2 Akine Cymane in xi nmaꞌne jlu: Cymanxe cye aj Israel tuꞌn ttzaj cyiꞌn tucꞌila jun vac cyak queꞌyin ttzmal, mintiꞌ tpaltil ex bajx tzꞌocx tjakꞌ yuw. 3 Cxeltzun cykꞌoꞌne te pal Eleazar, atzun te cꞌelex kꞌinte tiꞌjxi campament ex cxel tmaꞌn tuꞌn tcub byoꞌn twitz. 4 Ctzajel tiꞌn pal Eleazar chꞌin chicꞌ tuꞌn jun tal twi tkꞌab, ex cxel ttxꞌitoꞌn wuk maj tumlal ja xbalun te mojbabl tibil. 5 Cbeltzun patun vac twitz, tucꞌix ttzꞌumal, tucꞌix tchibjal, tucꞌix tchcꞌel ex tucꞌix ttxaꞌ. 6 Ctzajeltzun tiꞌntl pal jun piẍ tzeꞌ wiꞌten, tucꞌix jun tkꞌab tal cꞌul hisopo, tucꞌix jun piẍ xbalun cyak queꞌyin, ex che oquex tkꞌoꞌn tuj kꞌakꞌ jatum in tzꞌeꞌy vac. 7 Te tibajxi jlu cbajel ttxꞌjoꞌn pal t-xbalun, ax icx te cbajel chin, ex te tibajxi jlu baꞌn tuꞌn tocx tuj campament; max cꞌoquel pal te sak juntl maj ocxi tex kꞌij. 8 Ax icx aju xjal otok cub patunte vac cbajel ttxꞌjoꞌn t-xbalun ex cbajel chin, ex max cꞌoquel te sak juntl maj ocxi tex kꞌij. 9 Cꞌelex kꞌiꞌn ttzaꞌjil vac tuꞌn jun xjal t-saksan tib, ex cbel tkꞌoꞌn tuj jun lugar sak tiꞌjxi campament. Aju tzaꞌj lu cxel cycꞌuꞌn aj Israel tuꞌn tajben tuꞌn tbaj bant aꞌ te saksabl cye, ex tuꞌn tel cyil tuꞌn. 10 Aju xjal otok jaw chmonte tzaꞌj lu cbajel ttxꞌjoꞌn t-xbalun, ex max cꞌoquel te sak juntl maj ocxi tex kꞌij. Atzun jun ley lu cucx ctel te jumajx tuꞌn tajben cye aj Israel, ex cye ke stranjer xjal ax najl cyxol.

11 Alcye jun ma tzꞌoc maconte t-ximlal jun cyimni, wuk kꞌij ctel tuj ttzꞌilil. 12 Tuj toxin kꞌij ex tuj twukin kꞌij cbajel t-saksan tib tuꞌnju aꞌ te saksabl, ex csakseteltzun. Katzun miꞌn ma baj t-saksan tib tuj toxin kꞌij ex tuj twukin, mlaytzun sakset. 13 Ka at jun ma tzꞌoc maconte t-ximlal jun cyimni ex mintiꞌ in baj t-saksan tib, tuꞌn tlaj jlu in baj ttzꞌilsaꞌn njaye; cyjaꞌtzun biꞌx cꞌelex lajet cyxol aj Israel. Cucx ctel tuj ttzꞌilil tuꞌnju mintiꞌ ma tzꞌoc chitit ju aꞌ te saksabl tiꞌj.

14 Atzun ley lu tuꞌn tajben oc tcyim jun xjal tuj jun ja xbalun: Cycyakil keju ateꞌcx tuj ja xbalun ex cycyakil keju che oquex tuj, che tel wuk kꞌij tzꞌil ke. 15 Ex cycyakil ke xar ex ke cꞌil mya maksiꞌn cytziꞌ, ex ka mya mejor cyten cymaksil, ax icx che tel tzꞌil ke.

16 Alcye jun ma tzꞌoc maconte t-ximlal jun cyimni byoꞌn otok cub, ex ka tuꞌn yabil otok cyim tuj cojbil, ex ka ma tzꞌoc tmacoꞌn cybakil cyimni, ex ka jun pantyón, wuk kꞌij ctel tzꞌil cyuꞌn jlu.

17 Tiꞌjtzun xjal ttzꞌilsan tib, ctzajel kꞌit chꞌin ttzaꞌjil vac otok cub patit te chojbil il, ex cbelex kꞌot tuj jun xar tuꞌntzun t-xi ket aꞌ tibaj, aju aꞌ tzajni kꞌit tiꞌj twi aꞌ. 18 Ex jun xjal t-saksan tib ctzajel tiꞌn jun tkꞌab tal cꞌul hisopo, cbelex tkꞌoꞌn tuj aꞌ, ex cxel ttxꞌitoꞌn tiꞌj ja xbalun, cyiꞌj ke tiꞌxti ex cyiꞌj ke xjal ateꞌcx tuj ja, ax icx cxel ttxꞌitoꞌn chꞌin tiꞌj xjal otok tzꞌoc maconte tbakil jun cyimni, ex ka t-ximlal jun xjal byoꞌn otok cub, ex ka tuꞌn yabil otok cyim, ex ka otok tzꞌoc tmacoꞌn jun pantyón. 19 Atzunte xjal t-saksan tib cꞌoquel ttxꞌitoꞌn chꞌin aꞌ lu tuj toxin kꞌij ex tuj twukin kꞌij tiꞌj xjal ttzꞌilsan tib. Tuj twukin kꞌij cbajel sakset. Aju xjal otok baj ttzꞌilsan tib cbajel ttxꞌjoꞌn tiꞌj t-xbalun ex cbajel chin, ex max cꞌoquel te sak juntl maj ocxi tex kꞌij. 20 Ka at jun xjal ttzꞌilsan tib ex mintiꞌ in baj t-saksan tib, biꞌx cꞌelex lajet tuꞌntzun miꞌn tten cyxol t-xjalil tuꞌnju otok baj ttzꞌilsaꞌn njaye. Tuꞌnju mintiꞌ otok tzꞌoc txꞌitet aꞌ te saksabl tiꞌj, cucx ctel tuj ttzꞌilil. 21 A jlu jun ley cucx ctel te jumajx. Aju xjal cꞌoquel txꞌitoꞌn aꞌ te saksabl tiꞌj juntl, il tiꞌj tuꞌn tel ttxꞌjoꞌn tiꞌj t-xbalun. Alcye jun ma tzꞌoc maconte aꞌ te saksabl ctel tzꞌil, ex max cꞌoquel te sak juntl maj ocxi tex kꞌij. 22 Tcyakilju cꞌoquel tmacoꞌn jun xjal ttzꞌilsan tib, ctzꞌilixtel tuꞌn; ex alcye jun ma tzꞌoc maconte jlu, ax icx ctzꞌilixtel; max cꞌoquel te sak juntl maj ocxi tex kꞌij, chi Kman.