2 Ke aj Israel at tuꞌn cycub ten najchakyin tiꞌjele ja xbalun te mojbabl tibil, teyle junjun tjakꞌ tbander ex tucꞌix juntl bander te junjun cꞌloj tiyjil.

3 Ke soldad in che bet tjakꞌ bander cye tiyjil Judá, atzun che bel ten tuj tjawitz kꞌij, tuj cꞌlojin cyten. Aju nejenel cyxol, atzun Naasón aju tcyꞌajal Aminadab, 4 ex tzaꞌnx tajlal otok jaw, japun jun tajlal te 74,600 xinak aj Judá. 5 Cytxlaj che bel ten ke soldad te tiyjil Isacar, ex aju nejenel cye, atzun Natanael aju tcyꞌajal Zuar, 6 ex tzaꞌnx tajlal otok jaw, japun jun tajlal te 54,400 xinak aj Isacar. 7 Ax icx che bel ten ke soldad te tiyjil Zabulón cytxlaj, ex aju nejenel cyxol, atzun Eliab aju tcyꞌajal Helón, 8 ex tzaꞌnx tajlal otok jaw, japun jun tajlal te 57,400 xinak aj Zabulón. 9 Cyjaꞌtzun tten, cbel ten ox cꞌloj soldad tuj campament te Judá, tucꞌil jun tajlal tuꞌn tcyakilx te 186,400 xinak. Atzun ke che bel nej cywitz aj Israel.

10 Ke soldad in che bet tjakꞌ bander te Rubén, atzun che bel ten tuj tnayaj kꞌij. Aju nejenel cyxol, atzun Elisur aju tcyꞌajal Sedeur, 11 ex tzaꞌnx tajlal otok jaw, japun jun tajlal te 46,500 xinak aj Rubén. 12 Ex cytxlaj che bel ten ke soldad te tiyjil Simeón, ex aju nejenel cyxol, atzun Selumiel aju tcyꞌajal Zurisadai, 13 ex tzaꞌnx tajlal otok jaw, japun jun tajlal te 59,300 xinak aj Simeón. 14 Ax icx che bel ten ke soldad te tiyjil Gad cytxlaj, ex aju nejenel cyxol, atzun Eliasaf aju tcyꞌajal Deuel, 15 ex tzaꞌnx tajlal otok jaw, japun jun tajlal te 45,650 xinak aj Gad. 16 Cyjaꞌtzun tten, cbel ten ox cꞌloj soldad tuj campament te Rubén, tucꞌil jun tajlal tuꞌn tcyakilx te 151,450 xinak. Atzun ke che xel lpeꞌ te tcabin cꞌloj.

17 Atzun ke aj Leví che xel lpeꞌ cyiꞌj kak cꞌloj aj Israel lu tuꞌn t-xi cyiꞌn ja xbalun te mojbabl tibil, ex kak cꞌlojtl che xel lpeꞌ cyiꞌj ic tzaꞌnx cyten jatum otok che cub ten; txolin cyten oc cyxi bet ex tjakꞌ cyex cybander.

18 Ke soldad in che bet tjakꞌ bander te Efraín, atzun che bel ten tuj telex kꞌij tuj cꞌlojin cyten. Aju nejenel cyxol, atzun Elisama aju tcyꞌajal Amiud, 19 ex tzaꞌnx tajlal otok jaw, japun jun tajlal te 40,500 xinak aj Efraín. 20 Ex cytxlaj che bel ten ke soldad te tiyjil Manasés, ex aju nejenel cyxol, atzun Gamaliel aju tcyꞌajal Pedasur, 21 ex tzaꞌnx tajlal otok jaw, japun jun tajlal te 32,200 xinak aj Manasés. 22 Ax icx che bel ten ke soldad te tiyjil Benjamín cytxlaj, ex aju nejenel cyxol, atzun Abidán aju tcyꞌajal Gedeoni, 23 ex tzaꞌnx tajlal otok jaw, japun jun tajlal te 35,400 xinak aj Benjamín. 24 Cyjaꞌtzun tten, cbel ten ox cꞌloj soldad tuj campament te Efraín, tucꞌil jun tajlal tuꞌn tcyakilx te 108,100 xinak. Atzun ke che xel lpeꞌ te toxin cꞌloj.

25 Ke soldad in che bet tjakꞌ bander te Dan, atzun che bel ten tuj tbankꞌab kꞌij tuj cꞌlojin cyten. Aju nejenel cyxol, atzun Ahiezer aju tcyꞌajal Amisadai, 26 ex tzaꞌnx tajlal otok jaw, japun jun tajlal te 62,700 xinak aj Dan. 27 Ex cytxlaj che bel ten ke soldad te tiyjil Aser. Aju nejenel cyxol, Pagiel aju tcyꞌajal Ocrán, 28 ex tzaꞌnx tajlal otok jaw, japun jun tajlal te 41,500 xinak aj Dan. 29 Ax icx che bel ten ke soldad te tiyjil Neftalí cytxlaj. Aju nejenel cyxol, atzun Ahira aju tcyꞌajal Enán, 30 ex tzaꞌnx tajlal otok jaw, japun jun tajlal te 53,400 xinak aj Neftalí. 31 Cyjaꞌtzun tten, cbel ten ox cꞌloj soldad tuj campament te Dan, tucꞌil jun tajlal tuꞌn tcyakilx te 157,600 xinak. Atzun ke che xel lpeꞌ te mancbil tjakꞌ cybander.

32 Aju tajlal jaw cyiꞌj aj Israel tuj cꞌlojin cyten ic tzaꞌnx cyiyjil, o japun jun tajlal tuꞌn tcyakilx te 603,550 xinak. 33 Atzun ke aj Leví mintiꞌ e oc te tajlal tej tjaw cyajlal aj Israel, ic tzaꞌnx otok tzaj tmaꞌn Kman te Moisés.

34 Atzun cye aj Israel o cybincha tcyakil ic tzaꞌnx otok tzaj tmaꞌn Kman te Moisés: Teyle junjun cub ten tjakꞌ tex tbander, tuj cꞌlojin e bet cyucꞌil ke cyex cyiyjil.