Ke chun sak pwak cytxꞌotxꞌil
10
Tzaj yolin Kman tucꞌil Moisés ex tma:2 Binchan baja cabe chun sak pwak cytxꞌotxꞌil, txꞌinoꞌn tuꞌn martiy, tuꞌn tajben te chmobl xjal, ex cꞌoquel kꞌajtzet te jun techal tuꞌn cyicꞌ lakꞌeꞌ xjal. 3 Oc cyoc kꞌajtzet cycabil chun, cycyakil xjal cꞌoquel cychmon cyib twitza ttzi ja xbalun te mojbabl tibil. 4 Katzun junx chun ma tzꞌoc kꞌajtzet, oꞌcxtzun cye nejenel cye junjun cꞌloj cyiyjil aj Israel cꞌoquel cychmon cyib tucꞌila. 5 Octzun cyoc kꞌajtzet tnejel maj chun chꞌin cyxol tkꞌajkꞌajel, cbeltzun be cyuꞌn xjal cycub tuj tumlal tjawitz kꞌij, 6 ex oc cyoc kꞌajtzaꞌn tcabin maj chun, cbeltzun be cyuꞌn keju cycub tuj tumlal tnayaj kꞌij. Oc cyoc kꞌajtzet chun chꞌin cyxol tkꞌajkꞌajel, atzun techal tuꞌn tcub be cyuꞌn xjal. 7 Atzun oc cyoc kꞌajtzet chun maꞌ cyxol tkꞌajkꞌajel, atzun techal tuꞌn toc cychmon cyib cycyakil xjal. 8 Tuj cycwent pal, akeju tcyꞌajal Aarón, tuꞌn cyoc kꞌajtzet chun. Aju ley lu cyjel ten cyucꞌile te jumajx ex wikinwik cyjel cymaꞌne cye cycꞌwaꞌle.
9 Ex ka ma che ul aj kꞌoj kꞌojlel cyiꞌje tuj cytanmiye, cꞌoquel cykꞌajtzaꞌne chun ex che jawil schꞌiꞌne nim, tuꞌn cyexe kꞌojlel cyucꞌil, tuꞌntzun cytzaj nnaꞌne, akine cymane ex Cydiose; ex che cletele wuꞌne cywitz aj kꞌoj cyiꞌje. 10 Ex cykꞌajtzaꞌn oque chun cyuj kꞌij te tzalajbil, cyuj ninkꞌij, ex cyuj kꞌij oc cytzaj queꞌyin acꞌaj xjaw, ex oc t-xi cykꞌoꞌne cyoyaje patun in cub ex ju chojbil te mojbabl tibil, tuꞌntzun cytzaj nnaꞌne. Akine Cymane ex Cydiose, chi Kman te Moisés.
E icꞌ aj Israel t-xe witz Sinaí
11 Tuj winkin tajlal tcabin xjaw te tcabin abkꞌi, jaw lakꞌeꞌ muj tibaj ja xbalun jatum cꞌuꞌn tley Dios, 12 ex cubtzun be cyuꞌn aj Israel. E icꞌ tuj tzkij txꞌotxꞌ Sinaí ex atzun o weꞌ muj tuj tzkij txꞌotxꞌ Parán. 13 Atzun tnejel maj e bet ic tzaꞌnx otok tzaj tmaꞌn Kman te Moisés: 14 Tnejelxix nejni ke soldad aj Judá tucꞌil cybander kꞌiꞌn; aju nejenel cyxol soldad lu, atzun Naasón aju tcyꞌajal Aminadab, 15 atzun nejenel cyxol soldad tiyjil Isacar, atzun Natanael aju tcyꞌajal Zuar, 16 ex aju nejenel cyxol soldad tiyjil Zabulón, atzun Eliab aju tcyꞌajal Helón. 17 Tejtzun tbaj cycoꞌpin ja xbalun te mojbabl tibil, ake tiyjil Gersón ex tiyjil Merari e jeꞌx ikante te ex cub be cyuꞌn.
