Tzaꞌn tten tuꞌn cyxjanset ke xjal ex ke tiꞌxti te Dios
27
Tzaj yolin Kman tucꞌil Moisés ex tma: 2 Kꞌmanxa jlu cye aj Israel: Ka at jun xjal ma txi ttziyan tuꞌn ttzaj tkꞌoꞌn juntl xjal te weye, ex ka te tibajxi miꞌn japun tuꞌn, il tiꞌj tuꞌn ttzaj tchjoꞌn colpibl te xjal ex atzun jlu cxel tchjoꞌn: 3 Tiꞌj jun xinak te winkin abkꞌi asta 60, cꞌelel tiꞌna 50 sak pwak te colpibl te, ic tzaꞌnx pwak in ajben tuj tja Dios; 4 katzun xuꞌj, 30 sak pwak cꞌelel tiꞌna te colpibl te. 5 Atzun cyiꞌj ke xjal ma te jweꞌ abkꞌi asta winkin, winkin sak pwak cꞌelel tiꞌna tiꞌj jun xinak ex laj sak pwak tiꞌj xuꞌj, te colpibl te. 6 Atzun cye tal cꞌwaꞌl ma te jun xjaw asta jweꞌ abkꞌi, cꞌelel tiꞌna jweꞌ sak pwak te colpibl te jun tal kꞌa ex ox sak pwak tiꞌj jun tal txin. 7 Atzun cyiꞌj ke xjal mas te 60 abkꞌi, cꞌelel tiꞌna olaj sak pwak tiꞌj jun xinak ex laj sak pwak tiꞌj jun xuꞌj. 8 Katzun meba te xjal aju otok txi ttziyan, ex ka mlay chjet tuꞌn aju chojbil banin tiꞌj, che xeltzun kꞌit ke jlu twitz pal tuꞌn tcub tkꞌoꞌn jun acꞌaj chojbil, nok jteꞌ jacu chjet tuꞌn xjal otok txi tziyante yol.9 Ex katzun alumaj ctzajel cykꞌoꞌn weye, akeju baꞌn ttzaj cykꞌoꞌn te chojbil, cycyakil alumaj che tzajel kꞌoꞌn weye biꞌx che xjansetel, 10 ex mlay baj chꞌexpet tucꞌil juntl alumaj; miꞌn tzaj cykꞌoꞌn jun baꞌn te t-xel jun ploj, mi jun ploj te t-xel jun baꞌn; katzun ma baj cychꞌexpuꞌn, cycabil alumaj che xjansetel.
11 Katzun alumaj tzꞌil, aju mlay tzaj cykꞌoꞌn te chojbil weye, cxel kꞌit ju alumaj lu tucꞌil pal 12 tuꞌntzun ttzaj tmaꞌn jteꞌ twiꞌ, ka baꞌn alumaj ex ka mya baꞌn. Aju ctzajel tmaꞌn pal, atzun twiꞌju. 13 Ka taj tuꞌn tcyaj tcoꞌpin alumaj, baꞌn tuꞌn t-xi tchjoꞌn twiꞌ ic tzaꞌnx banimaj tiꞌj, ex il tiꞌj cxel tkꞌoꞌn tjweꞌyin tibaj.
14 Ka at jun ma txi ttziyan tuꞌn ttzaj tkꞌoꞌn tja tuꞌn t-xjanset te weye, ate pal ckꞌmalte jteꞌ twiꞌ, ic tzaꞌnx binchben te, ex aju ctzajel tmaꞌn pal, atzun twiꞌju. 15 Katzun taj xjal tuꞌn tcyaj tcoꞌpin tja, baꞌntzun tuꞌn t-xi tchjoꞌn twiꞌ ic tzaꞌnx banimaj tiꞌj, ex il tiꞌj cxel tkꞌoꞌn tjweꞌyin tibaj, ex aju ja cꞌoquel juntl maj te te.
16 Ka at jun ma txi ttziyan tuꞌn ttzaj tkꞌoꞌn jun piẍ ttxꞌotxꞌ tuꞌn t-xjanset te weye, cxel tantyarit twi txꞌotxꞌ según nicꞌpun iyaj in xi tiꞌn txꞌotxꞌ, 50 sak pwak twiꞌ jun piẍ txꞌotxꞌ nok jatum in pon baj cabe quintal iyaj sebad oc tcuꞌx awat. 17 Ka ma xjansanjtz txꞌotxꞌ te weye tuj abkꞌi te tzokpibl, cucx ctel twiꞌ ic tzaꞌn otok bant tiꞌj; 18 pero ka ma xjansanjtz tbajlenxi abkꞌi te tzokpibl, cxeltzun ttantyarin pal aju sak pwak at tuꞌn t-xi kꞌot, ex tuꞌn tel kꞌit chꞌintl twiꞌ, según jteꞌ abkꞌi atx taj tuꞌn tcanun abkꞌi te tzokpibl.
