2 Biꞌx che bajel cyxitune te jumajx cycyakil lugar jatum in che cꞌulun ke xjal cywitz cydios, akeju cꞌelel cyiꞌne cytxꞌotxꞌ tuꞌn toc te cyetzbile: Che bajel cyxitune ke lugar lu cywiꞌ ke nmak witz, cywiꞌ ke tal witz ex cyjakꞌ ke tzeꞌ nim cyxak. 3 Cyxitun cube ke cy-altar, cypaꞌn cube ke abj binchamaj cyuꞌn te cydios tuꞌn cycꞌulun cywitz, cypatun cube ke cydios binchamaj cyuꞌn tiꞌj tzeꞌ, ex cykꞌuchin baje ke tilbilal cydios; cycyakil ke jlu biꞌx che najel cyuꞌne, tuꞌntzun miꞌn cytzaj naꞌntl cyuꞌn xjal.

4 Miꞌn che cꞌulune twitz Kman Dios nok tuj alcyex lugar. 5 Ax cyxol cablaj cꞌloj cyiyjile, cjawil t-scꞌoꞌn Kman jun lugar jatum tuꞌn tten tnajbil ex te nabl tbi, ex tujtzunju lugar lu baꞌn tuꞌn cyxiꞌye cꞌulul twitz. 6 Atzun cpol cyiꞌne ke alumaj tuꞌn cycub patit te oyaj, ke alumaj te chojbil, ke tlajiꞌn, ke cyoyaje yecꞌun in xiꞌ twitz Kman, ke oyaj cxel cytziyane te Kman, ex ke mastl oyaj tuꞌn cyexe cygan cxel cykꞌoꞌne, ax icx ke cynejel cyal cywacẍe ex ke cynejel cyal cyẍneꞌle. 7 Atzun che waꞌle twitz Kman Dios, ex che tzalajele tiꞌj twitz cyakꞌunbene junx cyucꞌil keju ateꞌ tuj cyjaye, porque otok che cub cyꞌiwlaꞌne tuꞌn Kman Dios.

8 Miꞌn cybinchaye ic tzaꞌn in kbinchaꞌn jaꞌlo, teylex te junjun in tbinchaꞌn aju baꞌn tuj twitz, 9 porque naꞌnx cypone tuj lugar te ojlabl tuj cyetzbile, aju ctzajel tkꞌoꞌn Kman Dios cyeye. 10 Pero cyicꞌxlenxiye tuj nima Jordán, ex oc cynajane tuj txꞌotxꞌ aju ctzajel kꞌoꞌn te cyetzbile tuꞌn Kman Dios, oc t-xi cycolin aj kꞌoj tuꞌn cykꞌojin cyiꞌje, akeju txolin cyiꞌje cyuꞌn, ex oc cytene mintiꞌtl xobajil cyiꞌje, 11 cpoltzun cyiꞌne tcyakilju o txi nmaꞌne cyeye tuj lugar cjawil t-scꞌoꞌn Kman Dios te nabl tbi: Ke alumaj patun in che cub, ke chojbil, ke tlajiꞌn, ke cyoyaje yecꞌun in xiꞌ twitz Kman, ex tcyakil oyaj tbanilxix cxel cytziyane te Kman, 12 ex che tzalajeltzune twitz Kman Dios junx cyucꞌil ke cycyꞌajale ex ke cymeꞌjele, ke cymajene xinak ex ke cymajene xuꞌj, cyucꞌix ke aj Leví najl cyxole, porque miꞌn tzaj kꞌoꞌn jun piẍ txꞌotxꞌ te cyetzbil ke aj Leví, ic tzaꞌn cyeye.

13 Cykꞌonque cwent cyiꞌje tuꞌn miꞌn tcub cypatune alumaj te cyoyaje tuj nok alcyexcu lugar; 14 nok oꞌcx che pole kꞌolte cyoyaje tuj lugar cjawil t-scꞌoꞌn Kman cyxol cablaj cꞌloj cyiyjile. Atzun cbantel cyuꞌne tcyakilju ma txi nmaꞌne cyeye.

15 Masque icju, pero baꞌn tcub cybyoꞌne alumaj ex baꞌn t-xi cychyoꞌne nok tuj alcyex lugar jatum najl keye, nok alcyex kꞌij cyajbile ex nok alcyex ctzajel kꞌoꞌn cyeye tuꞌn Kman Dios. Ka tzꞌil keye ex ka sak keye ic tzaꞌn in tmaꞌn ley, baꞌn tuꞌn t-xi cychyoꞌne, ic tzaꞌn in xi chyoꞌt tchibjal masat. 16 Atzunju tchcꞌel miꞌn txi cychyoꞌne, ax cbel cykoꞌne twitz txꞌotxꞌ ic tzaꞌn aꞌ.

