2 Kꞌmanxa cye aj Israel tuꞌn tul cyiꞌn aseyt tbanilxix tucꞌila, aju nneꞌl tiꞌj twitz tzeꞌ olivo, tuꞌntzun cycꞌant ke candil tcyakil tyemp, 3 ex ate Aarón cbajel binchante cyten cycyakil kale, tuꞌntzun cycꞌant nwitze tcyakil konicꞌan tiꞌjtzi xbalun tcubsaꞌn te makbil tuj ja xbalun te mojbabl tibil, twitz cax cꞌubl nleye. Atzun ley lu cyjel ten cyucꞌile te jumajx ex wikinwik cyjel cymaꞌne cye cycꞌwaꞌle. 4 Il tiꞌj tuꞌn tbaj tbinchaꞌn cyten ke candil tibaj cycubil aju ttxꞌotxꞌil kꞌan pwak, tuꞌntzun cycꞌant nwitze tcyakil konicꞌan.

5 Ctzajel tiꞌna arin mas tbanil ex cbajel ttzkꞌajsaꞌna cablaj pan nimak, te cyaje libr arin ttxꞌotxꞌil junjun, 6 ex che bel tkꞌoꞌna tibaj mes lotzꞌimaj tiꞌj tuꞌn kꞌan pwak, aju tcubsaꞌn nwitze, ex te cabe txol cꞌelel tuꞌna, kakchak pan tuj junjun txol. 7 Ex kꞌon cuba tbanil storac ttxlaj junjun txol pan, tuꞌn cucx tuꞌn ttzaj naꞌt pan, ex te jun oyaj patun in cub te weye. 8 Tuj tcyakil kꞌij te ojlabl cbel kꞌot jlu nwitze, tuꞌntzun ttzaj naꞌt aju yol cyaj bant tiꞌj wuꞌne te jumajx cyucꞌil aj Israel. 9 Atzun ke pan lu te Aarón cꞌajbel ex cye tiyjil; atzun ke che xel waꞌnte pan lu tuj jun lugar xjan, porque mas xjanxix ke jlu cywitz mastl oyaj in cub patit nwitze.

10-11 Cyxol aj Israel attok jun xinak ax aj Israel ttxuꞌ, atzun tman aj Ejipt te. Aju ttxuꞌ xinak lu, Selomit tbi ex tmeꞌjel Dibri, aju tiyjil Dan. Aju xinak lu oc ten kꞌojlel tucꞌil jun xinak ax aj Israel tuj campament, atzunte xinak tal xuꞌj aj Israel o tma jun yol mya baꞌn tiꞌj Kman. Xitzun kꞌiꞌn twitz Moisés, 12 ex xi tmaꞌn Moisés cye tuꞌn tocx cykꞌoꞌn tuj pres, acux in tzaj tmaꞌn Kman alcye tuꞌn tbinchet tiꞌj.

13 Tzajtzun yolin Kman tucꞌil Moisés ex tma: 14 Kꞌiꞌn exa tiꞌjxi campament aju xinak ma yolin mya baꞌn wiꞌje, ex cycyakil keju e binte tyol, e tcub cykꞌoꞌn cykꞌab tibaj twiꞌ ex e toc cyxoꞌn cycyakil tnam xjal tuꞌn abj tuꞌn tcyim. 15 Ex kꞌmanxa cye aj Israel cyjaꞌ: Ka at jun ma yolin mya baꞌn wiꞌje akine Tdios, ax te at til tiꞌj tcamic, 16 ex cymel tuꞌn abj cyuꞌn cycyakil tnam xjal. Ka stranjer xjal ex ka aj Israel, ka ma yolin mya baꞌn wiꞌje akine Cymane, il tiꞌj cbel byet.

17 Alcye ma cub byonte jun xjal, ax icx te il tiꞌj tuꞌn tcyim.

18 Alcye jun xjal ma cub byonte talun juntl, il tiꞌj tuꞌn taj tkꞌoꞌn t-xel alumaj.

19 Alcye jun xjal ma tbincha jun mya baꞌn tiꞌj tucꞌil, ax icx te cbinchetel jun mya baꞌn tiꞌj ic tzaꞌnx otok tbincha tiꞌj tucꞌil. 20 Alcye jun ma tokj tbakil tucꞌil tuꞌn, ax icx te il tiꞌj tuꞌn ttokit tbakil; ka ma jatz tbakꞌ twitz tucꞌil tuꞌn, ax icx te il tiꞌj tuꞌn tjatz tbakꞌ twitz, ex ka ma tzꞌetz twitz teꞌ tucꞌil tuꞌn, ax icx te il tiꞌj tuꞌn tetz twitz teꞌ. Il tiꞌj tuꞌn tcꞌixbiset ic tzaꞌn otok tbincha tiꞌj tucꞌil.

21 Alcye jun xjal ma cub byonte talun juntl, il tiꞌj tuꞌn taj tkꞌoꞌn t-xel alumaj, pero alcye jun ma cub byonte jun xjal, icx te il tiꞌj tuꞌn tcyim.

22 Aju ley lu cꞌajbel cye stranjer xjal tzaꞌnx cye aj Israel. Akine Cymane ex Cydiose.

23 Xitzun tmaꞌn Moisés cye aj Israel aju otok tzaj tmaꞌn Dios te, ex extzun cyiꞌn tiꞌjxi campament aju xinak otok yolin mya baꞌn tiꞌj Dios, ex oc cyxoꞌn tuꞌn abj tuꞌn tcyim. O cybincha aj Israel ic tzaꞌnx otok tzaj tmaꞌn Kman te Moisés.