2 Kꞌmanxa cye aj Israel cyjaꞌ: Oc cyocxe tuj txꞌotxꞌ cxel nkꞌoꞌne cyeye, aju txꞌotxꞌ cꞌojlal junjun maj te jun nimbil weye. 3 Kak abkꞌi che awale cyuj cycojbile ex kak abkꞌi baꞌn tuꞌn tbaj cypodarine ke tkan cy-uvaye ex tuꞌn tjaw cychmoꞌne twitz, 4 atzun tuj twukin abkꞌi cꞌojlal txꞌotxꞌ cyuꞌne te jun nimbil weye. Miꞌn che awane cyuj cycojbile tuj abkꞌi lu, miꞌn baj cypodarine ke tkan cy-uvaye 5 ex miꞌn jaw cychmoꞌne t-xpokꞌl triw tajx ctzajel chꞌiy, ax icx twitz uva mya podarimaj, tuꞌntzun tojlan txꞌotxꞌ jun abkꞌi. 6 Aju twitz awal tzul tkꞌoꞌn txꞌotxꞌ tuꞌnx tib tuj abkꞌi te ojlabl, atzunju cꞌajbel te cywaye, te cywa ke cymajene xinak ex cymajene xuꞌj, te cywa ke akꞌnal ex te cywa ke stranjer xjal najl cyxole, 7 te cywa cywacẍe ex te cywa ke txcup te tjakꞌ cꞌul ateꞌ tuj cytxꞌotxꞌe. Tcyakil twitz awal ctzajel tkꞌoꞌn txꞌotxꞌ tuꞌnx tib cꞌajbel te cywaye.

8 Aju wuk abkꞌi, baꞌn tuꞌn t-xi cyajlaꞌne wuk maj, tuꞌntzun tjapun jun tajlal te 49 abkꞌi, 9 ex tuj tlajin tajlal twukin xjaw, atzunju kꞌij te najsbil il; cꞌoqueltzun cykꞌajtzaꞌne tcach ẍneꞌl cyuj cycyakil cytanmiye. 10 Aju abkꞌi 50 cꞌoquel cykꞌoꞌne te xjan, ex tujtzun abkꞌi lu cꞌelex tkanil tuꞌn cytzokpet cycyakil keju najl tuj txꞌotxꞌ; atzunju abkꞌi te tzokpibl. Cycyakil xjal che oquel te tajwil cytxꞌotxꞌ juntl maj ex che ajel meltzꞌaj tuꞌn cypon cyxol ke xjal at cyxilen cyucꞌil. 11 Aju abkꞌi 50, atzun jun abkꞌi te tzokpibl, ex tuj abkꞌi lu miꞌn cuꞌx cyawane awal, miꞌn jaw cychmoꞌne t-xpokꞌl triw tajx ctzajel chꞌiy tuj cycojbile ex miꞌn jaw cychmoꞌne twitz uva mya podarimaj, 12 porque atzun abkꞌi lu te tzokpibl cyeye ex cꞌoquel cykꞌoꞌne te xjan. Oꞌcx cxel cywaꞌne aju tuꞌnx tib txꞌotxꞌ ctzajel tkꞌoꞌn. 13 Tuj abkꞌi te tzokpibl, cycyakile che etzale juntl maj tiꞌj cytxꞌotxꞌe.

14 Ka at jun xjal ma tzaj tlakꞌoꞌn ex ka ma txi tcꞌayin jun piẍ txꞌotxꞌ te jun tucꞌil, miꞌn cub t-sbuꞌn tucꞌil tiꞌj jlu. 15 Oc ttzaj cylakꞌoꞌne txꞌotxꞌ, cxel cychjoꞌne ic tzaꞌnx tajlal abkꞌi tbajlen abkꞌi te tzokpibl, ex oc t-xi cycꞌayine txꞌotxꞌ cye cyucꞌile, cxel cykanine tuꞌn ttzaj cychjoꞌn ic tzaꞌnx tajlal abkꞌi tuꞌn tjaw chmet twitz awal. 16 Ka mas nim abkꞌi tuꞌn tjaw chmet twitz awal, ax mas nim twiꞌ; ex ka nicꞌxi abkꞌi taj, ax icx nok nicꞌxi twiꞌ, porque tzaꞌnx tajlal abkꞌi tuꞌn tjaw cychmoꞌne twitz awal tuj txꞌotxꞌ, icxtzun twiꞌ cxel cykꞌoꞌne.

