2 —Kꞌmanxa cye tnam xjal aj Israel ke yol lu: Che ocxe xjan, porque weye xjan kine, akine Cymane ex Cydiose.

3 Teylex junjun cyeye nimanx tman ex ttxuꞌ.

Ax icx miꞌn che akꞌnane tuj kꞌij te ojlabl. Akine Cymane ex Cydiose.

4 Miꞌn che cꞌulune cywitz ke tilbilal, ex miꞌn baj cybinchaꞌne jun cydiose tiꞌj cꞌuxbil otok cub ulj tuj kꞌakꞌ. Akine Cymane ex Cydiose.

5 Oc t-xi cykꞌoꞌne jun oyaj te mojbabl tibil nwitze, cykꞌontze tujxix tumel, tuꞌntzun tcꞌmet wuꞌne. 6 Biꞌx cxel chyoꞌt alumaj tujx kꞌij oc ttzaj kꞌot te weye, ax baꞌn tuꞌn t-xi cychyoꞌne tuj tcabin kꞌij; katzun ma cyaj ten chꞌintl tuj toxin kꞌij, il tiꞌj tuꞌn tcub patit. 7 Katzun ma txi cychyoꞌne chꞌin oyaj tuj toxin kꞌij, a jlu mya baꞌn tuj nwitze ex mlay cꞌmet wuꞌne. 8 Ka at jun ma txi chyonte te at til tiꞌj, tuꞌnju mya xoꞌn tuꞌn aju oyaj otok tzaj tkꞌoꞌn weye, ex biꞌx cꞌelex lajet tuꞌntzun miꞌn ttentl cyxol t-xjalil.

9 Oc tjaw cychmoꞌne twitz cyawale, il tiꞌj cyjel cykꞌoꞌne chꞌin ttxaꞌnile cojbil, ex miꞌn che aje sacwilte aju otok cyaj tzꞌak, 10 ex miꞌn che aje sacwilte junjun pnuj twitz uva otok cyaj ten twi tkan, ex miꞌn jaw cyscꞌoꞌne aju otok tzaj tzꞌak; cykꞌoncje jlu cye meba ex cye betin xjal. Akine Cymane ex Cydiose.

11 Miꞌn che elkꞌane. Miꞌn baj cysbun cyibe ex miꞌn che nicꞌane yol cyxolxe.

12 Miꞌn txi cymaꞌne tzkan Dios tuꞌn tajben nbiye cyuꞌne tiꞌj jun yol mya ax toc, porque tuꞌn jlu nnoꞌc cykꞌoꞌne nbiye te mintiꞌ tajben, akine Dios.

13 Miꞌn cub cyyajlaꞌne cyucꞌile ex miꞌn tzꞌel cyiꞌne aju at cye.

Miꞌn cub cytzyuꞌne twi tcꞌuꞌj cymajene tuꞌn tchjet cyuꞌne tujxi juntl kꞌij.

14 Miꞌn tzꞌoc cyyasoꞌne aju xjal chcyin twiꞌ.

Miꞌn cub cykꞌoꞌne tolsabl tuj cybe moẍ. Nok oꞌcx ten tchiylal Dios cyeye. Akine Cymane.

15 Miꞌn txi cybinchaꞌne tiꞌj xtis mya tuj tumel: Ka at til xjal, mya nok tuꞌnju meba xjal miꞌn cub t-sentens cyuꞌne, ax icx mya nok tuꞌnju maꞌ toclen xjal miꞌn cub t-sentens cyuꞌne ka at til, nok oꞌcx tuj tumel tuꞌn cycawine cyibaj cycyakil.

16 Miꞌn che siꞌmine yol cyiꞌj cyucꞌile cyxol cyxjalile.

Miꞌn jaw cysiꞌmine yol tiꞌj cyucꞌile tuꞌn tcub byoꞌn. Akine Cymane.

17 Miꞌn tzꞌel cyicꞌune jun cyermaniye tuj cyanmiye; ka at jun mya baꞌn ma tbincha jun cyucꞌile, cycawinxe, tuꞌntzun mya cyucꞌixe at cyoclene tiꞌj til.

18 Miꞌn tzꞌaj cykꞌoꞌne t-xel mya baꞌn cyiꞌj cyxjalile ka at jun mya baꞌn ma cybincha cyiꞌje, ex mya cucx tuꞌn t-xi cycꞌuꞌne kꞌoj tuj cyanmiye cyiꞌj. Nok oꞌcx cycꞌujlame ke cyucꞌile ic tzaꞌnx cyeye in cycꞌujlan cyibe. Akine Cymane.

