2 Ka at jun xjal ma jaw mal chꞌin tchibjal, ex ka at ronch tiꞌj, ex ka ronch sak queꞌyin, ex ka ic che queꞌyin jlu ic tzaꞌn txꞌaꞌc mintiꞌ kꞌanbil tiꞌj, cxel kꞌit xjal lu tucꞌil pal Aarón ex ka tucꞌil jun cye ke pal ax tiyjil Aarón. 3 Atzunte pal cbajel tqueꞌyin txꞌaꞌc toc tiꞌj xjal. Katzun otok sakix xyaꞌn jatum tocsaꞌn txꞌaꞌc ex ka otok tzꞌocx lakꞌeꞌ txꞌaꞌc tuj tchibjal, atzun txꞌaꞌc jlu mintiꞌ kꞌanbil tiꞌj. Tbajlenxitzun queꞌyin xjal tuꞌn pal, cxel tmaꞌn ka ate xjal lu tzꞌil taꞌ.

4 Ka sak queꞌyin aju señ toc tiꞌj ttzꞌumal xjal, pero ka mintiꞌ otok tzꞌocx lakꞌeꞌ txꞌaꞌc tuj tchibjal ex mintiꞌ otok sakix xyaꞌn jatum tocsaꞌn txꞌaꞌc, cꞌoquextzun lamoꞌn xjal wuk kꞌij tuꞌn pal. 5 Tuj twukin kꞌij cbajel tqueꞌyin pal juntl maj, ex katzun ttenx txꞌaꞌc ex mintiꞌ otok tzꞌel lakꞌeꞌ, cꞌoquextzun japuꞌn xjal wuk kꞌijtl tuꞌn pal. 6 Octzun tjapun wuk kꞌijtl, cbajeltzun queꞌyit juntl maj, ex katzun cyjaꞌ tcub naj txꞌaꞌc ex mintiꞌ otok tzꞌel lakꞌeꞌ, cxeltzun tmaꞌn pal ka sak taꞌ xjal lu ex ka nok eꞌlajx jun txꞌaꞌc otok jaw jlet tiꞌj. Atzunte xjal cjawitz ttxꞌjoꞌn tiꞌj t-xbalun ex csakseteltzun.

7 Katzun ma tzꞌel lakꞌeꞌ txꞌaꞌc tiꞌj xjal juntl maj tbajlenxi queꞌyit ex otok tma pal ka sak taꞌ, il tiꞌj tuꞌn t-xiꞌ juntl maj tuꞌntzun tbaj queꞌyin tuꞌn pal. 8 Octzun tbaj queꞌyin xjal tuꞌn pal, ex ka ma til otok tzꞌel lakꞌeꞌ txꞌaꞌc tiꞌj, cxeltzun tmaꞌn ka tzꞌil taꞌ xjal lu, ex yab tuꞌn txꞌaꞌc mintiꞌ kꞌanbil tiꞌj.

9 Ka at jun xjal at txꞌaꞌc tiꞌj, aju txꞌaꞌc mintiꞌ kꞌanbil tiꞌj, cxel kꞌit twitz pal. 10 Atzunte pal cbajel queꞌyinte te, ex ka sak queꞌyin tchibjal xjal otok jaw mal, ka otok sakix xyaꞌn, ex ka malecj tchibjal xjal tuj ju otok jaw mal, 11 atzun jlu txꞌaꞌc mintiꞌ kꞌanbil tiꞌj, ex otok locꞌin tuj tchibjal. Atzunte pal cxel tmaꞌn ka tzꞌil taꞌ xjal lu, ex mya il tiꞌj tuꞌn tocx japut, porque tzꞌil taꞌ.

12 Ka at jun xjal at txꞌaꞌc tiꞌj ex ka otok noj tiꞌj t-ximlal tuꞌn, xiꞌynix cyiꞌj tkan ex max japun baj tuj twiꞌ, nok jatum baꞌn tpon baj twitz pal tiꞌj, 13 cbajel tqueꞌyin pal; ex katzun otok baj t-sipan tib txꞌaꞌc tiꞌj tcyakil t-ximlal, ex ka otok tzꞌoc sak queꞌyin, cxel tmaꞌn pal ka sak taꞌ xjal lu; atzunte yab sak taꞌ. 14 Pero ka ma jaw jlet juntl maj txꞌaꞌc tiꞌj tchibjal xjal, ex ka kꞌanchaꞌlin acu tchibjal; tuꞌn jlu biꞌxtzun ctzꞌilixtel xjal. 15 Cbajeltzun tqueꞌyin pal tchibjal xjal otok jatz jlet ex cxel tmaꞌn ka tzꞌil taꞌ xjal lu, porque ka tchibjal xjal otok jatz jlet, tzꞌil jlu, atzun txꞌaꞌc mintiꞌ kꞌanbil tiꞌj.

