3 Ka ma che oc lpeꞌye cyiꞌj ke nleye, ka ma cheꞌx cynimane ke nmandamyente ex ka ma che japun cyuꞌne, 4 ctzajel nsamaꞌne jbal cyibaje tujxix tkꞌijlalil, tuꞌntzun ttzaj tkꞌoꞌn txꞌotxꞌ twitz cyawale ex ke tzeꞌ tuj cojbil ctzajel cykꞌoꞌn cywitz. 5 Oc tel baj cybajuꞌne triw, ya otok tzul tkꞌijlalil tuꞌn tjaw chmet twitz uva, ex oc tjaw baj cychmoꞌne twitz uva, ya otok tzul tkꞌijlalil tuꞌn toc awat awal. Che waꞌle ocxi tnoj cycꞌuꞌje, ex tuj txubtxaj che ankꞌile tuj cytanmiye. 6 Tuj txubtxaj che tele tuj cytanmiye ex mi aꞌl jun cꞌoquel secꞌpunte cyeye oc cytane; che elex nlajoꞌne ke txcup mya baꞌn ateꞌ tuj cytxꞌotxꞌe ex mlay txi nkꞌoꞌne ambil cye xjal tuꞌn cytzaj kꞌojlel cyiꞌje. 7 Che elel ok aj kꞌoj cyiꞌje ex che bel cybyoꞌne tuꞌn spad; 8 tuꞌn jweꞌ cyeye cybaj che elel ok jun syent aj kꞌoj, ex tuꞌn jun syent cyeye cybaj che elel ok laj mil aj kꞌoj; tuꞌn spad che najel cyuꞌne ke aj kꞌoj cyiꞌje. 9 Tuꞌn tzalajbil che tzajel nqueꞌyine ex cchmetel nim cybaje wuꞌne, ex ccyuwsetel nyole cyucꞌile, aju o txi ntziyane cyeye. 10 Nim kꞌij che waꞌle tiꞌj triw otok baj cꞌuꞌt tuj abkꞌi otok baj, ex aju csobryil cꞌelex cyiꞌne tuꞌntzun tocx cꞌuꞌt acꞌaj triw.

11 Chin najale cyxole ex mlay che el wicꞌune. 12 Ax chin betele cyxole ex akine chin oquele te Cydiose, atzun cyeye che oquele te jun tnam etzan wuꞌne. 13 Akine Cymane ex Cydiose aju etz kꞌinte cyeye tuj Ejipt tuꞌntzun miꞌn cytentle te cymajen, cub ntokine yuw tcub cyibaje, ex o nbinchaye tuꞌn cybete mintiꞌ cyxobile.

14 Katzun mintiꞌ ma chinx cynimane ex ka mintiꞌ ma che japun cycyakil ke nmandamyente lu cyuꞌne, 15 ka ma che el cyicꞌune ke nleye ex ka ma tzꞌoc cykꞌoꞌne ke nxnakꞌtzbile te mintiꞌ cyajben ex ka mintiꞌ ma che japun cyuꞌne, ex ka mintiꞌ ma japun cyuꞌne aju o cyaj bant tiꞌj wuꞌne cyucꞌile, 16 ax icxtzun weye oc nbinchaꞌye ke jlu cyiꞌje: Ctzajel nsamaꞌne xobtzabl cyibaje cyucꞌix ke yabil cheba in che naj xjal cyuꞌn, tucꞌix nim cyak ctzajel cyiꞌje, che belex julix tbakꞌ cywitze ex cbajel tipun cyximlal. Nok gan che awale, porque ake aj kꞌoj cyiꞌje che waꞌl tiꞌj twitz cyawale. 17 Ctzajel nkꞌoje cyiꞌje ex cbel cyiꞌje cyuꞌn ke aj kꞌoj cyiꞌje; akeju in che icꞌun cyeye che cawil cyibaje, ex akeye che elel oke masque mi aꞌl lepchix t-xiꞌ cyiꞌje.

