2 Kꞌiꞌn jawa cyajlal tiyjil Coat cyxol aj Leví, tuj cꞌlojin ic tzaꞌnx junjun cꞌloj cyiyjil, 3 akeju ma che japun twiꞌ 30 abkꞌi ex cpol baj cyiꞌj keju ma che japun twiꞌ 50 abkꞌi ex at cynabl tuꞌn cyajben tuj ja xbalun te mojbabl tibil.

4 Aju cyakꞌun ke tiyjil Coat tuj ja xbalun te mojbabl tibil atzun, tuꞌn toc cycwentin ke tiꞌxti xjan. 5 Oc cyicꞌ lakꞌeꞌ tnam xjal, cꞌelel tiꞌn Aarón cyucꞌix ke tcyꞌajal aju xbalun tcub te makbil tuj tja Dios, ex cꞌicꞌex cylicꞌun tibaj cax cꞌubl tley Dios, te maksibl te. 6 Ex tibaj xbalun lu, cbel cylicꞌun ke tzꞌuꞌm tbanilxix, te maksibl te, ex tibaj tzꞌuꞌm cbel cylicꞌun juntl xbalun ẍkꞌilun queꞌyin, ex cꞌoquex cykꞌoꞌn ke tzeꞌ tjakꞌ tuꞌntzun t-xi cyikan. 7 Ax icx cbel cylicꞌun jun xbalun ẍkꞌilun queꞌyin tibaj mes in che cub ten pan tibaj, ex tibajtzun ju xbalun lu, cbel cykꞌoꞌn ke lak, ke cuchar nmak, ke copa te cꞌabl ex ke xar tcubil oyaj vin, ax icx aju pan in xi kꞌot tcyakil maj. 8 Tibajtzun tcyakil jlu cbel cylicꞌun jun xbalun cyak queꞌyin, ex te mancbilxi, cꞌicꞌex cylicꞌun ke tzꞌuꞌm tbanilxix tibaj, ex cꞌoquex cykꞌoꞌn ke tzeꞌ tjakꞌ tuꞌntzun t-xi cyikan. 9 Ax icx ctzajel cyiꞌn jun xbalun ẍkꞌilun queꞌyin, ex cꞌicꞌex cylicꞌun tibaj tcubl candil, cyibaj ke candil, cyibaj ke matzbil twi mech, ke tal plat, ex cycyakil ke tcubl aseyt. 10 Cycyakiltzun ke jlu cbajel cypotzin cyiꞌj cyuꞌn ke tzꞌuꞌm tbanilxix, ex cbel cykꞌoꞌn twitz parwel tuꞌntzun t-xi cyikan.

11 Ax icx cꞌicꞌex cylicꞌun jun xbalun ẍkꞌilun queꞌyin tibaj altar kꞌan pwak ttxꞌotxꞌil, cbel cykꞌoꞌn ke tzꞌuꞌm tbanilxix tibaj, ex cꞌoquex cykꞌoꞌn ke tzeꞌ tjakꞌ tuꞌntzun t-xi cyikan. 12 Cꞌoquex cykꞌoꞌn cycyakil ke macbil in che ajben tuj tja Dios tuj jun xbalun ẍkꞌilun queꞌyin, ex cꞌoquex cypotzin cyuj ke tzꞌuꞌm tbanilxix, ax icx cbel cykꞌoꞌn twitz parwel tuꞌntzun t-xi cyikan.

13 Cꞌelel cyiꞌn tzaꞌj tibaj altar ex cbel cymaksiꞌn tuꞌn jun xbalun ẍjulin queꞌyin. 14 Tibajtzun cbel cykꞌoꞌn cycyakil ke macbil in che ajben tuj cꞌulbil: Ke tcubl xkꞌaꞌl, ke cuchar, ke pala ex ke lak nmak, akeju in che ajben tiꞌj altar. Cbel cymaksiꞌn cyibaj cycyakil jlu cyuꞌn ke tzꞌuꞌm tbanilxix, ex cꞌoquex cykꞌoꞌn ke tzeꞌ tjakꞌ tuꞌntzun t-xi cyikan.