19 Ka taj xjal tuꞌn tcyaj tcoꞌpin ttxꞌotxꞌ, baꞌn tuꞌn t-xi tchjoꞌn twiꞌ ic tzaꞌnx banimaj tiꞌj, ex il tiꞌj cxel tkꞌoꞌn tjweꞌyin tibaj, ex cꞌoqueltzun txꞌotxꞌ juntl maj te te. 20 Katzun mi ma cyaj tcoꞌpin xjal ttxꞌotxꞌ, ex ka ma txi cꞌayit te juntl, ya mlay bant tuꞌn tcyaj tcoꞌpin. 21 Octzun ttzokpet txꞌotxꞌ tuj abkꞌi te tzokpibl, axtzun cyjel ten txꞌotxꞌ xjansamaj tuꞌn tajben te weye, te cyetzbil pal cꞌoquel.
22 Ka at jun xjal ma txi ttziyan tuꞌn ttzaj tkꞌoꞌn jun piẍ txꞌotxꞌ tuꞌn t-xjanset te weye, ex lakꞌoꞌn otok tzꞌel txꞌotxꞌ tuꞌn, mya tiꞌj tetzbil, 23 ate pal, tucꞌix xjal, cxel cytantyarin twi txꞌotxꞌ ocxi tul canun abkꞌi te tzokpibl, atzunte xjal tujx kꞌij lu cxel tchjoꞌn twi txꞌotxꞌ ic tzaꞌnx otok bant tiꞌj, ex cxjanseteltzun te weye. 24 Tuj abkꞌi te tzokpibl cꞌoquel txꞌotxꞌ juntl maj teju cꞌayil, aju mer tajwilxix.
25 Tcyakil aju twiꞌ cxel ttantyarina, cxel ttantyarina ic tzaꞌnx pwak in ajben tuj tja Dios. Aju sak pwak chꞌixmi mey ons talil.
26 Atzun nej cyal alumaj weye ke tuꞌnju a nej cyal, ex mlay bant tuꞌn tbaj cyxjansaꞌne juntl maj. Ka jun tal tor ex ka jun tal tman ẍneꞌl, weye ke. 27 Katzun jun alumaj tzꞌil, baꞌn tuꞌn tcyaj coꞌpit ic tzaꞌnx twiꞌ otok tzꞌoc kꞌoꞌn ex il tiꞌj tuꞌn t-xi kꞌot tjweꞌyin tibaj. Katzun miꞌn ma cyaj coꞌpin, cxel cꞌayit ic tzaꞌnx twiꞌ otok bant tiꞌj.
28 Ka at jun xjal ma txi ttziyan tuꞌn ttzaj tkꞌoꞌn te jumajx nok alcyexcu at tucꞌil tuꞌn t-xjanset te weye, ka jun xjal, ka jun alumaj ex ka txꞌotxꞌ aju otok cyaj kꞌoꞌn te tetzbil, mlay bant tuꞌn t-xi cꞌayit ex mi tuꞌn tcyaj coꞌpit, cycyakil ke jlu che oquel te xjanxix ex weye ke. 29 Ax icx mlay tzꞌetz tcoꞌpin xjal juntl xjal ka otok bant tiꞌj tuꞌn tcyim; ilxix tiꞌj tuꞌn tcyim.
30 Aju tlajiꞌn tiꞌj cywitz awal in tzaj tuj txꞌotxꞌ, ka triw ex ka twitz tzeꞌ baꞌn tlonjtz twitz, weye ke jlu ex xjansamaj te weye. 31 Ka at jun xjal taj tuꞌn tcyaj tcoꞌpin aju tlajiꞌn, il tiꞌj tuꞌn t-xi tchjoꞌn twiꞌ, tucꞌix tjweꞌyin tibaj.
32 Ctzajel kꞌot te weye junjun tiꞌj lajchak alumaj, ka wacẍ ex ka ẍneꞌl, atzun tlajiꞌn jlu, 33 ex miꞌn jaw cyscꞌoꞌn aju mas baꞌn ex mi aju mya baꞌn, ex miꞌn baj cychꞌexpun. Katzun ma baj cychꞌexpuꞌn, entons aju tnejel alumaj tucꞌix ju otok txi kꞌoꞌn te t-xel, cycabil che xjansetel ex mlay bant tuꞌn cycyaj coꞌpit. Chi Kman te Moisés.
34 Atzun ke mandamyent lu tzaj tmaꞌn Kman te Moisés twi witz Sinaí tuꞌn t-xi tmaꞌn cye aj Israel.