2 Kꞌmanxa cye aj Israel cyjaꞌ:

Ka at jun aj Israel ex ka jun stranjer xjal najl cyxole ma txi tkꞌoꞌn jun tcꞌwaꞌl tuꞌn tcub patit te jun oyaj te Moloc aju tilbilal nnoꞌc cydiosin xjal, il tiꞌj tuꞌn tcyim; cꞌoquel xoꞌt tuꞌn abj cyuꞌn tnam xjal. 3 Ctzajel nkꞌoje tiꞌj xjal lu, ex biꞌx cymel wuꞌne tuꞌntzun miꞌn ttentl cyxol t-xjalil, tuꞌnju otok baj ttzꞌilsaꞌn Njaye ex otok tzꞌoc tkꞌoꞌn Nbiye Xjan te mintiꞌ tajben, tuꞌnju tcublen tpatun jun tcꞌwaꞌl twitz Moloc aju tilbilal nnoꞌc cydiosin xjal. 4 Ka mintiꞌ ma che kꞌajt xjal tiꞌj jlu ex mintiꞌ otok cub cykꞌoꞌn t-sentens xjal tuꞌn tcyim, 5 ctzajeltzun nkꞌoje tiꞌj xjal lu ex cyiꞌj keju ateꞌ tuj tja, ex biꞌx cymel wuꞌne junx cyucꞌil keju otok cheꞌx lpeꞌ tiꞌj tuꞌn cycꞌulun twitz Moloc, tuꞌntzun miꞌn cytentl cyxol cyxjalil.

6 Ka at jun xjal ma txi tkanin jun t-xjel cye ke xjal baꞌn che txocon cyiꞌj cyanmi cyimni, ex ka ma txiꞌ cyucꞌil chman, ctzajel nkꞌoje tiꞌj xjal lu ex biꞌx cymel wuꞌne tuꞌntzun miꞌn ttentl cyxol t-xjalil.

7 Cyxjansamxix cyibe nwitze, ex che oque xjan, porque akine Cymane ex Cydiose. 8 Cynimanxe ke nleye ex japunxix cyuꞌne. Akine Cymane aju xjansalte cyeye.

9 Alcye jun ma yolin mya baꞌn tiꞌj tman ex ka tiꞌj ttxuꞌ, cbel t-sentens tuꞌn tcyim tuꞌnju otok yolin mya baꞌn tiꞌj tman ex ka tiꞌj ttxuꞌ. Ax te at til tiꞌj tcamic.

10 Ka at jun xinak ma tbincha aj pajil tucꞌil t-xuꞌjil tucꞌil, cycabil cbel cysentens tuꞌn cycyim, tzaꞌnx te xinak ax icx te xuꞌj.

11 Ka at jun xinak ma cub tan tucꞌil juntl t-xuꞌjil tman, cbel tkꞌoꞌn tchꞌixwi tman tuꞌn jlu. Cyjaꞌtzun cbel t-sentens xinak tuꞌn tcyim tucꞌix xuꞌj, ex ax ke at cyil tiꞌj cycamic.

12 Ka at jun xinak ma cub tan tucꞌil tlib, cycabil cbel cysentens tuꞌn cycyim, ex ax ke at cyil tiꞌj cycamic porque icꞌbilxix aju otok cybincha.

13 Ka at jun xinak ma cub tan tucꞌil juntl xinak ic tzaꞌnx in cub tan tucꞌil jun xuꞌj, cycabil cbel cysentens tuꞌn cycyim, ex ax ke at cyil tiꞌj cycamic porque icꞌbilxix aju otok cybincha.

14 Ka at jun xinak ma jaw xuꞌjlante jun xuꞌj ex tucꞌix ttxuꞌ xuꞌj ma jaw t-xuꞌjlaꞌn, tuꞌn jlu in cybinchaꞌn jun mya baꞌn icꞌbilxix; cyjaꞌtzun cyoxil che bel patit tuꞌntzun miꞌn tten mya baꞌn icꞌbilxix cyxole.

