2 Atzun ke ley lu tuꞌn t-sakset jun xjal yab tuꞌnju txꞌaꞌc mintiꞌ kꞌanbil tiꞌj: Cxel kꞌit xjal yab tucꞌil pal, 3 atzunte pal cꞌelex tiꞌjxi campament tuꞌntzun tbaj tqueꞌyin. Ka ma til pal otok banix xjal tuꞌn txꞌaꞌc mintiꞌ kꞌanbil tiꞌj, 4 cxel t-samaꞌn jun xjal lolte cabe tal chyuꞌj itzꞌx ke, cyxol keju mya tzꞌil ke, tucꞌix jun piẍ tzeꞌ wiꞌten, tucꞌix jun piẍ xbalun cyak queꞌyin ex jun wik tal cꞌul hisopo, tuꞌntzun t-sakset xjal yab. 5 Cxel tmaꞌn pal tuꞌn tcub byet jun tal chyuꞌj tibaj jun cꞌil txꞌotxꞌ ttxꞌotxꞌil at aꞌ tuj, ex aju aꞌ lu ctzajel kꞌit max tiꞌj sak aꞌ in bet. 6 Ctzajeltzun tiꞌn pal aju tal chyuꞌj itzꞌx, tucꞌix tzeꞌ wiꞌten, tucꞌix xbalun cyak queꞌyin ex tucꞌix tal cꞌul hisopo, ex che belex tmuꞌn tuj tchcꞌel tal chyuꞌj otok cub byoꞌn tibaj aꞌ otok tzaj kꞌiꞌn tiꞌj aꞌ in bet. 7 Wuk maj cxel ttxꞌitoꞌn pal chicꞌ lu tibaj xjal csaksetel te txꞌaꞌc mintiꞌ kꞌanbil tiꞌj, ex cxeltzun tmaꞌn ka otok sakix xjal lu. Atzunju tal chyuꞌj itzꞌx cxel ttzokpiꞌn tuj cojbil.

8 Aju xjal csaksetel, cjawitz ttxꞌjoꞌn tiꞌj t-xbalun, ax icx te cchil ex cꞌelel tmatzoꞌn tcyakil t-xmatz tuꞌntzun t-sakix. Te tibajxitzun, baꞌn tuꞌn tocx tuj campament, pero il tiꞌj tuꞌn tcyaj ten wuk kꞌij tiꞌjxi tja. 9 Tujtzun twukin kꞌij cꞌelel cꞌoẍit tiꞌj twiꞌ, ex cꞌelel tiꞌn t-xmatz cyucꞌix ke t-xiꞌwitz ex tcyakil xyaꞌn toc tiꞌj, cjawitz ttxꞌjoꞌn cyiꞌj ke t-xbalun, ax icx il tiꞌj tuꞌn tchin, ex csakseteltzun. 10 Tujtzun twajxakin kꞌij, ctzajel tiꞌn cabe tal tman ẍneꞌl mintiꞌ cypaltil, tucꞌix jun tal ttxu ẍneꞌl ma te jun abkꞌi, ax icx mintiꞌ tpaltil; tucꞌix kak libr arin tbanilxix ex cabe octav tucꞌ mey chibj aseyt, te jun oyaj tiꞌj twitz awal xyokꞌamaj tucꞌil aseyt. 11 Aju pal csaksalte xjal cbel tkꞌoꞌn aju xjal twitz Kman, cyucꞌix ke toyaj, ttzi ja xbalun te mojbabl tibil. 12 Ctzajeltzun tiꞌn pal jun tal tman ẍneꞌl, ex cxel tkꞌoꞌn junx tucꞌil cabe octav tucꞌ mey aseyt te chojbil tpaltil xjal, ex cxel tyucun te jun oyaj yucun in xiꞌ twitz Kman. 13 Atzun cbel tbyoꞌn tal tman ẍneꞌl tuj lugar xjansamaj jatum in che cub byoꞌn ke alumaj te chojbil il ex ke oyaj patun in che cub. Aju chojbil tiꞌj tpaltil xjal, te pal cꞌajbel, ic tzaꞌnx in tenba ju chojbil tiꞌj il. A jlu xjanxix ke.

