2 Kꞌmanxa te Aarón cyjaꞌ: Oc cyoc ttxakoꞌn ke wuk candil, baꞌn tuꞌn t-xi tbinchaꞌn cyten tuꞌn t-xiꞌ cyspicꞌumal cywitzx. 3 O tbincha Aarón ic tzaꞌnx otok tma Kman te Moisés, oc ttxakoꞌn ke candil tuꞌn t-xiꞌ cyspicꞌumal cywitzx. 4 Aju tcubl candil lu kꞌan pwak ttxꞌotxꞌil, txꞌinoꞌn tuꞌn martiy tzajnix keꞌ max t-xeꞌ ex ponin baj max tuj twiꞌ. O tbincha Moisés ic tzaꞌnx binchben te otok tzaj tmaꞌn Kman.

5 Tzaj yolin Kman tucꞌil Moisés ex tma:

6 Paꞌn ela ke aj Leví cyiꞌj aj Israel ex saksaꞌn baja ke. 7 Atzun jlu cbantel tuꞌna tuꞌn cysakset: Cꞌoquel tchituna aꞌ te saksabl cyiꞌj, cꞌelel cyiꞌn xyaꞌn tiꞌj tcyakil cyximlal tuꞌn jun navaj ex cjawitz cytxꞌjoꞌn tiꞌj cyxbalun; cyjaꞌtzun tten che saksetel. 8 Ctzajel cyiꞌn jun tal tor tucꞌix chꞌin arin tbanil xyokꞌimaj tucꞌil aseyt te oyaj tiꞌj twitz awal, ex ctzajel tiꞌna juntl tal tor te chojbil il. 9 Che tzajel tiꞌna ke aj Leví tuꞌn cyul lakꞌeꞌ twitz ja xbalun te mojbabl tibil, ex che oquel tchmoꞌna cycyakil aj Israel. 10 Octzun cytzaj tiꞌna aj Leví nwitze, cbel cykꞌoꞌn aj Israel cykꞌab tibaj cywiꞌ. 11 Che tzajel tkꞌoꞌn Aarón ke aj Leví weye te jun oyaj te cyxel aj Israel, tuꞌntzun cyajben aj Leví oꞌcx weye. 12 Te tibajxi cbel cykꞌoꞌn aj Leví cykꞌab tibaj cywiꞌ ke tal tor; cxeltzun kꞌot jun tal tor te chojbil il, atzun juntl cxel kꞌot te jun chojbil patun in cub nwitze tuꞌn tnajset cyil aj Leví. 13 Che beltzun tkꞌoꞌna aj Leví twitz Aarón ex cywitz ke tcyꞌajal, ex che tzajel tkꞌoꞌna te jun oyaj weye; 14 cyjaꞌtzun tten che elel tpaꞌna aj Leví cyxol aj Israel tuꞌntzun cyoc te weye. 15 Te tibajxi baꞌntzun tuꞌn cytzaj tuj ja xbalun te mojbabl tibil tuꞌn cyajben weye. Tnejel che bajel t-saksaꞌna ex che tzajel tkꞌoꞌna te weye ic tzaꞌn jun oyaj, 16 porque cyxol cycyakil aj Israel ma che oc aj Leví te weye. Ma che ncꞌame ke te cyxel cycyakil nej cycyꞌajal aj Israel. 17 Porque weye cycyakil nej cycyꞌajal aj Israel, ax icx nej cyal alumaj. Tej cycyim ke nej cycyꞌajal aj Ejipt wuꞌne, biꞌxtzun e jeꞌl npaꞌne ke nej cycyꞌajal aj Israel tuꞌn cyoc te weye. 18 Pero te cyxeltzun ke nej cycyꞌajal aj Israel, ma che oc ke aj Leví te weye, 19 ex e jeꞌx nkꞌoꞌne ke tuj tcwent Aarón ex tuj cycwent ke tcyꞌajal, tuꞌntzun cyajben tuj ja xbalun te mojbabl tibil te cyxel aj Israel, ex tuꞌn tchjet cyil aj Israel cyuꞌn, tuꞌntzun miꞌn ttzaj jun castiw cyibaj aj Israel oc cypon lakꞌeꞌ twitz njaye, chi Kman te Moisés.

20 Cybinchatzun Moisés, tucꞌix Aarón, cyucꞌix cycyakil tnam xjal cyiꞌj aj Leví ic tzaꞌnx otok tma Kman te Moisés. 21 Bajtzun cysaksan cyib aj Leví ex jatz cytxꞌjoꞌn tiꞌj cyxbalun, e jeꞌxtzun kꞌoꞌn tuꞌn Aarón te jun oyaj te Kman ex xi tkꞌoꞌn Aarón chojbil cyil tuꞌn cysakset. 22 Tbajlenxitzun tcyakil jlu, e ocxtzun aj Leví tuꞌn cyakꞌnan twitz ja xbalun te mojbabl tibil, ex a Aarón ex ke tcyꞌajal e tzaj kꞌmante cyakꞌun. Cybinchatzun cyiꞌj aj Leví ic tzaꞌnx otok tzaj tmaꞌn Kman te Moisés.

23 Tzaj yolin Kman tucꞌil Moisés ex tma:

24 Ctzyetel cyakꞌnan aj Leví tuj ja xbalun te mojbabl tibil oc tjapun 25 abkꞌi cyuꞌn, 25 ex che elel kꞌit tiꞌj cyakꞌun ocxi cyjapun twiꞌ 50 abkꞌi. 26 Te tibajxi jlu, oꞌcx che ajbel tuꞌn cyonin cyiꞌj cyerman twitz ja xbalun te mojbabl tibil, tuꞌn cycwentin cyiꞌj ke tiꞌxti, pero mlay che akꞌnan ic tzaꞌn nej. Cyjaꞌtzun che tembil aj Leví tuj cyakꞌun tuꞌna.