15 Ka at jun xinak ma cub tan tucꞌil jun alumaj, cbel t-sentens tuꞌn tcyim. Ax icx alumaj biꞌx cbel byet.

16 Ka at jun xuꞌj ma txi tkꞌon tib te jun alumaj, cycabil che bel byet; tzaꞌnx te xuꞌj ax icx te alumaj. Ax ke at cyil tiꞌj cycamic.

17 Ka at jun xinak ma jaw t-xuꞌjlaꞌn tanb, ka oꞌcx cyman junx ex ka oꞌcx cytxuꞌ, ex ka ma cub cymojban cyib, cycabil che bel byet cywitz ke cyxjalil, porque aju tuꞌn tjaw tmojban tib jun tucꞌilx tanb, jun chꞌixbil jlu, ex alcye ma tbincha icju ax te at til tiꞌj tcamic.

18 Ka at jun xinak ma cub tan tucꞌil jun xuꞌj otok tzul ẍwoꞌj tiꞌj, cycabil che elex lajet tuꞌntzun miꞌn cytentl cyxol cyxjalil, porque mintiꞌ otok txi cyniman aju in tmaꞌn ley tuꞌn miꞌn tcub tan xinak tucꞌil xuꞌj oc nnuꞌl ẍwoꞌj tiꞌj.

19 Miꞌn cub tana tucꞌil jun xuꞌj terman ttxuꞌya mi tucꞌil tanb tmana, porque at t-xilena cyucꞌil ex cycabile at cyile tiꞌj jlu.

20 Ka at jun ma cub tan tucꞌil t-xuꞌjil terman tman, tuꞌn jlu in cub tkꞌoꞌn tchꞌixwi terman tman; cycabil at cyil tiꞌj jlu ex octzun cycyim, mintiꞌx cycꞌwaꞌl otok tzaj.

21 Ka at jun ma jaw t-xuꞌjlaꞌn t-xuꞌjil terman, tuꞌn jlu in cub tkꞌoꞌn tchꞌixwi terman. Icꞌbilxix binchben lu, ex mintiꞌx cycꞌwaꞌl ctzajel.

22 Cynimanxe ke nleye ex ke nmandamyente; japunx tcyakil cyuꞌne tuꞌntzun miꞌn cyetz nlajoꞌne tuj txꞌotxꞌ jatum che pol wiꞌne tuꞌn cynajane tuj. 23 Miꞌn che oc lpeꞌye tiꞌj cycostumr xjal che elex nlajoꞌne cywitze; porque o cybincha cycyakil ke jlu, ex tuꞌntzunju o che el wicꞌune. 24 O txi ntziyane cyeye tuꞌn cyoque tajwil cytxꞌotxꞌ; ax kine chin xel kꞌonte txꞌotxꞌ lu cyeye te cyetzbile, aju txꞌotxꞌ lu kꞌinun txꞌotxꞌxix ex tbanilxix.

Akine Cymane ex Cydiose ma chin el paꞌnte cyeye cyiꞌj mastl nasyon. 25 Cyjaꞌtzun, ax icx cyeye baꞌn tuꞌn tel cynicꞌe cyiꞌj ke jil sak ex cyiꞌj ke jil tzꞌil, ex cyiꞌj ke chyuꞌj sak ex ke chyuꞌj tzꞌil. Miꞌn baj cytzꞌilsan cyibe cyuꞌn ke jil, ke chyuꞌj ex keju in xi cyjakuꞌn cycꞌuꞌj twitz txꞌotxꞌ, akeju ma che oc nkꞌoꞌne te tzꞌil. 26 Che ocxe xjan nwitze, porque akine Cymane xjan kine, ex ma che el npaꞌne cyiꞌj ke mastl nasyon tuꞌntzun cyoque te weye.

27 Ka at jun xinak ex ka jun xuꞌj baꞌn txocon tiꞌj cyanmi cyimni, ex ka baꞌn kꞌijin, il tiꞌj tuꞌn tcyim. Cꞌoquel cyxoꞌne tuꞌn abj ex ax te at til tiꞌj tcamic.