2 Il tiꞌj tuꞌn tcub cyicꞌsaꞌn aj Israel Xjan Kꞌij tujxix tkꞌijlalil. 3 Ctzyetel cyuꞌn te kale tuj cyajlaj tajlal xjaw lu, ic tzaꞌnx banimaj tiꞌj, ex tuꞌn tbant tcyakil tiꞌj ic tzaꞌnx in cymaꞌn ke xnakꞌtzbil ex ke ley o txi nmaꞌne teya, chi Kman te Moisés.

4 Xitzun tmaꞌn Moisés cye aj Israel tuꞌn tcub cyicꞌsaꞌn Xjan Kꞌij, 5 ex cub cyicꞌsaꞌn te kale tuj cyajlaj tajlal tnejel xjaw, tuj tzkij txꞌotxꞌ t-xe witz Sinaí. Binchet tcyakil cyuꞌn ic tzaꞌnx otok tma Kman te Moisés.

6 Pero ateꞌtok junjun xinak otok baj cytzꞌilsan cyib tuꞌnju otok tzꞌoc cymacoꞌn jun cyimni, ex cyjaꞌtzun mintiꞌ tumel tuꞌn tcub cyicꞌsan Xjan Kꞌij tujx kꞌij lu. E jeꞌxtzun tucꞌil Moisés ex Aarón tujx kꞌij lu, 7 ex xi cymaꞌn cyjaꞌ:

—Tzꞌil koꞌye tuꞌnju ma tzꞌoc kmacoꞌne jun cyimni. ¿Maj miꞌntzun txi kkꞌoꞌne koyaje te Kman tuj kꞌij lu junx cyucꞌil mastl aj Israel?

8 Atzunte Moisés xi ttzakꞌweꞌn:

—Che ayone nej alcye ctzajel tmaꞌn Kman cyiꞌje.

9 Tzaj yolin Kman tucꞌil Moisés ex tma:

10 Kꞌmanxa cye aj Israel jlu: Ka at junjun cyeye ex ka junjun cyiyjile, tzꞌil ateꞌ tuꞌnju otok tzꞌoc cymacoꞌn jun cyimni, ex ka mi aꞌl tuꞌnju ateꞌ tuj jun cybe najchak, 11 baꞌn tuꞌn tcub cyicꞌsaꞌn Xjan Kꞌij te kale tuj tcyajlajin tajlal tcabin xjaw. Cxel cychyoꞌn tal tman ẍneꞌl tucꞌil itzaj cꞌa ex pan mintiꞌ t-samel tuj tuꞌn tjaw mal tcꞌuꞌj, 12 ex miꞌn cyaj cykꞌoꞌn chꞌin chibj te juntl kꞌij ex mi jun tbakil cbel cytokin. Cbel cyicꞌsaꞌn Xjan Kꞌij lu ic tzaꞌnx tcyakil ley o txi nmaꞌne. 13 Katzun at jun xjal mya ttzꞌilsan tib ex ax taꞌ tuj tja ex mintiꞌ ma cub ticꞌsaꞌn Xjan Kꞌij, cꞌelex lajet xjal lu, tuꞌntzun miꞌn ttentl cyxol t-xjalil, tuꞌnju mintiꞌ otok tzaj tkꞌoꞌn toyaj weye tuj kꞌij banimaj tiꞌj. At til xjal tiꞌj jlu.

14 Katzun at jun stranjer xjal najl cyxole taj tuꞌn tcub ticꞌsaꞌn Xjan Kꞌij te nimbil weye, il tiꞌj tuꞌn tcub ticꞌsaꞌn ic tzaꞌnx tcyakil xnakꞌtzbil ex ley o txi nmaꞌne. Ax ley ctel cyxol stranjer xjal ic tzaꞌnx cye aj Israel.

15 Tuj kꞌij tej tjaw binchaꞌn ja xbalun te mojbabl tibil, biꞌx o cub ten muj tlugaril jatum tcub cax cꞌubl tley Dios. Oc koc yupj, aju muj nnoꞌc queꞌyin ic tzaꞌn kꞌakꞌ, ex cucx tten oc tjawil kꞌij. 16 Cucx o ten tcyakil maj icju; te kꞌijl in cub ten muj tibaj tja Dios, ex te konicꞌan nnoꞌc queꞌyin muj ic tzaꞌn kꞌakꞌ. 17 Ex octzun tjaw lakꞌeꞌ muj tibaj ja xbalun te mojbabl tibil in che icꞌtzun lakꞌeꞌ aj Israel, ex jatum in weꞌ muj, axtzun in che cub ten aj Israel. 18 Ocxi ttzaj tmaꞌn Kman tuꞌn cyicꞌ lakꞌeꞌ aj Israel, in che icꞌtzun, ex oc ttzaj tmaꞌn jatum tuꞌn cyweꞌ, axtzun in che weꞌ. Nok jteꞌ kꞌij in cub ten muj tibaj ja xbalun te mojbabl tibil, ax icx cye aj Israel axtzun in che cub ten. 19 Ex oc tweꞌ muj nim kꞌij tibaj ja xbalun te mojbabl tibil, ax icx cye aj Israel in xi cyniman tyol Kman, ex axtzun in che cub ten. 20 Ex at maj nicꞌxi kꞌij in weꞌ muj tibaj ja xbalun te mojbabl tibil. Ax Kman in kꞌmante cye tuꞌn cyweꞌ, ex ax in kꞌmante tuꞌn cyicꞌ lakꞌeꞌ. 21 At maj oꞌcx jun konicꞌan in weꞌ muj, atzunte prim in jaw lakꞌeꞌ ex in cubtzun be cyuꞌn aj Israel. Ka kꞌijl ex ka konicꞌan, oc tjaw lakꞌeꞌ muj in che icꞌtzun lakꞌeꞌ. 22 Katzun cabe kꞌij, ka jun xjaw ex ka jun abkꞌi ma cub ten muj tibaj ja xbalun te mojbabl tibil, ax icx cye aj Israel ax in che ten ex mintiꞌ in che icꞌ lakꞌeꞌ. Pero octzun tjaw lakꞌeꞌ muj, in cubtzun be cyuꞌn. 23 Ocxi ttzaj tmaꞌn Kman tuꞌn cycub ten tuj jun lugar, axtzun in che cub ten, ex ocxi ttzaj tmaꞌn Kman tuꞌn cyicꞌ lakꞌeꞌ, in che icꞌtzun lakꞌeꞌ. Xi cyniman tyol Kman ic tzaꞌnx otok tzaj tmaꞌn Kman te Moisés.