2 Kꞌiꞌn jawa cyajlal cycyakil aj Israel, teylex junjun tcꞌloj ex tiyjil ex tzꞌibancuya cybi cycyakil xinak. 3-4 Cxelx keꞌ cyiꞌj keju ma che japun twiꞌ winkin abkꞌi, akeju ma bant tuꞌn cyxiꞌ tuj kꞌoj. Aya tucꞌix Aarón cykꞌoꞌnque tuj cꞌlojin ic tzaꞌnx in che tenba soldad, ex jun nejenel te junjun cꞌloj cyiyjil aj Israel tuꞌn t-onin tiꞌja. 5 Aju cybi ke nejenel che onil, atzun jlu:

Cyxol tiyjil Rubén: Atzun Elisur aju tcyꞌajal Sedeur.

6 Cyxol tiyjil Simeón: Atzun Selumiel aju tcyꞌajal Zurisadai.

7 Cyxol tiyjil Judá: Atzun Naasón aju tcyꞌajal Aminadab.

8 Cyxol tiyjil Isacar: Atzun Natanael aju tcyꞌajal Zuar.

9 Cyxol tiyjil Zabulón: Atzun Eliab aju tcyꞌajal Helón.

10 Cyxol cyiyjil keju cabe tcyꞌajal José: cyxol tiyjil Efraín: Atzun Elisama aju tcyꞌajal Amiud, atzun cyxol tiyjil Manasés: Atzun Gamaliel aju tcyꞌajal Pedasur.

11 Cyxol tiyjil Benjamín: Atzun Abidán aju tcyꞌajal Gedeoni.

12 Cyxol tiyjil Dan: Atzun Ahiezer aju tcyꞌajal Amisadai.

13 Cyxol tiyjil Aser: Atzun Pagiel aju tcyꞌajal Ocrán.

14 Cyxol tiyjil Gad: Atzun Eliasaf aju tcyꞌajal Deuel.

15 Cyxol tiyjil Neftalí: Atzun Ahira aju tcyꞌajal Enán, chi Kman te Moisés.

16 Atzun ke nejenel jlu e jaw scꞌoꞌn cyxol cycyakil aj Israel, nejenel ke cyxol junjun cꞌloj cyiyjil ex nejenel ke cyxol elaꞌ milchak aj Israel. 17-18 Tuj tnejel kꞌij te tcabin xjaw oc cychmoꞌn Moisés ex Aarón ke xinak lu, akeju otok che jaw t-scꞌoꞌn Dios, cyucꞌix cycyakil xjal, ex jaw cyiꞌn jun cyajlal cycyakil aj Israel; cub cytzꞌiban cybi teylex junjun tuj ttxolil ex tuj cꞌlojin, ic tzaꞌnx cyiyjil, xi keꞌ cyuꞌn cyiꞌj keju otok che japun twiꞌ winkin abkꞌi, 19 ic tzaꞌnx otok tzaj tmaꞌn Kman te Moisés. Aju tajlal lu jaw tuj tzkij txꞌotxꞌ t-xe witz Sinaí.

20-21 Tej tbant tajlal tiꞌj teylex junjun cꞌloj ic tzaꞌnx tiyjil, ex tej tcub tzꞌibet cybi teylex junjun, aju cyajlal ke xinak otok japun winkin abkꞌi cyuꞌn, atzun jlu:

Cyxol tiyjil Rubén aju nej tcyꞌajal Israel, japun jun tajlal te 46,500 xinak at cynabl tuꞌn cyxiꞌ tuj kꞌoj.

22-23 Cyxol tiyjil Simeón japun jun tajlal te 59,300 xinak.

24-25 Cyxol tiyjil Gad japun jun tajlal te 45,650 xinak.

26-27 Cyxol tiyjil Judá japun jun tajlal te 74,600 xinak.

28-29 Cyxol tiyjil Isacar japun jun tajlal te 54,400 xinak.

30-31 Cyxol tiyjil Zabulón japun jun tajlal te 57,400 xinak.

32-35 Cyxol cabe tiyjil José japun jun tajlal te 40,500 xinak tiꞌj tiyjil Efraín ex tiꞌj tiyjil Manasés japun jun tajlal te 32,200 xinak.

36-37 Cyxol tiyjil Benjamín japun jun tajlal te 35,400 xinak.

38-39 Cyxol tiyjil Dan japun jun tajlal te 62,700 xinak.

40-41 Cyxol tiyjil Aser japun jun tajlal te 41,500 xinak.

42-43 Cyxol tiyjil Neftalí japun jun tajlal te 53,400 xinak.

44 Atzun cyajlal o japun jlu tej tjaw cyajlal tuꞌn Moisés, tucꞌix Aarón ex cyucꞌix cablaj nejenel cyxol aj Israel, jun cyxol junjun cꞌloj cyiyjil. 45 Aju cyajlal aj Israel xiꞌx keꞌ cyiꞌj keju otok japun winkin abkꞌi cyuꞌn ex at cynabl tuꞌn cyxiꞌ tuj kꞌoj. 46 Tuꞌn tcyakilx japun jun tajlal te 603,550 xinak.

47 Pero mintiꞌ e oc aj Leví te tajlal cyxol ke xinak aj Israel, 48 porque otok txi tmaꞌn Kman te Moisés cyjaꞌ: 49 Oc tjaw cyajlal aj Israel tuꞌna, miꞌn che oc tkꞌoꞌna ke tiyjil Leví te tajlal cyxol, 50 nok oꞌcx che oquel tkꞌoꞌna ke tuꞌn tcyaj ten ja xbalun te mojbabl tibil tuj cycwent, cyucꞌix ke macbil ex tcyakilju at tuj. Ake che icꞌel lakꞌbante ja xbalun te mojbabl tibil, cyucꞌix cycyakil macbil in che ajben tuj, ax icx ake che ajbel tuj ja xbalun te mojbabl tibil, ex nikayin che bel ten tiꞌjele. 51 Oc ticꞌ lakꞌbet ja xbalun te mojbabl tibil tuꞌn t-xiꞌ tuj juntl part, ake at cyoclen tiꞌj tuꞌn tbaj cycoꞌpin, ex cyuꞌnx cjawil cybinchaꞌn juntl maj jatum che bel ten. Ex alcye jun xjal mya aj Leví ma pon lakꞌeꞌ tiꞌj, biꞌx cbel byet. 52 Atzun ke mastl aj Israel che bel ten tuj cꞌlojin, teyle junjun tuꞌn tten tuj tex tcampament ex tjakꞌ tex tbander. 53 Atzun cye aj Leví che bel ten tiꞌjele ja xbalun te mojbabl tibil tuꞌntzun miꞌn ttzaj tkꞌoj Kman cyiꞌj aj Israel. Tuj cycwent aj Leví cyjel ten ja xbalun te mojbabl tibil, chi Kman te Moisés.

54 O cybincha aj Israel tcyakil ic tzaꞌnx otok tzaj tmaꞌn Kman te Moisés.