14 Te tibajxi ctzajel tiꞌn pal chꞌin tchcꞌel tal tman ẍneꞌl, aju otok txi kꞌot te chojbil tpaltil xjal, ex cꞌoquel t-suꞌn chꞌin tiꞌj tjeꞌ t-ẍcyin xjal tuj tbankꞌab, aju csaksetel, tucꞌix tiꞌj tal tman tbankꞌab ex tiꞌj tal tman tkan tuj tbankꞌab. 15 Ctzajel tiꞌn pal chꞌin aseyt ex cbel tkꞌoꞌn tuj tlakil tkꞌab tuj tnayaj; 16 ex cbelex tmuꞌn twiꞌ tal tbankꞌab tuj aseyt at tuj tlakil tkꞌab tuj tnayaj, ex tuꞌnx twiꞌ tal tkꞌab cxel ttxꞌitoꞌn aseyt wuk maj twitz Kman. 17 Tiꞌj aseyt cyjel tentl tuj tkꞌab pal, cꞌoquel t-suꞌn chꞌin tiꞌj tjeꞌ t-ẍcyin xjal tuj tbankꞌab, aju csaksetel, tucꞌix tiꞌj tal tman tbankꞌab ex tiꞌj tal tman tkan tuj tbankꞌab, ax jatum otok tzꞌoc kꞌot tchcꞌel alumaj, aju otok txi kꞌot te chojbil tiꞌj tpaltil xjal, 18 ex aju aseyt csobryil tuj tlakil tkꞌab pal, cbel tkoꞌn tuj twiꞌ xjal csaksetel. Cyjaꞌtzun cchjetel til xjal twitz Kman tuꞌn pal. 19 Ex cbel tbyoꞌn pal aju tal tman ẍneꞌl te chojbil il, tuꞌntzun t-sakset xjal tzꞌiltok taꞌ; ex te tibajxi cbel tbyoꞌn aju alumaj te oyaj patun in cub, 20 ex cbel tkꞌoꞌn tibaj altar, junx tucꞌil oyaj tiꞌj twitz awal. Cyjaꞌtzun cchjetel til xjal tuꞌn pal twitz Kman, ex csakseteltzun.

21 Katzun meba te xjal yab ex mintiꞌ tumel tuꞌn ttzaj tkꞌoꞌn tcyakil jlu, ctzajeltzun tiꞌn junx tal tman ẍneꞌl te chojbil tpaltil, ex cxel toyin te Kman te jun oyaj yucun in xiꞌ tuꞌntzun tchjet til, tucꞌix cabe libr arin aju mas tbanil xyokꞌamaj tucꞌil aseyt, te jun oyaj tiꞌj twitz awal, tucꞌix cabe octav tucꞌ mey aseyt, 22 cyucꞌix cabe ẍpoꞌk ex ka cabe tal paloma, nok alcye jacu lakꞌet tuꞌn, jun te chojbil il ex juntl te oyaj patun in cub. 23 Tuj twajxakin kꞌij cxel tiꞌn tcyakil jlu tucꞌil pal, te saksabl te; ex cxel tkꞌoꞌn twitz Kman ttzi ja xbalun te mojbabl tibil. 24 Atzunte pal ctzajel tiꞌn tal tman ẍneꞌl te chojbil tpaltil xjal, tucꞌix cabe octav tucꞌ mey aseyt, ex cxel tyucun twitz Kman te jun oyaj yucun in xiꞌ. 25 Cꞌoquex tkesin tjakꞌ tkul tal tman ẍneꞌl te chojbil tpaltil xjal, ctzajel tiꞌn chꞌin tchcꞌel tal tman ẍneꞌl, ex cꞌoquel t-suꞌn chꞌin tiꞌj tjeꞌ t-ẍcyin xjal tuj tbankꞌab, aju csaksetel, tucꞌix tiꞌj tal tman tbankꞌab ex tiꞌj tal tman tkan tuj tbankꞌab; 26 ex ctzajel tiꞌn pal chꞌin aseyt ex cbel tkꞌoꞌn tuj tlakil tkꞌab tuj tnayaj, 27 ex wuk maj cxel ttxꞌitoꞌn twitz Kman tuꞌnju tal tbankꞌab aju aseyt tcub tuj tlakil tkꞌab tuj tnayaj. 28 Ax icx aju xjal csaksetel, cꞌoquel t-suꞌn pal chꞌin aseyt tiꞌj tjeꞌ t-ẍcyin tuj tbankꞌab ex tiꞌj tal tman tbankꞌab ex tiꞌj tal tman tkan tuj tbankꞌab, ax jatum otok tzꞌoc suꞌn tchcꞌel alumaj te chojbil tiꞌj tpaltil xjal. 29 Atzunju aseyt csobryil tuj tlakil tkꞌab pal, cbel tkoꞌn pal tuj twiꞌ xjal csaksetel. Cyjaꞌtzun cchjetel til xjal twitz Kman tuꞌn pal. 30 Cxeltzun tkꞌoꞌn pal aju ẍpoꞌk ex ka paloma nok alcye otok cnet tuꞌn xjal csaksetel, 31 jun cxel tkꞌoꞌn te chojbil il, atzun juntl te oyaj patun in cub, ex part oyaj tiꞌj twitz awal. Cyjaꞌtzun cchjetel til xjal twitz Kman tuꞌn pal ex csaksetel.