16 Katzun ma sakix tchibjal xjal, aju otok jatz jlet, il tiꞌj tuꞌn t-xiꞌ xjal tucꞌil pal, 17 tuꞌntzun toc tqueꞌyin, ex ka ma til pal otok sakix queꞌyin txꞌaꞌc, cxel tmaꞌn ka sak taꞌ xjal lu, porque sak taꞌ xjal.

18 Ka at jun xjal at jun cyakcꞌu tiꞌj, ex ka ma banix, 19 ex ka otok txi mal ticꞌlen ex sak otok tzꞌoc queꞌyin, ex ka scolin queꞌyin, il tiꞌj tuꞌn t-xiꞌ yecꞌul tib twitz pal. 20 Katzun ma til pal mas otok tzꞌocx lakꞌeꞌ ticꞌlen txꞌaꞌc, ex ka otok sakix queꞌyin xyaꞌn, cxeltzun tmaꞌn pal ka tzꞌil taꞌ xjal lu, porque aju txꞌaꞌc toc tiꞌj, atzunju mintiꞌ kꞌanbil tiꞌj. 21 Katzun mintiꞌ jun xyaꞌn sak queꞌyin ma til tuj ticꞌlen txꞌaꞌc, ex mintiꞌ otok tzꞌocx lakꞌeꞌ txꞌaꞌc tiꞌj tchibjal xjal, ka nok lekꞌan tcub naj, cꞌoquextzun tjapuꞌn pal xjal lu wuk kꞌij. 22 Katzun in lakꞌeꞌ tel txꞌaꞌc tiꞌj, cxeltzun tmaꞌn pal ka tzꞌil taꞌ xjal lu, porque aju txꞌaꞌc toc tiꞌj, atzunju mintiꞌ kꞌanbil tiꞌj. 23 Katzun mintiꞌ ma tzꞌel lakꞌeꞌ txꞌaꞌc, noktzun ticꞌlen atx, ex cxel tmaꞌn pal ka sak taꞌ xjal lu.

24 Ka at jun xjal ma tzꞌeꞌy, ex ka ma jatz jlet tchibjal scolin ex ka sak queꞌyin jatum otok tzꞌeꞌy, 25 cbajel tqueꞌyin pal. Ka otok sakix queꞌyin xyaꞌn toc ttziꞌ, ex otok tzꞌocx lakꞌeꞌ txꞌaꞌc tiꞌj tchibjal xjal, atzun txꞌaꞌc lu aju mintiꞌ kꞌanbil tiꞌj otok jaw jlet jatum otok tzꞌeꞌy; cyjaꞌtzun cxel tmaꞌn pal ka tzꞌil taꞌ xjal lu tuꞌnju otok jaw jlet txꞌaꞌc tiꞌj, aju mintiꞌ kꞌanbil tiꞌj. 26 Octzun tbaj tqueꞌyin pal aju txꞌaꞌc, ex ka mintiꞌ jun xyaꞌn ma til sak queꞌyin tcub ttziꞌ, ex ka mintiꞌ otok tzꞌocx lakꞌeꞌ txꞌaꞌc tuj tchibjal xjal, ex ka nok cyjaꞌ tcub naj, cꞌoquextzun tjapuꞌn pal xjal lu wuk kꞌij. 27 Tujtzun twukin kꞌij cbajel tqueꞌyin pal xjal juntl maj, ex katzun otok tzꞌel lakꞌeꞌ txꞌaꞌc tiꞌj, cxeltzun tmaꞌn te ka tzꞌil taꞌ, porque aju txꞌaꞌc toc tiꞌj, atzunju mintiꞌ kꞌanbil tiꞌj. 28 Katzun mintiꞌ ma tzꞌel lakꞌeꞌ txꞌaꞌc tiꞌj ex ka cyjaꞌ tcub naj, noktzun ticꞌlen aju otok tzꞌeꞌy atx; cyjaꞌtzun cxel tmaꞌn pal ka sak taꞌ xjal lu, porque nok ticꞌlen aju otok tzꞌeꞌy atx.

