2 Kꞌmanxa cye aj Israel cyjaꞌ: Akine Cymane ex Cydiose.

3 Miꞌn cheꞌx lpeꞌye cyiꞌj cycostumr aj Ejipt, tuj txꞌotxꞌ jatum e najane nej.

Miꞌn che oc lpeꞌye cyiꞌj cycostumr aj Canaán, tuj txꞌotxꞌ jatum che pol wiꞌne, ex miꞌn cybinchaye ic tzaꞌnx cye cyley.

4 Japunx ke nmandamyente ex ke nleye cyuꞌne ex che ankꞌine ic tzaꞌnx in cymaꞌn. Akine Cymane ex Cydiose.

5 Cybinchame tcyakilju in cymaꞌn ke nleye ex ke nmandamyente. Aju xjal cjapunel tuꞌn, cꞌankꞌil. Akine Cymane.

6 Mi jun xinak baꞌn tuꞌn tcub tan tucꞌil jun xuꞌj at t-xilen tucꞌil. Akine Cymane.

7 Miꞌn cub tkꞌoꞌna tchꞌixwi tmana tuꞌn tcub tana tucꞌil ttxuꞌya. Mya baꞌn tuꞌn tbinchanteya icju, porque ttxuꞌya jlu.

8 Miꞌn cub tkꞌoꞌna tchꞌixwi tmana tuꞌn tcub tana tucꞌil juntl t-xuꞌjil tmana.

9 Miꞌn cub tana tucꞌil tanba. Ka jun tanba oꞌcx tmana junx tucꞌil ex ka nok oꞌcx ttxuꞌya junx tucꞌil, ka ax otok tzul itzꞌj tuj ja ex ka tiꞌjxi, pero miꞌn cub tana tucꞌil.

10 Miꞌn cub tkꞌoꞌna tchꞌixwiya tuꞌnx tiba tuꞌn tcub tana tucꞌil jun tchmana xuꞌj, ka tmeꞌjel jun tcyꞌajala ex ka tal jun tmeꞌjela. Pero miꞌn cub tana tucꞌil.

11 Miꞌn cub tana tucꞌil jun tal juntl t-xuꞌjil tmana, porque a tmana otok tzaj cꞌwaꞌlinte te, ex tanba jlu. Miꞌn cub tana tucꞌil.

12 Miꞌn cub tana tucꞌil tanb tmana; porque terman tmana jlu.

13 Miꞌn cub tana tucꞌil jun xuꞌj terman ttxuꞌya; porque terman ttxuꞌya jlu.

14 Miꞌn cub tkꞌoꞌna tchꞌixwi terman tmana tuꞌn tcub tana tucꞌil t-xuꞌjil, porque t-xuꞌjil terman tmana jlu.

15 Miꞌn cub tana tucꞌil tliba, porque t-xuꞌjil tcyꞌajala jlu; cyjaꞌtzun miꞌn cub tana tucꞌil.

16 Miꞌn cub tkꞌoꞌna tchꞌixwi termaniya tuꞌn tcub tana tucꞌil t-xuꞌjil.

17 Miꞌn cub tana tucꞌil jun xuꞌj ex tucꞌil jun tal ax xuꞌj, ex miꞌn cub tana tucꞌil jun tal tchman xuꞌj lu, ka tmeꞌjel jun tal ex ka tal jun tal xuꞌj lu. Aju binchben lu jumajx mya baꞌn, porque cypamili cyib ke jlu.

18 Miꞌn jaw t-xuꞌjlaꞌna jun terman t-xuꞌjila, ex miꞌn cub tana tucꞌil acux itzꞌx t-xuꞌjila, tuꞌntzun miꞌn tcub ten kꞌoj cyxol.

19 Miꞌn cub tana tucꞌil jun xuꞌj oc tul ẍwoꞌj tiꞌj.

20 Miꞌn cub tana tucꞌil t-xuꞌjil jun tucꞌila, tuꞌntzun miꞌn ttzꞌilixa tuꞌn jlu.

21 Miꞌn txi tkꞌoꞌna jun tcꞌwaꞌla tuꞌn tcub patit te jun oyaj te Moloc aju tilbilal nnoꞌc cydiosin xjal. Miꞌn tbinchaya jlu tuꞌntzun miꞌn cyyolin xjal mya baꞌn tiꞌj Nbiye. Akine Cymane.

22 Miꞌn cub tana tucꞌil jun xinak ic tzaꞌn in cub tana tucꞌil xuꞌj, porque icꞌbilxix jlu.

23 Miꞌn cub tana tucꞌil jun alumaj, tuꞌntzun miꞌn ttzꞌilixa. Ax icx mya baꞌn tuꞌn t-xi tkꞌon tib jun xuꞌj te jun alumaj, porque icꞌbilxix jlu.

24 Miꞌn baj cytzꞌilsan cyibe cyuꞌn ke jlu, porque cyuꞌntzun ke jlu ma baj cytzꞌilsan cyib ke xjal, akeju che elex nlajoꞌne cywitze, 25 ex tucꞌix cytxꞌotxꞌ ma tzꞌilix; cyjaꞌtzun ma cub cycastiw wuꞌne tiꞌj cybinchben mya baꞌn ex ma che ex nlajoꞌne tuj cytxꞌotxꞌ. 26 Atzun cyeye, akeye aj Israel ex ke stranjer xjal najl cyxole, japunx ke nleye ex ke nmandamyente cyuꞌne, ex miꞌn cybinchaye ke binchben lu, akeju icꞌbilxix, 27 porque tcyakil aju mya baꞌn lu o cybinchaꞌ ke xjal najlketok tuj txꞌotxꞌ nej, ex aju txꞌotxꞌ biꞌx o tzꞌilix cyuꞌn. 28 Miꞌn cybinchaye ke jlu tuꞌntzun miꞌn cyex nlajoꞌne tuj txꞌotxꞌ lu, ic tzaꞌnx ma che ex nlajoꞌne ke xjal najlketok tuj nej. 29 Alcye jun xjal ma tbincha nok alcyexcu jun cyxol keju mya baꞌn lu, akeju icꞌbilxix, biꞌx cꞌelex lajet tuꞌntzun miꞌn ttentl cyxol t-xjalil. 30 Cyjaꞌtzun, japunx ke nmandamyente cyuꞌne ex miꞌn cybinchaye mya baꞌn lu, akeju icꞌbilxix in cybinchaꞌn xjal tuj txꞌotxꞌ jatum che pole, ex miꞌn baj cytzꞌilsan cyibe cyuꞌn ke jlu. Akine Cymane ex Cydiose.