5 Atzunte Moisés ex Aarón e cub mutzkꞌaj ex pon tacl tibaj cywitz max twitz txꞌotxꞌ cywitz cycyakil tnam xjal. 6 Atzunte Josué aju tcyꞌajal Nun, tucꞌix Caleb aju tcyꞌajal Jefone, akeju otok cheꞌx aj queꞌyilte txꞌotxꞌ Canaán, el cysbitꞌun cyxbalun cyiꞌj tuꞌn cybis, 7 ex xi cymaꞌn cye cycyakil aj Israel:

—Aju txꞌotxꞌ oꞌx aje queꞌyilte, puro tbanilxix. 8 Ka ma tzalaj Kman kiꞌj, ax te cꞌonil ke tuꞌn kcanun tuj txꞌotxꞌ ex ctzajel tkꞌoꞌn ke. Aju txꞌotxꞌ lu kꞌinun txꞌotxꞌ ex tbanilxix. 9 Pero miꞌn jaw cyiꞌn cyibe tiꞌj Kman, ex miꞌn che xobe cywitz xjal ateꞌ ma chixin, porque ke xjal lu jurat naj cbel cyiꞌj kuꞌn; mi aꞌl colol cyiꞌj, atzun ke, at Kman kucꞌil. Miꞌn che xobe cywitz, che chi, xi cymaꞌn.

10 Atzun cye xjal o cyajbe tuꞌn toc cyxoꞌn abj cyiꞌj. Cubtzun tyecꞌun tib t-spicꞌumal Kman cywitz cycyakil aj Israel tibaj ja xbalun te mojbabl tibil, 11 ex tzaj tmaꞌn Kman te Moisés:

—¿Jtoj ban txi cycolin xjal tuꞌn cyicꞌun wiꞌje? ¿Jtoj ban txi cycolin tuꞌn miꞌn tkeꞌ cycꞌuꞌj wiꞌje, ex o bant nimcu techal wuꞌne cyxol? 12 Tzul nsamaꞌne txꞌuꞌj yabil cyiꞌj tuꞌn cycyim ex tuꞌn miꞌn cyetzan tiꞌj txꞌotxꞌ Canaán; pero tiꞌja cꞌelel jun tnam maꞌxix wuꞌne ex mas tipun ic tzaꞌn cye, chi Dios te Moisés.

13 Atzunte Moisés xi ttzakꞌweꞌn te Kman:

—Oclo cybi aj Ejipt, jatum e etz tiꞌna tnam xjal lu tuꞌn tipumala, 14 ex cxel-lo cymaꞌn cye tnam xjal najl tuj Canaán. Ax icx cye aj Canaán o cybi ka aya Nman Dios tcuba cyxol tnam xjal lu, ex twitzelaya in cub tyecꞌun tiba cywitz, ex aju muj jatum tocxa tuj, tcub cyibaj; nejliya cywitz te kꞌijl tuj txkan muj ex te konicꞌan tuj txkan kꞌakꞌ. 15 Ka ma che cub tbyoꞌna tnam xjal lu, ke nmak tnam o cybi tkanil tiꞌja oc cyma: 16 Mix ma bant tuꞌn Cydios tnam xjal aj Israel tuꞌn cypon tuj txꞌotxꞌ Canaán, aju xi ttziyan tuꞌn t-xi tkꞌoꞌn cye, ex cyjaꞌtzun ma che cub tbyoꞌn tuj tzkij txꞌotxꞌ. 17 Tiltzun Nman Dios, yecꞌuntza nimxix tipumala jaꞌlo, ic tzaꞌnx o tzaj ttziyana, porque o tmaya 18 ka mintiꞌ in jaw kꞌojl naja, maꞌxix tcꞌujlalila ex in cub tnajsaꞌna mya baꞌn ex ttxꞌuꞌjil wibaj, masque mintiꞌ nniꞌcꞌx tiꞌj tuꞌna tuꞌn miꞌn tcub tcastiw jun xjal at til, nok oꞌcx in cub tkꞌoꞌna cycastiw cꞌwaꞌlbaj tuꞌn tlaj mya baꞌn cybinchben cyman, cyucꞌix ke tal chmambaj ex ke ttxcaꞌ chmambaj. 19 Tuꞌnju tcꞌujlalila maꞌxix najsancuya aju mya baꞌn ma bant cyuꞌn tnam xjal lu, ic tzaꞌn ma ten tpasensa cyiꞌj tej maxtok ateꞌ tuj Ejipt ax icx jaꞌlo.

20 Atzunte Kman tzaj ttzakꞌweꞌn:

—Baꞌn, ma cub nnajsaꞌne cyil ic tzaꞌnx ma tmaya weye, 21 pero cxel nmaꞌne teya jun yol axix toc wuꞌnx wibe, ex axix toc nojni tcyakil twitz txꞌotxꞌ tuꞌn wajwalile: 22 Cycyakil keju o cyil nspicꞌumale ex ke techal e bant wuꞌne tuj Ejipt ex tuj tzkij txꞌotxꞌ, ex ma chin oc kꞌoꞌne cyuꞌn tuj nimcu joybil wiꞌje ex mintiꞌ in chinx cyniman, 23 ax toc, mi jun cye oc cyilaꞌ aju txꞌotxꞌ xi ntziyane cye ktzan cyxeꞌchel. Mi jun cye keju ma che el icꞌunte weye oc cyilaꞌ aju txꞌotxꞌ. 24 Atzunte nmajene Caleb, tuꞌnju ma ten junxitl t-ximbetz ex ma chinx tniman tuj tcyakil, cxel nkꞌoꞌne ambil te tuꞌn tpon tuj txꞌotxꞌ xi aj queꞌyilte, ex ake tiyjil che najal tuj. 25 Ke aj Amalec ex ke aj Canaán, atzun najlke tuj chkꞌajlaj. Atzun cyeye, cyaj meltzꞌaje nchiꞌj ex cyxiꞌye tuj be in xiꞌ tuj tzkij txꞌotxꞌ tumlal mar Cyak Queꞌyin.