18 Katzun mintiꞌx ma chinx cynimane, cytzajlenxi ke jlu cyibaje, cbeltzun nkꞌoꞌntle wuk maj cycastiwoye tuꞌn tlaj cyile. 19 Cnajel wuꞌne aju cynimbil cyibe; oc nbinchaꞌye tuꞌn miꞌn ttzaj jbal twitz cyaꞌj, ex tuꞌn miꞌn ttzaj tkꞌoꞌn txꞌotxꞌ cyawale. 20 Nokx gan cbajel cynajsaꞌn cyipune, porque mlay tzaj tkꞌoꞌn txꞌotxꞌ twitz cyawale ex mi ke tzeꞌ mlay tzaj cykꞌoꞌn cywitz.

21 Ka cucx ma jaw cyiꞌn cyibe wiꞌje ex ka mintiꞌ ma chinx cynimane, cbel nkꞌoꞌntle wuk maj cycastiwoye ic tzaꞌnx cyile. 22 Che tzajel nsamaꞌne ke txcup te tjakꞌ cꞌul cyiꞌje, che xel kꞌiꞌn cycꞌwaꞌle cyuꞌn, che najel cyalune cyuꞌn, ex nicꞌxi cybaje cyjel cykꞌoꞌn tuꞌntzun mi jun tuꞌn tbet tuj be.

23 Katzun mintiꞌx ma txi cybinchaꞌn cytene tuꞌn tcyakil jlu, ex ka cucx ma jaw cyiꞌn cyibe wiꞌje, 24 ax icx weye cjawil wiꞌn wibe cyiꞌje ex cbel nkꞌoꞌntle wuk maj cycastiwoye tuꞌn tlaj cyile. 25 Che xel nsamaꞌne ke xjal kꞌojlel cyiꞌje tuꞌn t-xelin cyiꞌje, tuꞌnju mintiꞌ ma japun cyuꞌne aju yol otok cyaj bant tiꞌj wuꞌne cyucꞌile. Oc toc cychmon cyibe cyuj cytanmiye, cxel nsamaꞌne yabil cyibaje ex che bel tzꞌake tuj cykꞌab ke aj kꞌoj cyiꞌje.

26 Oc tel wiꞌne cywaye; cabalx jun jorni tuꞌn ttzkꞌaj cywa laj ja xjal tuj, maloꞌn cxeꞌl cywaye ex mlay noj cycꞌuꞌje tuꞌn.

27 Ka miꞌn ma chinx cynimane ttzajlenxi jlu cyiꞌje, ex ka cucx ma jaw cyiꞌn cyibe wiꞌje, 28 ax icx weye cjawil wiꞌn wibe cyiꞌje, ex tucꞌil nkꞌoje cbel nkꞌoꞌntle wuk maj cycastiwoye tuꞌn tlaj cyile. 29 Cxeltzun cychyoꞌne cycꞌwaꞌle, ke kꞌa ex ke txin. 30 Che bel nxitune ke lugar jatum in che cꞌulune cywiꞌ ke witz ex che bel npaꞌne ke cy-altare te patbil storac; che bel npalbaꞌne cyximlale, ya cyimnike, cyibaj ke tilbilal mya itzꞌ, akeju cꞌoquel cydiosine, ex che elel wicꞌune; 31 cnajel cytanmiye wuꞌne, che bel nxitune cyja cydiose, ex mlay chin tzalaje tiꞌj tcꞌocꞌjal chojbil ctzajel cykꞌoꞌntle weye.