17 Miꞌn cub cysbuꞌne jun cyucꞌile. Che xobe nwitze porque akine Cymane ex Cydiose.

18 Japunx ke nleye cyuꞌne, cynimanxe ke nmandamyente ex japunx cyuꞌne tuꞌntzun cyankꞌine tuj tzalajbil tuj txꞌotxꞌ cxel nkꞌoꞌne cyeye, 19 ex ctzajeltzun tkꞌoꞌn txꞌotxꞌ tuꞌn cywaꞌne tiꞌj ocxi tnoj cycꞌuꞌje, ex che ankꞌile tuj txꞌotxꞌ tuj tzalajbil.

20 Ex ka ma cymaye cyjaꞌ: ¿Titzun cxel kwaꞌn tuj twukin abkꞌi, ka miꞌn cuꞌx kawaꞌn kawal ex ka miꞌn jaw kchmoꞌn twitz?, ka che chiye, 21 ctzajel nsamaꞌne ncyꞌiwbile cyibaje tuj tkakin abkꞌi, ex aju twitz cyawale cjawil cychmoꞌne tuj abkꞌi lu, ccanitel te ox abkꞌi. 22 Cyjaꞌtzun che waꞌle tiꞌj twitz awal otok baj cycꞌuꞌne, acux nnuꞌl canun tuꞌn cyawane tiꞌj acꞌaj twitz awal tuj twajxakin abkꞌi, ex cucx che waꞌle tuj tbelajiꞌn abkꞌi tiꞌj twitz awal otok baj cycꞌuꞌne, acuxtzun nnuꞌl tkꞌijlalil tuꞌn tjaw cychmoꞌne twitz cyawale tuj tbelajiꞌn abkꞌi.

23 Aju txꞌotxꞌ mlay txi cꞌayit te jumajx porque weye txꞌotxꞌ, atzun cyeye nok betin xjal keye ex stranjer xjal keye. 24 Cyjaꞌtzun, nok alcyex txꞌotxꞌ ma tzꞌoc te cyetzbile, il tiꞌj tuꞌn taj cykꞌoꞌne cye tnejel tajwil, tuꞌntzun cycꞌmonte juntl maj cytxꞌotxꞌ.

25 Ka at jun cyxole ma tzꞌoc te meba ex ka ma txi tcꞌayin jun piẍ ttxꞌotxꞌ, aju terman mas at t-xilen tucꞌil, atzunju baꞌn tcyaj coꞌpinte txꞌotxꞌ otok txi tcꞌayin terman te juntl xjal.

26 Katzun at jun cyxjalile mintiꞌ jun terman tuꞌn tcyaj coꞌpinte tetzbil ex ka ma chmet twiꞌ tuꞌn tuꞌn tcyaj tcoꞌpin tuꞌnx, 27 cxeltzun tajlaꞌn jteꞌxi abkꞌi t-xilen tcꞌayin ex cꞌajel tkꞌoꞌn te lokꞌol aju tajlal pwak jteꞌ abkꞌi atx taj tuꞌn tjapun abkꞌi te tzokpibl, ex cꞌoqueltzun juntl maj te tajwil tetzbil. 28 Katzun mintiꞌ ma cnet pwak tuꞌn tuꞌn tcyaj tcoꞌpin tetzbil, cyjeltzun ten txꞌotxꞌ lu tuj tcwent lokꞌol max tuj abkꞌi te tzokpibl; maxitzun ctzokpetel tetzbil, ex aju xi cꞌayinte etzbil cꞌoquel juntl maj te tajwil.

