2 Kꞌmanxa cye aj Israel cyjaꞌ: Ke ninkꞌij nim cyoclen te weye tuꞌn tcub cybuyin cyibe ex tuꞌn cycꞌulune nwitze, atzun ke jlu.

3 Kak kꞌij che akꞌnale tuj seman, atzunju twukin kꞌij mi jun akꞌuntl cbantel cyuꞌne, porque kꞌij xjan te buyj tibil jlu. Atzun jun kꞌij lu te ojlabl cxel cykꞌoꞌne te nimbil weye nok jaxja che tele.

4 Ax icx cbel cybuyin cyibe tuj kꞌij banin tiꞌj ex cbel cyicꞌsaꞌne ke kꞌij lu nimxix toclen te nimbil weye:

5 Tuj cyajlaj tajlal tnejel xjaw te kale, atzun kꞌij tuꞌn tcub cyicꞌsaꞌne Xjan Kꞌij te nimbil weye.

6 Atzun tuj t-olajin kꞌij tex xjaw lu, atzun kꞌij tuꞌn tcub cyicꞌsaꞌne tkꞌijlalil pan mintiꞌ t-samel tuj tuꞌn tjaw mal tcꞌuꞌj. Wuk kꞌij che waꞌle cyiꞌj pan lu te nimbil weye. 7 Ex tuj tnejel kꞌij te ninkꞌij lu, cꞌoquel jun buyj tibil xjan cyuꞌne, ex mintiꞌ jun akꞌuntl cbantel cyuꞌne. 8 Tuj enter wuk kꞌij lu cbel cypatune chojbil te Kman, atzun tuj twukin kꞌij cꞌoquel juntl buyj tibil xjan cyuꞌne ex mi jun akꞌuntl cbantel cyuꞌne.

9 Tzaj yolin Kman tucꞌil Moisés ex tma:

10 Kꞌmanxa cye aj Israel cyjaꞌ: Oc cypone tuj txꞌotxꞌ cxel nkꞌoꞌne cyeye, oc tjaw triw cyuꞌne, ctzajel cyiꞌne aju tnejel cheꞌl te pal. 11 Te juntl kꞌij tbajlenxi kꞌij te ojlabl, cxel tyucun pal tnejel twitz awal lu nwitze, tuꞌntzun tcꞌmet wuꞌne cyeye. 12 Ax kꞌij oc ttzaj cykꞌoꞌne tnejel twitz awal weye, ctzajel cyiꞌne jun tal tman ẍneꞌl mintiꞌ tpaltil ex te jun abkꞌi, tuꞌn tcub patit te jun oyaj weye. 13 Ax icx ctzajel cyiꞌne cyaje libr arin tbanilxix smoꞌn tucꞌil aseyt, tuꞌn ttzaj cykꞌoꞌne weye te jun oyaj patun in cub at tcꞌocꞌjal tbanilxix. Ax icx ctzajel cyiꞌne jun litr taꞌl twitz uva tuꞌn tcub ket te jun oyaj weye. 14 Ttzajlenxi cykꞌoꞌne oyaj lu weye, baꞌn tuꞌn cywaꞌne tiꞌj twitz cyawale, ka triw txꞌiꞌlimaj ex ka chaꞌx, ex ka pan, pero nej otok tzaj cykꞌoꞌne cyoyaje weye. Atzun jun ley lu cyjel ten cyucꞌile te jumajx ex wikinwik cyjel cymaꞌne cye cycꞌwaꞌle nok jaxja che tele.