17 Miꞌn txi cywaꞌne cyuj ke cytanmiye aju tlajiꞌn tiꞌj twitz cytriwoye, miꞌn txi cycꞌaꞌne aju tlajiꞌn tiꞌj taꞌl twitz cy-uvaye, ex miꞌn txi cychyoꞌne aju tlajiꞌn tiꞌj cychiꞌye aseyt, mi ke cynejel cyal cywacẍe, mi ke cynejel cyal cyẍneꞌle, mi ke oyaj in cheꞌx cytziyane te Kman, mi ke mastl oyaj tuꞌn cyexe cygan in cheꞌx cykꞌoꞌne. 18 Che nicꞌbele cyiꞌj jlu twitz Kman Dios tuj lugar cjawil t-scꞌoꞌn cyxole. Cycyakile che waꞌle, che cꞌaꞌle ex che chyoꞌle cyiꞌj, cyucꞌil ke cycyꞌajale, ke cymeꞌjele, ke cymajene xinak, ke cymajene xuꞌj ex ke aj Leví najl ke cyxole. Junx che tzalajele cycyakile twitz Kman Dios tiꞌj cyakꞌunbene. 19 Nok jteꞌx kꞌij che tele twitz txꞌotxꞌ, miꞌn tzicꞌ cynaꞌl ke aj Leví cyuꞌne.

20 Octzun tel lakꞌeꞌ cytxꞌotxꞌe tuꞌn Kman Dios ic tzaꞌnx o tzaj ttziyan cyeye, ka ma tzaj tkanin cycꞌuꞌje chibj, baꞌn t-xi cychyoꞌne nok alcyex kꞌij cyajbile. 21 Katzun najchak ateꞌye tiꞌj lugar otok jaw t-scꞌoꞌn Kman Dios te nabl tbi, baꞌn tuꞌn tcub cybyoꞌne wacẍ te cychiꞌye ex ka ẍneꞌl aju o tzaj tkꞌoꞌn cyeye, ex baꞌn tuꞌn cychyoꞌne tiꞌj tcyakil nok alcye cyajbile tuj lugar jatum najl keye, ic tzaꞌnx ma txi nmaꞌne cyeye. 22 Ic tzaꞌn in xi cychyoꞌne tchibjal masat, ax icx baꞌn tuꞌn cychyoꞌne cychibjal alumaj, ka tzꞌil keye ex ka sak keye ic tzaꞌn in tmaꞌn ley. 23 Pero cykꞌonque cwent cyiꞌje tuꞌn miꞌn t-xi cychyoꞌne chicꞌ, porque tuj tchcꞌel alumaj taꞌ tchwinklal; cyjaꞌtzun miꞌn txi cychyoꞌne tchwinklal alumaj junx tucꞌil tchibjal. 24 Miꞌn txi cychyoꞌne chicꞌ, cucx cbel cykoꞌne twitz txꞌotxꞌ ic tzaꞌn aꞌ. 25 Miꞌn txi cychyoꞌne, tuꞌntzun cytene baꞌn cyucꞌix ke cycꞌwaꞌle che ul itzꞌj te tibajxi; che tele baꞌn ka ma bant cyuꞌne aju baꞌn tuj twitz Kman. 26 Atzun ke cyoyaje paꞌmaj cyuꞌne tuꞌn cyxi cykꞌoꞌne te Kman, ex akeju otok cheꞌx cytziyane tuꞌn cyxi cykꞌoꞌne te, atzun che pol cyiꞌne tuj lugar cjawil t-scꞌoꞌn Kman, 27 ex atzun tibaj t-altar Kman Dios che xel cykꞌoꞌne ke cyoyaje patun in che cub tucꞌix cychcꞌel. Atzun cychcꞌel mastl chojbil in xi cykꞌoꞌne, cꞌoquel cykoꞌne tiꞌjele t-altar, ex atzun tchibjal baꞌn tuꞌn t-xi cychyoꞌne.

28 Cybinxe ex japunx cyuꞌne aju ma txi nmaꞌne cyeye, tuꞌntzun cytene baꞌn te jumajx cyucꞌix ke cycꞌwaꞌle che ul itzꞌj te tibajxi; che tele baꞌn ka ma bant cyuꞌne aju in tzalaj Kman Dios tiꞌj ex aju baꞌn tuj twitz.

29 Oc cybaj naj ke nasyon tuꞌn Kman Dios cywitze jatum che pole tuꞌn cyoque tajwil cytxꞌotxꞌ, oc tel cyetzane cytxꞌotxꞌ ex oc cynajane tuj, 30 ten cycwente cyiꞌje tuꞌn miꞌn cyoc lpeꞌye cyiꞌj cybinchben ke nasyon lu tcublenxi cyiꞌj cyuꞌne, ex miꞌn cub cyximane tuꞌn cyxiꞌye cꞌulul cywitz cydios ic tzaꞌn cye in bant cyuꞌn. 31 Miꞌn che cꞌulune twitz Kman Dios ic tzaꞌn cye in cybinchaꞌn cywitz cydios, porque icꞌbilxix tuj twitz Kman aju cye in cybinchaꞌn cywitz cydios; ajunlpe cycyꞌajal ex cymeꞌjel in cub cypatun te cyoyaj cywitz cydios.

32 Tzꞌoc tililxix cyuꞌne tuꞌn tjapun tcyakilju ma txi nmaꞌne cyeye; miꞌn tzꞌoc cykꞌoꞌne juntl yol tiꞌj, ex miꞌn tzꞌel cyiꞌne jun yol tiꞌj.