Keju at cyoclen cyiꞌj ke oyaj in cheꞌx kꞌot te Kman
22
Tzaj yolin Kman tucꞌil Moisés ex tma:2 Kꞌmanxa te Aarón ex cye ke tcyꞌajal tuꞌn tten cycwent cyiꞌj ke tiꞌxti xjan, aju in tzaj cykꞌoꞌn aj Israel weye, tuꞌntzun miꞌn toc tkꞌoꞌn nbiye xjan te mintiꞌ tajben. Akine Cymane.
3 Kꞌmanxa cye: Ic tzaꞌnx jaꞌlo ax icx tuj tkꞌijlalil tzul, ka at jun tiyjil Aarón ttzꞌilsan tib ma pon lakꞌeꞌ cyiꞌj ke tiꞌxti xjan aju ctzajel cykꞌoꞌn ke aj Israel weye, biꞌx cꞌelel toclen te pal, tuꞌn miꞌn tajben weye. Akine Cymane.
4 Ka at jun xinak tiyjil Aarón yab tuꞌn txꞌaꞌc mintiꞌ kꞌanbil tiꞌj, ex ka in jaw poj twi ttzꞌaꞌlbil, mya baꞌn tuꞌn twaꞌn cyiꞌj ke tiꞌxti xjansamaj; max cwaꞌl tiꞌj ocxi t-sakix.
Ax icx ka at jun ma tzꞌoc maconte jun tiꞌxti tzꞌil, aju otok tzꞌoc tacl t-ximlal jun cyimni tiꞌj, ex ka ma tzꞌoc tmacoꞌn jun xjal yab tuꞌn poj in jaw twi ttzꞌaꞌlbil, 5 ex ka ma baj ttzꞌilsan tib tuꞌnju toclen tmacoꞌn jun jil jakuꞌn in xiꞌ tcꞌuꞌj twitz txꞌotxꞌ, ex ka ma tzꞌoc tmacoꞌn jun xinak ttzꞌilsan tib tuꞌn nok alcyexcu ttzꞌilil, 6 biꞌx ctzꞌilixtel ex max cꞌoquel te sak juntl maj ocxi ttzaj klolj; mlay waꞌn cyiꞌj ke tiꞌxti xjan ka naꞌnxtok tbaj chin. 7 Csakixtel max ocxi tex kꞌij. Te tibajxi baꞌn tuꞌn twaꞌn cyiꞌj ke tiꞌxti xjansamaj, porque atzun twa. 8 Miꞌn txi tchyoꞌn tchibjal jun jil tajx otok cyim, ex ka tuꞌn jun txcup te tjakꞌ cꞌul otok cub byoꞌn, tuꞌntzun miꞌn ttzꞌilix tuꞌn jlu. Akine Cymane.
9 Il tiꞌj tuꞌn cyjapun ke nmandamyente cyuꞌn pal, tuꞌntzun miꞌn cybinchaꞌn il ex tuꞌn miꞌn cycyim tuꞌnju otok tzꞌoc cykꞌoꞌn nmandamyente te mintiꞌ tajben, porque akine aju Cymane ma baj xjansante cye.
10 Mi jun xjal mya tiyjil pal jacu waꞌn cyiꞌj ke tiꞌxti xjansamaj, mi ju xjal cpol betzalte pal ex mi ju xjal in akꞌnan tucꞌil; mi jun baꞌn tuꞌn twaꞌn cyiꞌj ke tiꞌxti xjansamaj.
11 Pero ka at jun pal ma tlokꞌ jun tmajen tuꞌn pwak, aju majen lu baꞌn tuꞌn twaꞌn cyiꞌj ke tiꞌxti xjansamaj; ax icx ke majen ax otok che itzꞌj tuj tja pal, baꞌn tuꞌn cywaꞌn tiꞌj wabj lu.
12 Oc tmojeꞌ jun cymeꞌjel pal tucꞌil jun xjal mya pal, mintiꞌtl toclen tuꞌn twaꞌn cyiꞌj ke oyaj in xi kꞌot cye pal. 13 Pero ka ma cyaj ten txin lu te meba xuꞌj ex ka ma cub tpaꞌn tib tucꞌil tchmil ex mintiꞌ tal otok tzaj, ka ma pon meltzꞌaj tja tman juntl maj tjunalxte, ic tzaꞌnx tten nej tej mintiꞌtok tchmil, jacu waꞌn tiꞌj wabj in xiꞌ tuꞌn tman. Atzun ke xjal mya tiyjil pal, mintiꞌ cyoclen tuꞌn cywaꞌn tiꞌj.
