2 Kꞌmanxa jlu cye aj Israel: Ka at jun xinak ex ka jun xuꞌj ctzajel ttziyan jun yol weye tuꞌn t-xjansante tib, tuꞌn toc te nazarey tuꞌn tajben te weye, 3 miꞌn txi tcꞌaꞌn vin, mi kꞌeꞌn, mi vinagr banimaj tiꞌj vin mi tiꞌj kꞌeꞌn, ex miꞌn txi tcꞌaꞌn taꞌl twitz uva; ax icx miꞌn txi tloꞌn twitz uva ctzajelx twi tkan ex mi twitz uva otok tzkij. 4 Tuj tcyakil tyemp nok jteꞌ kꞌij otok tzaj ttziyan tuꞌn toc te nazarey, miꞌn txi tloꞌn tcyakil aju in tzaj tkꞌoꞌn tkan uva, mi aju iyaj at tuj, mi ttxcꞌomal. 5 Ax icx miꞌn tzꞌel tmatzoꞌn ttzmal twiꞌ, nok oꞌcx cyjel tkꞌoꞌn tuꞌn tchꞌiy; maxi cꞌelel tmatzoꞌn ocxi tjapun baj aju kꞌij banimaj tiꞌj ju yol otok tzaj ttziyan, porque at tuꞌn t-xjansante tib nwitze. 6 Ex tuj enter tyemp lu miꞌn tzꞌoc lakꞌeꞌ tiꞌj jun cyimni, 7 masque ka a tman ex ka a ttxuꞌ otok cyim, ex ka jun terman ex ka jun tanb, miꞌn txi lakꞌeꞌ tiꞌj tuꞌntzun miꞌn ttzꞌilix, porque aju ttzmal twiꞌ, atzun jun techal ka xjansamaj te weye. 8 Tuj tcyakil tyemp nok jteꞌ kꞌij otok tzaj ttziyan tuꞌn toc te nazarey, ctel aju xjal lu xjansamajtl nwitze.

9 Katzun minabencu in cyim jun xjal ttxlaj, ex tuꞌn jlu ctzꞌilixtel ttzmal twiꞌ aju xjansamaj tuꞌn te weye, iltzun tiꞌj tuꞌn t-saksante tib juntl maj ex tuꞌn tel matzet ttzmal twiꞌ tbajlenxi wuk kꞌij. 10 Tuj twajxakin kꞌij ctzajel tiꞌn cabe ẍpoꞌk ex ka cabe tal palom te pal, ttzi ja xbalun te mojbabl tibil. 11 Cxel tkꞌoꞌn pal jun te chojbil til xjal, atzun juntl cxel tkꞌoꞌn te jun oyaj patun in cub tuꞌntzun tchjet til, tuꞌnju cyim jun xjal ttxlaj. Tex kꞌij lu cbajel t-xjansaꞌn juntl maj ttzmal twiꞌ te weye, 12 Ctzajel tiꞌn jun tal tman ẍneꞌl te jun abkꞌi te chojbil til, ex tzajx ctzyetel juntl maj aju xjansabl tib wucꞌile. Aju tyemp otok baj mlayx tzꞌoc te tajlal, porque otok tzꞌilix aju ttzmal twiꞌ xjansamajtok te weye nej.

13 Atzun ley lu te xjal nazarey oc tjapun baj aju kꞌij te xjansabl te: Tzul ttzi ja xbalun te mojbabl tibil, 14 ex ctzajel tkꞌoꞌn weye jun tal tman ẍneꞌl te jun abkꞌi ex mintiꞌ tpaltil, te jun oyaj tuꞌn tcub patit; ex jun tal ttxu ẍneꞌl te jun abkꞌi ex mintiꞌ tpaltil cxel tkꞌoꞌn te chojbil til, ex jun tman ẍneꞌl mintiꞌ tpaltil te oyaj te mojbabl tibil. 15 Ax icx ctzajel tiꞌn jun tal chiꞌl pan arin cytxꞌotxꞌil, mintiꞌ t-samel cyuj tuꞌn tjaw mal cycꞌuꞌj ex xyokꞌimaj tucꞌil aseyt, tucꞌix jun wik tal pan xaxj suꞌmaj aseyt cyiꞌj ex mintiꞌ t-samel tuꞌn tjaw mal cycꞌuꞌj, junx cyucꞌil ke mastl oyaj tiꞌj twitz awal tucꞌix taꞌl twitz uva. 16 Ctzajel tkꞌoꞌn pal tcyakil jlu weye tucꞌix chojbil te il ex aju oyaj patun in cub, 17 ex cxel tkꞌoꞌn tman ẍneꞌl te jun chojbil te mojbabl tibil, junx tucꞌil tal chiꞌl pan mintiꞌ t-samel cyuj tuꞌn tjaw mal cycꞌuꞌj ex ke oyaj tiꞌj twitz awal ex taꞌl twitz uva. 18 Atzunte xjal nazarey cꞌelel matzoꞌn ttzmal twiꞌ ttzi ja xbalun te mojbabl tibil, ctzajel tiꞌn ttzmal twiꞌ xjansamaj ex cꞌoquex tkꞌoꞌn tuj kꞌakꞌ aju in cꞌant tjakꞌ oyaj te mojbabl tibil. 19 Ctzajel ttzyuꞌn pal jun tkꞌab tman ẍneꞌl aju otok tzkꞌaj, tucꞌix jun pan mintiꞌ t-samel tuj tuꞌn tjaw mal tcꞌuꞌj, aju tcuꞌx tuj tal chiꞌl, ex jun tal pan xaxj mintiꞌ t-samel tuj tuꞌn tjaw mal tcꞌuꞌj, ex cxel tkꞌoꞌn tcyakil jlu tuj tkꞌab xjal nazarey otokxi tzꞌel matzoꞌn ttzmal twiꞌ. 20 Cbajel tyucun pal jlu nwitze te jun oyaj te weye, xjansamaj tuꞌn tajben te pal, junx tucꞌil t-xuꞌc tman ẍneꞌl ex tcux ctzajel kꞌoꞌn te jun oyaj weye. Tbajlenxi tcyakil jlu, baꞌn tuꞌn tcꞌan xjal nazarey tiꞌj taꞌl twitz uva.

21 Atzun ley lu te te xjal in tzaj ttziyan jun yol tuꞌn t-xjansante tib nwitze tuꞌn toc te nazarey, ex atzun ke oyaj tuꞌn ttzaj tkꞌoꞌn, ex mya toc te tajlal mastl oyaj jacu tzaj tkꞌoꞌn ka at tumel. At tuꞌn tjapun tuꞌn aju ctzajel ttziyan, ic tzaꞌnx in tman ley tuꞌn tbant.

22 O yolin Kman tucꞌil Moisés cyjaꞌ:

23 Kꞌmanxa te Aarón ex cye tcyꞌajal: Oc tcub cycyꞌiwlaꞌne ke aj Israel, cyjaꞌtzun ctelba cyuꞌne:

27 Cyjaꞌtzun tten tzul cynaꞌn ke pal nbiye oc cycub cyꞌiwlaꞌn ke aj Israel cyuꞌn, ex akine chin bel cyꞌiwlante cye.