Números 7

Ke oyaj tej t-xjanset ja xbalun te mojbabl tibil

Tuj kꞌij tej tbaj bant ja xbalun te mojbabl tibil tuꞌn Moisés, baj t-xjansaꞌn tuꞌn aseyt, junx cyucꞌil cycyakil ke tiꞌxti ateꞌ tuj ex tucꞌix altar ex cycyakil ke tmacbil. 2 Atzun ke nejenel cye junjun cꞌloj cyiyjil aj Israel, akeju otok che onin tiꞌj tuꞌn tjaw cyajlal xjal, tzaj cyiꞌn cyoyaj: 3 Ul cyiꞌn twitz Kman kak carwaj te ikal iktz ex cablaj wacẍ; jun carwaj tuꞌn cabe nejenel ex jun wacẍ tuꞌn junjun. Tcyakil jlu cub cykꞌoꞌn twitz ja xbalun te mojbabl tibil.

4 Xi tmaꞌn Kman te Moisés cyjaꞌ: 5 Cꞌmonxa ke carwaj cyucꞌix ke wacẍ, ex kꞌonxa cye aj Leví tuꞌn tajben cyuꞌn tuj akꞌuntl tiꞌj ja xbalun te mojbabl tibil, tzaꞌnx akꞌuntl cbantel cyuꞌn teyle junjun.

6 Tzajtzun tcꞌmoꞌn Moisés ke carwaj cyucꞌix ke wacẍ ex xi tkꞌoꞌn cye aj Leví. 7 Xi tkꞌoꞌn cabe carwaj ex cyaje wacẍ cye tiyjil Gersón tuꞌn cyajben tuj cyakꞌun. 8 Xi tkꞌoꞌn cyaje carwaj ex wajxak wacẍ cye tiyjil Merari tuꞌn cyajben tuj cyakꞌun, ex a Itamar aju tcyꞌajal pal Aarón in kꞌmante cyakꞌun. 9 Mintiꞌ xi tkꞌoꞌn carwaj ex mi wacẍ cye tiyjil Coat, porque ke macbil xjan, akeju ateꞌ tuj cycwent, at tuꞌn t-xi cyiꞌn twi cysemil.

10 Tej tbaj xjanset altar, ke nejenel cye aj Israel xi cyiꞌn cyoyaj ex cub cykꞌoꞌn twitz altar. 11 Xitzun tmaꞌn Kman te Moisés cyjaꞌ: Jun nejenel tuꞌn ttzaj tiꞌn toyaj tuj jun kꞌij, ex juntl tuj juntl kꞌij, ocxi cyex baj tuꞌn t-xjanset altar.

12 Tuj tnejel kꞌij xi tiꞌn Naasón toyaj, aju nejenel cye tiyjil Judá ex tcyꞌajal Aminadab. 13 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 14 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 15 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, te oyaj patun in cub, 16 tucꞌix jun tman chip te chojbil il, 17 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Naasón aju tcyꞌajal Aminadab.

18 Tuj tcabin kꞌij xi tiꞌn Natanael toyaj, aju nejenel cye tiyjil Isacar ex tcyꞌajal Zuar. 19 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 20 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 21 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, te oyaj patun in cub, 22 tucꞌix jun tman chip te chojbil il, 23 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Natanael aju tcyꞌajal Zuar.

24 Tuj toxin kꞌij xi tiꞌn Eliab toyaj, aju nejenel cye tiyjil Zabulón ex tcyꞌajal Helón. 25 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 26 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 27 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, te oyaj patun in cub, 28 tucꞌix jun tman chip te chojbil il, 29 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Eliab aju tcyꞌajal Helón.

30 Tuj tcyajin kꞌij xi tiꞌn Elisur toyaj, aju nejenel cye tiyjil Rubén ex tcyꞌajal Sedeur. 31 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌn malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 32 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 33 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, te oyaj patun in cub, 34 tucꞌix jun tman chip te chojbil il, 35 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Elisur tcyꞌajal Sedeur.

36 Tuj tjweꞌyin kꞌij xi tiꞌn Selumiel toyaj, aju nejenel cye tiyjil Simeón ex tcyꞌajal Zurisadai. 37 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 38 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 39 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, te oyaj patun in cub, 40 tucꞌix jun tman chip te chojbil il, 41 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Selumiel aju tcyꞌajal Zurisadai.

42 Tuj tkakin kꞌij xi tiꞌn Eliasaf toyaj, aju nejenel cye tiyjil Gad ex tcyꞌajal Deuel. 43 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 44 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 45 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, te oyaj patun in cub, 46 tucꞌix jun tman chip te chojbil il, 47 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Eliasaf aju tcyꞌajal Deuel.

48 Tuj twukin kꞌij xi tiꞌn Elisama toyaj, aju nejenel cye tiyjil Efraín ex tcyꞌajal Amiud. 49 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 50 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 51 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, te oyaj patun in cub. 52 tucꞌix jun tman chip te chojbil il, 53 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Elisama aju tcyꞌajal Amiud.

