—Kꞌmanxa te termaniya Aarón: Mya nok alcyex or baꞌn tocx tuj Lugar Xjanxix tiꞌjxi xbalun tcub tuj tmij njaye, twitz tlamel cax, tuꞌntzun miꞌn tcyim; porque cbel nyecꞌun wibe tuj jun muj tibaj tmaksil cax. 3 Nok oꞌcx baꞌn tocx Aarón tuj Lugar Xjanxix oc cybant ke jlu tuꞌn: Oc ttzaj tiꞌn jun tal tor te chojbil til ex jun tman ẍneꞌl te chojbil patun in cub. 4 Aju t-xbalun cꞌoquel atzun ke jlu: T-ẍjoꞌw tucꞌix tcalsonsiy, tucꞌix cꞌalbil tcꞌuꞌj ex cꞌalbil twiꞌ; cycyakil xbalun lu lino ke ex xjansamaj ke, che oquel tkꞌoꞌn tiꞌj tbajlenxi chin.

5 Atzun cye aj Israel cxel cykꞌoꞌn cabe tman chip te Aarón te chojbil il, ex jun tman ẍneꞌl te chojbil patun in cub. 6 Ctzajeltzun tiꞌn Aarón tal tor te chojbil te til, tuꞌntzun tnajset tex til ex cyil keju ateꞌ tuj tja. 7 Te tibajxi ctzajel tiꞌn keju cabe tman chip ex che bel tkꞌoꞌn nwitze, ttzi ja xbalun te mojbabl tibil. 8 Cjawil tiꞌn Aarón swert cyiꞌj cabe tman chip lu, tuꞌntzun tel tnicꞌ tiꞌj alcye te Kman ex alcye tuꞌn t-xi tzokpet tuꞌn t-xi tikan cyil xjal. 9 Aju tman chip cbel swert tibaj tuꞌn toc te Kman, cbel tbyoꞌn Aarón te chojbil il. 10 Atzun tman chip ma cub tzꞌak swert tibaj tuꞌn t-xi tzokpet, ctzajel tiꞌn Aarón ex cbel tkꞌoꞌn twitz Kman tuꞌntzun tnajset cyil xjal, ex maxitzun cxel tzokpet, ex cxel samet tuj lugar mintiꞌ cynajbil xjal tuj.

11 Te tibajxi jlu ctzajel tiꞌn Aarón tal tor te chojbil tex til, ex cꞌoquex tkesin tjakꞌ tkul, tuꞌntzun tnajset tex til ex cyil keju ateꞌ tuj tja. 12 Maxitzun ctzajel tiꞌn jun ẍlaꞌc nojni tuꞌn xkꞌaꞌl otok tzaj tiꞌn tibaj altar tcubsaꞌn twitz Kman, tucꞌix cabe jot storac cheꞌmajtl, ex cꞌoquex tiꞌn tiꞌjxi xbalun tcub tuj tmij njaye; 13 ex cꞌoquex tkꞌoꞌn storac tibaj kꞌakꞌ tcuꞌx tuj ẍlaꞌc, tuꞌntzun tcub tkꞌoꞌn nwitze, atzun t-sibel storac cmaksilte tlamel cax cꞌubl nleye, tuꞌntzun miꞌn tcyim Aarón. 14 Ctzajel tiꞌn chꞌin tchcꞌel tal tor, cxel ttxꞌitoꞌn chꞌin chicꞌ tuꞌn twiꞌ tal tkꞌab tibaj cax tuj tumlal tjawitz kꞌij. Ax icx cxel ttxꞌitoꞌn chꞌin chicꞌ lu wuk maj tiꞌj tmaksil cax. 15 Te tibajxi jlu, cbel tbyoꞌn Aarón aju tman chip te chojbil cyil tnam xjal, ex cꞌoquex tiꞌn tchcꞌel tiꞌjxi xbalun tcub tuj tmij njaye; ex cxel ttxꞌitoꞌn chꞌin chicꞌ lu tibaj tmaksil cax, tucꞌix tiꞌj, ic tzaꞌnx otok tbincha tiꞌj tchcꞌel tal tor. 16 Ictzun tten csaksetel lugar xjanxix tuꞌn tlaj cytzꞌilil aj Israel, tuꞌn tlaj miban che niman ex tuꞌn tlaj cyil. Ax icx il tiꞌj tuꞌn t-sakset ja xbalun te mojbabl tibil, aju tcubsaꞌn cyxol ke xjal at nim cytzꞌilil.