29 Ka at jun ma txi tcꞌayin jun ja tuj tnam tocsaꞌn muro tiꞌj, oꞌcx jun abkꞌi at toclen tiꞌj tuꞌn tcyaj tlakꞌoꞌn juntl maj; oꞌcx jun abkꞌi at toclen tiꞌj tuꞌn tcyaj tcoꞌpin. 30 Katzun mintiꞌ ma cyaj coꞌpin ja at tuj tnam tocsaꞌn muro tiꞌj oc tel jun abkꞌi, cyjeltzun ten te jumajx tuj tcwent lakꞌolte ex tuj cycwent ke tiyjil in che ul itzꞌj te tibajxi. Mlayx tzꞌaj kꞌot te tnejel tajwil tuj abkꞌi te tzokpibl. 31 Atzun ke ja ateꞌ tuj tnam mintiꞌ muro tocsaꞌn cyiꞌj, ax cbantel cyiꞌj ic tzaꞌn in bant cyiꞌj ke cojbil, jacu bant tuꞌn cycyaj coꞌpit, ex che ajel kꞌot juntl maj cye tnejel cyajwil tuj abkꞌi te tzokpibl.

32 Atzun cye aj Leví cucx ctel cyoclen tuꞌn tcyaj cycoꞌpin ke ja ateꞌ cyujx cye cytanmi. 33 Baꞌn tuꞌn tcyaj cycoꞌpin aj Leví cyja; ex ka miꞌn, il tiꞌj tuꞌn tcyaj tcolin lokꞌol ja tuj abkꞌi te tzokpibl, tuꞌn taj tkꞌoꞌn ja cye aj Leví, porque aju cyetzbil aj Leví at cyxol aj Israel, atzunju cyja at tuj cyex cytanmi. 34 Ke cojbil ateꞌ cyiꞌjele cytanmi aj Leví mlay cheꞌx cꞌayit, porque atzun cyetzbil ex cucx ctel te cye te jumajx.

35 Ka at jun cyxjalile ma tzꞌoc te meba ex ka mintiꞌ tzaꞌn tten tuꞌn tankꞌin, ex ka ma pon cyucꞌile, il tiꞌj tuꞌn t-xi cyonine, ic tzaꞌn jun stranjer xjal ex betin xjal, ex ax baꞌn tuꞌn tcyaj ten cyucꞌile. 36 Miꞌn tzꞌel cykanine taꞌl cypwake cxel cykꞌoꞌne te tchꞌex, nok oꞌcx che xobe twitz Dios ex cycꞌmome tuꞌn tten cyxjalile cyucꞌile. 37 Miꞌn tzꞌel cyiꞌne taꞌl cypwake cxel cykꞌoꞌne te tchꞌex ex miꞌn jax cylakꞌbaꞌne twiꞌ twa. 38 Akine Cymane ex Cydiose aju etz kꞌinte cyeye tuj Ejipt tuꞌn t-xi nkꞌoꞌne txꞌotxꞌ Canaán cyeye ex tuꞌn woque te Cydiose.

39 Ka at jun cyxjalile ma tzꞌoc te meba ex ka ma tzaj tcꞌayin tib cyeye tuꞌnju at nim tcꞌas cyucꞌile, miꞌn cub cykꞌoꞌne akꞌuntl cyuwxix tibaj, ic tzaꞌn jun majen tcꞌayin tib; 40 nok oꞌcx cꞌoquel cykꞌoꞌne ic tzaꞌn jun akꞌnal chjoꞌn tkꞌij ex ka ic tzaꞌn jun betin xjal, ex max tuj abkꞌi te tzokpibl cxel tcolin tuꞌn takꞌnan cyucꞌile. 41 Cꞌelextzun tuj cyjaye junx cyucꞌil ke tcꞌwaꞌl, tuꞌntzun taj juntl maj cyxol ke tiyjil ex tuj cyetzbil keju at cyxilen tucꞌil. 42 Porque weye nmajen ke aj Israel; wuꞌne e jeꞌtz wiꞌne tuj Ejipt ex mlay bant tuꞌn cyxi cꞌayit te majen; 43 miꞌn che baj cyyajlaꞌne; nok oꞌcx che xobe nwitze.

