Ke jil sak ex ke jil tzꞌil
11
Tzaj yolin Kman tucꞌil Moisés ex tucꞌil Aarón, chi cyjaꞌ:2 Cymanxe cye aj Israel alcye ke jil baꞌn tuꞌn t-xi cychyoꞌn cyxol cycyakil ke jil ateꞌ twitz txꞌotxꞌ: 3 Baꞌn tuꞌn t-xi cychyoꞌn akeju baꞌn che cocꞌsan cywa ex paꞌn tten t-xol t-xpacꞌil cykan; 4 pero cyxol keju baꞌn che cocꞌsan cywa ex ka paꞌn tten cyxol tpas cykan, miꞌn txi cychyoꞌn ke jlu:
Aju chej camey, masque baꞌn cocꞌsan twa, pero mya paꞌn tten cyxol tpas tkan. Baꞌn tuꞌn toc cykꞌoꞌne te tzꞌil. 5 Icx jil cwatusa, masque baꞌn cocꞌsan twa, pero mintiꞌ t-xpacꞌil tkan paꞌn tten. Baꞌn tuꞌn toc cykꞌoꞌne te tzꞌil.
6 Icx ẍic, masque baꞌn cocꞌsan twa, pero mintiꞌ t-xpacꞌil tkan paꞌn tten. Baꞌn tuꞌn toc cykꞌoꞌne te tzꞌil.
7 Icx boch, masque at t-xpacꞌil tkan paꞌn tten cyxol, pero miban cocꞌsan twa. Baꞌn tuꞌn toc cykꞌoꞌne te tzꞌil.
8 Miꞌn txi cychyoꞌne cychibjal ke jil lu, ex miꞌn tzꞌoc cymacoꞌne cyximlal ka otok che cycyim. Baꞌn tuꞌn toc cykꞌoꞌne te tzꞌil ke jil lu.
9 Cyxol ke jil najl tuj aꞌ, ka tuj mar ex ka tuj nima, oꞌcx baꞌn tuꞌn t-xi cychyoꞌne akeju at cykꞌab ex at tpwakil cyiꞌj. 10 Atzun keju mintiꞌ cykꞌab ex mintiꞌ tpwakil cyiꞌj, baꞌn tuꞌn tel cyicꞌune, masque ateꞌ tuj mar ex ka tuj nima, tzaꞌnx ke cocꞌ ax icx ke nmak. 11 Miꞌn txi cychyoꞌne cychibjal; baꞌn tuꞌn tel cyicꞌune ke jil lu, ax icx baꞌn tuꞌn tel cyicꞌune cyximlal oc cycyim. 12 Cycyakil txcup ateꞌ tuj aꞌ, ka mintiꞌ cykꞌab ex mintiꞌ tpwakil cyiꞌj, baꞌn tuꞌn tel cyicꞌune. 13 Cyxol ke jil in che lipan twitz cyaꞌj, akeju mya baꞌn tuꞌn t-xi cychyoꞌne ex baꞌn tuꞌn tel cyicꞌune, atzun ke jlu: ke tꞌiw, ke quebrantawesos, ke cꞌutz, 14 ke milano, tcyakil txcaj halcones, 15 tcyakil txcaj joj, 16 ke avestrús, ke xitxꞌ, ke gaviota, tcyakil txcaj kꞌanjan, 17 ke tol, ke cormorán, ke ibis, 18 ke cisne, ke pelícano, ke azor, 19 ke cigüeña, tcyakil txcaj garza, ke tal chyuꞌj abubilla ex ke sotzꞌ.
20 Ex tcyakil tal jil baꞌn che lipan ex baꞌn che bet tuꞌn cyaje cykan, baꞌn tuꞌn tel cyicꞌune, 21 pero baꞌn tuꞌn t-xi cychyoꞌne junjun cyxol ke tal jil baꞌn che lipan ex baꞌn che bet tuꞌn cyaje cykan, pero ka at cycux ex ka at cykan tuꞌn tbant cytꞌicpaj twitz txꞌotxꞌ. 22 Ex atzun ke jlu baꞌn tuꞌn t-xi cychyoꞌne: Tcyakil txcaj ẍplon, ke cocꞌ ex ke nmak, ke chꞌiꞌl, cyucꞌix ke xtxil. 23 Pero tcyakil mastl tal jil baꞌn che lipan ex baꞌn che bet tuꞌn cyaje cykan, baꞌn tuꞌn tel cyicꞌune.
24 Ax icx jacu che tzꞌilixe cyuꞌn ke jlu:
Nok alcye jun ma tzꞌoc maconte t-ximlal jun tal jil cyimni, biꞌx ctzꞌilixtel ex cꞌoquel juntl maj te sak ocxi ttzaj klolj.
25 Nok alcye jun ma jaw kꞌinte t-ximlal jun tal jil cyimni, ctzꞌilixtel; baꞌn tuꞌn tbaj ttxꞌjoꞌn tiꞌj t-xbalun ex cꞌoquel juntl maj te sak ocxi ttzaj klolj.
26 Cycyakil ke jil at tpas cykan, pero ka mya paꞌn tten cyxol tpas cykan ex ka miban che cocꞌsan cywa, baꞌn tuꞌn toc cykꞌoꞌne te tzꞌil, ex ka at jun ma tzꞌoc maconte cyximlal oc cycyim, biꞌx cꞌoquel te tzꞌil.