32 Cnajel txꞌotxꞌ wuꞌne ex oc cyul aj kꞌoj cyiꞌje najal tuj, che jawil labin tiꞌj. 33 Atzun cyeye che bajel nsputune cyuj ke nasyon ex chin oquel lpeꞌye cyiꞌje tuꞌn cycub nbyoꞌne tuꞌn spad; cꞌoquel cytxꞌotxꞌe te tzkij wuꞌne, che najel cytanmi wuꞌne ex nok cytxꞌakan che cyjel ten. 34 Cꞌojlaltzun txꞌotxꞌ tuj tcyakil tyemp oc mintiꞌ awal cꞌoquel tuj acux ateꞌye tuj cytxꞌotxꞌ aj kꞌoj cyiꞌje; maxitzun cꞌojlal txꞌotxꞌ te t-xel mintiꞌtok in ojlan nej. 35 Tuj tcyakil tyemp oc miꞌn tzꞌoc awal tuj, cꞌojlal txꞌotxꞌ te cyxel ke kꞌij te ojlabl, aju mintiꞌ xi cykꞌoꞌne tej najl keye tuj.

36 Atzun keju che cyjel ankꞌin, ctzajel nimxix t-xobil cyiꞌj wuꞌne tuj cytxꞌotxꞌ aj kꞌoj cyiꞌj, ex nok tuꞌn tkꞌajkꞌajel jun t-xak tzeꞌ ctzajel tzꞌak che elel ok; che elel ok mer ic tzaꞌn lajoꞌn ke tuꞌn jun xjal kꞌiꞌn spad tuꞌn, ex che bel tzꞌak masque mi aꞌl jun lajol cye; 37 che jawil tolj jun tiꞌj juntl, mer ic tzaꞌn in che el ok tuj kꞌoj, masque mi aꞌl lajol cye. Mi aꞌl jun cye jacu cub weꞌ twitz aj kꞌoj tiꞌj. 38 Che najel cyuj ke nasyon, che bel baj cyuꞌn aj kꞌoj cyiꞌj tujx cytanmi, 39 ex akeju che cyjel ankꞌin tuj cytxꞌotxꞌ aj kꞌoj cyiꞌje, che najel tuꞌn tlaj cybinchben mya baꞌn ex junx cyucꞌil cyman che najel tuꞌn tlaj cybinchben mya baꞌn.

40 Katzun ma jatz cypaꞌn cyil ex ka ma jatz cypaꞌn cyil cyman tuꞌnju mintiꞌ otok japun nyole cyuꞌn ex tuꞌnju otok jaw cyiꞌn cyib wiꞌje, 41 (ex icx weye otok jaw wiꞌn wibe cyiꞌj ex otok cheꞌx wiꞌne tuj cytxꞌotxꞌ aj kꞌoj cyiꞌj); katzun ma cub cymansin cyanmi mya baꞌn, ex ka ma tzꞌel cynicꞌ tiꞌj cyil, 42 ctzajeltzun nnaꞌne aju yol cyaj bant tiꞌj wuꞌne tucꞌil Jacob, tucꞌil Isaac ex tucꞌil Abraham, ax icx ctzajel nnaꞌne cytxꞌotxꞌ. 43 Otok cyaj cycolin cytxꞌotxꞌ ex otok ojlan txꞌotxꞌ te cyxel ke kꞌij te ojlabl, acux mya najlke twitz; atzun cye, cxel cychjoꞌn cybinchben mya baꞌn, porque otok tzꞌel cyicꞌun ke nxnakꞌtzbile ex ke nleye.

44 Masque icju, oc cyten tuj cytxꞌotxꞌ aj kꞌoj cyiꞌj, mlay che el wicꞌune ex mlay tzaj nloꞌche cyiꞌj tuꞌn cybaj naj cycyakil, ex mlay tzꞌajtz jolpaj tiꞌj yol cyaj bant tiꞌj wuꞌne cyucꞌil cyxeꞌchel, porque akine Cyman ex Cydios. 45 Nok oꞌcx ctzajel nnaꞌne aju yol cyaj bant tiꞌj wuꞌne cyucꞌil cyxeꞌchel tej cyetz wiꞌne tuj Ejipt cywitz ke nasyon tuꞌn woque te Cydios. Akine Cyman, chi Dios te Moisés.

46 Atzun ke ley lu, cyucꞌix ke mandamyent ex ke xnakꞌtzbil tzaj tkꞌoꞌn Kman te Moisés twi witz Sinaí, tuꞌn t-xi tmaꞌn cye aj Israel.