2 Cymanxe jlu cye aj Israel: Ka at jun xinak in jatz poj tuj twi ttzꞌaꞌlbil, tzꞌil te xjal lu, 3 ex mya oꞌcx oc matok in jaw jlu tuj twi ttzꞌaꞌlbil, ax icx ka ma maket, porque cyuꞌn ke jlu in ten xjal tuj ttzꞌilil.

4 Nok alcye jun watbil jatum ma cub tan xjal ex nok alcye jun kꞌukbil jatum in cub keꞌ, biꞌx che tzꞌilixtel. 5 Alcye jun ma tzꞌoc maconte twatbil xjal lu biꞌx ctzꞌilixtel, il tiꞌj cjawitz ttxꞌjoꞌn tiꞌj t-xbalun ex tuꞌn tchin, ex max cꞌoquel te sak juntl maj ocxi ttzaj klolj.

6 Alcye jun ma cub keꞌ tibaj jun tiꞌxti jatum otok cub keꞌ xjal lu biꞌx ctzꞌilixtel; il tiꞌj tuꞌn tjatz ttxꞌjoꞌn tiꞌj t-xbalun ex tuꞌn tchin, ex max cꞌoquel te sak juntl maj ocxi ttzaj klolj.

7 Ex alcye jun ma tzꞌoc maconte t-ximlal xjal lu biꞌx ctzꞌilixtel; il tiꞌj tuꞌn tjatz ttxꞌjoꞌn tiꞌj t-xbalun ex tuꞌn tchin, ex max cꞌoquel te sak juntl maj ocxi ttzaj klolj.

8 Ka ma tzꞌoc ttzuban xjal yab taꞌl ttziꞌ tiꞌj jun xjal sak taꞌ, ate xjal sak biꞌx ctzꞌilixtel, ex il tiꞌj cjawitz ttxꞌjoꞌn tiꞌj t-xbalun ex tuꞌn tchin, ex max cꞌoquel te sak juntl maj ocxi ttzaj klolj.

9 Cꞌoquel cykꞌoꞌne te tzꞌil tcyakil t-siy chej jatum ma jax keꞌ xjal yab tuꞌn poj in jaw twi ttzꞌaꞌlbil.

10 Alcye jun ma tzꞌoc maconte jun tiꞌxti jatum otok cub keꞌ xjal lu biꞌx ctzꞌilixtel; max cꞌoquel te sak juntl maj ocxi ttzaj klolj.

Ex alcye jun ma txi kꞌinte jun cye ke tiꞌxti lu biꞌx ctzꞌilixtel; il tiꞌj tuꞌn tjatz ttxꞌjoꞌn tiꞌj t-xbalun ex tuꞌn tchin, ex max cꞌoquel te sak juntl maj ocxi ttzaj klolj.

11 Nok alcye jun xjal ma tzꞌoc macoꞌn tuꞌnju xjal yab tuꞌn poj in jaw twi ttzꞌaꞌlbil ex ka mintiꞌ otok baj ttxꞌjoꞌn yab ke tkꞌab, aju xjal cꞌoquel macoꞌn tuꞌn biꞌx ctzꞌilixtel; il tiꞌj tuꞌn tjatz ttxꞌjoꞌn tiꞌj t-xbalun ex tuꞌn tchin, ex max cꞌoquel te sak juntl maj ocxi ttzaj klolj.

12 Ka ma tzꞌoc macoꞌn jun cꞌil txꞌotxꞌ ttxꞌotxꞌil tuꞌnju xjal yab tuꞌn poj in jaw twi ttzꞌaꞌlbil, biꞌx cbel paꞌt cꞌil lu, ex katzun tzeꞌ ke macbil che cꞌoquel tmacoꞌn, iltzun tiꞌj tuꞌn cybaj txꞌjet.

13 Katzun ma banix xinak lu tuꞌn yabil, baꞌn tuꞌn t-xi tajlaꞌn wuk kꞌij tuꞌntzun t-sakset; tbajlenxi wuk kꞌij, cjawitz ttxꞌjoꞌn tiꞌj t-xbalun ex cchil tuj jun aꞌ in bet, ex csakseteltzun. 14 Tujtzun twajxakin kꞌij ctzajel tiꞌn cabe ẍpoꞌk ex ka cabe paloma, ex cpol twitz Kman ttzi ja xbalun te mojbabl tibil ex cxel tkꞌoꞌn ke chyuꞌj te pal. 15 Atzunte pal cxel tkꞌoꞌn jun chyuꞌj te chojbil il, atzun juntl te oyaj patun in cub, ex csakseteltzun xinak tiꞌj tyabil tuꞌn pal twitz Kman.

16 Ka at jun xinak ma jaw twi ttzꞌaꞌlbil nok tajx, biꞌx ctzꞌilixtel; il tiꞌj tuꞌn tchin, ex max cꞌoquel te sak juntl maj oc ttzaj klolj.

17 Ka ma cub kojl chꞌin aju cjawil tuj twi ttzꞌaꞌlbil xjal tibaj jun xbalun ex ka jun tzꞌuꞌm, biꞌx che tzꞌilixtel; il tiꞌj tuꞌn cybaj txꞌjet ex max che oquel te sak juntl maj ocxi ttzaj klolj.

