle, ex tiꞌj arin tcuꞌx tuj choc jatum in cub xyokꞌit. 18 Ctzajel mya baꞌn cyibaj cycꞌwaꞌle, cyibaj twitz cyawale, cyibaj cyal cywacẍe ex cyal cyẍneꞌle. 19 Ctzajel mya baꞌn cyibaje oc cyxiꞌye tuj cybeye ex oc cyul meltzꞌaje.

20 Ctzajel t-samaꞌn Kman mya baꞌn cyibaje, cbajel ttzpet-saꞌn cynable ex ctzajel bis cyiꞌje tiꞌj tcyakilju cbantel cyuꞌne, ocxi cynaje tuꞌn jurat naj, tuꞌn tlaj cybinchbene mya baꞌn ex tuꞌnju otok cyaj cycoline. 21 Ctzajel t-samaꞌn Kman jun txꞌuꞌj yabil cyibaje tuj txꞌotxꞌ che najale tuj, ocxi cybaj naje tuꞌn. 22 Ax icx ctzajel t-samaꞌn yabil cheba in che naj xjal tuꞌn, tucꞌix cyak ex mal; ctzkijel txꞌotxꞌ tuꞌnju miꞌn tzaj jbal, ex ctzajel soj ex mastl yabil cyiꞌj awal. Cucx che tzajel ke jlu cyibaje ocxi cybaj naje. 23 Mlay tzajtl jbal twitz cyaꞌj cyibaje, ex aju txꞌotxꞌ ccyuwixtel ic tzaꞌn cꞌuxbil. 24 Ctzajel tkꞌoꞌn Kman kuk tucꞌix tzaꞌj cyibaje te t-xel jbal, ocxi cynaje. 25 Tuꞌn Kman cbel cyiꞌje cyuꞌn aj kꞌoj. Tuj txolin cytene oc cyoc tzokpaje cyiꞌj, pero che elel oke cywitz, biꞌx cbajel cysputun cyibe, ex cycyakil ke cawbil twitz txꞌotxꞌ che jawil labin cyiꞌje. 26 Ke txcup in che lipan twitz cyaꞌj ex ke txcup te tjakꞌ cꞌul che chyoꞌl tiꞌj cyximlale ex mi aꞌl jun cxel secꞌpunte cye.

27 Che cꞌixbisetele tuꞌn txꞌaꞌc tuꞌn Kman, ic tzaꞌn e tenba aj Ejipt, che jawil cyakcꞌu ex cykach txꞌaꞌc cyiꞌje, tucꞌix sal. Mlay che kꞌananjtz ke yabil lu cyuꞌne. 28 Ax icx che oquele te loc tuꞌn, che oquele te moẍ, cbajel tzpet cynable tuꞌn, 29 ex xmacan che betele kꞌijtl ic tzaꞌn moẍ in bet tuj klolj. Mi jun tiꞌxti oc cybinchaye baꞌn cꞌelel. Cucx che bajel yajlaꞌne, cucx cꞌelel kꞌiꞌn aju at cyeye, ex mi aꞌl jun ctzajel onil cyeye. 30 Cbantel tiꞌj tuꞌn cymojeꞌye tucꞌil jun xuꞌj, pero junxitl xinak cbel tan tucꞌil; cjawil cybinchaꞌne cyjaye, pero mlay che najane tuj; cbelex cyawaꞌne tkan uva, pero mlay che loꞌne tiꞌj twitz. 31 Cywitzxe cbel byoꞌn cywacẍe, pero mlay che chyoꞌne tiꞌj tchibjal; cywitzxe cꞌelel kꞌiꞌn cyburre, ex mlay tzꞌajtz kꞌoꞌntl; che xeꞌl kꞌiꞌn cyẍneꞌle cyuꞌn aj kꞌoj cyiꞌje, ex mi aꞌl jun c-onil cyiꞌje tuꞌn cyel kꞌit tuj cykꞌab. 32 Cywitzxe che xel kꞌoꞌn ke cycyꞌajale ex cymeꞌjele cye stranjer xjal, cucx che queꞌyile cyiꞌj tuꞌn cyul juntl maj, che sictel ke tbakꞌ cywitze ex mintiꞌ jacu bant cyuꞌne cyiꞌj. 33 Ke xjal mintiꞌ ojtzkin cywitz cyuꞌne che waꞌl tiꞌj twitz cyawale tzul tkꞌoꞌn txꞌotxꞌ ex tiꞌj tcyakilju cyakꞌunbene; cucx che bajel yajlaꞌne cyuꞌn, ex cycyakil kꞌij cꞌoquel cybinchaꞌn mya baꞌn cyiꞌje. 34 Octzun tcyile tcyakil jlu, che oquele te loc tuꞌn. 35 Che cꞌixbisetele tuꞌn Kman tuꞌn txꞌaꞌc plojxix cjawil jlet twi cychꞌeque, tiꞌj cycuxe ex tiꞌj tcyakil cyximlale, ex mlay che banixe.

