Aju tuꞌn tbant cyuꞌn aj Leví
3
Atzun ke tiyjil Aarón ex Moisés jlu, akeju ateꞌtok tuj tkꞌijlalil tej tyolin Kman tucꞌil Moisés twi witz Sinaí: 2 Atzun cybi ke tcyꞌajal Aarón jlu: Nadab tbi aju nej tcꞌwaꞌl; te tibajxi e tzaj Abiú, Eleazar ex Itamar. 3 Atzun ke tcyꞌajal Aarón o che xjansanjtz ex xi kꞌoꞌn cyoclen tuꞌn cyoc te pal. 4 Pero ate Nadab tucꞌix Abiú e cyim twitz Kman tuj tzkij txꞌotxꞌ t-xe witz Sinaí, porque ajben ju kꞌakꞌ cyuꞌn te patbil storac aju mintiꞌ o kꞌmanjtz cye tuꞌn tajben. Tuꞌnju mintiꞌ cycyꞌajal o tzaj, cyjaꞌtzun oꞌcxte Eleazar tucꞌix Itamar e cyaj ten tuꞌn cyajben te pal ttxlaj Aarón aju cyman.5 Tzaj yolin Kman tucꞌil Moisés ex tma:
6 Txcontza ke tiyjil Leví tuꞌn cyul lakꞌeꞌ twitz pal Aarón, tuꞌn cyonin tiꞌj tuj takꞌun. 7 Che ajbel te Aarón ex cye cycyakil aj Israel twitz ja xbalun te mojbabl tibil ex tuꞌn cyajben tuj tja Dios. 8 Ax icx cꞌoquel cycwentin ke macbil ateꞌ tuj ja xbalun te mojbabl tibil ex che ajbel cye aj Israel tuj tcyakil akꞌuntl tuj tja Dios. 9 Paꞌn ela ke aj Leví cyiꞌj ke mastl aj Israel, tuꞌntzun cyajben oꞌcx te Aarón ex cye ke tiyjil. 10 Atzun oclenj te pal, kꞌoꞌn cyaja tuj tkꞌab Aarón ex cye ke tiyjil. Katzun at jun ma tzꞌoc tkꞌon tib te pal ex mya axix toc tiyjil pal, biꞌx cbel byet.
Etzan ke aj Leví tuꞌn Kman
11 Tzaj yolintl Kman tucꞌil Moisés ex tma:
12 Ma che jaw nscꞌoꞌne ke aj Leví cyxol ke aj Israel, te cyxel ke nej cycyꞌajal cycyakil aj Israel. Weye ke aj Leví, 13 porque weye cycyakil ke nej cycyꞌajal aj Israel. Tej cynaj ke nej cycyꞌajal aj Ejipt, biꞌx e jeꞌl npaꞌne ke nej cycyꞌajal aj Israel te weye, ex ke nej cyal ke alumaj. Cyjaꞌtzun weye ke. Akine Cymane.
Jaw jun tajlal cyiꞌj aj Leví
14 Tzaj yolintl Kman tucꞌil Moisés tuj tzkij txꞌotxꞌ t-xe witz Sinaí ex tma: 15 Kꞌiꞌn jawa jun tajlal cyiꞌj cycyakil xinak aj Leví tuj cꞌlojin, teylex junjun tpamili; cxel keꞌ tajlanjtz cyiꞌj keju ma te jun xjaw cyul-len itzꞌj. 16 Jawtzun tajlal tuꞌn Moisés ic tzaꞌnx otok tma Kman te.
17 Atzun cybi ke tcyꞌajal Leví jlu: Gersón, Coat ex Merari.
18 Ke tiyjil Gersón tuj cꞌlojin cyten, atzun ke jlu: Libni ex Simei.
19 Ke tiyjil Coat tuj cꞌlojin cyten, atzun ke jlu: Amram, Ishar, Hebrón ex Uziel.
20 Ke tiyjil Merari tuj cꞌlojin cyten, atzun ke jlu: Mahli ex Musi.
Cycyakil ke jlu tiyjil Leví ke tuj cꞌlojin cyten.
21 Ke aj Libni ex ke aj Simei, tiyjil Gersón ke. 22 Aju tajlal jaw cyiꞌj ke cycyꞌajal tzajx keꞌ cyiꞌj keju matok jun xjaw cyul-len itzꞌj, japun te 7,500 cybaj. 23 Atzun ke jlu e cub ten tuj tumlal telex kꞌij, tiꞌjxi tja Dios. 24 Aju nejenel cyxol ke tiyjil Gersón, atzun Eliasaf aju tcyꞌajal Lael. 25 Tuj cycwent ke tiyjil Gersón taꞌ ja xbalun te mojbabl tibil, cyucꞌix ke tzꞌuꞌm te maksibl tiꞌj, tucꞌix xbalun tcub ttzi ja xbalun, 26 cyucꞌix ke xbalun cycub ttxaꞌn peꞌn, aju toc tiꞌjele tja Dios ex tiꞌj altar, tucꞌix xbalun tcub jatum tuꞌn cyocx xjal tuj ttxaꞌn tpeꞌn tja Dios, cyucꞌix keju cꞌalbil cye.
