2 Kꞌmanxa cye aj Israel cyjaꞌ: Oc toc ten tal jun xuꞌj ex ka kꞌa jun tal oc tul itzꞌj, wuk kꞌij ctel tuj ttzꞌilil ic tzaꞌnx in bant tuꞌn oc nnuꞌl ẍwoꞌj tiꞌj tuj junjun xjaw. 3 Il tiꞌj tuꞌn t-sircunsidarinjtz tal kꞌa oc tel wajxak kꞌij tul-len itzꞌj. 4 Atzunte txubaj, cucx csaksalte tib tuj 33 kꞌijtl tiꞌj chicꞌ nnuꞌl tiꞌj. Mintiꞌ toclen tuꞌn toc tmacoꞌn jun tiꞌxti xjansamaj ex mintiꞌ toclen tuꞌn tocx tuj tja Dios ka naꞌnxtok tjapun kꞌij tuꞌn t-saksante tib. 5 Katzun txin tal oc tul itzꞌj, cabe seman ctel tuj ttzꞌilil, ex il tiꞌj tuꞌn tbant tuꞌn ic tzaꞌnx in bant tuꞌn oc nnuꞌl ẍwoꞌj tiꞌj tuj junjun xjaw. Ax icx cucx csaksalte tib tuj 66 kꞌijtl tiꞌj chicꞌ nnuꞌl tiꞌj.

6 Octzun tjapun baj kꞌij tuꞌn t-saksante tib txubaj, ka kꞌa tal ex ka txin, il tiꞌj tuꞌn t-xi tiꞌn jun tal tman ẍneꞌl te jun abkꞌi max ttzi ja xbalun te mojbabl tibil, tuꞌntzun t-xi kꞌot te oyaj patun in cub, tucꞌix jun paloma ex ka jun ẍpoꞌk te chojbil il. Che xel tkꞌoꞌn te pal, 7 atzunte pal cbel tkꞌoꞌn nwitze tuꞌntzun ttxꞌjet txubaj tuj ttzꞌilil; cyjaꞌtzun csaksetel tiꞌj chicꞌ nnuꞌl tiꞌj.

Atzun ke ley lu cyiꞌj ke xuꞌj oc tul itzꞌj cyal, ka xinak ex ka xuꞌj. 8 Katzun mintiꞌ tumel tuꞌn tlakꞌet jun tal tman ẍneꞌl tuꞌn txubaj, entons baꞌn tuꞌn ttzaj tiꞌn cabe ẍpoꞌk ex ka cabe paloma; jun cxel kꞌot te oyaj patun in cub, ex juntl cbel tkꞌoꞌn te chojbil il. Atzunte pal cxel tkanin najsbil tiꞌj ju txubaj ex csakseteltzun, chi Dios.