19 Japunx ke nleye cyuꞌne.

Miꞌn cybinchaye tuꞌn t-sakchan jun alumaj tiꞌj juntl ka mya ax tiyjil.

Miꞌn cuꞌx cyawaꞌne cabe wik awal tuj jun cojbil.

Miꞌn tzꞌoc cykꞌoꞌne cyxbalune banimaj cyiꞌj ela txcaj nokꞌ.

20 Ka at jun xinak ma cub tan tucꞌil jun xuꞌj majen tcꞌayin tib banin tiꞌj tuꞌn tmojeꞌ tucꞌil juntl xinak, pero ka naꞌnxtok tlakꞌet xuꞌj ex naꞌnxtok ttzokpet, cycabil cbel cycastiw, pero miꞌn che cub byet, porque naꞌnxtok ttzokpet xuꞌj. 21 Atzunte xinak ctzajel tiꞌn jun tman ẍneꞌl nwitze te chojbil til, ex cpol tiꞌn ttzi ja xbalun te mojbabl tibil. 22 Cbel byet ẍneꞌl lu te chojbil til xjal, ex ctzajel tkanin pal weye tuꞌn tnajset til xjal, ex cnajseteltzun aju il otok tbincha xjal.

23 Oc cypone tuj txꞌotxꞌ cxel nkꞌoꞌne cyeye, ex oc tcuꞌx cyawaꞌne tcyakil txcaj tzeꞌ baꞌn tlonjtz twitz, tuj ox abkꞌi miꞌn cub cyiꞌne twitz ex miꞌn txi cyloꞌne twitz. 24 Tuj tcyajin abkꞌi tcyakil twitz ctzajel cykꞌoꞌne weye tucꞌil jun ninkꞌij te akꞌbil chjonte. 25 Tujtzun tjweꞌyin abkꞌi baꞌntzun tuꞌn t-xi cyloꞌne twitz. Ictzun tten cꞌoquel mas twitz cyawale. Akine Cymane ex Cydiose.

26 Miꞌn txi cychyoꞌne chibj ka mintiꞌ ma tzꞌel tchcꞌel.

Miꞌn baj cyxnakꞌtzan cyibe tuꞌn tbant cykꞌijine, ex miꞌn cymaye ka nneꞌl cynicꞌe tiꞌj aju tzul tiꞌj jun xjal.

27 Miꞌn tzꞌel cymatzoꞌne ttzmal cywiꞌye seꞌw tten, ex miꞌn tzꞌel cymatzoꞌne twi cyxmatze.

28 Miꞌn baj cykesune cyximlale nok tuꞌn tlaj jun cyimni, ex miꞌn tzꞌoc cykꞌoꞌne jun tilbilal tiꞌj cychibjale. Akine Cymane.

29 Miꞌn txi cykꞌoꞌne cymeꞌjele tuꞌn cyyaẍin cyucꞌil xinak porque mya baꞌn jlu, ex jaculo che oc cycyakil xjal aj pajil ex cchmetel mya baꞌn icju.

30 Miꞌn che akꞌnane cyuj kꞌij te ojlabl, ex tenwt tchiylal njaye cyeye. Akine Dios.

31 Miꞌn cheꞌxe cyucꞌil ke xjal in tzaj cytxcoꞌn cyanmi cyimni; ex miꞌn cheꞌxe cyucꞌil chman. Miꞌn txi cykanine jun cyxjele cye, porque tuꞌn jlu jacu baj cytzꞌilsan cyibe. Akine Cymane ex Cydiose.

32 Che weꞌctze cywitz tij xjal ex che nimane cye. Tenxwit nchiylale cyeye. Akine Cymane.

33 Oc tul jun stranjer xjal najal cyxole, miꞌn cub cyyajlaꞌne. 34 Cykꞌonque stranjer xjal ic tzaꞌnx ax jun cyxjalile, ex cycꞌujlame ic tzaꞌn cyeye in cycꞌujlan cyibe, porque ax icx cyeye stranjer xjal keye tej cytene tuj Ejipt. Akine Cymane ex Cydiose.

35 Cybinchame tiꞌj xtis tuj tumelxix; miꞌn che sbune tiꞌj echbil txꞌotxꞌ, miꞌn che sbune tiꞌj talil cꞌaẍjel ex mi tiꞌj cymalbile. 36 Balans tzꞌaklxix, marc tzꞌaklxix ex malbil tzꞌaklxix cꞌajbel cyuꞌne. Akine Cymane ex Cydiose aju etz kꞌinte cyeye tuj Ejipt.

37 Cynimanxe cycyakil ke nleye ex ke nmandamyente ex japunx cyuꞌne. Akine Cymane.