—Acux tuꞌn cycawine kibaje, porque cycyakil tnam xjal xjan ke ex at Kman kucꞌil kcyakil. ¿Tikuꞌntzun nnoꞌc cykꞌon cyibe te cawil maꞌxix cyoclene cyibaj tnam xjal etzan tuꞌn Kman? Che chi.

4 Tejtzun tbinte Moisés jlu, cub mutzkꞌaj ex pon tacl tibaj twitz max twitz txꞌotxꞌ, 5 ex xi tmaꞌn te Coré ex cye keju otok mojeꞌ cyyol tucꞌil:

—Nchiꞌjxi prim ctzajel tyecꞌun Kman alcye aju axix toc te Kman ex alcye aju axix toc xjan, ex ax te Kman cjawil scꞌonte alcyeju xjal tajbil Kman tuꞌn tpon lakꞌeꞌ twitz. 6 Aya Coré, cyucꞌix ke tucꞌila, cybinchaye jlu: Bix tzaj cyiꞌne ẍlaꞌc patbil storac, 7 bix cuꞌx cykꞌoꞌne xkꞌaꞌl cyuj, tucꞌix storac, ex cykꞌoꞌn cubtzune twitz Kman nchiꞌj. Aju xinak cjawil t-scꞌoꞌn Kman, atzunte xjansamaj. Acuxtzun tjaw cyiꞌn cyibe wiꞌje, akeye aj Leví.

8 Ax icx xi tmaꞌntl Moisés te Coré:

—Chin cybintze, akeye aj Leví: 9 ¿Maj chꞌintzun t-xilen tuj cywitze tuꞌnju ma che jaw scꞌoꞌne tuꞌn Dios cyxol tnam xjal aj Israel tuꞌn cytene nikayin twitz, tuꞌn cyajbene tuj tja Dios ex tuꞌn cyajbene cyxol tnam xjal? 10 Ate Kman jaw scꞌonte teya ex cye mastl aj Leví, akeju at t-xilena cyucꞌil, tuꞌn cytene nikayin twitz, atzun jaꞌlo ¿cyajbile tuꞌn cyoque te pal? 11 Cyjaꞌtzun aya cyucꞌix ke tucꞌila ma jaw cyiꞌn cyibe tiꞌj Kman, porque ¿ti t-xilen Aarón tuꞌnju in che yoline mya baꞌn tiꞌj?

12 E jeꞌxtzun txocbaj Datán tucꞌix Abiram akeju tcyꞌajal Eliab, tuꞌn Moisés, atzun cye tzaj cytzakꞌweꞌn:

—Mlay koꞌxe. 13 ¿Chꞌinpetzun t-xilen tuj twitza tuꞌnju ma ko etz tiꞌna tuj Ejipt, tuj jun txꞌotxꞌ tbanilxix ex kꞌinun txꞌotxꞌ, tuꞌn kcyime tuꞌna tuj tzkij txꞌotxꞌ lu, ax icx taja tuꞌn toca te jun nejenel maꞌxix toclen kibaje? 14 Naꞌnx kxi tiꞌna tuj txꞌotxꞌ tbanilxix ex kꞌinun txꞌotxꞌ ex naꞌnx ttzaj tkꞌoꞌna kcojbile ex ke tkan k-uvaye. ¿Che xelpe tiꞌna cycyakil xjal ic tzaꞌn moẍ ke? Miꞌn, mlayx koꞌxe, che chi.

15 Tzajtzun nimxix tkꞌoj Moisés ex xi tmaꞌn te Kman:

—Miꞌn txi tcꞌmoꞌna cyoyaj xjal lu. Misicyer jun cybur ma tzꞌel wiꞌne ex bajx nbinchaye jun mya baꞌn cyiꞌj.

16 Te tibajxi jlu xi tmaꞌn Moisés te Coré:

—Aya cyucꞌix ke tucꞌila, bix che pone nchiꞌj twitz Kman ex tucꞌix Aarón ctel ma chixin. 17 Teyle te junjun tuꞌn t-xi tiꞌn t-ẍlaꞌc tcuꞌx storac tuj. Ax icx teya tucꞌix Aarón cxel cyiꞌne cyẍlaꞌque, ex cbel cykꞌoꞌne twitz Kman junx tucꞌil cyẍlaꞌc 250 xinak.