54 Tuj twajxakin kꞌij xi tiꞌn Gamaliel toyaj, aju nejenel cye tiyjil Manasés ex tcyꞌajal Pedasur. 55 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 56 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 57 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, te oyaj patun in cub, 58 tucꞌix jun tman chip te chojbil il, 59 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Gamaliel aju tcyꞌajal Pedasur.

60 Tuj tbelajiꞌn kꞌij xi tiꞌn Abidán toyaj, aju nejenel cye tiyjil Benjamín ex tcyꞌajal Gedeoni. 61 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 62 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 63 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, te oyaj patun in cub, 64 tucꞌix jun tman chip te chojbil il, 65 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Abidán aju tcyꞌajal Gedeoni.

66 Tuj tlajiꞌn kꞌij xi tiꞌn Ahiezer toyaj, aju nejenel cye tiyjil Dan ex tcyꞌajal Amisadai. 67 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 68 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 69 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, tuꞌn cyajben te oyaj patun in cub, 70 tucꞌix jun tman chip te chojbil il, 71 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Ahiezer aju tcyꞌajal Amisadai.

72 Tuj tjunlajin kꞌij xi tiꞌn Pagiel toyaj, aju nejenel cye tiyjil Aser ex tcyꞌajal Ocrán. 73 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 74 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 75 tucꞌix jun tal tor, jun tman ẍneꞌl ex jun tal tman ẍneꞌl te jun abkꞌi, te oyaj patun in cub, 76 tucꞌix jun tman chip te chojbil il, 77 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Pagiel aju tcyꞌajal Ocrán.

78 Tuj tcablajin kꞌij xi tiꞌn Ahira toyaj, aju nejenel cye tiyjil Neftalí ex tcyꞌajal Enán. 79 Aju toyaj xi tkꞌoꞌn, atzun jlu: Jun plat sak pwak ttxꞌotxꞌil mas te ox libr talil, ex jun matij lak ax sak pwak ttxꞌotxꞌil, mas te jun libr tucꞌ mey talil, ic tzaꞌnx malbil in ajben tuj ja xbalun te mojbabl tibil, ex cycabil ke jlu nojni tuꞌn arin tbanilxix xyokꞌimaj tucꞌil aseyt, te jun oyaj tiꞌj twitz awal; 80 tucꞌix jun pacꞌ kꞌan pwak ttxꞌotxꞌil mas te ox ons talil, nojni tuj tuꞌn storac, 81 tucꞌix jun tal tor, jun tman ẍneꞌl ex jun tal tman ẍneꞌl te jun jun abkꞌi, te oyaj patun in cub, 82 tucꞌix jun tman chip te chojbil il, 83 cyucꞌix cabe tor, jweꞌ tman ẍneꞌl, jweꞌ tman chip ex jweꞌ tal tman ẍneꞌl te jun abkꞌi, tuꞌn cyajben te chojbil te mojbabl tibil. Atzun ke jlu toyaj Ahira aju tcyꞌajal Enán.

84 Atzun ke oyaj lu pon cyiꞌn ke nejenel cye aj Israel tej tbaj xjanset altar; xi cykꞌoꞌn cablaj plat sak pwak cytxꞌotxꞌil, cablaj lak matij sak pwak cytxꞌotxꞌil ex cablaj pacꞌ kꞌan pwak cytxꞌotxꞌil. 85 Teyle junjun plat sak pwak ttxꞌotxꞌil mas te ox libr talil, ex teyle junjun lak matij ax sak pwak ttxꞌotxꞌil, mas te jun libr tucꞌ mey talil. Aju talil sak pwak cytxꞌotxꞌil ke plat tucꞌix sak pwak cytxꞌotxꞌil ke lak matij, japun jun tajlal te 60 libr tuꞌn tcyakilx, tzaꞌnx malbil in ajben tuj ja xbalun te mojbabl tibil. 86 Ex cablaj pacꞌ kꞌan pwak cytxꞌotxꞌil nojni tuꞌn storac, mas te ox ons talil junjun, ic tzaꞌnx malbil in ajben tuj ja xbalun te mojbabl tibil. Aju talil kꞌan pwak cytxꞌotxꞌil ke pacꞌ japun jun tajlal te ox libr tuꞌn tcyakilx.

87 Aju cyajlal alumaj tuꞌn cycub patit, o bant cablaj tal tor, cablaj tman ẍneꞌl, cablaj tal tman ẍneꞌl te jun abkꞌi, cyucꞌix ke oyaj tiꞌj twitz awal ex cablaj tman chip te chojbil il. 88 Ke alumaj te chojbil te mojbabl tibil, japun jun cyajlal te 24 tal tor, 60 tman ẍneꞌl, 60 tman chip ex 60 tal tman ẍneꞌl te jun abkꞌi. Atzun ke oyaj lu e tzaj kꞌoꞌn tuꞌn ticꞌset tkꞌij altar, tbajlenxi xjansaꞌn.

89 Oc tocx Moisés tuj ja xbalun te mojbabl tibil tuꞌn tyolin tucꞌil Kman, in tbiꞌn nneꞌtz yolin Kman tibaj tmaksil cax cꞌubl tley Dios cyxol ke cabe querubín, ex in yolin tucꞌil.