Kꞌmanxa cye pal akeju tcyꞌajal Aarón tuꞌn miꞌn toc cymacoꞌn t-ximlal jun cyimni cyxol ke cyxjalil, tuꞌntzun miꞌn cytzꞌilix. 2 Oꞌcx at cyoclen tuꞌn toc cymacoꞌn t-ximlal cytxuꞌ ex ka cyman ex ka cycyꞌajal ex ka cymeꞌjel ex ka jun cyerman xinak, 3 ex ka jun cyanb naꞌnx tmojeꞌ ex ax taꞌ tuj cycwent, masque che tzꞌilixtel ke tuꞌn tlaj otok tzꞌoc cymacoꞌn cyximlal ke jlu. 4 Pero miꞌn tzꞌoc cymacoꞌn t-ximlal juntl xjal aju nok otok mojeꞌ tucꞌil jun cyerman, tuꞌntzun miꞌn cytzꞌilix.

5 Miꞌn tzꞌel cycꞌoẍin tiꞌj cywiꞌ, miꞌn tzꞌel cymatzoꞌn twi cyxmatz ex miꞌn baj cykesin cyximlal, 6 nok oꞌcx tuꞌn tbaj cyxjansan cyib nwitze tuꞌntzun miꞌn toc cykꞌoꞌn nbiye te mintiꞌ tajben, porque atzun ke che tzajel kꞌonte ke oyaj patun in che cub nwitze, ex ax ke che tzajel kꞌonte ke pan te weye, akine Cydios; cyjaꞌtzun cucx tuꞌn cyten xjan ke.

7 Ax icx mya baꞌn tuꞌn cymojeꞌ tucꞌil jun xuꞌj jawni twitz cyucꞌil xinak, mi tucꞌil jun xuꞌj otok cub tpaꞌn tib tucꞌil tchmil, porque xjansamaj ke pal tuꞌn cyajben weye. 8 Che cypaꞌn ela ke, porque atzun ke che tzajel kꞌonte tcyakil txcaj oyaj weye, ex xjan che oquel ke te cyeye, porque akine Cymane xjan kine, ex wuꞌne che oquel te xjan.

9 Ex ka at jun cymeꞌjel pal jawni twitz cyucꞌil xinak, tuꞌn jlu cbel tkꞌoꞌn tchꞌixwi tman; il tiꞌj cbel patit.

10 Aju tnejel pal ma tcꞌam toclen tuꞌnju aseyt te xjansabl cub koꞌn tuj twiꞌ ex ma tcꞌam toclen tuꞌn toc tkꞌoꞌn xbalun xjansamaj, cyjaꞌtzun mlay tzꞌel tchitpuꞌn ttzmal twiꞌ ex mlay tzꞌel t-sbitꞌun t-xbalun tiꞌj tuꞌn tlaj tbis; 11 ex mlay tzꞌocx queꞌyilte jun cyimni masque ka a tman ex ka ttxuꞌ, tuꞌntzun miꞌn ttzꞌilix. 12 Miꞌn tzꞌetz tuj njaye ex miꞌn baj ttzꞌilsaꞌn, porque o cub koꞌn aseyt te xjansabl tibaj twiꞌ, tuꞌn tajben te weye. Akine Cymane.

13 Il tiꞌj tuꞌn tmojeꞌ tucꞌil jun xuꞌj naꞌnx tlonte xinak. 14 Miꞌn jaw tiꞌn jun meba xuꞌj te t-xuꞌjil, mi jun xuꞌj otok cub tpaꞌn tib tucꞌil tchmil, mi jun xuꞌj otok til xinak, ex mi jun xuꞌj jawni twitz cyucꞌil xinak. Aju xuꞌj naꞌnx ttil xinak, atzunju baꞌn tuꞌn toc te t-xuꞌjil, ex ax cyxol ke tiyjil, 15 tuꞌntzun miꞌn ttzaj jun tal xuꞌj mya te pal tcyꞌajal; porque akine Cymane ma chin baj xjansante te.

16 Tzaj yolin Kman tucꞌil Moisés ex tma:

17 Kꞌmanxa te Aarón cyjaꞌ: Ka at jun tiyjil at ttzacaj, miꞌn txi kꞌot ambil te tuꞌn ttzaj tkꞌoꞌn tcyakil txcaj oyaj weye. 18 Porque mijun xinak at ttzacaj jacu tzaj kꞌonte oyaj weye: Ka moẍ, ka cox, ka tzcaj taꞌ ttxaꞌn ex ka t-ẍcyin, 19 ka toknaj jun tkan ex ka tkꞌab, 20 ka yucꞌ tiꞌj, ka chꞌin twaꞌl, ka muj cyiꞌj tbakꞌ twitz, ka at txꞌaꞌc tiꞌj, ka at sal tiꞌj ex ka tzcaj ke tbakꞌ. 21 Mi jun tiyjil pal Aarón tzcaj taꞌ jacu tzaj kꞌonte oyaj patun in cub te weye. Tuꞌnju at ttzacaj, mlay tzaj tkꞌoꞌn tcyakil txcaj oyaj weye. 22 Baꞌn tuꞌn twaꞌn tiꞌj oyaj lu ex cyiꞌj ke tiꞌxti xjan ex keju mas xjanxix, 23 pero mlay tzꞌocx tiꞌjxi xbalun tcub tuj ttzi Njaye ex mlay pon lakꞌeꞌ tiꞌj altar tuꞌnju at ttzacaj, tuꞌntzun miꞌn tbaj ttzꞌilsaꞌn Njaye. Akine Cymane o chin xjansante cye, chi Dios.

24 Atzunte Moisés xi tmaꞌn tcyakil yol lu te Aarón ex cye ke tcyꞌajal ex cye cycyakil aj Israel.