17 Oc tocx Aarón tuj Lugar Xjanxix kanil te Dios tuꞌn tnajset cyil xjal, mi jun xjal baꞌn tocx ten tuj ja xbalun te mojbabl tibil. Maxi baꞌn tocx, ocxi tetz Aarón tbajlenxi tkꞌoꞌn chojbil tiꞌj tex til, tucꞌix tiꞌj cyil keju ateꞌ tuj tja, ex cye cycyakil tnam xjal aj Israel. 18 Cꞌeletztzun Aarón tuꞌn t-sakset altar tcubsaꞌn nwitze. Ctzajel tiꞌn chꞌin tchcꞌel tal tor ex chꞌin tchcꞌel tman chip, ex cꞌoquel t-suꞌn tcyakil cyiꞌjele tcach altar, 19 ex wuk maj cxel ttxꞌitoꞌn chicꞌ tuꞌn twiꞌ tal tkꞌab tibaj altar te patbil chojbil. Ictzun tten csaksetel altar tuꞌn tlaj ttzꞌilil cybinchben aj Israel, ex ictzun tten cxjansetel.

20 Octzun tbaj sakset Lugar Xjanxix tuꞌn Aarón, ex ja xbalun te mojbabl tibil, tucꞌix altar te patbil chojbil, cxel tmaꞌn tuꞌn ttzaj lakꞌbaꞌn tman chip itzꞌx; 21 ex che bel tkꞌoꞌn tkꞌab Aarón tibaj twiꞌ tman chip, ex cjawitz tpaꞌn tcyakil cybinchben aj Israel mya baꞌn, tucꞌix cypaltil ex cyil. Ictzun tten cbel tkꞌoꞌn cyil xjal tibaj twiꞌ tman chip, ex aju xjal banimaj tiꞌj cxel tiꞌn tman chip lu tuj lugar mintiꞌ cynajbil xjal tuj. 22 Cyjaꞌtzun tten cxel tiꞌn tman chip tcyakil cyil aj Israel tuj txꞌotxꞌ mintiꞌ cynajbil xjal tuj, ex cxel ttzokpiꞌn xjal tman chip tuj lugar mintiꞌ cynajbil xjal tuj. 23 Te tibajxi jlu cꞌoquex Aarón tuj ja xbalun te mojbabl tibil, ex cꞌelel tiꞌn t-xbalun lino, aju otok tzꞌoc tkꞌoꞌn tuꞌn tocx tuj Lugar Xjanxix; axtzun cyjel tkꞌoꞌn 24 ex cꞌoquex chil tuj Lugar Xjan. Ex toclenxi t-xbalun, aju toc tuꞌn tcyakil maj, cꞌeletz tuꞌn t-xi tkꞌoꞌn chojbil til ex chojbil cyil aj Israel, tuꞌntzun tnajset tex til tucꞌix cyil xjal. 25 Atzunju t-sebyil alumaj te chojbil il cbel tpatun tibaj altar te patbil chojbil. 26 Atzunju xinak otok txi kꞌinte tman chip tuꞌn t-xi tzokpet, cbajel ttxꞌjoꞌn tiꞌj t-xbalun; ax icx te, il tiꞌj tuꞌn tchin. Te tibajxitzun baꞌn tuꞌn tocx tuj cycampament aj Israel.

27 Atzunju tal tor tucꞌix tman chip otok cheꞌx kꞌot te chojbil il, ex otok tzꞌocx txꞌitet chꞌin cychcꞌel tuj Lugar Xjanxix te najsbil il, che elex kꞌit tiꞌjxi campament, ex che bel patit tucꞌix cytzꞌumal, cychibjal ex cytxaꞌ. 28 Aju xjal cbel patunte te, il tiꞌj tuꞌn tjatz ttxꞌjoꞌn tiꞌj t-xbalun ex tuꞌn tchin, ex te tibajxi jlu baꞌn tuꞌn tocx tuj campament.

29 Lu jun ley lu te jumajx cyjel ten te cyeye: Tuj tlajin kꞌij te twukin xjaw cbel cyyoꞌne weꞌyaj ex mi aꞌl jun cꞌakꞌnal; tzaꞌnx cyeye, ax icx ke stranjer xjal ateꞌ cyxole, 30 porque atzun kꞌij lu cnajsetel cyile nwitze, ex che cyjel tene sakxix, ya mintiꞌtl cyile. 31 Aju kꞌij lu cꞌoquel te ojlabl ex maꞌ toclen te cyeye. Tuj kꞌij lu miꞌn che waꞌne, ex a jlu jun ley cyjel ten cyucꞌile te jumajx. 32 Aju pal cyjel ten te nejenel cye pal te t-xel tman cbantel tcyakil jlu tuꞌn, tuꞌntzun tnajset tcyakil il. Cꞌoquel tkꞌoꞌn t-xbalun lino aju xjansamaj, 33 ex csaksetel Lugar Xjanxix tuꞌn, tucꞌix ja xbalun te mojbabl tibil, tucꞌix altar te patbil chojbil, ex cchjetel cyil cycyakil pal ex cyil cycyakil aj Israel tuꞌn.

34 A jlu jun ley cyjel ten te cyeye te jumajx: Jun maj cbantel jlu tuj tcyakil abkꞌi, tuꞌn tnajset cyil aj Israel, chi Dios te Moisés.

Ex o bant tcyakil jlu ic tzaꞌnx otok cyaj tmaꞌn Kman te Moisés.