2 Kꞌmanxa cye aj Israel tuꞌn tex cyiꞌn tiꞌjxi campament cycyakil xjal yab tuꞌn txꞌaꞌc mintiꞌ kꞌanbil tiꞌj, ke yab tuꞌn poj in jaw twi cytzꞌaꞌlbil ex keju ma che tzꞌilix tuꞌnju otok tzꞌoc cymacoꞌn jun cyimni. 3 Il tiꞌj tuꞌn tex cyiꞌn tiꞌjxi campament, ka xinak ex ka xuꞌj, tuꞌntzun miꞌn ttzꞌilix campament jatum atine cyxol, chi Kman te Moisés.

4 Xi cyniman aj Israel aju tzaj tmaꞌn Kman te Moisés ex e jeꞌx cyiꞌn tiꞌjxi campament ke xjal at cytzꞌilil.

5 Tzaj yolin Kman tucꞌil Moisés ex tma:

6 Kꞌmanxa cye aj Israel jlu: Ka at jun xinak ex ka jun xuꞌj mintiꞌ in niman weye ex ka ma tbincha mya baꞌn tiꞌj juntl, il jlu. 7 Il tiꞌj tuꞌn tjatz tpaꞌn til ex tuꞌn taj tkꞌoꞌn juntl maj aju otok tzꞌel telkꞌaꞌn, ex il tiꞌj tuꞌn t-xi tkꞌoꞌn tjweꞌyin tibaj. 8 Katzun otok cyim aju xjal otok tzꞌel elkꞌaꞌn tiꞌxti te, ex ka mintiꞌ jun terman at tuꞌn t-xi cꞌmonte aju cꞌajetz tkꞌoꞌn elekꞌ, a jlu ctzajel kꞌoꞌn weye tuꞌntzun tajben cye ke pal, ex mya oꞌcx jlu, ax icx cxel tkꞌoꞌn jun ẍneꞌl te pal tuꞌn tcub tbyoꞌn te najsbil til xjal.

9 Cycyakil chojbil ex oyaj in tzaj cykꞌoꞌn aj Israel weye, aju in pon cyiꞌn cywitz ke pal, a jlu cyex pal cꞌajbel. 10 Tcyakilju in tzaj kꞌoꞌn weye ex in pon kꞌiꞌn cywitz pal, cye pal cꞌajbel.

11 Tzaj yolin Kman tucꞌil Moisés ex tma:

12 Kꞌmanxa cye aj Israel jlu: Ka at jun xuꞌj ma tzꞌeꞌl txalpuj ex ka ma tbincha mya baꞌn tiꞌj tchmil, 13 ex ka ma cub tan tucꞌil juntl xinak ex mintiꞌ ma tbi tchmil, masque ma tzꞌilix pero mintiꞌ jun testiw tiꞌj jlu, ex mintiꞌ ma tzꞌel cnet tiꞌj tbinchben, 14 ex ka at twitz chmilbaj tiꞌj t-xuꞌjil, ka otok tbincha xuꞌj il ex ka miꞌn, 15 cxeltzun tiꞌn chmilbaj t-xuꞌjil twitz pal, ex cxel tiꞌn cabe libr sebad cheꞌmaj, te oyaj tiꞌj t-xuꞌjil. Pero miꞌn cub tkoꞌn aseyt tibaj sebad cheꞌmaj, mi storac, porque a jlu jun oyaj tiꞌj at twitz chmilbaj tiꞌj t-xuꞌjil, ex jun oyaj tuꞌn tel jun il tuj kꞌanchaꞌl.

