3 Tzꞌelx cynicꞌe tiꞌj, ate Kman Dios cbel nej cywitze ic tzaꞌn jun kꞌakꞌ in baj tzꞌeꞌy tcyakil tuꞌn; ke nasyon lu che najel tuꞌn ex cbel cyiꞌj tuꞌn, tuꞌntzun cyex cylajoꞌne ex tuꞌn cynaj cyuꞌne jurat naj, ic tzaꞌnx o tma Kman cyeye. 4 Octzun cyex tlajoꞌn Kman Dios ke nasyon lu cywitze, miꞌn cymaye tuj cyanmiye cyjaꞌ: Nok tuꞌnju tzꞌaklxix koꞌ ma ko oc tajwil txꞌotxꞌ lu tuꞌn Kman, nokax che chiye, porque mya ic ttenju. Che elex tlajoꞌn Kman ke xjal lu cywitze porque jumajx aj il ke. 5 Mya tuꞌnju baꞌn cybinchbene ex mya tuꞌnju tzꞌaklxix keye twitz Kman che oquele tajwil cytxꞌotxꞌ ke xjal lu; che elex tlajoꞌn Kman ke xjal lu cywitze porque jumajx aj il ke, ex tuꞌntzun tjapun aju yol o bant tiꞌj tuꞌn cyucꞌil ke cyxeꞌchele Abraham, Isaac ex Jacob. 6 Tzꞌelx cynicꞌe tiꞌj, mya tuꞌnju mejor xjal keye ctzajel kꞌoꞌn aju tbanil txꞌotxꞌ te cyetzbile tuꞌn Kman Dios, porque akeye jun tnam miban che nimane.

7 Miꞌn tzicꞌ tnaꞌl cyuꞌne tzaꞌn tten o tzaj tkꞌoj Kman Dios cyiꞌje tuꞌn tlaj cybinchbene mya baꞌn o bant tuj tzkij txꞌotxꞌ. Atxix tej cyetze tuj Ejipt ex tejxi cyule tzalu, mintiꞌ o txi cynimane tyol Kman. 8 Tej cytene t-xe witz Horeb, tzaj tkꞌoj Kman cyiꞌje tuꞌn tlaj cybinchbene mya baꞌn. Tuꞌntzun jlu otok bant tten tuꞌn cynaje tuꞌn. 9 Tej njaxe twi witz cꞌmolte ke tzꞌlom abj jatum tzꞌiban aju yol o bant tiꞌj tuꞌn Kman cyucꞌile, atzun in tene 40 kiꞌj ex 40 konicꞌan, mintiꞌ in waꞌne ex mintiꞌ in cꞌane. 10 Tzajtzun tkꞌoꞌn Kman cabe tzꞌlom abj weye, tzꞌibamaj cywitz tuꞌnx Dios, ex cywitztzun ke jlu tzꞌibamaj ke yol tzaj tmaꞌn Dios cyeye tuj tmij tkan kꞌakꞌ twi witz, tuj kꞌij tej tcub cychmon cyibe. 11 Tbajlenxi 40 kꞌij ex 40 konicꞌan, tzaj tkꞌoꞌn Kman ke cabe tzꞌlom abj weye, jatum tzꞌiban aju yol o bant tiꞌj tuꞌn cyucꞌile, 12 ex tzaj tmaꞌn Kman weye cyjaꞌ: Weꞌctza, tcuꞌx naja t-xe witz, porque ke t-xjalila, akeju e jeꞌtz tiꞌna tuj Ejipt, ma che binchan mya baꞌn. Jurat ma tzꞌel cypaꞌn cyib tiꞌj be xi nmaꞌne cye. Ma baj cybinchaꞌn jun cydios tiꞌj kꞌan pwak otok cub ulj tuj kꞌakꞌ.

13 Tzaj tmaꞌntl Kman weye cyjaꞌ: Matzun tzꞌel nnicꞌe cyiꞌj ke xjal lu, ax toc miban che bin. 14 Miꞌn colina cyiꞌj tuꞌn cynaj wuꞌne ex tuꞌn miꞌn ttzaj naꞌntl cybi twitz txꞌotxꞌ. Tiꞌja cꞌelel jlet jun nasyon wuꞌne mas nim tipun ex mas nim cyajlal cywitz ke jlu, chi Kman weye.

