13
Ka ma jaw jlet jun pacbal ex ka witzcyꞌal cyxole, ka ma tma tkanil tiꞌj jun señ ex ka jun binchben nim tipumal naꞌnxtok tbaj, 2 katzun ma japun aju señ ex ka binchben nim tipumal aju otok yolin tiꞌj, ex ka ma tma cyeye: Koꞌke, ko lpex cyiꞌj junxitl dios mintiꞌ ojtzkiꞌn cyuꞌne, ex ko cꞌulun cywitz, ka chi, 3 miꞌn txi cybiꞌne tyol aju xjal lu; porque taj Kman Dios tuꞌn ticꞌ twitz cyiꞌje, ka in cycꞌujlaꞌne tuꞌn tcyakil cycꞌuꞌje ex tuꞌn tcyakil cyanmiye. 4 Oꞌcx che lpeꞌque tiꞌj Kman Dios, oꞌcx twitz che xobe, japunx ke tmandamyent cyuꞌne, cybinxe tyol, che cꞌulune twitz, ex tenx cymojbabl cyibe tucꞌil. 5 Aju pacbal ex ka witzcyꞌal lu il tiꞌj tuꞌn tcub byet, tuꞌnju otok tzꞌoc ten ocsalte cycꞌuꞌje tuꞌn miꞌn t-xi cynimane Kman Dios, aju etz colpinte cyeye tuj Ejipt, jatum ateꞌtoke te majen, ex tuꞌnju in tmaꞌntok tuꞌn tel cypaꞌn cyibe tiꞌj be tzaj tmaꞌn Kman Dios cyeye tuꞌn cybete tuj. Atzun tumel jlu tuꞌn tnaj aju mya baꞌn otok tzꞌoctz cyxole.6 Ka at jun termaniya, ka tcyꞌajala, ka tmeꞌjela, ka tamiwoya ex ka ax t-xuꞌjila aju cꞌujlaꞌn tuꞌna, ma kꞌmaꞌnte teya tuj ewaj cyjaꞌ: Koꞌ cꞌulul cywitz junxitl dios, ka chi, akeju dios lu mintiꞌ ojtzkiꞌn cyuꞌne mi cyuꞌn cymane, 7 ic tzaꞌn ke cydios mastl xjal ateꞌ cyiꞌjele, akeju nikayin ateꞌ ex keju najchak ateꞌ tuj tcyakil part twitz txꞌotxꞌ, 8 miꞌn txi tbiꞌna tyol, miꞌn tzaj kꞌakꞌan tcꞌuꞌja tiꞌj, miꞌn tzaj tzꞌeꞌy tcꞌuꞌja tiꞌj, ex miꞌn cub tewana til xjal lu, 9 nok oꞌcx tuꞌn tcub tbyoꞌna. Aya cꞌoquel xonte tnejel abj tiꞌj xjal lu nej, ex te tibajxi cꞌoquel xoꞌn abj tiꞌj cyuꞌn cycyakil xjal. 10 Xoꞌn oca tuꞌn abj tuꞌntzun tcyim, porque o tajbe tuꞌn tel paꞌna tuꞌn tiꞌj Kman Dios aju etz kꞌinte cyeye tuj Ejipt, jatum ateꞌtoke te majen. 11 Cyjaꞌtzun, oc cybinte cycyakil aj Israel, tzul tchi cyiꞌj ex mlay cybinchatl jun il ic tzaꞌn jlu.
12 Nok tuj alcyex jun tnam ctzajel tkꞌoꞌn Kman Dios cyeye tuꞌn cynajane tuj, ka ma cybiye tkanil cyiꞌj 13 junjun xjal mintiꞌ in che niman te Dios, in che baj cytzpet-saꞌn ke xjal najl tuj cytanmi ex nnoꞌc cyocsaꞌn cycꞌuꞌj tuꞌn cyxiꞌ cꞌulul cywitz junxitl dios, ka chi, 14 cbajel cykanine, cbajel cybiꞌne ex cbajel cyjyoꞌne wen. Katzun ma tzꞌel cnet ka ax toc otok tzꞌocx jun mya baꞌn icꞌbilxix cyxole, 15 cbeltzun cybyoꞌne tuꞌn spad cycyakil xjal najl tuj tnam lu ex cycyakil alumaj; biꞌx cnajel tcyakilju at tuj tnam. 16 Cbajel cychmoꞌne tcyakil cykꞌinumabl tuj tmij plas, ex cꞌoqueltzun cykoptzꞌiꞌne kꞌakꞌ tiꞌj kꞌinumabl tucꞌix tnam; cbeltzun cypatune tcyakil ic tzaꞌn oyaj patun in cub te Kman Dios. Aju tnam lu jumajx cbajel xitj ex mlay jaw binchaꞌn juntl maj.
17 Miꞌn cyaj cyiꞌne te cyeye jun tiꞌxti aju biꞌx tuꞌn tnaj, tuꞌntzun tchewix tkꞌoj Kman ex tuꞌn ttzaj kꞌakꞌan tcꞌuꞌj cyiꞌje, tuꞌn ttzaj tzꞌeꞌy tcꞌuꞌj cyiꞌje ex tuꞌn tchmet nim cybaje tuꞌn ic tzaꞌnx o tzaj ttziyan cye cyxeꞌchele. 18 Cbantel jlu tuꞌn Kman ka ma txi cynimane tyol, ka ma che japun cycyakil ke mandamyent cyuꞌne akeju ma cheꞌx nmaꞌne cyeye jaꞌlo, ex ka ma cybinchaye aju tzꞌaklxix twitz.