36 Che elex lajoꞌne tuꞌn Kman tucꞌix cyreye; che pol kꞌoꞌne tuj txꞌotxꞌ mintiꞌ ojtzkiꞌn cyuꞌne mi cyuꞌn cymane. Atzun che ajbele cye junxitl dios, akeju binchamaj tiꞌj tzeꞌ ex tiꞌj abj. 37 Che jawil labin xjal cyiꞌje, che oquele te cyxmaybil, ex che tzeꞌl cyiꞌje cyuj cycyakil tnam jatum che pol lajoꞌne tuꞌn Kman. 38 Cbelex cyawaꞌne nim iyaj, pero nicꞌxi twitz cjawil cychmoꞌne, porque cbajel cywaꞌn ẍplon. 39 Cbelex cyawaꞌne tkan uva ex cꞌoquel cycwentine, pero mlay jaw cychmoꞌne twitz, ex mlay che cꞌane tiꞌj taꞌl twitz, porque cnajel tcyakil cyuꞌn ẍukꞌ. 40 Ctel tkan olivo tuj tcyakil cytxꞌotxꞌe, pero mlay tzꞌoc cykꞌoꞌne aseyt cyiꞌje, aju nneꞌl tiꞌj twitz olivo, porque cyajx ke cywitz che tzajel tzꞌak naꞌnxtok tpon cykꞌij. 41 Che ul itzꞌj cycyꞌajale ex cymeꞌjele, pero mlay che ten cyucꞌile, porque che xel kꞌiꞌn pres cyuj txkantl tnam. 42 Che najel cycyakil tzeꞌ cyuꞌn ẍplon, tucꞌix tcyakil twitz awal ctzajel tuj cytxꞌotxꞌe. 43 Ake stranjer xjal najl tuj cytxꞌotxꞌe cꞌoquel mas cyoclen, atzun cyeye nok cyjaꞌ cꞌelel cyoclene. 44 Ctzajel cykꞌoꞌn cychꞌexe, atzun cyeye mintiꞌ cypwake ctel tuꞌn t-xi cykꞌoꞌne te cychꞌex. Che oquel te tnejel, atzun cyeye che oquele te mancbil.

45 Tcyakil mya baꞌn lu ctzajel cyibaje nok jatum che tele, ocxi cycub baje, porque mintiꞌ otok txi cynimane Kman Dios ex mintiꞌ otok che japun ke tmandamyent ex ke tley cyuꞌne, akeju o tzaj tmaꞌn cyeye. 46 Akeju mya baꞌn lu che ajbel te jumajx te jun yecꞌbil maꞌxix t-xilen ex xobajilxix te cyeye ex cye cyiyjile. 47 Tuꞌnju mintiꞌ otok che cꞌulune twitz Kman Dios tucꞌil tzalajbil ex axix toc tuꞌn tcyakil cyanmi oc ttzaj tkꞌoꞌn nimcu cykꞌinumable, 48 cyjaꞌtzun che ajbele cye aj kꞌoj cyiꞌje, akeju che tzajel t-samaꞌn Kman. Cꞌicꞌex nim weꞌyaj cyuꞌne ex nim txketleꞌn, mintiꞌ cyxbalune ctel ex tuj mebayil che tele. Che oquel kꞌoꞌne te cymajen xjal tuꞌn Kman, tuꞌntzun ticꞌx nimcu cyuꞌne ocxi cynaje. 49 Max ttxaꞌnpun txꞌotxꞌ najchak wen ctzajel tiꞌn Kman jun nasyon cyiꞌje, ic lipan ic tzaꞌn tꞌiw, ex mlay tzꞌel cynicꞌe tiꞌj tyol. 50 Ke xjal lu puro txꞌuꞌj cywitz, mlay che niman cye tij xjal ex mlay tzaj tzꞌeꞌy cycꞌuꞌj cyiꞌj cꞌwaꞌl. 51 Che xel cychyoꞌn cyal cywacẍe ex cxel cywaꞌn twitz cyawale ctzajel tuj cytxꞌotxꞌe, ocxi cynaje cyuꞌn; mlay cyaj cykꞌoꞌn cytriwoye mi cycꞌaye taꞌl twitz uva, mi cychiꞌye aseyt, mi cyal cywacẍe ex mi cyal cyẍneꞌle, ocxi cynaje cyuꞌn.

