Aju maꞌxix toclen Kman Dios
11
Cycꞌujlame Kman Dios ex che japunx ke t-xnakꞌtzbil cyuꞌne, cyucꞌix ke tley, ke tcawbil ex ke tmandamyent. 2 Tzꞌelx cynicꞌe tiꞌj jaꞌlo tzaꞌn tten e cub cawine tuꞌn Kman Dios. Mya cyucꞌil cycꞌwaꞌle in chin yoline, akeju mintiꞌ baꞌn cyuꞌn ex mintiꞌ o cyil tajwalil Kman ex tipumal maꞌxix, 3 ke señ, ke binchben nim cyipumal e bant tuꞌn tuj Ejipt tiꞌj Faraón ex cyiꞌj ke t-xjalil, 4 aju tbincha cyiꞌj ke soldad aj Ejipt, cyiꞌj ke cychej ex ke cycarwaj in che ajben tuj kꞌoj, ex tzaꞌn tten e aj mulkꞌaj tuꞌn tuj mar Cyak Queꞌyin tej cytzaj lpeꞌ cyiꞌje. Ate Kman o cub xitunte cye te jumajx. 5 Ax icx cynaꞌntze tcyakilju o tbincha cyiꞌje tuj tzkij txꞌotxꞌ tejxi cyule tzalu; 6 aju tbincha cyiꞌj Datán ex Abiram akeju tcyꞌajal Eliab ex tiyjil Rubén, tej tel cꞌabchaj txꞌotxꞌ ex e cuꞌx tzꞌak junx cyucꞌil cycyakil ateꞌ tuj cyja, cyucꞌix ke cyja xbalun ex cycyakil cyalun, ex cywitz cycyakil aj Israel o bant jlu. 7 Ax keye testiw cyiꞌj ke binchben nim cyipumal o bant tuꞌn Kman.Aju tuꞌn tbant cyuꞌn aj Israel tuꞌntzun cycub cyꞌiwlaꞌn tuꞌn Dios tuj txꞌotxꞌ tziyimaj cye
8 Japunx cyuꞌne cycyakil ke mandamyent ma cheꞌx nmaꞌne cyeye jaꞌlo, tuꞌntzun tten cyipune oc cyocxe cꞌmolte aju txꞌotxꞌ ctzyetel cyuꞌne, 9 ex tuꞌn cyankꞌine nim abkꞌi tuj txꞌotxꞌ lu, aju o tzaj ttziyan Kman tuꞌn ttzaj tkꞌoꞌn cye cyxeꞌchele ex cye cyiyjil che ul itzꞌj te tibajxi; aju txꞌotxꞌ lu kꞌinunxix ex tbanilxix. 10 Aju txꞌotxꞌ ctzyetel cyuꞌne mya junx taꞌ ic tzaꞌn txꞌotxꞌ Ejipt jatum o che etze; jatum in cuꞌx cyawaꞌntoke iyaj ex aꞌlin nnoꞌc cyuꞌne tuꞌn toma, ic tzaꞌn nnoꞌc aꞌlit txkan itzaj. 11 Atzunju txꞌotxꞌ che oquele te tajwil, at tiwitz txꞌotxꞌ, at chkꞌajlaj ttzi aꞌ, ex in aꞌlinjtz tuꞌn jbal in tzaj twitz cyaꞌj. 12 Aju txꞌotxꞌ lu, twitzelcu Kman in cwentin tiꞌj, ex ax toc twitz tiꞌj tuj tcyakil abkꞌi.
13 Ka ma che japun ke mandamyent cyuꞌne, akeju ma cheꞌx nmaꞌne cyeye jaꞌlo, ka ma cycꞌujlaye Kman Dios, ex ka ma che ajbene te tuꞌn tcyakil cyanmiye ex tuꞌn tcyakil cycꞌuꞌje, 14 ctzajeltzun tkꞌoꞌn Dios jbal tibaj cytxꞌotxꞌe tujxix tkꞌijlalil, aju jbal in tzaj ttzi jbalil ex aju jbal in tzaj oc tjaw jbalil, tuꞌntzun tjaw cychmoꞌne triw, ex tuꞌn tten taꞌl twitz uva cyucꞌile, tucꞌix chibj aseyt. 15 Ax icx ctzajel chꞌiy cꞌul tuꞌn tuj cojbil, tuꞌn cywaꞌn ke cywacẍe. Che waꞌltzune ex cnojel cycꞌuꞌje. 16 Pero ten cycwente cyiꞌje tuꞌn miꞌn cycub sbuꞌne; miꞌn tzꞌel cypaꞌn cyibe tiꞌj Kman, miꞌn che ajbene cye junxitl dios, ex miꞌn che cub ẍmejeꞌye cywitz, 17 porque ka ma cybinchaye jlu, ctzajel tkꞌoj Kman cyiꞌje ex miꞌn tzaj t-samaꞌntl jbal cyibaje, mlay tzaj tkꞌoꞌntl txꞌotxꞌ twitz cyawale, ex jurat che najele tuj tbanil txꞌotxꞌ aju ctzajel tkꞌoꞌn Kman cyeye.
