4 Otok tzꞌoc cysmon cyib elaꞌ txcaj xjal cyucꞌil aj Israel, ex ake jlu oꞌcx in che ximan tiꞌj cychiꞌ; ax icx cye aj Israel el cycanoꞌn cyiꞌj e oc ten okꞌel ex cyma: Ay, nokwit at jun baꞌn ttzaj kꞌonte kchiꞌ chibj. 5 Cucx tul tiꞌj kcꞌuꞌj kcotz cyiẍ oc tbaj kuꞌn tuj Ejipt, tucꞌix pepin, melón, jun wik seboy puerro tbi, seboy ex anjs. 6 Atzun jaꞌlo ma baj kgan tiꞌj maná, porque oꞌcx maná in baj kuꞌn, che chi.

7 Aju maná mer ic queꞌyin ic tzaꞌn iyaj culantr, ẍkꞌanyin queꞌyin ic tzaꞌn tkꞌolil tzaj. 8 In che ex xjal chmolte te ex oc tjaw cycheꞌn ex ka oc tbaj cytxꞌinoꞌn, in jax cytzkꞌajsaꞌn tuj cꞌil ex ka in cub cybinchaꞌn ic tzaꞌn wabj, ex aju tcꞌocꞌjal nnoꞌc ic tzaꞌn pan xiꞌyni aseyt tuj. 9 Oc tcub tkꞌab cheꞌw te konicꞌan tuj campament ax icx in cub aju wabj maná.

10 O tbi Moisés in che okꞌtok cycyakil aj Israel ttziꞌyile cyja xbalun. Tzajtzun nim tkꞌoj Kman cyiꞌj, ax icx te Moisés mya baꞌn ela tuj twitz, 11 ex xi tmaꞌn te Kman:

—¿Tikuꞌn in tbinchaꞌna mya baꞌn wiꞌje, akine tmajena? ¿Titzun tkꞌoja wiꞌje, tuꞌnju ma che cyaj tkꞌoꞌna ke xjal lu tuj ncwente ex ma che oc te weye ic tzaꞌn jun iktz alxix? 12 Baka akine cyman xjal lu ex baka akine cytxuꞌ, tuꞌn ttzaj tmaꞌna weye tuꞌn cyxi npaloꞌne ic tzaꞌn neꞌ, ex tuꞌn cypon wiꞌne max tuj txꞌotxꞌ xi ttziyana cye cyxeꞌchel. 13 ¿Jatum ctzajel wiꞌne chibj tuꞌn t-xi kꞌot te cychiꞌ cycyakil xjal lu? In che okꞌ ex in che ul kꞌmalte wucꞌile: Kꞌontza chibj te kchiꞌye, che chi. 14 Mlayx chin xcyeꞌye tuꞌn cyxi wiꞌne cycyakil xjal lu njunalxe; jun iktz jlu alxix te weye. 15 Ka a jlu cbantel tuꞌna wiꞌje, mejor chin tbyoncuya. Ka axix toc in chin tcꞌujlaꞌna, miꞌn takꞌa ambil tuꞌn ntentle tuj yajbil weye, chi Moisés.

16 Atzunte Kman xi ttzakꞌweꞌn:

—Che chmon oca 70 tij xjal cyxol aj Israel, akeju ojtzkiꞌn tuꞌna at cyoclen cyxol xjal; che kꞌintza ke tuj ja xbalun te mojbabl tibil ex ax e cyayon tucꞌila. 17 Chin beletze ex chin yolile tucꞌila; cꞌelel wiꞌne chꞌin toclena aju tcꞌama tuꞌn Xewbaj Xjan, ex cxel nkꞌoꞌne cye, tuꞌntzun cyonin tucꞌila tuꞌn cyoc cwentit ke xjal lu, tuꞌntzun miꞌn cyten xjal oꞌcx tuj teya tcwent. 18 Kꞌmanxa cye xjal tuꞌn cybaj cyxjansan cyib te nchiꞌj ex che chyoꞌl chibj, porque o che nbiye in che okꞌ ex in cymaꞌn: Nokwit at jun baꞌn ttzaj kꞌonte kchiꞌ chibj; mas baꞌntok kten tuj Ejipt, che chi. Ax baꞌn, cxel nkꞌoꞌne cychiꞌ chibj, 19 ex mya oꞌcx te jun kꞌij, mi te cabe kꞌij, mi te jweꞌ, mi te laj mi te winkin. Miꞌn. 20 Che chyoꞌl chibj tuj enter jun xjaw, ocxi tjawil noj tuj cykul tuꞌn ttzaj xab cycꞌuꞌj, porque ma chin el icꞌune cyuꞌn, akine Cyman atine cyxol. Ma che okꞌ ex ma cyma nwitze: ¿Tzaꞌn tten xko etz tuj Ejipt?

