2 Kꞌmanxa te Aarón ex cye tcyꞌajal ex cye cycyakil aj Israel cyjaꞌ: Atzun orden lu ma tzaj tmaꞌn Kman, chicuya:

3 Nok alcye jun aj Israel ma cub byonte jun tor, ex ka jun tal tman ẍneꞌl, ex ka jun chip tuj campament ex ka tiꞌjxi, 4 ex ka mintiꞌ ma tzul tiꞌn alumaj ttzi ja xbalun te mojbabl tibil tuꞌn ttzaj tkꞌoꞌn te jun oyaj weye twitz njaye, at til tiꞌj chicꞌ otok tzꞌel tuꞌn, ex biꞌx cꞌelex lajet tuꞌntzun miꞌn ttentl cyxol t-xjalil. 5 Aju til ley lu, tuꞌn miꞌn tcub cybyoꞌn aj Israel alumaj tuj cojbil, nok oꞌcx ctzajel cykꞌoꞌn te jun chojbil weye, ex tuꞌn t-xi cyiꞌn tucꞌil pal ttzi ja xbalun te mojbabl tibil, tuꞌntzun ttzaj tkꞌoꞌn weye te jun chojbil te mojbabl tibil. 6 Atzunte pal cxel ttxꞌitoꞌn chicꞌ tibaj altar tcub nwitze, ttzi ja xbalun te mojbabl tibil, ex cbel tpatun t-sebyil alumaj te jun oyaj at tcꞌocꞌjal in chin tzalaje tiꞌj. 7 Ex miꞌntl txi cykꞌoꞌn ke chojbil cye juꞌẍ, aju o che cꞌulun cywitz ex o che el tzpet cyuꞌn. Atzun ley lu cyjel ten cyucꞌile te jumajx tuꞌn tajben cyeye ex wikinwik cyjel cymaꞌne cye cycꞌwaꞌle.

8 Ax icx kꞌmanxa cye cyjaꞌ: Ka at jun aj Israel ex ka jun stranjer xjal najl cyxole ma txi tkꞌoꞌn jun oyaj patun in cub ex ka nok alcyexcu juntl chojbil, 9 ex ka miꞌn ma pon tiꞌn ttzi ja xbalun te mojbabl tibil tuꞌn ttzaj tkꞌoꞌn weye, biꞌx cꞌelex lajet tuꞌntzun miꞌn ttentl cyxol t-xjalil.

10 Ka at jun aj Israel ex ka jun stranjer xjal najl cyxole ma txi cychyoꞌn tchcꞌel nok alcyexcu jun alumaj, ctzajel nkꞌoje tiꞌj; cbel tcastiw wuꞌne, ex biꞌx cꞌelex lajet tuꞌntzun miꞌn ttentl cyxol t-xjalil, 11 porque atzun taꞌ cychwinklal cycyakil alumaj tuj cychcꞌel, ex o txi nkꞌoꞌne jlu cyeye tuꞌn tcub txꞌitet tibaj altar tuꞌn tchjet cyile, tuꞌntzun tclet cychwinklale; porque aju chicꞌ in chjet til xjal tuꞌn.

12 Cyjaꞌtzun in xi nmaꞌne cye aj Israel: Mi jun cyeye ex mi jun stranjer xjal najl cyxole baꞌn t-xi tchyoꞌn chicꞌ. 13 Nok alcyexcu jun aj Israel ex ka jun stranjer xjal najl cyxole ma cub tbyoꞌn jun jil ex ka jun chyuꞌj baꞌn cychyoꞌnjtz, il tiꞌj tuꞌn tel cykoꞌn tchcꞌel ex tuꞌn ticꞌx cymakuꞌn tibaj tuꞌn txꞌotxꞌ, 14 porque aju chicꞌ, atzunju in kꞌonte cychwinklal cycyakil keju itzꞌke. Cyjaꞌtzun ma txi nmaꞌne cyeye tuꞌn miꞌn t-xi cychyoꞌne chicꞌ, porque atzunju in kꞌonte cychwinklal cycyakil keju itzꞌke, ex nok alcye jun ma txi chyoꞌnte, biꞌx cꞌelex lajet tuꞌntzun miꞌn ttentl cyxol t-xjalil.

15 Nok alcye jun aj Israel ex ka jun stranjer xjal ma txi chyonte tchibjal jun jil tajx otok cyim, ex ka tuꞌn jun txcup te tjakꞌ cꞌul otok baj tzakin, cꞌoquel cykꞌoꞌne te tzꞌil, ex il tiꞌj tuꞌn tjatz ttxꞌjoꞌn tiꞌj t-xbalun ex tuꞌn tchin, ex max cꞌoquel te sak ocxi ttzaj klolj. 16 Katzun mi ma jatz ttxꞌjoꞌn tiꞌj t-xbalun ex ka mi ma chin, axte cxel ikante til.