44 Ka cyajbile tuꞌn tten cymajene xinak ex ka cymajene xuꞌj, baꞌn tuꞌn ttzaj cylakꞌoꞌne cyuj ke nasyon ateꞌ cyiꞌjeleye. 45 Ax icx baꞌn tuꞌn ttzaj cylakꞌoꞌne te cymajene ke stranjer xjal ax najl cyxole, ex ke cycꞌwaꞌl che ul itzꞌj acux ateꞌ tuj cytxꞌotxꞌe. Atzun ke baꞌn tuꞌn ttzaj cylakꞌoꞌne tuꞌn cyoc te cyeye, 46 ex tuꞌn tcyaj cykꞌoꞌne cye cycꞌwaꞌle oc cycyime, ex cucx che ajbel te cye. Atzun cyeye, akeye aj Israel, mi jun cyeye ccawil tibaj jun terman, ex miꞌn che cub cyyajlaꞌne cyermaniye junx cyiyjile cyucꞌil.

47 Ka at jun stranjer xjal najl tuj cytxꞌotxꞌe ma tzꞌoc te kꞌinun, ex ka at jun cyxjalile tvesin tib tucꞌil ju xjal lu ma tzꞌoc te meba, ex ka ma txi tcꞌayin tib te xjal lu ex ka te juntl xjal at t-xilen tucꞌil, 48 at oclenj te tuꞌn tchjet tzokpibl te t-xilenxi tcꞌayin tib. Jacu coꞌpj tuꞌn jun terman; 49 ka tuꞌn jun terman tman, ka tuꞌn jun tcyꞌajal terman tman ex ka tuꞌn juntl xjal at t-xilen tucꞌil. Ax icx jacu coꞌpj tuꞌnx tib, ka ma cnet pwak tuꞌn. 50 Ex cjawil tiꞌn jun tajlal tucꞌil xjal xi lakꞌonte te, atxix tuj abkꞌi tej t-xi tcꞌayin tib ocxi tpon tuj abkꞌi te tzokpibl; aju twiꞌ cxel kꞌit, ic tzaꞌnx cyajlal abkꞌi ex aju tyemp otok tzꞌakꞌnan, cjawil kꞌit tajlal ic tzaꞌnx chojbil te jun akꞌnal. 51 Ka nim abkꞌi atx taj, cꞌajel tkꞌoꞌn twiꞌ ic tzaꞌnx t-xilen tcꞌayin tib, tuꞌntzun tcyaj tcoꞌpin tib tzaꞌnx tajlal abkꞌi atx taj; 52 katzun nicꞌxi taj tuꞌn tul canun abkꞌi te tzokpibl, cxel tkꞌoꞌn te coꞌpbilte jun tajlal ic tzaꞌnx tajlal abkꞌi atx taj. 53 Cꞌoquel cykꞌoꞌne ic tzaꞌn jun akꞌnal tuj abkꞌiyin; miꞌn cyakꞌe ambil tuꞌn cybaj yajlaꞌn.

54 Katzun mintiꞌ tumel tuꞌn tetz tcoꞌpin tib tuꞌnx ex ka tuꞌn juntl, maxitzun ctzokpetel tuj abkꞌi te tzokpibl junx cyucꞌil ke tcꞌwaꞌl, 55 porque weye nmajen ke aj Israel, wexixe nmajen ke; wuꞌne e jeꞌtz wiꞌne tuj Ejipt. Akine Cymane ex Cydiose.