18 Lepchix e jeꞌx soldad tiyjil Rubén, tucꞌix cybander kꞌiꞌn, ex aju nejenel cyxol, atzun Elisur aju tcyꞌajal Sedeur; 19 aju nejenel cyxol soldad tiyjil Simeón, atzun Selumiel aju tcyꞌajal Zurisadai, 20 ex aju nejenel cyxol soldad tiyjil Gad, atzun Eliasaf aju tcyꞌajal Deuel. 21 Lepchix e jeꞌx ke tiyjil Coat, kꞌiꞌn ke macbil xjan cyuꞌn. Oc in che pon tuj jun lugar, ya otok jaw binchaꞌn ja xbalun te mojbabl tibil.
22 Ex akeju lepchix cyiꞌj, atzun ke soldad tiyjil Efraín, tucꞌix cybander kꞌiꞌn, ex aju nejenel cyxol, atzun Elisama aju tcyꞌajal Amiud; 23 aju nejenel cyxol soldad tiyjil Manasés, atzun Gamaliel aju tcyꞌajal Pedasur, 24 ex aju nejenel cyxol soldad tiyjil Benjamín, atzun Abidán aju tcyꞌajal Gedeoni.
25 Te mancbilxitzun e jeꞌx lpeꞌ ke soldad tiyjil Dan, tucꞌix cybander kꞌiꞌn, ex aju nejenel cyxol, atzun Ahiezer aju tcyꞌajal Amisadai; 26 aju nejenel cyxol soldad tiyjil Azer, atzun Pagiel aju tcyꞌajal Ocrán, 27 ex aju nejenel cyxol soldad tiyjil Neftalí, atzun Ahira aju tcyꞌajal Enán.
28 Cyjaꞌtzun e tenba ke soldad aj Israel tej cybet.
Xi ttxcoꞌn Moisés tbalc tuꞌn t-xiꞌ cyucꞌil
29 At jun kꞌij xi tmaꞌn Moisés te Hobab aju tbalc, aju tcyꞌajal Reuel, aju aj Madián ex tjiꞌ Moisés, ex chi cyjaꞌ:
—Ma koꞌx keye tuj txꞌotxꞌ o tzaj ttziyan Kman tuꞌn ttzaj tkꞌoꞌn keye. Koꞌ kucꞌile ex baꞌn ctela kuꞌne, porque ma tzaj ttziyan Kman tuꞌn tbinchante baꞌn cye aj Israel.
30 Atzunte Hobab xi ttzakꞌweꞌn:
—Mlay chinxe cyucꞌile, nok oꞌcx chin ajel meltzꞌaje tuj ntxꞌotxꞌe jatum ateꞌ ke xjal at nxilene cyucꞌil.
31 Atzunte Moisés xi tmaꞌn te:
—Miꞌn tzꞌaja, ojtzkiꞌn ke lugar tuꞌna jatum baꞌn tuꞌn kcub ten tuj tzkij txꞌotxꞌ, ex jacu tzꞌajbena yecꞌul be keye. 32 Ka ma txiꞌya kucꞌile, jacu tzꞌoca te tajlal kuꞌne tiꞌj tcyakilju baꞌn tzul tkꞌoꞌn Kman keye.
33 Cyjaꞌtzun tten e icꞌ t-xe witz te Kman ex e bet ox kꞌij. Aju cax cꞌubl tley Dios nejnitok cywitz, in jyon tiꞌj jun lugar jatum tuꞌn cyojlan. 34 Te kꞌijl, oc ttzyet cybe, in bet muj te Kman cyibaj. 35 Ex octzun ticꞌ cyiꞌn cax, in xi tmaꞌn Moisés cyjaꞌ:
Weꞌctza Nman. E cyel sputj ke aj kꞌoj tiꞌja, ex e cyel ok keju in che icꞌun teya.
36 Ex oc tpon cax jatum tuꞌn tcub ten, in xi tmaꞌn Moisés cyjaꞌ:
Tajtza jaꞌlo Nman cyucꞌil cycyakil cꞌloj aj Israel miban cyajlanjtz.