18 Teylex te junjun tzaj tiꞌn t-ẍlaꞌc, ex cuꞌx tkꞌoꞌn xkꞌaꞌl tuj tucꞌix storac, ex e cubtzun ten twitz ja xbalun te mojbabl tibil, junx tucꞌil Moisés ex Aarón. 19 Otok che baj tchmoꞌn Coré cycyakil tnam xjal twitz ja xbalun te mojbabl tibil tuꞌn tjaw cyiꞌn cyib tiꞌj Moisés ex tiꞌj Aarón. Cubtzun ten tajwalil Kman cywitz cycyakil tnam xjal, 20 ex tzaj tmaꞌn Kman te Moisés ex te Aarón:

21 —Cypaꞌmil cyibe cyiꞌj tnam xjal lu, porque nok minaben che najel wuꞌne jaꞌlo.

22 Atzun cye e cub mutzkꞌaj ex pon tacl tibaj cywitz max twitz txꞌotxꞌ, ex cyma:

—Kman Dios, tuꞌna in tzaj tkꞌoꞌna cychwinklal cycyakil xjal, ¿Maj ctzajeltzun tkꞌoja cyiꞌj cycyakil tnam xjal nok tuꞌn tlaj til jun xjal?

23 Atzunte Kman tzaj ttzakꞌweꞌn te Moisés ex tma:

24 —Kꞌmanxa cye cycyakil aj Israel tuꞌn cyel lakꞌeꞌ cyiꞌj ke ja xbalun jatum cyocxsaꞌn Coré, Datán ex Abiram.

25 Jawtzun weꞌ Moisés ex xiꞌ jatum ateꞌtok Datán ex Abiram ex e oc lpeꞌ ke cytijil xjal aj Israel tiꞌj. 26 Xitzun tmaꞌn Moisés cye tnam xjal cyjaꞌ:

—Cyel lakꞌeꞌye cyiꞌj cyja xjal jumajx mya baꞌn ke, ex miꞌn tzꞌoc cymacoꞌne jun tiꞌxti at cye, tuꞌntzun mya ajun keye tuꞌn cynaje tuꞌn tlaj cyil.

27 E jeꞌltzun lakꞌeꞌ tnam xjal cyiꞌj cyja Coré, Datán ex Abiram. Atzunte Datán ex Abiram e jeꞌtz ex e cub ten ttzi cyja, xbalun ja, cyucꞌix ke cyxuꞌjil ex ke cycꞌwaꞌl. 28 Ex tmatl Moisés:

—Jaꞌlo cꞌelel cynicꞌe tiꞌj ka ate Kman ma tzaj samante weye tuꞌn tbant tcyakil jlu wuꞌne, ex mya tuꞌn wexe nnicꞌ in bant jlu. 29 Katzun ma che cyim xjal lu ic tzaꞌnx in che cyim cycyakil xjal, myatzun a Kman ma tzaj samante weye; 30 pero ka ma tbincha Kman jun acꞌaj tbinchben; ka ma tzꞌel cꞌabchaj txꞌotxꞌ ex ka ma cheꞌx tzꞌak xjal lu tuj tucꞌix tcyakilju at cye, ex itzꞌx ke oc cycuꞌpun tzꞌak max tuj cynajbil cyimni, cꞌeleltzun cynicꞌe tiꞌj ka ake xjal lu ma che el icꞌunte Kman.

31 Tejtzun tbaj yolin Moisés, el cꞌabchaj txꞌotxꞌ jatum cycubsaꞌntok 32 ex e jeꞌx tzꞌak ke xjal tuj, akeju otok mojeꞌ cyyol tucꞌil Coré, cyucꞌix keju ateꞌ tuj cyja ex tcyakilju at cye. 33 Itzꞌx ke tej cycuꞌpun tzꞌak tuj cynajbil cyimni tucꞌix tcyakilju at cye, ex octzun tmojban tib tpaꞌxil txꞌotxꞌ juntl maj. Cyjaꞌtzun tten e cyim ex biꞌx e cub naj cyxol aj Israel. 34 Tejtzun cybinte aj Israel, akeju ateꞌtok cyiꞌjele, in che schꞌintok xjal lu, e jeꞌl ok ex cyma: Nok koꞌx tzꞌak tuj tpaꞌxil txꞌotxꞌ. 35 Ax icx tzaj t-samaꞌn Kman jun kꞌakꞌ, ex tuꞌn jlu e baj tzꞌeꞌy keju 250 xinak, akeju e cub patunte storac.