15 Tujx kꞌij t-xilen cykꞌoꞌne cyoyaje otok txi yuquet nwitze, ex ka ewtok tbajlen kꞌij te ojlabl, cxel cyajlaꞌne wuk seman cabal. 16 Octzun tjapun wuk seman tbajlen kꞌij te ojlabl, tucꞌix juntl kꞌij, atzun ctzꞌaketel 50 kꞌij. Maxitzun ctzajel cyiꞌne acꞌaj cyoyaje twitz awal weye. 17 Ex cybinchan baje cabe pan ma cyjaye, te cyaje libr talil junjun ex at t-samel tuj tuꞌn tjaw mal tcꞌuꞌj, tuꞌn ttzaj yucut nwitze, ex a arin cꞌajbel cyuꞌne te pan aju mas tbanilxix, atzun jun cyoyaje ctzajel cykꞌoꞌne weye tiꞌj tnejel twitz cyawale. 18 Junx cyucꞌil ke pan ctzajel cyiꞌne wuk tal tman ẍneꞌl mintiꞌ cypaltil, te jun abkꞌi ke, tucꞌix jun tal tor ex cabe tman ẍneꞌl, tuꞌntzun cycub patit te oyaj weye at tcꞌocꞌjal in chin tzalaje tiꞌj. Atzun cyoyaje jlu ctzajel cyiꞌne te tmoj twitz awal ex taꞌl twitz uva.

19 Ax icx ctzajel cykꞌoꞌne jun tman chip te chojbil cyile ex cabe tal tman ẍneꞌl te jun abkꞌi ke, te jun oyaj te mojbabl tibil. 20 Che xel tyucun pal ke cabe tal tman ẍneꞌl lu nwitze junx tucꞌil pan tiꞌj tnejel twitz awal, ex che xjansetel ke oyaj lu te weye, tuꞌntzun tajben te pal.

21 Ax kꞌij lu cbel cybuyin cyibe tuj jun buyj tibil xjan ex mi jun akꞌuntl cbantel cyuꞌne. Atzun jun ley lu cyjel ten cyucꞌile te jumajx, ex wikinwik cyjel cymaꞌne cye cycꞌwaꞌle nok jatum che tele.

22 Oc tjaw cychmoꞌne twitz cyawale, il tiꞌj cyjel cykꞌoꞌne chꞌin ttxaꞌnile cojbil ex miꞌn che aje sacwilte aju otok cyaj tzꞌak. Cykꞌoncje jlu cye meba ex cye betin xjal. Akine Cymane ex Cydiose.

23 Tzaj yolin Kman tucꞌil Moisés ex tma:

24 Kꞌmanxa cye aj Israel ke yol lu: Tuj tnejel kꞌij te twukin xjaw cꞌoquel jun ninkꞌij te ojlabl cyuꞌne, tucꞌix jun buyj tibil xjan, tuꞌn ttzaj cynaꞌne t-xtalbil Dios tucꞌil tkꞌajkꞌajel twi chun. 25 Cbel cypatune jun oyaj te weye ex mi jun akꞌuntl cbantel cyuꞌne.

26 Ax icx tzaj yolin Kman tucꞌil Moisés ex tma:

27 Tuj tlajin kꞌij tex ju twukin xjaw, atzun kꞌij tuꞌn tnajset cyile. Atzun kꞌij lu tuꞌn toc cybuyin cyibe tuj jun buyj tibil xjan, ex tuj kꞌij lu cbel cyyoꞌne weꞌyaj ex cbel cypatune oyaj te nimbil weye. 28 Mi jun akꞌuntl cbantel cyuꞌne tuj kꞌij lu, porque atzun kꞌij tuꞌn tnajset cyile nwitze, akine Cymane ex Cydiose. 29 Ka at jun xjal mintiꞌ ma txi tniman tuꞌn tcub tyoꞌn weꞌyaj tuj kꞌij lu, biꞌx cꞌelex lajet tuꞌntzun miꞌn ttentl cyxol t-xjalil. 30 Ex ka at jun xjal ma tzꞌakꞌnan tuj kꞌij lu, biꞌx cnajel wuꞌne tuꞌntzun miꞌn ttentl cyxol t-xjalil. 31 Mi jun akꞌuntl cbantel cyuꞌne tuj kꞌij lu. Atzun ley lu cyjel ten cyucꞌile te jumajx, ex wikinwik cyjel cymaꞌne cye cycꞌwaꞌle nok jatum che tele. 32 Aju kꞌij lu, kꞌij te ojlabl te cyeye ex tuꞌn tcub cyyoꞌne weꞌyaj, ctzyetel te kale tuj belaj tajlal xjaw ex cpol baj tuj juntl kꞌij te kale.

