E oc ten María ex Aarón yolil mya baꞌn tiꞌj Moisés
12
E oc ten María ex Aarón yolil mya baꞌn tiꞌj Moisés tuꞌnju otok jaw mojeꞌ Moisés tucꞌil jun xuꞌj aj Etiopía. 2 Ax icx o cyma: Mya nok oꞌcx tucꞌil Moisés in yolin Kman, ax icx in yolin kucꞌil. Ex o tbi Kman cyyol. 3 Ax toc ate Moisés mansxix, mas mans cywitz mastl xjal twitz txꞌotxꞌ. 4 Jurattzun xi tmaꞌn Kman te Moisés, te Aarón ex te María cyjaꞌ: Cyxiꞌye cyoxile twitz ja xbalun te mojbabl tibil.E jeꞌxtzun cyoxil. 5 Cuꞌtztzun Kman tuj muj, cub ten ttzi ja xbalun te mojbabl tibil ex xi ttxcoꞌn Aarón tucꞌix María. Tejtzun cycanun twitz, 6 tzaj tmaꞌn cye: Cybintze aju cxel nmaꞌne cyeye: Ka at jun nsanjele cyxole, in chin yoline tucꞌil mer ic tzaꞌn tuj witzicꞌ, ex ka tuj twitzicꞌ, 7 atzun tucꞌil nmajene Moisés mintiꞌ in bant wuꞌne icju. Ate Moisés mas in japun tuꞌn cywitz cycyakil nmajene. 8 In chin yoline tucꞌil Moisés nwitzeleye tucꞌil jun yol chicꞌlxix, ex mya tuj techal, ex in chin ilwaje tuꞌn. ¿Tzaꞌntzun tten mintiꞌ ma tzaj cyxobile tuꞌn cyyoline mya baꞌn tiꞌj nmajene Moisés?
9 Tzaj nimxix tkꞌoj Kman cyiꞌj cycabil ex ajtzun. 10 Tejtzun tjaw lakꞌeꞌ muj tibaj ja xbalun te mojbabl tibil, lu María otok jawil txꞌaꞌc tiꞌj, aju mintiꞌ kꞌanbil tiꞌj, ex sak oc queꞌyin tcyakil t-ximlal tuꞌn txꞌaꞌc. Tejtzun t-xi tqueꞌyin Aarón tiꞌj María otok jawil txꞌaꞌc tiꞌj aju mintiꞌ kꞌanbil tiꞌj, 11 xi tmaꞌn te Moisés: Binchama xtalbil tat, miꞌn cub tkꞌoꞌna kcastiwoye tiꞌj ju il ma kbinchaye tuꞌn kchcyinibile. 12 Miꞌn takꞌa ambil tuꞌn toc María ic tzaꞌn jun cꞌwaꞌl otok cyim naꞌnxtok tul itzꞌj ex oc tul itzꞌj otok baj kꞌay mij t-ximlal.
13 Octzun ten Moisés cubsal twitz Kman ex tma: Nman Dios, in chin cubsane twitza tuꞌn tbanix María tuꞌna.
14 Tzaj ttzakꞌweꞌn Kman te Moisés: Nokwit a tman ma tzꞌocx tzubante tuj twitz, mawtlo cyaj ten wuk kꞌij tuj tchꞌixwi. E tex tuꞌn tten wuk kꞌij tiꞌjxi campament, ex te tibajxi baꞌn tuꞌn tul meltzꞌaj juntl maj.