2 Kꞌmanxa cye aj Israel: Il tiꞌj tuꞌn ttzaj cyiꞌn teyle junjun nejenel cye junjun cꞌloj cyiyjil jun cyꞌakoꞌch, ex ka tuꞌn tul cyiꞌn cablaj cyꞌakoꞌch tuꞌn tcyakil, ex tzꞌiban oca tbi teyle junjun nejenel tiꞌj tcyꞌakoꞌch. 3 Tzꞌiban oca tbi Aarón tiꞌj tcyꞌakoꞌch tiyjil Leví, porque tzul cyiꞌn jun cyꞌakoꞌchbaj te junjun nejenel cye junjun cꞌloj cyiyjil aj Israel. 4 Atzun che bel tkꞌoꞌna tuj ja xbalun te mojbabl tibil, twitz cax cꞌubl nleye jatum in cub nyecꞌun wibe twitza. 5 Cbantel wuꞌne tuꞌn ttzaj t-xul tcyꞌakoꞌch aju xinak cjawil nscꞌoꞌne, tuꞌntzun miꞌn cucx cyyolin aj Israel mya baꞌn cyiꞌje nwitze, chi Dios.

6 Xi tmaꞌn Moisés tcyakil jlu cye aj Israel, ex teyle junjun nejenel cye junjun cꞌloj cyiyjil xi tkꞌoꞌn tcyꞌakoꞌch te Moisés. Cablaj cyꞌakoꞌch bant tuꞌn tcyakil ex tucꞌix tcyꞌakoꞌch Aarón oc te tajlal cyxol. 7 E cubtzun tkꞌoꞌn Moisés ke cyꞌakoꞌch lu twitz Kman tuj ja xbalun te mojbabl tibil. 8 Tuj juntl kꞌij, tej tocx Moisés tuj ja xbalun te mojbabl tibil, o til aju tcyꞌakoꞌch Aarón cyiꞌj ke tiyjil Leví, otok tzaj t-xul, otok tzꞌoc t-xmacal ex attok twitz almendro otok kꞌanix tiꞌj. 9 Etztzun tiꞌn Moisés cycyakil cyꞌakoꞌch twitz Kman ex xi tyecꞌun cye aj Israel. Tbajlenxitzun cyqueꞌyin, teyle junjun xi tiꞌn ju tcyꞌakoꞌch.

10 Tzajtzun tmaꞌn Kman te Moisés: Kꞌoꞌn ocxa juntl maj tcyꞌakoꞌch Aarón twitz cax cꞌubl nleye, ex axtzun cꞌuꞌn cyaja te jun techal cye tnam xjal lu miban che bin. Cyjaꞌtzun cmayetel tuꞌna, tuꞌn miꞌn cyyolintl mya baꞌn wiꞌje, tuꞌntzun miꞌn cycyim.

11 Tbinchatzun Moisés tcyakil ic tzaꞌnx otok tzaj tmaꞌn Kman te, 12 atzun cye aj Israel xi cymaꞌn te Moisés: Ma ko najxe. Kcyakile ko cymele. 13 Cycyakil keju in che pon lakꞌeꞌ tiꞌj ja xbalun te mojbabl tibil biꞌx in che cyim. ¿Maj ko najeltzune kcyakile? Che chi xjal.