26 Ex tzaj tmaꞌntl Kman te Moisés ex te Aarón cyjaꞌ:

27 —¿Cucxpe cꞌicꞌelex taꞌw cyyol aj Israel wuꞌne, ake jumajx mya baꞌn ke? Ma nbiye in che yolin mya baꞌn wiꞌje. 28 Kꞌmanxa cye cyjaꞌ: Akine Dios cxel nmaꞌne jun yol axix toc wuꞌnx wibe: Ic tzaꞌn cyyole ma nbiye, icxtzun cbantel cyiꞌje wuꞌne. 29 Cycyakil keju o japun winkin abkꞌi cyuꞌn, ic tzaꞌnx in tmaꞌn tuj cyajlal xjal o jaw, ex ma che yolin mya baꞌn wiꞌje, che cymel, ex aju cyximlal cyjel paleꞌ tuj tzkij txꞌotxꞌ lu. 30 Mi jun cye cpol tuj txꞌotxꞌ xi ntziyane aju tuꞌn cypon najal tuj, nok oꞌcx Caleb aju tcyꞌajal Jefone, tucꞌix Josué aju tcyꞌajal Nun, che pol tuj txꞌotxꞌ lu. 31 Atzun cye cycꞌwaꞌle, akeju o cymaye ka tuꞌn cycub tzꞌak tuj cykꞌab aj kꞌoj cyiꞌje, che xel wiꞌne tuꞌn cypon najal tuj txꞌotxꞌ aju ma tzꞌel cyicꞌune. 32 Atzun cyeye, che cyjel paleꞌye cyimni keye tuj tzkij txꞌotxꞌ lu. 33 Atzun ke cycꞌwaꞌle ax che pastoril cyalun 40 abkꞌi tuj tzkij txꞌotxꞌ lu. Nim cꞌicꞌelex cyuꞌn tuꞌn tlaj mya baꞌn ma bant cyuꞌne, ocxi cybaj cyime tzalu tuj tzkij txꞌotxꞌ. 34 Akeju e jeꞌx aj queꞌyilte txꞌotxꞌ, e ten 40 kꞌij tuꞌn ticꞌ cywitz tiꞌj, ax icxtzun 40 abkꞌi cchjetel cyile; jun abkꞌi tiꞌj jun kꞌij. Atzun cꞌelel cynicꞌe tiꞌj alcye in tzaj tuꞌnju in chin kꞌojine cyiꞌje. 35 Akine Dios in xi nmaꞌne jlu: Atzun cbantel wuꞌne cyiꞌj tnam xjal lu, akeju jawni cywitz ex ma jaw cyiꞌn cyib wiꞌje. Tujx tzkij txꞌotxꞌ lu che bajel cyim.

36 Akeju xinak e jeꞌx t-samaꞌn Moisés queꞌyilte txꞌotxꞌ, ex tej cyul meltzꞌaj o cyma tkanil mya baꞌn tiꞌj txꞌotxꞌ, ex tuꞌn cyyol xjal lu e oc ten cycyakil tnam xjal yolil mya baꞌn tiꞌj Moisés, 37 akeju xinak lu tzaj jun cꞌixbisabl cyibaj ex e cyim tuꞌn Kman. 38 Cyxol cycyakil keju e jeꞌx aj queꞌyilte txꞌotxꞌ, oꞌcx te Caleb aju tcyꞌajal Jefone, tucꞌix Josué aju tcyꞌajal Nun e cyaj ten ex mintiꞌ e cyim.

39 Tejtzun t-xi ttxꞌolbaꞌn Moisés cye aj Israel aju otok tma Kman te, cycyakil aj Israel e bisun nimxix wen, 40 ex te juntl kꞌij te prim e jaw weꞌ, e jax twi witz ex cyma:

—Ax toc ma ko binchan il, atzun jaꞌlo koꞌ tuj lugar o tzaj ttziyan Kman ke.

41 Atzunte Moisés xi tmaꞌn cye:

—¿Tikuꞌn ma che icꞌe tibaj tyol Kman? Mya baꞌn cꞌelel te cyeye. 42 Tiltzun miꞌn che jaxe, porque mi aꞌl Kman cyucꞌile ex cbel cyiꞌje cyuꞌn aj kꞌoj cyiꞌje, 43 porque lu ke aj Amalec ex ke aj Canaán in che ayon cyiꞌje tuꞌn cykꞌojin cyucꞌile ex tuꞌn cycub byoꞌne cyuꞌn. Tuꞌnju ma tzꞌel cypaꞌn cyibe tiꞌj Kman, cyjaꞌtzun mi aꞌl Kman cyucꞌile, chi Moisés cye.

44 Atzun cye mintiꞌ xi cybiꞌn tuꞌn miꞌn cyjax twi witz ex e jax oꞌcx cye. Atzunte Moisés tucꞌix cax cꞌubl tley Dios ax e cyaj ten tuj campament. 45 E etztzun ke aj Amalec cyucꞌix ke aj Canaán, akeju najlke tuj lugar lu, e oc ten kꞌojlel cyiꞌj aj Israel, cub cyiꞌj cyuꞌn ex e jeꞌx lpeꞌ cyiꞌj tejxi cypon tuj lugar Horma.