36 Tzajtzun yolin Kman tucꞌil Moisés ex tma:

37 Kꞌmanxa te Eleazar aju tcyꞌajal pal Aarón tuꞌn cyetz tiꞌn tuj kꞌakꞌ ke ẍlaꞌc patbil storac, ex tuꞌn tex tkoꞌn najchak wen aju xkꞌaꞌl at cyuj, porque xjansamaj ke ẍlaꞌc lu. 38 Ke cyẍlaꞌc ke xjal ma che naj tuꞌn tlaj cyil, xjansamaj ke, porque o che ajben tuꞌn tcub kꞌoꞌn storac nwitze. E cybaj txꞌinoꞌn ke ẍlaꞌc lu, tuꞌn cybant lámina cyiꞌj, tuꞌn cyoc loꞌtzit tiꞌj altar, tuꞌntzun tajben te jun techal cye aj Israel, chi Dios.

39 Jawtzun tchmoꞌn pal Eleazar ke ẍlaꞌc kꞌan cꞌuxbil cytxꞌotxꞌil, akeju otok tzul cyiꞌn ke xjal otok che cyim tuꞌn kꞌakꞌ, ex xi tmaꞌn tuꞌn cybaj binchaꞌn ke lámina cyiꞌj, tuꞌn cyoc loꞌtzit tiꞌj altar. 40 A jlu ajben te jun techal cye aj Israel, ka mi jun jacu pon lakꞌeꞌ tiꞌj altar tuꞌn tcub tpatun storac twitz Kman ka mya tiyjil Aarón. Katzun at jun ma tbincha icju, ax cbajel tiꞌj ic tzaꞌn o baj tiꞌj Coré ex cyiꞌj ke tucꞌil. Tbinchatzun Eleazar tcyakil ic tzaꞌnx otok tma Kman te Moisés.

41 Tuj juntl kꞌij cycyakil tnam xjal aj Israel e oc ten yolil mya baꞌn tiꞌj Moisés ex tiꞌj Aarón ex cyma:

—Akeye ma che cub byonte cye tnam xjal etzan tuꞌn Kman.

42 Tzaj cykꞌoj xjal, ex tej toc cychmon cyib cyiꞌjele Moisés ex Aarón xi cyqueꞌyin tiꞌj ja xbalun te mojbabl tibil, lu otok cub ten txkan muj tibaj ex cub tyecꞌun tib tajwalil Kman. 43 Atzunte Moisés tucꞌix Aarón e jeꞌx twitz ja xbalun te mojbabl tibil, 44 ex tzaj tmaꞌn Kman te Moisés cyjaꞌ:

45 —Cypaꞌmil cyibe cyiꞌj xjal lu, porque nok minaben che najel wuꞌne jaꞌlo.

Atzunte Moisés tucꞌix Aarón e cub mutzkꞌaj ex pon tacl tibaj cywitz max twitz txꞌotxꞌ. 46 Xitzun tmaꞌn Moisés te Aarón:

—Kꞌintza t-ẍlaꞌca, kꞌon cuꞌxa xkꞌaꞌl tuj, aju tcub tibaj altar, kꞌoꞌn cuꞌxa storac tuj, txiꞌya jurat naj jatum ateꞌ tnam xjal, patun cuba storac ex kaninxa te Dios tuꞌn tnajset cyil, porque ma tzaj nimxix tkꞌoj Kman cyiꞌj ex ya ma tzyet tuꞌn cycyim xjal, chi Moisés.

47 Banttzun tuꞌn Aarón aju xi tmaꞌn Moisés te, ex xi kelan jatum ateꞌ tnam xjal. Otok tzyet tuꞌn cycyim tnam xjal tuꞌn cꞌixbisabl otok tzaj t-samaꞌn Kman. Atzunte Aarón cub tpatun storac ex xi tkanin te Dios tuꞌn tnajset cyil tnam xjal. 48 Cubtzun ten Aarón cyxol keju otok che cyim cyucꞌil keju itzꞌx ke, ex weꞌtzun tuꞌn cycyim xjal. 49 Akeju xjal e cyim tuꞌnju cꞌixbisabl lu, japun jun tajlal te 14,700, ex part keju otok che cyim nok tuꞌn tlaj til Coré. 50 Tejtzun tweꞌ tuꞌn cycyim xjal, ajtzun meltzꞌaj Aarón ttzi ja xbalun te mojbabl tibil jatum taꞌtok Moisés.