27 Cycyakil jil at cyaje cykan ex in che bet tibaj tlakil cykan, baꞌn tuꞌn toc cykꞌoꞌne te tzꞌil, ex nok alcye jun ma tzꞌoc maconte t-ximlal jun jil lu cyimni, biꞌx ctzꞌilixtel tuꞌn; ex cꞌoquel te sak juntl maj ocxi ttzaj klolj. 28 Ax icx ka at jun ma jaw kꞌinte t-ximlal jun jil lu, ctel tuj ttzꞌilil; baꞌn tuꞌn tjatz ttxꞌjoꞌn tiꞌj t-xbalun ex cꞌoquel juntl maj te sak ocxi ttzaj klolj. Baꞌn tuꞌn toc cykꞌoꞌne ke jil lu te tzꞌil.
29 Ex cyxol ke jil in xi cyjakuꞌn cycꞌuꞌj twitz txꞌotxꞌ, baꞌn tuꞌn toc cykꞌoꞌne te tzꞌil ke jlu: Ke sakbin, ke ichꞌ, tcyakil txcaj ẍal, 30 ke xmatx ex tcyakil txcaj ẍula, ke lagarto, ke cocodrilo ex ke camaleón. 31 Cꞌoquel cykꞌoꞌne ke jil lu te tzꞌil; nok alcye jun ma tzꞌoc maconte cyximlal cyimni ke, biꞌx ctzꞌilixtel cyuꞌn ex max cꞌoquel te sak juntl maj ocxi ttzaj klolj.
32 Ax icx ka ma cub tzꞌak t-ximlal jun jil lu cyimni tibaj jun tzeꞌ at tajben, jun xbalun, jun tzꞌuꞌm, jun sac, ex ka nok alcyex jun macbil in ajben tuj akꞌuntl, biꞌx ctzꞌilixtel tuꞌn. Cbelex kꞌot tuj aꞌ, porque otok tzꞌilix, ex max cꞌoquel te sak juntl maj ocxi ttzaj klolj.
33 Ka ma txi tzꞌak t-ximlal jun jil lu cyimni tuj jun cꞌil txꞌotxꞌ ttxꞌotxꞌil, biꞌx ctzꞌilixtel tucꞌix tcyakilju at tuj, ex aju cꞌil lu, biꞌx cbel paꞌt. 34 Ka ma cuꞌx tzꞌak jun jil tuj aꞌ ex ka ma tzꞌajben chꞌin aꞌ lu tiꞌj chibj ex ka tiꞌj cꞌabj, biꞌx ctzꞌilixtel chibj ex ka cꞌabj tuꞌn. 35 Ka ma cub tzꞌak t-ximlal jun jil lu cyimni tibaj nok alcyex jun tiꞌxti, biꞌx ctzꞌilixtel; ka tibaj jun jorni ex ka tibaj jun tcubil kꞌakꞌ, il tiꞌj tuꞌn tcub xitit porque otok tzꞌilix.
36 Katzun ma txi tzꞌak t-ximlal jun jil lu cyimni tuj jun twi aꞌ, ex ka jatum in chmet aꞌ, ate aꞌ mlay tzꞌilix, atzunte xjal cjawitz kꞌinte t-ximlal jil tuj aꞌ, biꞌx ctzꞌilixtel.
37 Ka ma cub tzꞌak t-ximlal jun jil lu cyimni tibaj iyaj tuꞌn tcuꞌx awat, ate iyaj cucx ctel sak; 38 pero katzun otok acꞌset iyaj oc tcub tzꞌak t-ximlal jil lu cyimni tibaj, entons ctzꞌilixtel iyaj tuꞌn.
39 Ka ma cyim jun jil baꞌn tchyoꞌnjtz ex ka at jun xjal ma tzꞌoc maconte t-ximlal, biꞌx ctzꞌilixtel tuꞌn, max cꞌoquel te sak juntl maj ocxi ttzaj klolj. 40 Ka at jun xjal ma txi chyoꞌnte tchibjal jil otok cyim, ctzꞌilixtel tuꞌn; cjawitz ttxꞌjoꞌn tiꞌj t-xbalun ex cꞌoquel te sak juntl maj ocxi ttzaj klolj. Ex alcye jun ma jaw kꞌinte t-ximlal jil cyimni, ax icx ctzꞌilixtel tuꞌn, cjawitz ttxꞌjoꞌn tiꞌj t-xbalun ex max cꞌoquel juntl maj te sak ocxi ttzaj klolj.
41 Miꞌn txi cychyoꞌne ke jil jakuꞌn in xiꞌ cycꞌuꞌj twitz txꞌotxꞌ, icꞌbil ke jlu.
42 Miꞌn txi cychyoꞌne cycyakil txcaj jil jakuꞌn in xiꞌ cycꞌuꞌj twitz txꞌotxꞌ ex ka in che bet tuꞌn cyaje cykan ex ka mas, porque icꞌbil ke jlu. 43 Miꞌn tzꞌoc cykꞌon cyibe te icꞌbil ex te tzꞌil cyuꞌn ke jil jakuꞌn in xiꞌ cycꞌuꞌj twitz txꞌotxꞌ, ex miꞌn txi cykꞌoꞌne ambil tuꞌn cyoque te tzꞌil cyuꞌn. 44 Akine Cymane ex Cydiose, cyjaꞌtzun il tiꞌj tuꞌn cyoque sak ex xjan, porque xjan kine. Miꞌn baj cytzꞌilsan cyibe cyuꞌn ke jil jakuꞌn in xiꞌ cycꞌuꞌj twitz txꞌotxꞌ. 45 Akine Cymane etz kꞌinte cyeye tuj Ejipt tuꞌntzun woque te Cydiose. Cyjaꞌtzun baꞌn tuꞌn cyoque te xjan, porque xjan kine, chi Dios.