O bant juntl maj tiꞌj yol tuꞌn Dios cyucꞌil aj Israel
10
Tujtzun kꞌij lu tzaj tmaꞌn Kman weye: Jasoꞌn baja cabe tzꞌlom abj ic tzaꞌn keju e bant nej, binchama jun cax tzꞌlom tzeꞌ, ex tjatza twi witz tuꞌn tyolina wucꞌile. 2 Cbel ntzꞌibane cywitz abj lu ax ke yol tzꞌiban wuꞌne nej cywitz keju e cub tbuchina, ex che belex tcꞌuꞌna tuj cax.3 Cubtzun nbinchaꞌne jun cax tiꞌj tzeꞌ chꞌiꞌx acacia, baj njasoꞌne cabe tzꞌlom abj ic tzaꞌnx ke otok bant nej, ex e jax wiꞌne twi witz. 4 Cub ttzꞌiban Kman ke laj mandamyent cywitz cycabil tzꞌlom abj, ic tzaꞌn tzꞌibantok tuꞌn nej, ex ic tzaꞌn tzaj tmaꞌn cyeye tej ttzaj yolin cyucꞌile tuj tkan kꞌakꞌ twi witz, tej tbaj cychmon cyibe. E tzajtzun tkꞌoꞌn Kman weye, 5 atzun weye in ajtz meltzꞌaje twi witz ex e cuꞌx ncꞌuꞌne ke cabe tzꞌlom abj tuj cax, aju otok bant wuꞌne ic tzaꞌnx otok tzaj tmaꞌn Kman weye. Ex lu ke ax cycuꞌx jaꞌlo.
6 (E jeꞌtztzun ke aj Israel tuj lugar Beerot-bene-jaacán tuꞌn cypon tuj lugar Mosera. Atzun cyim Aarón, ex ax cuꞌx makuꞌn; atzunte Eleazar oc te pal te t-xel ktzan tman. 7 E jeꞌtztzun tuj Mosera tuꞌn cypon tuj lugar Gudgoda, ex e icꞌtzun tuj Gudgoda tuꞌn cypon tuj lugar Jotbata, atzun lugar lu at nim aꞌ tuj. 8 Atzun kꞌij tej tjaw t-scꞌoꞌn Kman ke tiyjil Leví, tuꞌn t-xi cyikan aju cax cꞌubl tley Dios, tuꞌn cycub ten twitz Dios tuꞌn cyajben te, ex tuꞌn cycyꞌiwlanjtz xjal cyuꞌn tuj tbi Kman, ic tzaꞌn cucx tbant cyuꞌn jaꞌlo. 9 Cyjaꞌtzun, mintiꞌ xi kꞌoꞌn jun piẍ txꞌotxꞌ cye tiyjil Leví tuꞌn toc te cyetzbil, ic tzaꞌn xi kꞌoꞌn cye cyiyjil cyerman, porque ate Kman cꞌoquel te cyetzbil ic tzaꞌnx o tma Kman cye.)
10 Atzun weye in tene twi witz 40 kꞌij ex 40 konicꞌan, ic tzaꞌn tuj tnejel maj; ax icx in tzaj biꞌne juntl maj tuꞌn; cub tuj twitz tuꞌn miꞌn cynaje tuꞌn, 11 ex tzaj tmaꞌn weye: Chux txiꞌya, nejcuya cywitz xjal tuꞌn cyxiꞌ ex tuꞌn cyoc tajwil txꞌotxꞌ aju xi ntziyane cye cyxeꞌchel.
Aju tma Dios tuꞌn tbant cyuꞌn aj Israel
12 Jaꞌlotzun akeye aj Israel: ¿Alcye in tkanin Kman Dios cyeye? Atzun in tkanin, tuꞌn t-xi cynimane, tuꞌn cyoc lpeꞌye tiꞌj tuj tcyakil, tuꞌn cycꞌujlanteye, tuꞌn cyajbene te tuꞌn tcyakil cycꞌuꞌje ex tuꞌn tcyakil cyanmiye, 13 ex tuꞌn cyjapun ke tmandamyent ex ke tley cyuꞌne, akeju in cheꞌx nmaꞌne cyeye jaꞌlo, tuꞌntzun tel baꞌn cyeye. 14 Che ximane tiꞌj jlu: Ate Kman Dios tajaw cyaꞌj ex tajaw tcyakil jatum ponin baj cyaꞌj, ex ax Kman tajaw txꞌotxꞌ ex tcyakilju at twitz. 15 Masque icju, pero oꞌcx cyiꞌj cyxeꞌchele o pon tgan Kman, e tcꞌujla ex te tibajxi e jaw t-scꞌoꞌn cyiyjil cyxol ke mastl nasyon, ic tzaꞌn in cyile jaꞌlo; atzun keye cyiyjil.
16 Cykꞌoꞌncxe tuj cyanmiye aju techal tiꞌj yol cyaj bant tiꞌj tuꞌn Kman cyucꞌile, ex mya cucx tuꞌn tcub cycyuwsaꞌn cyanmiye, 17 porque ate Kman Dios maꞌxix toclen cywitz keju in che oc cykꞌoꞌn xjal te cydios ex ax cyajaw cycyakil keju in che oc cykꞌoꞌn xjal te cyajaw; porque ate jun Dios maꞌxix toclen, nimxix tipumal ex xobajilxix, mintiꞌ nnoꞌc tqueꞌyin Dios aju t-xilen xjal, ex mintiꞌ in xi tcꞌmoꞌn pwak tuꞌn t-xi binchaꞌn cyiꞌj xjal at cyil. 18 in xi tbinchaꞌn cyiꞌj ke cꞌwaꞌl mintiꞌ cyman ex mintiꞌ cytxuꞌ, ax icx cyiꞌj ke meba xuꞌj, in che tcꞌujlaꞌn ke stranjer xjal najl cyxole, ex in xi tkꞌoꞌn cywa ex cyxbalun. 19 Cyjaꞌtzun cycꞌujlame ke stranjer xjal, porque icx cyeye stranjer xjal keye tej cytene tuj Ejipt.
20 Tenx tchiylal Kman Dios tuj cywitze, oꞌcx te che ajbene, che lpeꞌque oꞌcx tiꞌj, ex oꞌcx tbi Kman ctzajel cynaꞌne tiꞌj cyyole oc t-xi cytziyane. 21 Atzun Cydiose, ex atzunju cjawil cynimsaꞌne tbi; xobajilxix, ex maꞌxix cyoclen ke tbinchben o tbincha cyiꞌje ex o cyile tuꞌn cywitze. 22 Tej cypon ke cyxeꞌchele tuj Ejipt nok 70 cybaj, atzun jaꞌlo tuꞌn Kman ma chmet cybaje ic tzaꞌn ke cheꞌw twitz cyaꞌj nimxix cyajlal.