16 Atzunte pal cpol tlakꞌbaꞌn xuꞌj ex cbel tkꞌoꞌn nwitze. 17 Ctzajeltzun tiꞌn pal chꞌin aꞌ xjansamaj tuj jun xar txꞌotxꞌ ttxꞌotxꞌil ex cxel tkꞌoꞌn chꞌin kuk tuj, aju tcub twitz txꞌotxꞌ tuj njaye. 18 Cbel tkꞌoꞌn pal aju xuꞌj nwitze, cꞌelel tchitpuꞌn ttzmal twiꞌ xuꞌj ex cbel tkꞌoꞌn oyaj tuj tkꞌab xuꞌj, aju oyaj tiꞌj at twitz chmilbaj tiꞌj t-xuꞌjil, acux tzyuꞌn xar tuꞌn jatum tcuꞌx aꞌ cꞌa, aju in tzaj kꞌinte castiw. 19 Atzunte pal cxel tkanin te xuꞌj tuꞌn ttzaj tmaꞌn jun yol axix toc, ex cxel tmaꞌn te cyjaꞌ: Ka mintiꞌ ma cub tana tucꞌil juntl xinak ex ka bajx txi tkꞌon tiba te juntl xinak tuꞌn tbinchanteya aju in tzꞌilixa tuꞌn, mintiꞌwttzun baj tiꞌja oc t-xi tcꞌaꞌna aꞌ cꞌa, aju in tzaj kꞌinte castiw. 20 Katzun o tbinchaya mya baꞌn tiꞌj tchmila ex ka o cub tana tucꞌil juntl xinak ex o tbinchaya aju in tzꞌilixa tuꞌn, 21 awttzun Kman tzꞌoc kꞌonte teya te jun yecꞌbil tiꞌj castiw ctzajel tiꞌja cywitz xjal, ex tuꞌn tbant tuꞌn tuꞌn cyoc tzkij ke t-xixa ex tuꞌn t-xi mal tcꞌuꞌja. 22 Oc t-xi tcꞌaꞌna aꞌ cꞌa, aju in tzaj castiw tuꞌn, che oquel tzkij ke t-xixa ex cxel mal tcꞌuꞌja, chi pal, cxel tmaꞌn te xuꞌj. Cxeltzun ttzakꞌweꞌn xuꞌj: Bant-xwit icju.

23 Cbeltzun ttzꞌiban pal twitz jun botzꞌ uꞌj aju castiw ctzajel tiꞌj xuꞌj, ex cꞌelel ttxꞌjoꞌn ke yol tuj aꞌ cꞌa. 24 Cxeltzun tkꞌoꞌn pal aꞌ lu te xuꞌj tuꞌn t-xi tcꞌaꞌn, aju in tzaj castiw tuꞌn, tuꞌntzun tcꞌayix tuj tcꞌuꞌj, 25 ex ctzajeltzun tiꞌn pal aju oyaj tiꞌj at twitz chmilbaj tiꞌj t-xuꞌjil, aju tcub tuj tkꞌab xuꞌj, ex cxel yucut twitz Kman; te tibajxi cxel tkꞌoꞌn te Kman twitz altar. 26 Ctzajel tiꞌn pal jun yub tiꞌj oyaj twitz awal ex cbel tpatun tibaj altar ic tzaꞌn jun oyaj cucx tuꞌn ttzaj naꞌt.

Te tibajxitzun cxel tmaꞌn pal tuꞌn t-xi tcꞌaꞌn xuꞌj aju aꞌ cꞌa. 27 Katzun otok tbincha mya baꞌn tiꞌj tchmil, ccꞌayixtel tuj tcꞌuꞌj xuꞌj tuꞌn aꞌ cꞌa, aju in tzaj kꞌinte castiw, cxel mal tcꞌuꞌj, che oquel tzkij ke t-xix ex aju xuꞌj cꞌoquel te jun techal cyxol t-xjalil tiꞌj castiw otok tzaj tiꞌj. 28 Katzun mintiꞌ til xuꞌj, mintiꞌ cbajel tiꞌj ex jacu che tzaj tal.

29 Atzunju ley lu tiꞌj at twitz chmilbaj tiꞌj t-xuꞌjil, ka at jun xuꞌj in tbinchaꞌn mya baꞌn tiꞌj tchmil ex in tbinchaꞌn aju in tzꞌilix tuꞌn, 30 ex ka aju chmilbaj nok cucx at twitz tiꞌj t-xuꞌjil. Cxel tiꞌn chmilbaj aju t-xuꞌjil twitz Kman ex cbantel tuꞌn pal tiꞌj xuꞌj ic tzaꞌnx in tmaꞌn ley lu. 31 Mintiꞌ te chmilbaj til tiꞌj jlu, atzunte xuꞌj, ka at til ctzajel castiw tibaj tuꞌn jlu.