Aya cyucꞌix ke tcyꞌajala, junx cyucꞌil txkantl tiyjil Leví akeju junx tiyjila cyucꞌil, akeye at cyile tiꞌj ka ma binchanjtz jun mya baꞌn tiꞌj njaye; katzun tuj akꞌuntl cye pal ma binchanjtz jun mya baꞌn, oꞌcxtzun teya ex ke tcyꞌajala at cyile tiꞌj. 2 Che kꞌintza cycyakil tiyjil Leví akeju junx tiyjila cyucꞌil, tuꞌn cyonin tiꞌja ex cyiꞌj ke tcyꞌajala tuj akꞌuntl in bant cyuꞌne twitz ja xbalun te mojbabl tibil. 3 Cbantel cyuꞌn ke termaniya akeju aj Leví aju cxel tmaꞌna cye; cꞌoquel cycwentin ja xbalun te mojbabl tibil, pero mintiꞌ cyoclen tuꞌn cypon lakꞌeꞌ cyiꞌj ke macbil xjan ateꞌ tuj ex mi tiꞌj altar; porque ka ma che pon lakꞌeꞌ, che najel, ex ajun keye che najel cyucꞌil. 4 Baꞌn tuꞌn cyten tucꞌila ex cꞌoquel cycwentin ja xbalun te mojbabl tibil, ex cbantel mastl akꞌuntl cyuꞌn tiꞌjx ja, pero mi jun xjal baꞌn tuꞌn tpon lakꞌeꞌ cyiꞌje, ka mya aj Leví. 5 Akeye at cyoclene tiꞌj tuꞌn tbant akꞌuntl tuj ja xbalun te mojbabl tibil ex tiꞌj altar, tuꞌntzun miꞌn ttzaj juntl maj nkꞌoje cyiꞌj aj Israel. 6 Wuꞌne e jaw nscꞌoꞌne ke termaniya akeju aj Leví cyxol mastl aj Israel, tuꞌn cyxi nkꞌoꞌne te cyeye ic tzaꞌn jun oyaj paꞌmaj te weye, tuꞌntzun cyajben tuj akꞌuntl twitz ja xbalun te mojbabl tibil. 7 Pero oꞌcx teya cyucꞌix ke tcyꞌajala che ajbele te pal, tuꞌn cyajbene tiꞌj altar ex tuꞌn cyajbene tiꞌjxi xbalun tcub ttzi njaye, porque ma txi nkꞌoꞌne oclenj cyeye tuꞌn cyoque te pal. Katzun at jun ma tzꞌoc tkꞌon tib te pal ex mya pal te, baꞌn tuꞌn tcyim.

8 Tzaj tmaꞌntl Kman te Aarón:

Ax icx ma txi nkꞌoꞌne tuj tcwenta ke oyaj in che tzaj kꞌoꞌn weye. Cycyakil oyaj xjan in tzaj cykꞌoꞌn aj Israel weye, che xel nkꞌoꞌne teya ex cye ke tcyꞌajala, tuꞌnju pal keye; a jlu jun ley ctel te jumajx. 9 Cyiꞌj ke chojbil mintiꞌ in che ocx patit, atzun ke che ajbel teya: Ke oyaj tiꞌj twitz awal, ke oyaj te chojbil il ex ke oyaj te chojbil cypaltil aj Israel. Cycyakil ke oyaj xjansamaj lu, teya che ajbel ex cye ke tcyꞌajala. 10 Cxel cywaꞌne tuj jun lugar xjan; cycyakil xinak che waꞌl tiꞌj, ex xjan cꞌoquel jlu te cyeye.

11 Ax icx cxel nkꞌoꞌne teya ex cye ke tcyꞌajala ex ke tmeꞌjela, akeju ax ateꞌ tuj tjaya, ke oyaj in che tzaj yecꞌun weye ex ke oyaj in cheꞌx yucun nwitze, aju in tzaj cykꞌoꞌn aj Israel weye. A jlu jun ley cucx ctel te jumajx. Nok alcyex jun xjal ax tiyjila ex ka t-saksan tib, baꞌn tuꞌn twaꞌn cyiꞌj. 12 Ax icx cxel nkꞌoꞌne tnejel twitz awal teya, aju ctzajel cykꞌoꞌn aj Israel weye teyle junjun abkꞌi: Aju tbanil aseyt, tucꞌix tbanil taꞌl twitz uva ex tbanil triw. 13 Ax icx cxel nkꞌoꞌne teya tnejel cywitz cycyakil txcaj awal in tzaj cykꞌoꞌn aj Israel weye. Nok alcyex jun xjal ax tiyjila ex ka t-saksan tib, baꞌn tuꞌn twaꞌn cyiꞌj. 14 Cycyakil oyaj cꞌelel cypaꞌn aj Israel te weye, teya cꞌajbel.