33 Tzaj yolin Kman tucꞌil Moisés ex tma:

34 Kꞌmanxa cye aj Israel cyjaꞌ: Tuj t-olajin tajlal twukin xjaw, ctzyetel ninkꞌij cyiꞌj tal ja t-xak tzeꞌyin cywiꞌ, ex wuk kꞌij cbel cyicꞌsaꞌne te nimbil weye. 35 Tuj tnejel kꞌij ninkꞌij cꞌoquel jun buyj tibil xjan ex mi jun akꞌuntl cbantel cyuꞌne tuj kꞌij lu. 36 Wuk kꞌij ctzajel cykꞌoꞌne oyaj weye patun in che cub, atzun tuj twajxakin kꞌij cꞌoquel juntl buyj tibil xjan cyuꞌne, ax icx ctzajel cykꞌoꞌne oyaj weye patun in cub. Atzun jun ninkꞌij lu maꞌ toclen ex mi jun akꞌuntl cbantel cyuꞌne tuj kꞌij lu.

37 Atzun ke ninkꞌij jlu maꞌxix cyoclen te weye; cyujtzun ke ninkꞌij lu cꞌoquel buyj tibil xjan te weye cyuꞌne, ex cyujtzun ke kꞌij lu ctzajel cykꞌoꞌne weye oyaj patun in che cub, ke oyaj te chojbil cyile, ke oyaj tiꞌj twitz cyawale, ke oyaj te chojbil weye, tucꞌix oyaj tiꞌj taꞌl twitz uva; teylex te junjun cxel cykꞌoꞌne tuj kꞌij banin tiꞌj. 38 Atzun ke ninkꞌij lu part ke, part ke ninkꞌij te ojlabl, ex atzun ke oyaj lu tuꞌn ttzaj cykꞌoꞌne weye, part ke, part ju oyaj tziyimaj cyuꞌne ex ke oyaj ctzajel cykꞌoꞌne tuꞌn cyexe cygan.

39 Tuj t-olajin tajlal twukin xjaw, oc tjaw baj cychmoꞌne twitz cyawale, cꞌoquel wuk kꞌij ninkꞌij cyuꞌne te weye. Aju tnejel kꞌij jun kꞌij te ojlabl, ax icx twajxakin kꞌij, ax juntl kꞌij te ojlabl. 40 Tuj tnejel kꞌij ctzajel cyiꞌne tkꞌab tzeꞌ tbanilxix tucꞌix twitz, cyucꞌix ke tkꞌab xaꞌj, cyucꞌix ke tkꞌab tzeꞌ puro pin cyxak, cyucꞌix ke tkꞌab chjaj at ttzi aꞌ ex wuk kꞌij che tzalajele nwitze. Akine Cymane ex Cydiose. 41 Tcyakil abkꞌi cꞌoquel wuk kꞌij ninkꞌij cyuꞌne nwitze tuj twukin xjaw. Atzun jun ley lu cyjel ten cyucꞌile te jumajx ex wikinwik cyjel cymaꞌne cye cycꞌwaꞌle. 42 Cyujtzunju ke wuk kꞌij te ninkꞌij lu, cycyakil aj Israel ax che itzꞌjel tuj txꞌotxꞌ jatum che najale che tel cyuj tal ja t-xak tzeꞌyin cywiꞌ, 43 tuꞌntzun tel cynicꞌ cycyakil cyiyjile tiꞌj, akeju che ul itzꞌj te tibajxi, tej cyetz wiꞌne cyxeꞌchel tuj Ejipt nok cyuj tal ja t-xak tzeꞌyin cywiꞌ e najan wuꞌne. Akine Cymane ex Cydiose.

44 Atzun ke yol lu xi tmaꞌn Moisés cye aj Israel cyiꞌj ke ninkꞌij maꞌ cyoclen te Kman.