18 Ka ma cub tan jun xinak tucꞌil jun xuꞌj, biꞌx che tzꞌilixtel; cycabil il tiꞌj tuꞌn cychin, ex max che oquel te sak juntl maj ocxi ttzaj klolj.

19 Oc tul ẍwoꞌj tiꞌj jun xuꞌj, biꞌx ctzꞌilixtel wuk kꞌij.

Alcye jun ma tzꞌoc maconte te cyuj ke wuk kꞌij lu, biꞌx ctzꞌilixtel ex max cꞌoquel te sak juntl maj ocxi ttzaj klolj.

20 Cycyakil tiꞌxti jatum cbel tan xuꞌj cyuj ke wuk kꞌij lu, biꞌx che tzꞌilixtel.

Ax icx ke tiꞌxti jatum cbel keꞌ, biꞌx che tzꞌilixtel.

21 Alcye jun ma tzꞌoc maconte ke tiꞌxti jatum otok cub tan xuꞌj, biꞌx ctzꞌilixtel; il tiꞌj tuꞌn tjatz ttxꞌjoꞌn tiꞌj t-xbalun ex tuꞌn tchin, ex max cꞌoquel te sak juntl maj ocxi ttzaj klolj.

22 Alcye jun ma tzꞌoc maconte jun tiꞌxti jatum otok cub keꞌ xuꞌj, biꞌx ctzꞌilixtel; il tiꞌj tuꞌn tjatz ttxꞌjoꞌn tiꞌj t-xbalun ex tuꞌn tchin, ex max cꞌoquel te sak juntl maj ocxi ttzaj klolj. 23 Alcye jun ma tzꞌoc macoꞌnte jun tiꞌxti tcub tibaj watbil jatum otok cub tan xuꞌj, ex ka jun tiꞌxti tcub tibaj kꞌukbil jatum otok cub keꞌ, biꞌx ctzꞌilixtel, ex max cꞌoquel te sak juntl maj ocxi ttzaj klolj.

24 Ka at jun xinak ma cub tan tucꞌil xuꞌj lu acux at ẍwoꞌj tiꞌj, biꞌx ctzꞌilixtel, ex wuk kꞌij ctel tuj ttzꞌilil; ax icx che tzꞌilixtel watbil jatum cbel tan xinak tuj wuk kꞌij lu.

25 Katzun at jun xuꞌj ma ten nim kꞌij ẍwoꞌj tiꞌj, mas ic tzaꞌn junjun maj, cucx ctel tuj ttzꞌilil acux cucx tul ẍwoꞌj tiꞌj, ic tzaꞌnx oc nnuꞌl ẍwoꞌj tiꞌj junjun maj.

26 Nok alcye jun watbil jatum cbel tan xuꞌj, ex nok alcyex jun tiꞌxti jatum cbel keꞌ tuj kꞌij oc nnuꞌl ẍwoꞌj tiꞌj, che oquel ke jlu te tzꞌil, ic tzaꞌnx oc nnuꞌl ẍwoꞌj tiꞌj tcyakil maj.

27 Alcye jun ma tzꞌoc maconte cye ke tiꞌxti lu, biꞌx ctzꞌilixtel; il tiꞌj tuꞌn tjatz ttxꞌjoꞌn tiꞌj t-xbalun ex tuꞌn tchin, ex max cꞌoquel te sak juntl maj ocxi ttzaj klolj.

28 Octzun tweꞌ ẍwoꞌj tiꞌj, baꞌn tuꞌn t-xi tajlaꞌn wuk kꞌij, ex tbajlenxi wuk kꞌij csaksetel. 29 Tujtzun twajxakin kꞌij ctzajel tiꞌn cabe ẍpoꞌk ex ka cabe tal paloma, ex che xel tkꞌoꞌn te pal ma ttzi ja xbalun te mojbabl tibil. 30 Atzunte pal cxel tkꞌoꞌn jun chyuꞌj te chojbil il, atzun juntl te oyaj patun in cub. Cyjaꞌtzun csaksetel xuꞌj tiꞌj ẍwoꞌj tuꞌn pal twitz Kman, 31 ex cyjaꞌtzun tten che elel cyiꞌne cytzꞌilil aj Israel, tuꞌntzun miꞌn cycyim tuꞌn tlaj cytzꞌilil oc tbaj cytzꞌilsaꞌn aju lugar jatum najl kine cyxol, chi Dios.

32 Atzun ke ley lu cyiꞌj ke xinak yab ke tuꞌn poj in jaw twi cytzꞌaꞌlbil, ex cyiꞌj keju tajx in jaw tuj twi cytzꞌaꞌlbil, porque tuꞌn jlu in che oc te tzꞌil, 33 ex tiꞌj ẍwoꞌj nnuꞌl cyiꞌj xuꞌj tujxix tkꞌijlalil, ex cyiꞌj keju in che ten mas nim kꞌij tuꞌn ẍwoꞌj, ex cyiꞌj ke xinak in jaw poj twi cytzꞌaꞌlbil, ex cyiꞌj ke xinak in che cub tan cyucꞌil xuꞌj oc tul ẍwoꞌj cyiꞌj.