52 Cbajel cytxolban cyib cyiꞌj cycyakil cytanmiye, ex che oquel tzokpaj cyiꞌj, ocxi cycub cyxitun ke muro maꞌ cywaꞌl, akeju otok tzꞌoc keꞌ cycꞌuꞌje cyiꞌj. Cbajel cytxolban cyib cyiꞌjele, ex che oquel tzokpaj cyiꞌj cycyakil tnam ateꞌ tuj txꞌotxꞌ ctzajel kꞌoꞌn cyeye tuꞌn Kman Dios. 53 Oc tbaj cytxolban cyib ke aj kꞌoj cyiꞌjele cytanmiye, ctzajel baj cycꞌuꞌje, ctzajel nimxix weꞌyaj cyiꞌje, ex axpe cycyꞌajale ex cymeꞌjele cxel cychyoꞌne, akeju otok che tzaj kꞌoꞌn cyeye tuꞌn Kman Dios. 54 Icxpeju xinak at cyxole, aju mas baꞌn tmod ex cheꞌw tcꞌuꞌj, mlay tzaj kꞌakꞌan tcꞌuꞌj tiꞌj terman mi tiꞌj t-xuꞌjil aju cꞌujlaꞌnxix tuꞌn, ex mi cyiꞌj tcꞌwaꞌl akeju ateꞌx, 55 ex mlay cub t-sipan cyxol aju tchibjal tcꞌwaꞌl in xi tchyoꞌn, porque misicyer jun tiꞌxti at tuꞌn t-xi twaꞌn oc cyoc tzokpaj ke aj kꞌoj cyiꞌje, ex oc cybaj yajlaꞌne nimxix cyuj cycyakil cytanmiye. 56 Icxpeju xuꞌj at cyxole, aju mas baꞌn tmod ex cheꞌw tcꞌuꞌj, aju mintiꞌtok in cub aj tkan twitz txꞌotxꞌ ka mintiꞌ t-xajab toc, mlay txi tkꞌoꞌn chꞌin tchiꞌ te tchmil aju cꞌujlaꞌnxix tuꞌn, ex mi cye tal; 57 oc tul itzꞌj jun tal, tuj ewaj cxel tchyoꞌn tucꞌix tmuj, ex miꞌn cub t-sipan cyxol keju ateꞌ tuj tja; porque misicyer jun tiꞌxti at tuꞌn t-xi twaꞌn oc cyoc tzokpaj ke aj kꞌoj cyiꞌj ke cytanmiye.

58 Ka miꞌn ma che japun ke ley cyuꞌne, aju tzꞌiban tuj uꞌj lu, ex ka miꞌn ma che xobe twitz biybaj tbanilxix ex xobajilxix, aju tbi Kman Dios, 59 che tzajeltzun t-samaꞌn Kman cꞌixbisabl maꞌxix ex xobajilxix cyibaje ex cyibaj ke cyiyjile che ul itzꞌj te tibajxi, ex che tzajel t-samaꞌn ke yabil plojxix cyiꞌje, akeju mintiꞌ kꞌanbil cyiꞌj. 60 Ctzajel tkꞌoꞌn cycyakil cꞌixbisabl cyibaje, akeju e tzaj tuj Ejipt, akeju tzaj nimxix t-xobil cyiꞌje cyuꞌn, ex cucx che cꞌixbisetele cyuꞌn. 61 Mya oꞌcx jlu, ax icx che tzajel t-samaꞌn Kman txkantl yabil ex cꞌixbisabl cyibaje, akeju mya tzꞌiban tuj uꞌj te ley lu, ocxi cycub baje cyuꞌn. 62 Masque otok chmet nim cybaje ic tzaꞌn ke cheꞌw twitz cyaꞌj, pero nicꞌxi cybaje cyjel ten, tuꞌnju mintiꞌ otok txi cynimane Kman Dios. 63 Ic tzaꞌnx o tzalaj Kman cyiꞌje tuꞌn tbinchante baꞌn cyeye ex tuꞌn tchmet cybaje, ax icxtzun ctzalajel oc cynaje tuꞌn; che elex kꞌiꞌne tuꞌn tuj txꞌotxꞌ jatum che pole tuꞌn cyoque te tajwil. 64 Che bajel sputune tuꞌn Kman cyuj cycyakil nasyon max ttxaꞌnpun txꞌotxꞌ. Atzun che cꞌulule cywitz junxitl dios, akeju tzeꞌ ex abj cytxꞌotxꞌil, akeju mintiꞌ ojtzkiꞌn cyuꞌne ex mi cyuꞌn ke cyxeꞌchele. 65 Octzun cytene cyuj ke nasyon lu, mlay che tene tuj txubtxaj ex mlay che ojlane. Tuꞌn Kman che ankꞌile tucꞌil cyxobile, bis ctel cywitze, ex ctzajel baj cycꞌuꞌje. 66 Tuj xobajil che ankꞌile, che xobtele kꞌijtl ex konicꞌan ex mlayx che tene tuj segur. 67 Te prim oc cymaꞌye: Nokwit baꞌn toc kax naj, ex te konicꞌan oc cymaꞌye: Nokwit baꞌn tcub naj kꞌij, tuꞌnju nimxix t-xobil ctzajel cyiꞌje, ex tuꞌnju tiꞌchak cꞌoquel cyqueꞌyine. 68 Masque o tma Kman cyeye tuꞌn miꞌn cyaj meltzꞌaje tuj tbeyil Ejipt, che ajel meltzꞌaje tuꞌn juntl maj tuj Ejipt cyuj barc. Atzun cxel cycꞌayin cyibe tuꞌn cyoque te majen cye aj kꞌoj cyiꞌje, pero mi jun cxel lakꞌonte cyeye.