14
Tcꞌwaꞌl Kman Dios keye. Miꞌn baj cykesine cyximlale, ex miꞌn tzꞌel cymatzoꞌne ttzmal cywiꞌye tibaj cywitze tuꞌn tlaj otok cyim jun xjal, 2 porque jun tnam xjan keye te Kman Dios; ate jaw scꞌonte cyeye cyxol cycyakil xjal twitz txꞌotxꞌ tuꞌntzun cyoque te jun cꞌloj xjal etzan tuꞌn.Ke txcup sak ex ke tzꞌil
3 Miꞌn txi cychyoꞌne jun txcup tzꞌil, aju mayoꞌn tuꞌn ley.
4 Atzun ke txcup lu baꞌn tuꞌn cyxi cychyoꞌne: Wacẍ, ẍneꞌl, chip, 5 cyucꞌix cycyakil wik masat atzun cybi jlu: Ciervo, gacela, gamo, corzo, íbice ex antílope, ex chip ex ẍneꞌl te tjakꞌ cꞌul. 6 Baꞌn tuꞌn cyxi cychyoꞌne cycyakil ke txcup baꞌn che cocꞌsan cywa ex paꞌn tten t-xol t-xpacꞌil cykan. 7 Pero miꞌn cheꞌx cychyoꞌne ke txcup lu: Chej camey, ẍic ex cwatusa; masque in baj cycocꞌsaꞌn cywa, pero mya paꞌn tten t-xol t-xpacꞌil cykan; ake jlu che oquel cykꞌoꞌne te tzꞌil. 8 Ax icx ke boch, masque paꞌn tten t-xol t-xpacꞌil cykan, pero mintiꞌ in baj cycocꞌsan cywa; a jlu cꞌoquel cykꞌoꞌne te tzꞌil. Miꞌn txi cychyoꞌne cychibjal ke txcup lu, ex miꞌn tzꞌoc cymacoꞌne cyximlal ka otok che cyim.
9 Cyxol ke txcup najl tuj aꞌ, baꞌn tuꞌn cyxi cychyoꞌne keju at cykꞌab ex at tpwakil cyiꞌj, 10 pero miꞌn cheꞌx cychyoꞌne keju mintiꞌ cykꞌab ex mintiꞌ tpwakil cyiꞌj; ake jlu che oquel cykꞌoꞌne te tzꞌil.
11 Baꞌn tuꞌn t-xi cychyoꞌne tcyakil txcaj chyuꞌj akeju sak, 12 oꞌcxcu ke jlu miꞌn cheꞌx cychyoꞌne: tꞌiw, buchil bak, juntl wik tꞌiw at ttzi mar, 13 milano, tcyakil txcaj halcón, 14 tcyakil txcaj joj, 15 avestrúz, xitxꞌ, gaviota, tcyakil txcaj kꞌanjan, 16 tol, ibis, cisne, 17 pelícano, cꞌutz, somormujo, 18 tcyakil txcaj garza, abubilla ex sotzꞌ. 19 Ke tal jil at cyxicꞌ, che oquel cykꞌoꞌne te tzꞌil ex miꞌn cheꞌx cychyoꞌne, 20 pero ke chyuꞌj sak, baꞌn tuꞌn cyxi cychyoꞌne.
21 Miꞌn txi cychyoꞌne jun txcup tajx cymel, tuꞌnju akeye jun cꞌloj xjal paꞌmaj tuꞌn Kman Dios; atzun ke stranjer xjal najl cyuj cytanmiye baꞌn tuꞌn t-xi cychyoꞌn, ex ka baꞌn tuꞌn t-xi cycꞌayine cye betin xjal.
Miꞌn jax cytxcoꞌne tal chip tujx taꞌl tim ttxuꞌ.
Aju xnakꞌtzbil tiꞌj tlajiꞌn
22 Teyle junjun abkꞌi il tiꞌj tuꞌn tel cypaꞌne tlajiꞌn tiꞌj tcyakil twitz cyawale cjawil cychmoꞌne. 23 Cxel cywaꞌne tlajiꞌn cꞌelel cypaꞌne tiꞌj cytriwoye, tiꞌj taꞌl twitz cy-uvaye ex tiꞌj cychiꞌye aseyt, cyucꞌix cyiꞌj ke tnejel cyal cywacẍe ex ke tnejel cyal cyẍneꞌle; che xel cywaꞌne twitz Kman Dios tuj lugar cjawil t-scꞌoꞌn te nabl tbi, tuꞌntzun tbant cynimane te Kman te jumajx. 24 Oc cycub cyꞌiwlaꞌne tuꞌn Kman, ka najchak tuꞌn t-xi cyiꞌne aju tlajiꞌn otok tzꞌel cypaꞌne, tuꞌnju najchak najl keye tiꞌj lugar otok jaw t-scꞌoꞌn Kman te nabl tbi, 25 cycꞌayinxe aju tlajiꞌn, atzun twiꞌ cxel cyiꞌne tuj lugar otok jaw t-scꞌoꞌn Kman. 26 Aju pwak lu cꞌajbel cyeye tuꞌn tjaw cylakꞌoꞌne ma chixin nok alcye cyajbile: Ka wacẍ, ka ẍneꞌl, ka taꞌl twitz uva ex ka nok alcyexcu cꞌabj txꞌamsamaj. Atzun cxel cywaꞌne twitz Kman Dios nok alcye cyajbile, ex cbantel jun ninkꞌij cyuꞌne junx cyucꞌil keju ateꞌ tuj cyjaye.
27 Miꞌn tzꞌic cynaꞌl aj Leví cyuꞌne, akeju najl ke tuj cytanmiye, porque mintiꞌ cye cytxꞌotxꞌ oc cycꞌma te cyetzbil ic tzaꞌn cyeye.
28 Oc tel oxchak abkꞌi, cꞌelel cypaꞌne aju tlajiꞌn tiꞌj twitz cyawale tuj abkꞌi lu, ex cxel cycꞌuꞌne cyuj ke tnam jatum ateꞌye, 29 tuꞌntzun tajben cye aj Leví, akeju miꞌn cycꞌam cytxꞌotxꞌ te cyetzbil ic tzaꞌn cyeye, tucꞌix cye stranjer xjal akeju ax najl cyxole, ex tuꞌn tajben cye cꞌwaꞌl mintiꞌ cyman ex cytxuꞌ ex cye meba xuꞌj. Baꞌn tuꞌn cywaꞌn tiꞌj ocxi tnoj cycꞌuꞌj wen. Cyjaꞌtzun che bel cyꞌiwlaꞌne tuꞌn Kman Dios tiꞌj tcyakilju cbantel cyuꞌne.