32 Atzun ke ley lu cyiꞌj ke xjal yab tuꞌn txꞌaꞌc mintiꞌ kꞌanbil tiꞌj, akeju mintiꞌ tumel tuꞌn t-xi cykꞌoꞌn jun cyoyaj matij te saksabl cye.

33 Tzaj yolin Kman tucꞌil Moisés ex tucꞌil Aarón, chi cyjaꞌ:

34 Oc cyocxe tuj txꞌotxꞌ Canaán, aju cxel nkꞌoꞌne te cyetzbile, ka ma txi nkꞌoꞌne ambil tuꞌn tjaw jlet kꞌux tuj cyjaye tuj txꞌotxꞌ jatum che najalaye, 35 aju xjal tajaw ja cxeꞌl tucꞌil pal, ex cxel tmaꞌn te cyjaꞌ: Mer ic tzaꞌn niban tjaw jlet kꞌux tuj njaye.

36 Atzunte pal cxel tmaꞌn tuꞌn tetz kꞌiꞌn tcyakilju at tuj ja naꞌnxtok tocx pal tuj, tuꞌntzun miꞌn cytzꞌilix cycyakil tiꞌxti at tuj. Te tibajxitzun cꞌoquex pal queꞌyilte kꞌux.

37 Octzun tbaj tqueꞌyin pal aju kꞌux, ex ka ma til ticꞌlen kꞌux twitz ja chaꞌxyin queꞌyin ex ka cyakyin queꞌyin, ex ka otok tzꞌocx loꞌn twitz ja tuꞌn, 38 cꞌeletz pal tuj ja ex cyjel tlamoꞌn ja wuk kꞌij. 39 Tujtzun twukin kꞌij cxeꞌl pal queꞌyilte juntl maj, ex katzun otok tzꞌel lakꞌeꞌ kꞌux twitz ja, 40 cxeltzun tmaꞌn tuꞌn cyel kꞌiꞌn ke abj at kꞌux cyiꞌj, ex tuꞌn cyex xoꞌt tiꞌjxi tnam tuj jun lugar tzꞌil. 41 Ax icx cxel tmaꞌn tuꞌn tel jakut tcyakil twitz ja te tujxi, ex aju kuk cꞌelel oc tel jakut twitz ja, cꞌelex xoꞌt tiꞌjxi tnam tuj jun lugar tzꞌil. 42 Ctzajeltzun kꞌit mastl abj te cyxel keju otok che el kꞌiꞌn, ex ctzajel kꞌit acꞌaj mescla tuꞌn toc kꞌot repey twitz tcajonil ja.

