2 Kꞌmanxa cye aj Israel cyjaꞌ: Oc cyocxe tuj txꞌotxꞌ cxel nkꞌoꞌne cyeye tuꞌn cynajane tuj, 3 ex oc ttzaj cykꞌoꞌne jun tor ex ka jun ẍneꞌl tuꞌn tcub patit te nimbil weye, ka te chojbil patun in cub at tcꞌocꞌjal in chin tzalaje tiꞌj, ex ka te oyaj, ka tiꞌj jun yol otok japun aju otok tzaj cytziyane weye, ex ka jun oyaj tuꞌn cyexe cygan ctzajel cykꞌoꞌne, ex ka tiꞌj jun ninkꞌij, 4 aju xjal ctzajel kꞌonte oyaj lu weye, ax icx ctzajel tkꞌoꞌn cabe libr arin tbanilxix xyokꞌimaj tucꞌil jun litr aseyt, 5 ax icx ctzajel tkꞌoꞌn jun litr oyaj taꞌl twitz uva tuꞌn tcub koꞌn tiꞌj junjun tal tman ẍneꞌl in cub patit te chojbil, ex ka tiꞌj chojbil te mojbabl tibil. 6 Katzun jun tman ẍneꞌl chojbil ctzajel cykꞌoꞌn, cxeltzun cykꞌoꞌntl cyaje libr tucꞌ mey arin xyokꞌimaj, tucꞌil mas te jun litr aseyt, 7 ex mas te jun litr taꞌl twitz uva, te jun oyaj at tcꞌocꞌjal in chin tzalaje tiꞌj. 8 Katzun jun tal tor chojbil ctzajel cykꞌoꞌn, ka jun chojbil tuꞌn tcub patit, ka jun chojbil te mojbabl tibil, ex ka tiꞌj tjapunlen jun yol otok txi cytziyan, 9 cxel cykꞌoꞌntl kak libr arin xyokꞌimaj, tucꞌ cabe litr aseyt, 10 tucꞌix cabe litr oyaj taꞌl twitz uva tuꞌn tcub koꞌn. A jlu jun oyaj patun in cub at tcꞌocꞌjal in chin tzalaje tiꞌj. 11 Atzun jlu cbantel cyuꞌn tiꞌj junjun tor, tiꞌj junjun tman ẍneꞌl, tiꞌj junjun tal tman ẍneꞌl ex tiꞌj junjun tal tman chip oc ttzaj cykꞌoꞌn. 12 Ic tzaꞌnx cyajlal alumaj ctzajel cykꞌoꞌn, icxtzun cyoyaj ctzajel cykꞌoꞌn tiꞌj teyle junjun. 13 Il tiꞌj tuꞌn tjapun jlu cyuꞌn cycyakil aj Israel oc ttzaj cykꞌoꞌn cyoyaj patun in cub at tcꞌocꞌjal in chin tzalaje tiꞌj.

14 Ka at jun stranjer xjal ex ka nok alcye juntl xjal ax najl cyxole taj tuꞌn ttzaj tkꞌoꞌn toyaj weye patun in cub at tcꞌocꞌjal in chin tzalaje tiꞌj, il tiꞌj tuꞌn tbant tcyakil tuꞌn ic tzaꞌnx cyeye. 15 Aju ley cꞌajbel cyeye, axtzunju cꞌajbel cye stranjer xjal najlke cyxole; atzun ley lu cyjel ten cyucꞌile te jumajx, tuꞌn tajben cyeye ex wikinwik tuꞌn tcyaj cymaꞌne cye cycꞌwaꞌle. 16 Aju ley cꞌajbel te cyeye, ax cꞌajbel cye ke stranjer xjal najl cyxole.

17 Tzaj yolin Kman tucꞌil Moisés ex tma:

18 Kꞌmanxa cye aj Israel cyjaꞌ: Oc cyocxe tuj txꞌotxꞌ jatum che pol wiꞌne, 19 ex oc ttzyet cywaꞌne tiꞌj triw in tzaj tuj txꞌotxꞌ, cꞌelel cypaꞌne chꞌin tiꞌj tuꞌn ttzaj cykꞌoꞌne weye. 20 Ctzajel cykꞌoꞌne weye jun pan tiꞌj tnejel acꞌaj triw oc tex cycheꞌne, te jun cyoyaje tiꞌj tcyakil twitz triw. 21 Aju oyaj lu cucx ctzajel cykꞌoꞌne weye tcyakil abkꞌi.