29 Ka at jun xinak ex ka jun xuꞌj ma jaw jlet txꞌaꞌc tiꞌj twiꞌ ex ka tiꞌj t-xcꞌawꞌ, 30 cbajel tqueꞌyin pal txꞌaꞌc lu. Ka otok tzꞌocx lakꞌeꞌ txꞌaꞌc tuj tchibjal xjal ex aju xyaꞌn otok tzꞌoc kꞌanyin queꞌyin, ex ka niban tel pulj, cxeltzun tmaꞌn pal ka tzꞌil taꞌ xjal lu, porque sal toc tiꞌj ex ka aju txꞌaꞌc mintiꞌ kꞌanbil tiꞌj toc tiꞌj twiꞌ ex ka tiꞌj t-xcꞌawꞌ. 31 Oc tbaj tqueꞌyin pal aju txꞌaꞌc, ka ma til mintiꞌ otok tzꞌocx lakꞌeꞌ txꞌaꞌc tuj tchibjal xjal ex mintiꞌ xyaꞌn kꞌek queꞌyin tcub ttziꞌ, cꞌoquextzun tjapuꞌn pal xjal lu wuk kꞌij. 32 Tujtzun twukin kꞌij cbajel tqueꞌyin pal aju txꞌaꞌc, ex katzun mintiꞌ otok tzꞌel lakꞌeꞌ txꞌaꞌc, ex mintiꞌ otok tzꞌocx lakꞌeꞌ tuj tchibjal xjal ex mya kꞌanyin queꞌyin xyaꞌn tcub ttziꞌ, 33 cxeltzun tmaꞌn pal te xjal tuꞌn tel tiꞌn ttzmal twiꞌ ex t-xmatz, atzun ke xyaꞌn cyocxsaꞌn tuj txꞌaꞌc miꞌn tzꞌel tiꞌn, ex cꞌoquex japuꞌn xjal tuꞌn pal wuk kꞌijtl. 34 Tbajlenxi wuk kꞌijtl, cꞌoquel tqueꞌyin pal juntl maj txꞌaꞌc; katzun mintiꞌ otok tzꞌel lakꞌeꞌ txꞌaꞌc ex mintiꞌ otok tzꞌocx lakꞌeꞌ txꞌaꞌc tuj tchibjal xjal, cxeltzun tmaꞌn pal ka sak taꞌ xjal lu. Cjawitz ttxꞌjoꞌn xjal tiꞌj t-xbalun ex csakseteltzun. 35 Katzun ma tzꞌel lakꞌeꞌ juntl maj txꞌaꞌc tiꞌj xjal t-xilenxi kꞌmaꞌn te ka otok sakix, 36 cbajel tqueꞌyin pal juntl maj; katzun otok tzꞌel lakꞌeꞌ txꞌaꞌc tiꞌj, mya il tiꞌj tuꞌn t-xi tjyoꞌntl pal aju xyaꞌn kꞌanyin queꞌyin: aju xjal lu tzꞌil taꞌ. 37 Pero ka tuj tnabl pal otok banix txꞌaꞌc tiꞌj xjal, ex otok tzaj jlet xyaꞌn kꞌek queꞌyin tuj ticꞌlen txꞌaꞌc, otoktzun bant txꞌaꞌc; aju xjal sak taꞌ, ex cxel tmaꞌn pal ka sak taꞌ te xjal lu.

38 Ka at jun xinak ex ka jun xuꞌj otok che jawil manch sak queꞌyin tiꞌj, 39 cbajel tqueꞌyin pal tiꞌj t-ximlal, ex ka ma til chꞌin manch sakyin queꞌyin tiꞌj, noktzun eꞌlajx manch otok jaw jlet tiꞌj; sak taꞌ xjal lu.

40 Ka at jun xinak ma cuꞌtz pulj ttzmal twiꞌ ex tzꞌaꞌj ma cyaj tuj twiꞌ, sak taꞌ te xjal lu. 41 Ex ka ma cuꞌtz pulj ttzmal twiꞌ ttzi twitz, tzꞌaꞌjtzun tibaj twitz; ax icx sak taꞌ te xjal lu. 42 Pero ka ma jaw jlet txꞌaꞌc scolin queꞌyin jatum otok tzꞌel baj ttzmal twiꞌ, ka tuj twiꞌ ex ka tibaj twitz, atzun txꞌaꞌc lu mintiꞌ kꞌanbil tiꞌj niban tjaw jlet tiꞌj. 43 Atzunte pal cbajel tqueꞌyin, ex ka otok txi mal txꞌaꞌc scolin queꞌyin ic tzaꞌn txꞌaꞌc mintiꞌ kꞌanbil tiꞌj, jatum mintiꞌ ttzmal twiꞌ, ka tuj twiꞌ ex ka tibaj twitz, 44 yabtzun xjal lu tuꞌn txꞌaꞌc mintiꞌ kꞌanbil tiꞌj; tiꞌj twiꞌ toc yabil. Aju xjal lu tzꞌil taꞌ, ex cxel tmaꞌn pal ka tzꞌil taꞌ xjal lu.