15 In julin witz wen tuꞌn kꞌakꞌ tej ncuꞌtze twiꞌ, kꞌiꞌn cabe tzꞌlom abj wuꞌne jatum tzꞌiban aju yol cyaj bant tiꞌj tuꞌn Dios cyucꞌile. 16 O wile otok che binchane il twitz Kman Dios, otok cub cybinchaꞌne jun tilbilal tal wacẍ kꞌan pwak ttxꞌotxꞌil, tuꞌn toc te cydiose, ex otok tzꞌel cypaꞌn naj cyibe tiꞌj be otok tzaj kꞌmaꞌn cyeye tuꞌn Kman. 17 Tejtzun twile jlu e cub nxoꞌne ke cabe tzꞌlom abj, akeju tzyuꞌntok wuꞌne, ex e cub nbuchine ke cywitze. 18 In cubtzun ẍmejeꞌye juntl maj twitz Kman, ic tzaꞌnx otok bant wuꞌne nej, ex in tene 40 kꞌij ex 40 konicꞌan mintiꞌ in waꞌne ex mintiꞌ in cꞌane, tuꞌn tlaj tcyakilju mya baꞌn otok cybinchaye twitz Kman, ex otok tzaj tkꞌoj Kman cyiꞌje. 19 Tzaj t-xobil wiꞌje tuꞌn tlaj tkꞌoj Kman ex ttxꞌuꞌjil otok tzaj cyiꞌje; otok cub t-ximan tuꞌn cynaje tuꞌn, pero in cubsane twitz cyiꞌje, ex in tzaj bine tuꞌn juntl maj. 20 Ax icx otok tzaj nim tkꞌoj Kman tiꞌj Aarón ex o tajbe tuꞌn tnaj tuꞌn, pero in cubsane tiꞌj tuꞌn miꞌn tnaj. 21 Atzunju tilbilal tal wacẍ otok cub cybinchaꞌne te cydiose, aju otok che binchaꞌne il tuꞌn, tzaj wiꞌne ex ocx npatune tuj kꞌakꞌ, baj npaẍuꞌne ex baj ncheꞌne wen tejxi toc te kuk. Xi nchitune kuk lu tuj nima in cuꞌtz twi witz.

22 Ax icx cyuj lugar Tabera, Masah, ex Kibrot-hataava, tzaj tkꞌoj Kman cyuꞌne tuꞌn tlaj cybinchbene mya baꞌn. 23 Ex tej ttzaj tmaꞌn Kman cyeye tuj Cades-barnea tuꞌn cyjaxe etzalte txꞌotxꞌ otok tzaj ttziyan tuꞌn ttzaj tkꞌoꞌn cyeye, pero miꞌn che chiye, mintiꞌ keꞌ cycꞌuꞌje tiꞌj, ex mintiꞌ xi cynimane tyol. 24 Atxix tej twile cywitze, el nnicꞌe cyiꞌje, miban che nimane te Kman. 25 Tuꞌnju otok cub t-ximan Kman tuꞌn cynaje tuꞌn, cyjaꞌtzun in cub mutzeꞌye twitz 40 kꞌij ex 40 konicꞌan, 26 in cubsane twitz ex xi nmaꞌne te cyjaꞌ: Nman, miꞌn che cub tnajsaꞌna ke xjal lu, akeju etzan tuꞌna ex o che colpet tuꞌna tuꞌn tipumala, ex tuꞌnx tipumala o che etz tiꞌna tuj Ejipt. 27 Naꞌntza ke tmajena Abraham, Isaac ex Jacob. Miꞌn tzꞌoc tkꞌoꞌn twitza tiꞌj cychcyinibil aj Israel, mi tiꞌj cybinchben mya baꞌn ex mi tiꞌj cyil; 28 tuꞌntzun miꞌn cymante xjal cyjaꞌ tuj txꞌotxꞌ jatum o ko etz tiꞌna: Mintiꞌ o xcyeꞌ Cydios tuꞌn cyocx tuj txꞌotxꞌ xi ttziyan cye, ex o che el ticꞌun; cyjaꞌtzun e jeꞌx tiꞌn tzalu tuꞌn cycub tbyoꞌn tuj tzkij txꞌotxꞌ, jacu che chi aj Ejipt. 29 Pero teya ke, ex etzan ke tuꞌna; porque aya etz kꞌinte cye tuj Ejipt tuꞌn tipumala nimxix, nchitzune.