15 Tbajlenxitzun cypotzin Aarón cyucꞌix ke tcyꞌajal cyiꞌj cycyakil tiꞌxti in che ajben tiꞌj tja Dios, ex cyiꞌj cycyakil ke macbil in che ajben tuj, ex otok bant cyten aj Israel tuꞌn tcub be cyuꞌn, baꞌntzun tuꞌn cytzaj ke tiyjil Coat tuꞌn t-xi cyikan tcyakil jlu, pero miꞌn tzꞌoc cymacoꞌn ke macbil xjan tuꞌntzun miꞌn cycyim. Cycyakil ke tiꞌxti at tuj ja xbalun te mojbabl tibil, ake tiyjil Coat che xel ikante cye. 16 Atzunte Eleazar aju tcyꞌajal pal Aarón cꞌoquel cwentinte aseyt cye candil, tucꞌix storac at tcꞌocꞌjal, tucꞌix oyaj tiꞌj twitz awal ctzajel cykꞌoꞌn aj Israel tcyakil kꞌij weye, ex aju aseyt te xjansabl. Ax icx cꞌoquel tcwentin tja Dios, tucꞌix tcyakilju at tuj, akeju macbil xjan.

17 Tzaj yolin Kman tucꞌil Moisés ex tucꞌil Aarón, chi cyjaꞌ:

18 Miꞌn cyakꞌe ambil tuꞌn cycub naj ke tiyjil Coat cyxol aj Leví. 19 Atzun jlu tuꞌn tbant cyuꞌn tuꞌn miꞌn cycyim oc cypon lakꞌeꞌ cyiꞌj ke tiꞌxti xjan. Nej cꞌoquex Aarón cyucꞌix ke tcyꞌajal tuj ja xbalun te mojbabl tibil, ex atzun ke che xel kꞌmante cye aj Coat alcye tuꞌn tbant tuꞌn junjun ex alcye tuꞌn t-xi cyiꞌn. 20 Cyjaꞌtzun miꞌn che ocx ke aj Coat queꞌyil cye macbil xjan ka naꞌnxtok tbaj potzit cyiꞌj, tuꞌntzun miꞌn cycyim.

21 Tzaj yolin Kman tucꞌil Moisés ex tma:

22 Ax icx kꞌiꞌn jawa cyajlal tiyjil Gersón tuj cꞌlojin tzaꞌnx junjun cꞌloj cyiyjil, 23 akeju ma che japun twiꞌ 30 abkꞌi, ex pon baj cyiꞌj keju ma che japun twiꞌ 50 abkꞌi ex at cynabl tuꞌn cyajben tuj ja xbalun te mojbabl tibil.

24 Aju cyakꞌun ke tiyjil Gersón atzun jlu: 25 Cꞌicꞌel cyiꞌn ke xbalun te tja Dios, aju ja xbalun te mojbabl tibil, cyucꞌix ke tzꞌuꞌm tbanilxix aju in cub ten tibaj, tucꞌix ju xbalun tcub ttzi ja xbalun te mojbabl tibil, 26 cyucꞌix ke xbalun cyoc tiꞌjele ttxaꞌn peꞌn, tucꞌix ju xbalun tcub jatum in che ocx xjal tuꞌn cyocpun tuj ttxaꞌn peꞌn toc tiꞌjele tja Dios ex tiꞌjele altar, cyucꞌix ke takꞌal, cyucꞌix cycyakil macbil in che ajben tiꞌj; ex tuj cycwent cyjel ten tcyakil jlu. 27 Ate Aarón cyucꞌix ke tcyꞌajal che xel kꞌmante cye tiyjil Gersón alcye akꞌuntl tuꞌn tbant cyuꞌn, ex alcye ke tiꞌxti cxel cyikan. Akeye che xel kꞌonte cyoclen tiꞌj ju cbantel cyuꞌn. 28 Atzun akꞌuntl lu cbantel cyuꞌn ke cabe cꞌloj tiyjil Gersón tiꞌj ja xbalun te mojbabl tibil, ex a Itamar aju tcyꞌajal pal Aarón tuꞌn t-xi kꞌmante cyakꞌun.