22 Katzun nok minaben ex mya ximamaj cyuꞌne ma che icꞌe cyibaj ke nmandamyente, akeju o cheꞌx nmaꞌne te Moisés, 23 ex atxix tej t-xi tmaꞌn Moisés cyeye, ka mintiꞌ ma japun cyuꞌne, ex ka cyuꞌn cyiyjile che ul itzꞌj te tibajxi, 24 ex ka nok minaben ma cybincha tnam xjal jun il, ex mya ximamaj cyuꞌn, cycyakiltzun tnam xjal ctzajel cykꞌoꞌn jun tal tor weye te jun oyaj patun in cub at tcꞌocꞌjal in chin tzalaje tiꞌj, cyucꞌix ke oyaj tiꞌj twitz awal ex taꞌl twitz uva, ic tzaꞌnx o txi nmaꞌne; ax icx ctzajel cykꞌoꞌn jun tman chip te chojbil il. 25 Atzunte pal cxel tkꞌoꞌn chojbil ic tzaꞌnx in tmaꞌn ley, tuꞌn tnajset cyil tnam xjal aj Israel, ex cbel nnajsaꞌne cyil, porque mya tuꞌn cyex cygan otok cybincha il, ex tuꞌnju otok tzaj cykꞌoꞌn cyoyaj patun in cub ex ju chojbil tiꞌj cyil. 26 Cbel nnajsaꞌne cyil cycyakil tnam xjal aj Israel, cyucꞌix stranjer xjal najl cyxol, tuꞌnju mya tuꞌn cyex cygan otok cybincha il.

27 Ka at jun xjal nok minaben ma binchan il ex mya ximamaj tuꞌn, cxel tkꞌoꞌn xjal jun tal ttxu chip te jun abkꞌi te chojbil til. 28 Atzunte pal cxel tkꞌoꞌn chojbil ic tzaꞌnx in tmaꞌn ley tuꞌn tnajset til xjal aju nok minaben otok binchan il ex mya ximamaj tuꞌn, ex cbel nnajsaꞌne til. 29 Ax ley lu cꞌajbel cye aj Israel ex ax cꞌajbel cye stranjer xjal najl cyxole, ka nok minaben otok che binchan il ex mya ximamaj cyuꞌn.

30 Katzun at jun xjal ma binchan il tuꞌn tex tgan, masque aj Israel ex ka stranjer xjal, a jlu mya baꞌn ma tbincha wiꞌje, cyjaꞌtzun, aju xjal lu cbel byet tuꞌntzun miꞌn ttentl cyxol t-xjalil, 31 porque ma tzꞌel ticꞌun nyole ex mintiꞌ ma japun nmandamyente tuꞌn. Aju xjal lu biꞌx cbel byet, ex ax te at til tiꞌj tcamic.

32 Tej ateꞌtok aj Israel tuj tzkij txꞌotxꞌ e oc noj tiꞌj jun xinak in chmontok siꞌ tuj kꞌij te ojlabl. 33 Xi kꞌiꞌn cyuꞌn keju e oc noj tiꞌj, tuꞌn tpon twitz Moisés ex Aarón ex cywitz cycyakil tnam xjal, 34 ex ocx cykꞌoꞌn tuj pres, porque naꞌnxtok cybinte alcye tuꞌn tbinchet tiꞌj. 35 Tzajtzun tmaꞌn Kman te Moisés cyjaꞌ: Il tiꞌj tuꞌn tcyim xjal lu. Cycyakil aj Israel e toc cyxoꞌn abj tiꞌj tiꞌjxi campament. 36 Extzun cyiꞌn aj Israel xjal lu tiꞌjxi campament ex oc cyxoꞌn abj tiꞌj tejxi tcyim cyuꞌn, ic tzaꞌnx otok tzaj tmaꞌn Kman te Moisés.

37 Tzaj yolin Kman tucꞌil Moisés ex tma:

38 Kꞌmanxa cye aj Israel cyjaꞌ: Akeye aj Israel cyucꞌix ke cyiyjile che ul itzꞌj te tibajxi, cykꞌonque ttxaꞌn cyxbalune ẍliꞌjin tten ex cycꞌaloꞌn oque jun piẍ nokꞌ ẍkꞌilun queꞌyin tuj junjun cꞌaloꞌbin te ẍliꞌjin. 39 Cyjaꞌtzun, oc toc cyqueꞌyine ttxaꞌn cyxbalune, ctzajel cynaꞌne cycyakil nmandamyente tuꞌntzun tjapun cyuꞌne, ex tuꞌn miꞌn cyxi lpeꞌye tiꞌj cyexe cyximbetze ex tiꞌj cyexe cyajbile, porque cyuꞌn jlu jacu bant tuꞌn tel cypaꞌn cyibe wiꞌje. 40 Tuꞌnju ẍliꞌjin lu, jacu tzaj cynaꞌne cycyakil nmandamyente tuꞌn tjapun cyuꞌne, ex che tele xjan nwitze. 41 Akine Cymane ex Cydiose, aju etz kꞌinte cyeye tuj Ejipt tuꞌntzun woque te Cydiose. Akine Cymane ex Cydiose.