14 Katzun at jun xjal ma txi twaꞌn ke wabj xjansamaj ex mintiꞌ biꞌn tuꞌn ka xjansamaj, cxel tkꞌoꞌn t-xel te pal, ex te tibajxi jlu cxel tkꞌoꞌn tjweꞌyin tibaj; 15 pero miꞌn txi cykꞌoꞌn pal ambil cye aj Israel tuꞌn toc cykꞌoꞌn ke tiꞌxti xjansamaj te nok alcyex nicꞌbebl, aju ctzajel cykꞌoꞌn xjal weye, 16 tuꞌntzun miꞌn ttzaj mya baꞌn cyibaj tuꞌn tlaj cyil ka ma txi cywaꞌn ke tiꞌxti xjansamaj. Akine aju Cymane ma baj xjansante cye.
Aju at tuꞌn tbant cyiꞌj ke alumaj che xel kꞌot te Dios
17 Tzaj yolin Kman tucꞌil Moisés ex tma:
18 Kꞌmanxa te Aarón ex cye tcyꞌajal ex cye cycyakil aj Israel cyjaꞌ: Ka at jun aj Israel ex ka jun stranjer xjal najl cyxol ctzajel tkꞌoꞌn jun alumaj te oyaj patun in cub nwitze, ka te jun oyaj oc tjapun jun yol tuꞌn aju otok txi ttziyan tiꞌj, ex ka jun oyaj tuꞌn tex tgan ctzajel tkꞌoꞌn, 19 baꞌn tuꞌn ttzaj tkꞌoꞌn jun tor ex ka jun tman ẍneꞌl ex ka jun tman chip mintiꞌ tpaltil, tuꞌntzun tcꞌmet wuꞌne. 20 Miꞌn tzaj cykꞌoꞌne jun alumaj at tpaltil, porque a jlu mlay cꞌmet wuꞌne cyeye.
21 Nok alcye jun taj tuꞌn ttzaj tkꞌoꞌn weye jun chojbil te mojbabl tibil wucꞌile, ka te jun oyaj oc tjapun jun yol tuꞌn aju otok txi ttziyan, ex ka jun oyaj tuꞌn tex tgan, il tiꞌj tuꞌn ttzaj tkꞌoꞌn jun wacẍ ex ka jun ẍneꞌl mintiꞌ tpaltil, tuꞌntzun tcꞌmet wuꞌne. 22 Miꞌn tzaj cykꞌoꞌne weye jun alumaj moẍ twitz ex ka at cꞌixblen tiꞌj, ka cox, ka at txꞌaꞌc tiꞌj ex ka sal tiꞌj ex ka at juntl tyabil ttzꞌumal, ex miꞌn txi cykꞌoꞌne tuꞌn tcub patit te jun oyaj tibaj n-altare. 23 Te cyoyaje tuꞌn cyexe cygan, baꞌn tuꞌn ttzaj cykꞌoꞌne ka jun wacẍ ex ka jun ẍneꞌl, ichak ẍtij, ex ka nok otok tzaj swecꞌj twitz tkan, pero miꞌn tzaj cykꞌoꞌne te jun oyaj oc tjapun jun yol cyuꞌne aju otok txi cytziyane, porque mlay cꞌmet jlu. 24 Ax icx miꞌn tzaj cykꞌoꞌne weye akeju alumaj at ẍil tiꞌj cybakꞌ ex ka at cꞌixblen cyiꞌj ex ka o che el tzakin ex ka o che el kesin. Miꞌn cybinchaye jlu tuj cytanmiye. 25 Ax icx miꞌn tzaj cyiꞌne ke alumaj lu te jun stranjer xjal tuꞌn ttzaj cykꞌoꞌne weye, porque at cypaltil ex mlay che cꞌmet wuꞌne cyeye.
Tzaꞌn tten tuꞌn cycub byet ke alumaj te oyaj te Dios
26 Tzaj yolin Kman tucꞌil Moisés ex tma:
27 Oc tul itzꞌj jun tal wacẍ ex ka jun tal ẍneꞌl ex ka jun tal chip, il tiꞌj tuꞌn tcyaj ten wuk kꞌij tiꞌj ttxuꞌ tuꞌn tchꞌuꞌn; max tuj twajxakin kꞌij jacu cꞌmet wuꞌne tuꞌn tcub patit te jun oyaj weye.
28 Miꞌn cub cybyoꞌne jun vac ex ka jun ttxu ẍneꞌl tuj junx kꞌij junx tucꞌil tal.
29 Oc ttzaj cykꞌoꞌne jun cyoyaje te akꞌbil chjonte weye, cybinchame tujxix tumel tuꞌntzun tcꞌmet wuꞌne, 30 ex biꞌx cbajel cychyoꞌne tuj junx kꞌij; miꞌn cyaj cykꞌoꞌne chꞌintl tuj juntl kꞌij. Akine Cymane.
31 Cynimanxe ke nmandamyente ex japunx cyuꞌne. Akine Cymane.