29 Ax icx kꞌiꞌn jawa cyajlal tiyjil Merari tuj cꞌlojin, tzaꞌnx cyiyjil, 30 akeju ma che japun twiꞌ 30 abkꞌi, ex cpol baj cyiꞌj keju ma che japun twiꞌ 50 abkꞌi ex at cynabl tuꞌn cyajben tuj ja xbalun te mojbabl tibil. 31 Aju cyakꞌun tuꞌn tbant tiꞌj ja xbalun te mojbabl tibil, atzun jlu: Cxel cyikan ke tzꞌlom te tja Dios, cyucꞌix ke tkꞌeꞌlil, cyucꞌix ke tkan, cyucꞌix ke tkꞌukbil, 32 cyucꞌix ke tkan toc tiꞌjele ttxaꞌn tpeꞌn tja Dios, cyucꞌix ke tkꞌukbil, ke stac, ke takꞌal ex tcyakilju in ajben cyiꞌj. Aya cxel kꞌmante cye alcye ke macbil tuꞌn t-xi cyiꞌn teyle junjun. 33 Atzun akꞌuntl lu cbantel cyuꞌn ke cabe cꞌloj tiyjil Merari tiꞌj ja xbalun te mojbabl tibil, ex a Itamar aju tcyꞌajal pal Aarón tuꞌn t-xi kꞌmante cyakꞌun, chi Dios, xi tmaꞌn te Moisés.

34 Tuꞌn Moisés ex Aarón cyucꞌix ke nejenel te tnam jaw cyajlal tiyjil Coat tuj cꞌlojin, ic tzaꞌnx cyiyjil. 35 tzajx keꞌ cyiꞌj keju otok che japun twiꞌ 30 abkꞌi, ex pon baj cyiꞌj keju otok che japun twiꞌ 50 abkꞌi ex at cynabl tuꞌn cyajben tuj ja xbalun te mojbabl tibil. 36 Akeju xinak jaw cyajlal tzaꞌnx cyiyjil, japun 2,750 cybaj tuꞌn tcyakilx. 37 Atzun tajlal jlu o japun cyiꞌj ke tiyjil Coat, akeju otok bant tuꞌn cyajben tuj ja xbalun te mojbabl tibil, tzaꞌnx tajlal o jaw tuꞌn Moisés ex Aarón, ic tzaꞌnx otok tzaj tmaꞌn Kman te Moisés.

38 Jaw jun cyajlal ke tiyjil Gersón tuj cꞌlojin cyten, ic tzaꞌnx junjun cꞌloj cyiyjil, 39 tzajx keꞌ cyiꞌj keju otok che japun twiꞌ 30 abkꞌi, ex pon baj cyiꞌj keju otok che japun twiꞌ 50 abkꞌi ex at cynabl tuꞌn cyajben tuj ja xbalun te mojbabl tibil, 40 ex japun 2,630 cybaj tuꞌn tcyakilx. 41 Atzun tajlal jlu o japun cyiꞌj ke tiyjil Gersón, akeju otok bant tuꞌn cyajben tuj ja xbalun te mojbabl tibil, tzaꞌnx tajlal o jaw tuꞌn Moisés ex Aarón, ic tzaꞌnx otok tzaj tmaꞌn Kman.

42 Jaw cyajlal ke tiyjil Merari tuj cꞌlojin cyten, ic tzaꞌnx junjun cꞌloj cyiyjil, 43 tzajx keꞌ cyiꞌj keju otok che japun twiꞌ 30 abkꞌi, ex pon baj cyiꞌj keju otok che japun twiꞌ 50 abkꞌi ex at cynabl tuꞌn cyajben tuj ja xbalun te mojbabl tibil, 44 ex japun 3,200 cybet tuꞌn tcyakilx. 45 Atzun tajlal jlu o japun cyiꞌj ke tiyjil Merari, ic tzaꞌnx tajlal o jaw tuꞌn Moisés ex Aarón, ic tzaꞌnx otok tzaj tmaꞌn Kman te Moisés.

46 Aju cyajlal aj Leví jaw tuj cꞌlojin ic tzaꞌnx junjun cꞌloj cyiyjil, tuꞌn Moisés ex Aarón cyucꞌix ke nejenel cye aj Israel, 47 tzajx keꞌ cyiꞌj keju otok che japun twiꞌ 30 abkꞌi, ex pon baj cyiꞌj keju otok che japun twiꞌ 50 abkꞌi ex at cynabl tuꞌn cyajben tuj ja xbalun te mojbabl tibil, ex tuꞌn t-xi cyikan cycyakil ke tiꞌxti in che ajben tiꞌj tja Dios, 48 japun 8,580 cybaj tuꞌn tcyakilx. 49 Aju tajlal o jaw lu o bant ic tzaꞌnx otok tzaj tmaꞌn Kman te Moisés, ex teyle junjun xi kꞌmaꞌn te alcye tuꞌn tbant tuꞌn ex alcye tuꞌn t-xi tikan, ic tzaꞌnx otok tzaj tmaꞌn Kman te Moisés.