21 Atzunte Moisés xi ttzakꞌweꞌn:

—At kak syent mil soldad wucꞌile, ex atzun teya in tmaꞌna ka tuꞌn ttzaj tkꞌoꞌna kchiꞌye chibj tuj enter jun xjaw. 22 ¿Jatum at nim ẍneꞌl ex wacẍ tuꞌn cycub byet ex tuꞌn tcanun te cychiꞌ cycyakil xjal lu? Masque tzaj tkꞌoꞌna cycyakil cyiẍ at tuj mar te cychiꞌ, mlaylo canun cye, chi Moisés.

23 Atzunte Kman tzaj ttzakꞌweꞌn:

—¿Nokpe chꞌin wipumale tuj twitza? Jaꞌlo cꞌoquel tqueꞌyina ka cjapunel ex ka miꞌn aju ma txi nmaꞌne teya.

24 Etztzun Moisés ex xi ttxꞌolbaꞌn cye xjal aju otok tma Kman. Te tibajxi oc tchmoꞌn Moisés 70 tij xjal cyxol aj Israel ex e cub ttxolbaꞌn tiꞌjele ja xbalun te mojbabl tibil. 25 Cuꞌtztzun Kman tuj muj ex o yolin tucꞌil Moisés; eltzun tiꞌn Kman chꞌin toclen Moisés, aju otok tcꞌam tuꞌn Xewbaj Xjan, ex xi tkꞌoꞌn cye 70 tij xjal. Tej tcub ten Xewbaj Xjan cyibaj, e octzun ten yolil ic tzaꞌn t-sanjel Dios, pero mintiꞌtl e yolin juntl maj icju.

26 At cabe xinak, jun Eldad tbi, atzun juntl Medad tbi. Akeju cabe xinak lu, ajun ke cyoc te tajlal cyxol 70 tij xjal pero mintiꞌ e jeꞌx tuj ja xbalun te mojbabl tibil, nok oꞌcx ax e cyaj ten tuj campament. Ax icx ul Xewbaj Xjan cyucꞌil ex e oc ten yolil ic tzaꞌn t-sanjel Dios. 27 Entons tzaj kelan jun cuꞌxun kꞌmalte te Moisés cyjaꞌ:

—Ate Eldad ex Medad in che yolin cyxol xjal mer ic tzaꞌn t-sanjel Dios ke, chi cuꞌxun.

28 Atzunte Josué aju tcyꞌajal Nun, aju matok cuꞌxunx tej toc te onil te Moisés, tma:

—Tat Moisés, kꞌmanxa cye tuꞌn miꞌn cyyolin icju.

29 Xi ttzakꞌweꞌn Moisés:

—¿Apetzun taja oꞌcx weye tuꞌn tten woclene? Nokwit baꞌn t-xi tkꞌoꞌn Kman T-xew cye cycyakil tnam xjal etzan tuꞌn, ex tuꞌn cyoc cycyakil te t-sanjel Dios.

30 Ajtzun meltzꞌaj Moisés cyucꞌix cytijil xjal cyxol aj Israel tuꞌn cypon tuj campament.

31 Tzaj txkan cykꞌikꞌ tuj mar tuꞌn Kman, tzaj tiꞌn cykꞌikꞌ txkan tzꞌuchin ex e cub tzꞌak tiꞌjele campament, ex balo te jun kꞌij tbetj jatum ponin baj cytxaꞌn tiꞌjele campament. In che lipan nikayin twitz txꞌotxꞌ, balo te jun var cyjaw tibaj txꞌotxꞌ. 32 Tuj enter kꞌij ex enter konicꞌan ex tuj enter juntl kꞌij e chmon xjal cyiꞌj tzꞌuchin. Aju xjal nicꞌxi tzꞌuchin chmet tuꞌn, nok laj byuj chmet tuꞌn, ex cub cytzkijsaꞌn tiꞌjele campament. 33 Matoktzun nnoꞌcx cykꞌoꞌn cychiꞌ tzꞌuchin tuj cytziꞌ, naꞌnxtok tbaj cycocꞌsaꞌn, tzaj tkꞌoj Kman cyiꞌj, tzaj tkꞌoꞌn cycastiw ex e cyim nimcu xjal. 34 Cyjaꞌtzun oc cykꞌoꞌn tbi lugar lu Kibrot-hataava, porque atzun lugar jatum e cuꞌx makuꞌn ke xjal oꞌcx toc cycꞌuꞌj tiꞌj cychiꞌ.

35 Tuj lugar Kibrot-hataava cub be cyuꞌn tnam xjal tuꞌn cypon tuj lugar Hazerot ex atzun e cub ten.