27 Ke tiyjil Coat tuj cꞌlojin cyten, atzun ke jlu: Amram, Ishar, Hebrón ex Uziel. 28 Aju tajlal jaw cyiꞌj ke cycyꞌajal tzajx keꞌ cyiꞌj keju matok jun xjaw cyul-len itzꞌj, japun te 8,600 cybaj. Atzun ke cyoc te cwentil tja Dios, 29 ex atzun e cub ten tuj tumlal tnayaj kꞌij te tja Dios. 30 Aju nejenel cyxol ke tiyjil Coat, atzun Elizafán aju tcyꞌajal Uziel. 31 Tuj cycwent ke jlu taꞌ ju cax cꞌubl tley Dios, tucꞌix mes, tucꞌix tcubl candil, cyucꞌix ke altar, cyucꞌix ke macbil xjansamaj in che ajben tuj cꞌulbil, tucꞌix ju xbalun tcubsaꞌn tuj tmij tja Dios, ex cycyakil ke macbil ateꞌ tuj.
32 Aju nejenel maꞌxix toclen cyxol aj Leví, atzun Eleazar aju tcyꞌajal pal Aarón, ex atzun toc te kꞌmalte cyakꞌun keju in che cwentin tiꞌj tja Dios.
33 Ke tiyjil Merari tuj cꞌlojin cyten, atzun ke jlu: Mahli ex Musi. 34 Aju tajlal jaw cyiꞌj ke cycyꞌajal tzajx keꞌ cyiꞌj keju matok jun xjaw cyul-len itzꞌj, japun te 6,200 cybaj. 35 Aju nejenel cyxol ke tiyjil Merari, atzun Zuriel aju tcyꞌajal Abihail, ex atzun e cub ten tuj tumlal tbankꞌab kꞌij te tja Dios. 36 Tuj cycwent ke tiyjil Merari taꞌ ke tzꞌlom te tja Dios, cyucꞌix ke tkꞌeꞌlil, cyucꞌix ke tkan, cyucꞌix ke tkꞌukbil ex tcyakil in ajben cyiꞌj, 37 ex cyucꞌix ke tkan ateꞌ tiꞌjele ttxaꞌn peꞌn, cyucꞌix ke cykꞌukbil, cyucꞌix ke stac ex ke takꞌal.
38 Atzun e cub ten Moisés tucꞌix Aarón, cyucꞌix ke tcyꞌajal Aarón, twitz tja Dios tuj tumlal tjawitz kꞌij, twitz ja xbalun te mojbabl tibil, ex atzun ke e oc cwentinte tja Dios te cyxel aj Israel. Katzun at jun xjal mya pal ma tzꞌocx tuj tja Dios, il tiꞌj tuꞌn tcub byet.
39 Tejtzun tjaw tajlal cyuꞌn Moisés ex Aarón cyiꞌj cycyakil cꞌloj cyiyjil aj Leví ic tzaꞌnx otok tzaj tmaꞌn Kman, japun jun tajlal te 22,000 xinak tuꞌn tcyakilx, tzajx keꞌ cyiꞌj keju matok jun xjaw cyul-len itzꞌj.
Tzaꞌn tten tuꞌn cycyaj coꞌpit ke nej cꞌwaꞌlbaj
40 Tzaj tmaꞌn Kman te Moisés cyjaꞌ:
Kꞌiꞌn jawa jun tajlal cyiꞌj ke nej cycyꞌajal aj Israel, tzajx keꞌ tuꞌna cyiꞌj keju ma jun xjaw cyul-len itzꞌj, tzꞌiban cuba cybi ex ajlama jteꞌ cybet. 41 Kꞌontza ke aj Leví te weye te cyxel nej cycyꞌajal aj Israel. Ax icx kꞌontza cyalun aj Leví te weye te cyxel nej cyalun aj Israel. Akine Cymane.
42 Jawtzun tiꞌn Moisés cyajlal nej cycyꞌajal aj Israel ic tzaꞌnx otok tzaj tmaꞌn Kman te, 43 ex cycyakil xinak nej cꞌwaꞌlbaj cuꞌx tzꞌibet cybi tzajx keꞌ cyiꞌj keju matok jun xjaw cyul-len itzꞌj, japun jun tajlal te 22,273 tuꞌn tcyakilx.
44 Ax icx tzaj yolin Kman tucꞌil Moisés ex tma:
45 Kꞌontza ke aj Leví te weye te cyxel nej cycyꞌajal aj Israel, ex kꞌontza cyalun aj Leví te weye te cyxel cyalun aj Israel, porque weye ke aj Leví. Akine Cymane. 46 Pero akeju nej cycyꞌajal aj Israel at 273 mas cywitz ke aj Leví; cyjaꞌtzun, tuꞌn cycyaj coꞌpj keju 273 nej cycyꞌajal lu, 47 kaninxa jweꞌ sak pwak tiꞌj junjun, tzaꞌnx malbil in ajben tuj tja Dios. Aju sak pwak chꞌixmi mey ons talil junjun. 48 Ex kꞌonxa pwak te colpibl cye te Aarón ex cye ke tcyꞌajal.