45 Aju xjal at txꞌaꞌc tiꞌj, aju mintiꞌ kꞌanbil tiꞌj, sbitꞌumaj t-xbalun cꞌoquel tkꞌoꞌn, cxel tchitpuꞌn twiꞌ, cꞌoquel tpotzin ttziꞌ ex cjawil schꞌin cyjaꞌ: Tzꞌil kine, tzꞌil kine. 46 Tzꞌil ctel acux at txꞌaꞌc tiꞌj, cnajal junx te tiꞌjxi campament.

47 Ka ma jlet sbac tiꞌj jun xbalun lan ex ka tiꞌj jun xbalun lino, 48 ex ka tiꞌj jun xbalun lino ex ka lan chmoꞌn in che cuꞌtz, ex ka tiꞌj jun tzꞌuꞌm, ex ka tiꞌj juntl tiꞌxti binchamaj tiꞌj tzꞌuꞌm, 49 ex ka aju sbac toc cyiꞌj ke tiꞌxti lu chaꞌxyin ex ka cyakyin queꞌyin, atzun txꞌaꞌc toc cyiꞌj aju mintiꞌ kꞌanbil tiꞌj, ex il tiꞌj tuꞌn t-xi yecꞌbaj te pal. 50 Atzunte pal cbajel queꞌyinte aju sbac lu ex aju tiꞌxti otok tzꞌoc sbac tiꞌj, ex cꞌoquex tlamoꞌn wuk kꞌij. 51 Tujtzun twukin kꞌij cbajel tqueꞌyin pal aju sbac; katzun otok tzꞌel lakꞌeꞌ sbac tiꞌj xbalun ex ka tiꞌj chemaj, ka tiꞌj tzꞌuꞌm ex ka tiꞌj jun macbil tzꞌuꞌm, atzun txꞌaꞌc lu mya baꞌn, mintiꞌ kꞌanbil tiꞌj, ex atzun ke macbil lu tzꞌil ke. 52 Cyjaꞌtzun cbel patit nok alcyexcu jun tiꞌxti, ka xbalun, ka chemaj, ka tzꞌuꞌm ex ka jun macbil tzꞌuꞌm at sbac tiꞌj, biꞌx cbel patit, porque atzun txꞌaꞌc mya baꞌn jlu, aju mintiꞌ kꞌanbil tiꞌj. 53 Pero ka oc tbaj tqueꞌyin pal ex ka ma til mintiꞌ otok tzꞌel lakꞌeꞌ sbac, 54 cxel tmaꞌn tuꞌn tbaj txꞌjet tiꞌxti lu, ex cꞌoquex tlamoꞌn wuk kꞌijtl.

55 Tbajlenxitzun txꞌjet tiꞌxti lu ex tel-lenxi wuk kꞌijtl, cbajel tqueꞌyin pal juntl maj, ex ka ma til mintiꞌ otok cub naj sbac, cꞌoqueltzun jlu te tzꞌil ex biꞌx cbel patit masque naꞌnx tel lakꞌeꞌ sbac, tuꞌnju aju sbac lu loꞌn tel xbalun tuꞌn, ka tujxi ex ka tiꞌjxi. 56 Katzun oc tbaj tqueꞌyin pal aju sbac ex ka ma til nok niban tcub naj tbajlenxi txꞌjet, cꞌeleltzun tkesin jun piẍ xbalun, ka tzꞌuꞌm ex ka chemaj, jatum toc sbac. 57 Pero ka ma jaw jlet ex ma tzꞌel lakꞌeꞌ juntl maj sbac tiꞌj xbalun, ex ka tiꞌj ttzeꞌyil chemaj ex ka tiꞌj twa ex ka tiꞌj tzꞌuꞌm, cꞌoquextzun patit tiꞌxti lu. 58 Atzunju xbalun ex ka chemaj ex ka tzꞌuꞌm otok cub naj sbac tiꞌj tej tjatzlen txꞌjoꞌn, il tiꞌj tuꞌn tjatz txꞌjet tiꞌj juntl maj, ex biꞌxtzun cꞌoquel te sak.

59 Atzun ke ley lu tiꞌj sbac cyiꞌj ke xbalun binchamaj tiꞌj lan ex ka tiꞌj xbalun lino, ex ka tiꞌj ttzeꞌyil chemaj, ex ka tiꞌj twa ex ka tiꞌj jun tiꞌxti tzꞌuꞌm, tuꞌntzun t-xi kꞌmat ka sak ateꞌ ex ka tzꞌil.