18 Cyjaꞌtzun, cycꞌunxe ke yol lu tuj cyanmiye; cycꞌalonque cyiꞌj cykꞌabe ex tibaj cywitze te jun techal; 19 cyxnakꞌtzanxe cye cycꞌwaꞌle, ex cynaꞌntze ke yol lu tuj cyjaye ex tuj cybeye, ax icx oc cyxiꞌye tal ex oc cyjaw weꞌye. 20 Ax icx cytzꞌiban oque cyiꞌj tlamel cyjaye ex cyiꞌj tmarquil, 21 tuꞌntzun ttzaj tkꞌoꞌn mastl cyankꞌible ex cyankꞌibl cycꞌwaꞌle tuj txꞌotxꞌ tzaj ttziyan Kman cye cyxeꞌchele; ex cucx tuꞌn tten cyankꞌible, ic tzaꞌn cyaꞌj cucx tten te jumajx tibaj txꞌotxꞌ.
22 Katzun ma txi cynimane ex ka ma japun cycyakil ke mandamyent cyuꞌne, akeju ma cheꞌx nmaꞌne cyeye, ka ma cycꞌujlaye Kman Dios, ka ma che oc lpeꞌye tiꞌj ex ka ma che bete tuj tumelxix tuj twitz, 23 che elextzun tlajoꞌn Kman cycyakil ke nasyon lu cywitze, atzun cyeye cbel cyiꞌj cyuꞌne ke nasyon mas nim cybet ex at mas cyipun cywitze. 24 Cycyakil lugar jatum cbel aj cykane cꞌoquel te cyeye. Aju tmojonil cytxꞌotxꞌe cxel keꞌ tuj tzkij txꞌotxꞌ ex cpol baj max jatum taꞌ witz Líbano, cxel keꞌtl ttzi nima Éufrates ex cpol baj max ttzi Nintz Mar. 25 Mi aꞌl jun jacu cub twaban tib cywitze. Tuꞌn Dios ctzajel cyxobil xjal cywitze, ex ctzajel cychiye cyiꞌj tuj tcyakil twitz txꞌotxꞌ aju cbajel cybetine, ic tzaꞌnx o tzaj ttziyan.
26 Jaꞌlo, baꞌn tuꞌn tjaw cyscꞌoꞌne alcye cyajbile; ka tuꞌn cycub cyꞌiwlaꞌne ex ka tuꞌn ttzaj castiw cyibaje. 27 Ka ma cheꞌx cynimane ke tmandamyent Kman Dios, akeju ma cheꞌx nmaꞌne cyeye jaꞌlo, oc cycꞌmaꞌye cyꞌiwbil. 28 Katzun ma cheꞌx lpeꞌye cyiꞌj ke dios mintiꞌ ojtzkiꞌn cyuꞌne, ka mintiꞌ ma cheꞌx cynimane ke tmandamyent Kman Dios, ex ka ma tzꞌel cypaꞌn cyibe tiꞌj tbe aju ma txi nmaꞌne cyeye jaꞌlo, ctzajeltzun castiw cyibaje.
29 Octzun cyocx kꞌoꞌne tuꞌn Kman Dios tuj txꞌotxꞌ ctzyetel cyuꞌne, cxel cymaꞌne ke yol te cyꞌiwbil twi witz Gerizim, atzun twi witz Ebal cxel cymaꞌne ke yol tuꞌn ttzaj castiw. 30 Akeju witz lu ateꞌ ke max jlajxi nima Jordán, tiꞌjxi be in xiꞌ tuj telex kꞌij tuj cytxꞌotxꞌ aj Canaán akeju najl ke tuj chkꞌajlaj, ex cycub tumlal twitz tnam Gilgal, nikayin jatum ateꞌ ke tzeꞌ cꞌol tuj lugar More. 31 Atzun cyeye chꞌix cyicꞌxe tuj nima Jordán, tuꞌn ttzyet txꞌotxꞌ cyuꞌne aju ctzajel kꞌoꞌn cyeye tuꞌn Kman Dios. Octzun ttzyet txꞌotxꞌ cyuꞌne ex oc cynajane tuj, 32 ten cycwente cyiꞌje tuꞌn cyjapun cycyakil ke ley ex ke xnakꞌtzbil cyuꞌne, akeju ma cheꞌx nmaꞌne cyeye jaꞌlo.