15 Cycyakil nej cycyꞌajal aj Israel cyucꞌix nej cyal alumaj aju ctzajel cykꞌoꞌn weye, teya cꞌajbel. Pero ke nej cycyꞌajal xinak ex nej cyal alumaj, akeju mlay cheꞌx kꞌot te chojbil, kaninxa cywiꞌ tuꞌntzun cycolpet. 16 Oc tjapun jun xjaw cyul-len itzꞌj, baꞌn tuꞌn ttzaj cykꞌoꞌn jweꞌ sak pwak te colpibl cye, ic tzaꞌnx cywiꞌ ex ic tzaꞌnx sak pwak in ajben tuj njaye, chꞌixmi mey ons talil junjun. 17 Atzun ke nej cyal vac, ke nej cyal ẍneꞌl ex ke nej cyal chip, miꞌn che cyaj colpet, porque weye ke jlu. Che bel tbyoꞌna ke, cꞌoquel ttxꞌitoꞌna cychcꞌel tiꞌjele tcꞌuꞌj altar, ex cbel tpatuna cysebyil te jun oyaj at tcꞌocꞌjal in chin tzalaje tiꞌj. 18 Atzunju cychibjal, teya cꞌajbel, ic tzaꞌn ttzi cyxuꞌc mastl alumaj ex cycux tuj cybankꞌab. 19 Cycyakil ke oyaj xjan nneꞌl cypaꞌn aj Israel te weye, teya cxel nkꞌoꞌne ex cye tcyꞌajala ex cye tmeꞌjela, akeju ax ateꞌ tuj tjaya. A jlu jun ley cucx ctel te jumajx. Aju yol ma cyaj bant tiꞌj wuꞌne tucꞌila, axju cꞌajbel cye tiyjila, mlay chꞌexpet ex cucx ctel te jumajx, chi Kman te Aarón.

20 Ex tmatl Kman te Aarón cyjaꞌ:

Mintiꞌ ttxꞌotxꞌa ex mintiꞌ tetzbila ctel tuj cytxꞌotxꞌ aj Israel. Akine chin oquel te tetzbila tuj cytxꞌotxꞌ aj Israel. 21 Aju tlajiꞌn in tzaj cykꞌoꞌn aj Israel tiꞌj twitz cyawal, cxel nkꞌoꞌne te cyetzbil aj Leví te twi cycꞌuꞌj, tuꞌnju in che ajben tuj ja xbalun te mojbabl tibil. 22 Atzun ke mastl aj Israel miꞌntl che pon lakꞌeꞌ tiꞌj ja xbalun te mojbabl tibil, porque tuꞌn jlu jacu cybincha jun il ex jacu che cyim tuꞌn tlaj. 23 Oꞌcx cye aj Leví che ajbel tuj ja xbalun te mojbabl tibil, ex ka at jun mya baꞌn ma binchanjtz tiꞌj, atzun ke at cyil tiꞌj. Atzun jun ley jlu cyjel ten cyucꞌile te jumajx, ex wikinwik cyjel cymaꞌne cye cycꞌwaꞌle. Ke aj Leví mintiꞌ cytxꞌotxꞌ ctel tuj cytxꞌotxꞌ mastl aj Israel, 24 porque ma txi nkꞌoꞌne te cyetzbil aju tlajiꞌn in tzaj cykꞌoꞌn aj Israel weye tiꞌj twitz cyawal. Cyjaꞌtzun ma txi nmaꞌne: Mintiꞌ cytxꞌotxꞌ ctel tuj cytxꞌotxꞌ aj Israel, chi Kman te Aarón.

25 Tzaj yolin Kman tucꞌil Moisés ex tma:

26 Kꞌmanxa cye aj Leví cyjaꞌ: Oc ttzaj cycꞌmoꞌne aju tlajiꞌn tiꞌj twitz cyawal aj Israel, aju o txi nkꞌoꞌne te cyetzbile, cꞌelel cyiꞌne tlajiꞌn tiꞌj tlajiꞌn ctzajel cycꞌmoꞌne, tuꞌn ttzaj cykꞌoꞌne weye. 27 Atzun cyeye cyoyaj ctzajel cykꞌoꞌne junx taꞌ tucꞌil cye aj Israel cyoyaj in tzaj cykꞌoꞌn tiꞌj triw ex tiꞌj taꞌl twitz uva. 28 Cyjaꞌtzun cꞌelel cypaꞌne cyoyaje te Kman tiꞌj tlajiꞌn ctzajel cykꞌoꞌn aj Israel weye, ex cxel cykꞌoꞌne te pal Aarón. 29 Tiꞌj tcyakilju ctzajel cykꞌoꞌn cyeye cꞌelel cypaꞌne chꞌin tiꞌj, ic tzaꞌn jun cyoyaje te weye, ex aju mas tbanil atzunju ctzajel cykꞌoꞌne weye.

30 Tel-lenxi cypaꞌne aju mas tbanil te weye, aju csobryil baꞌn tuꞌn toc te cyeye, ic tzaꞌnx cyexe cyawale triw ex taꞌl twitz uva. 31 Baꞌntzun tuꞌn t-xi cywaꞌne akeye ex keju ateꞌ tuj cyjaye nok tuj alcyex lugar. Atzun twi cycꞌuꞌje tuꞌnju in che ajbene tuj ja xbalun te mojbabl tibil. 32 Ka ma tzꞌel cypaꞌne aju mas tbanil te weye, baꞌn tuꞌn t-xi cywaꞌne aju csobryil, ex mya il jlu; ictzun tten aju cyoyaj ke aj Israel xjansamaj, mlay baj cytzꞌilsaꞌne ex mlay che cyime, chicuya cye, chi Kman te Moisés.