2 Samanxa junjun xinak queꞌyilte txꞌotxꞌ Canaán aju cxel nkꞌoꞌne cye aj Israel. Samanxa junjun xinak maꞌ cyoclen, jun cyxol teyle junjun cꞌloj aj Israel.

3 E jeꞌxtzun t-samaꞌn Moisés tej ateꞌtok tuj tzkij txꞌotxꞌ Parán, ic tzaꞌnx otok tma Kman. Cycyakil ke xinak e jeꞌx samaꞌn, nejenel ke cyxol aj Israel, 4 ex atzun ke jlu: Cyxol tiyjil Rubén, a Samúa xiꞌ, aju tcyꞌajal Zacur; 5 cyxol tiyjil Simeón, a Safat xiꞌ, aju tcyꞌajal Hori; 6 cyxol tiyjil Judá, a Caleb xiꞌ, aju tcyꞌajal Jefone; 7 cyxol tiyjil Isacar, a Igal xiꞌ, aju tcyꞌajal José; 8 cyxol tiyjil Efraín, a Oseas xiꞌ, aju tcyꞌajal Nun; 9 cyxol tiyjil Benjamín, a Palti xiꞌ, aju tcyꞌajal Rafú; 10 cyxol tiyjil Zabulón, a Gadiel xiꞌ, aju tcyꞌajal Sodi; 11 cyxol tiyjil José, tiꞌj tiyjil Manasés, a Gadi xiꞌ, aju tcyꞌajal Susi; 12 cyxol tiyjil Dan, a Amiel xiꞌ, aju tcyꞌajal Gemali; 13 cyxol tiyjil Aser, a Setur xiꞌ, aju tcyꞌajal Micael; 14 cyxol tiyjil Neftalí, a Nahbi xiꞌ, aju tcyꞌajal Vapsi; 15 cyxol tiyjil Gad, a Geuel xiꞌ, aju tcyꞌajal Maqui. 16 Atzun cybi ke xinak e jeꞌx t-samaꞌn Moisés queꞌyilte txꞌotxꞌ. Baj tchꞌexpuꞌn Moisés tbi Oseas aju tcyꞌajal Nun, ex Josué tbi oc tkꞌoꞌn.

17 E jeꞌxtzun t-samaꞌn Moisés ke xinak lu queꞌyilte txꞌotxꞌ Canaán ex xi tmaꞌn cye:

—Cyjaꞌ cyjaxe tuj lugar Néguev ex cyjaxe tuj tiwitz txꞌotxꞌ. 18 Cyqueꞌyin baje txꞌotxꞌ tzaꞌn tten, ax icx ke xjal najl tuj, ka at nim cyipun ex ka mintiꞌ cyipun, ka nim cybaj ex ka nicꞌxi cybaj. 19 Cyqueꞌyin baje ke tnam, ka at muro toc cyiꞌj ex ka mintiꞌ, ex aju txꞌotxꞌ jatum najl ke xjal, ka baꞌn ex ka mya baꞌn, 20 ka baꞌn ttzaj awal tuj txꞌotxꞌ ex ka miꞌn, ex ka at tzeꞌ tuj ex ka mintiꞌ. Cyuwx cycꞌuꞌje, cyiꞌntze junjun twitz awal at tuj txꞌotxꞌ, chi Moisés cye.

Acu tkꞌijlalil tuꞌn tjaw chmet tnejel twitz uva. 21 E jeꞌxtzun ke xinak ex baj cyqueꞌyin txꞌotxꞌ, xiꞌx keꞌ cyuꞌn tuj tzkij txꞌotxꞌ Zin tuj tumlal tnayaj kꞌij, ex e japun baj max tuj Lugar Rehob ttxaꞌn tnam Hamat tuj tumlal tbankꞌab kꞌij. 22 E icꞌ tuj txꞌotxꞌ Néguev ex e pon max tuj tnam Hebrón. Atzun najltok Ahimán tucꞌix Sesai ex Talmai, ake jlu tiyjil Anac ke. Otok bant wuk abkꞌi tbantlen tnam Hebrón tej tbant tnam Zoán tuj Ejipt. 23 E pon max jatum taꞌ tkꞌab xak Escol, ex atzun el cytxꞌemin jun tkꞌab uva nim twitz toc tiꞌj, octzun cyyobin tiꞌj jun tzeꞌ ex cabe xjal tzaj kꞌinte te. Ax icx tzaj cyiꞌn carnad ẍokꞌ tucꞌix higo. 24 Escol tbi tkꞌab xak oc cykꞌoꞌn, tuꞌnju atzun el cytxꞌemin aj Israel aju rasim uva lu.

25 Tuj 40 kꞌij baj cyqueꞌyin txꞌotxꞌ, ex tbajlenxi jlu e ajtztzun meltzꞌaj 26 tuꞌn cyul tuj lugar Cades tuj tzkij txꞌotxꞌ Parán. Atzun ateꞌtok Moisés tucꞌix Aarón ex cycyakil aj Israel. Xi cytxꞌolbaꞌn cye aju otok cyil tiꞌj txꞌotxꞌ ex xi cyyecꞌun cye aju twitz awal in tzaj tuj txꞌotxꞌ. 27 Ax icx xi cymaꞌn te Moisés:

—Ma kox aje tuj txꞌotxꞌ jatum oꞌx t-samaꞌna. Axix toc aju txꞌotxꞌ lu kꞌinun txꞌotxꞌ ex tbanilxix, ex atzun ke twitz awal in tkꞌoꞌn txꞌotxꞌ jlu, 28 pero ke xjal najl ma chixin at nim cyipun ex ke tnam nimakxix ke ex at muro toc cyiꞌj. Ex mya oꞌcx jlu, ax icx ma kile ke xjal maꞌ cywaꞌl tiyjil Anac ke. 29 Tuj Néguev, atzun najl ke aj Amalec, ex tuj tiwitz txꞌotxꞌ, atzun najl ke aj Hetey, ke aj Jebusey ex ke aj Amorrey, atzun nikayin ttzi mar ex ttzi nima Jordán, atzun najl ke aj Canaán.

30 Atzunte Caleb xi tmaꞌn tuꞌn miꞌn cykꞌajt tnam xjal ateꞌ twitz Moisés ex tma:

—Koꞌke tuꞌn tcambet txꞌotxꞌ lu kuꞌn. Jacu cambet kuꞌn.

31 Atzun keju e jeꞌx aj tucꞌil queꞌyilte txꞌotxꞌ tzaj cytzakꞌweꞌn:

—Miꞌn, mlay ko xcyeꞌ cyiꞌj xjal lu, porque mas at cyipun kwitz.

32 Ex e oc ten kꞌmalte cye aj Israel ka aju txꞌotxꞌ otok cheꞌx aj queꞌyilte jumajx mya baꞌn te, ex xi cymaꞌn:

—Aju txꞌotxꞌ oꞌx aje queꞌyilte, jumajx xobajil, ex cycyakil xinak o kile ma chixin maꞌ cywaꞌl. 33 Ax icx o kile ke xjal maꞌ cywaꞌl akeju tiyjil Anac. Tej kcub tene cytxlaj o knaꞌye mer ic tzaꞌn ẍplon koꞌye, ax icxlo o eꞌlaye tuj cywitz tej cyqueꞌyinte koꞌye.