43 Katzun ma jaw jlet juntl maj kꞌux tuj ja cyel-lenxi kꞌit ke abj, tel-lenxi jakut twitz ja ex toclenxi acꞌaj repey tiꞌj, 44 cꞌoquextzun juntl maj pal queꞌyilte. Katzun otok tzꞌel lakꞌeꞌ kꞌux tuj ja, xobajiltzun te kꞌux lu, ex aju ja lu tzꞌil taꞌ. 45 Cyjaꞌtzun il tiꞌj tuꞌn tcub xitit ja lu, ex cycyakil abj, tcyakil tzeꞌ ex tcyakil ttxꞌakan repey cꞌelex xoꞌt tiꞌjxi tnam tuj jun lugar tzꞌil. 46 Ka at jun xjal ma tzꞌocx tuj ja tuj kꞌij tej lamoꞌntok tuꞌn pal, cꞌoquel xjal lu te tzꞌil, ex max cꞌoquel te sak ocxi ttzaj klolj. 47 Ka at jun ma waꞌn ex ka ma tan tuj ja lu, il tiꞌj tuꞌn tjatz ttxꞌjoꞌn tiꞌj t-xbalun tuꞌntzun t-sakix.

48 Octzun tocx pal queꞌyilte ja, ka ma til mintiꞌ otok tzꞌel lakꞌeꞌ kꞌux tbajlenxi kꞌot repey tiꞌj, cxel tmaꞌn pal ka sak taꞌ ja, porque aju kꞌux otok cub naj. 49 Tuꞌn t-sakset ja lu, ctzajel tiꞌn pal cabe tal chyuꞌj tucꞌix jun piẍ tzeꞌ wiꞌten, tucꞌix jun piẍ xbalun cyak queꞌyin ex jun wik tal cꞌul hisopo. 50 Cbel tbyoꞌn jun tal chyuꞌj tibaj jun cꞌil txꞌotxꞌ ttxꞌotxꞌil tcuꞌx aꞌ tuj, aju aꞌ lu ctzajel kꞌit tiꞌj aꞌ sak in bet. 51 Ctzajeltzun tiꞌn pal tzeꞌ wiꞌten tucꞌix tal cꞌul hisopo, tucꞌix jun piẍ xbalun cyak queꞌyin ex tal chyuꞌj itzꞌx, ex che belex tmuꞌn tuj tchcꞌel tal chyuꞌj otok cub byoꞌn, ex tuj aꞌ otok tzaj kꞌiꞌn tiꞌj aꞌ sak in bet, ex cxel ttxꞌitoꞌn wuk maj tiꞌj ja. 52 Cyjaꞌtzun csaksetel ja tuꞌn tchcꞌel tal chyuꞌj ex tuꞌn aꞌ otok tzaj kꞌiꞌn tiꞌj aꞌ sak in bet, tuꞌn tal chyuꞌj itzꞌx, tuꞌn tzeꞌ wiꞌten, tuꞌn tal cꞌul hisopo ex tuꞌnju xbalun cyak queꞌyin. 53 Te tibajxi cxel ttzokpiꞌn pal tal chyuꞌj itzꞌx tiꞌjxi tnam tuj cojbil, ex cyjaꞌtzun tten cjapunel aju at tuꞌn tbant tuꞌn t-sakset jun ja.

54 Atzun ke ley lu cyiꞌj cycyakil txcaj txꞌaꞌc mintiꞌ kꞌanbil cyiꞌj, tiꞌj sal, 55 tiꞌj sbac nnoꞌc ten tiꞌj xbalun, tiꞌj kꞌux tiꞌj ja, 56 tiꞌj mal in jaw tiꞌj xjal, tiꞌj txꞌaꞌc in jlet poj tuj ex cyiꞌj manch sak queꞌyin; 57 tuꞌntzun tel cynicꞌe tiꞌj alcye sak ex alcye tzꞌil. Atzun ke ley lu tiꞌj txꞌaꞌc mintiꞌ kꞌanbil tiꞌj ex tiꞌj sbac ex kꞌux.