Ke xjal at cynabl tuꞌn tbant tja Dios cyuꞌn
31
Tzaj tmaꞌn Kman Dios te Moisés cyjaꞌ: 2 Bintza, cyxol ke tiyjil Judá o jaw nscꞌoꞌne Bezaleel aju tcyꞌajal Uri ex tal tchman Hur; 3 o noj tuj tanmi tuꞌn Nxewe ex o tzꞌoc nim tnabl wuꞌne, o txi nkꞌoꞌne tojtzkibl ex t-secꞌal tnabl tiꞌj tcyakil akꞌuntl, 4 tuꞌn t-ximan tiꞌj tzaꞌn tten tuꞌn tbant akꞌuntl, tuꞌn takꞌnan tiꞌj kꞌan pwak, tiꞌj sak pwak, tiꞌj kꞌan cꞌuxbil, 5 ex tuꞌn cybaj jaset ke tal abj tbanilxix ex tuꞌn cycuꞌx tkꞌoꞌn cyuj cykꞌukbil, tuꞌn cybaj tjasoꞌn ke tzeꞌ, ex tuꞌn takꞌnan tiꞌj tcyakil wik akꞌuntl. 6 Cyxol ke tiyjil Dan o tzꞌoc nkꞌoꞌne Aholiab aju tcyꞌajal Ahisamac, te onil te. Ax icx o txi nkꞌoꞌne cynabl cycyakil keju at cyojtzkibl tuꞌn cyakꞌnan, tuꞌn tbant cyuꞌn tcyakilju o txi nmaꞌne teya. 7 Cbajel cybinchaꞌn aju ja xbalun te mojbabl tibil, aju cax te cꞌubl nleye, aju tmaksil tcubsaꞌn tibaj, ex cycyakil ke macbil che ajbel tuj ja xbalun, 8 aju mes ex ke macbil che ajbel tiꞌj, aju cycubil candil kꞌan pwak tbanilxix ttxꞌotxꞌil ex cycyakil ke macbil che ajbel tiꞌj, aju altar jatum cbel patit storac, 9 aju altar jatum cbel patit chojbil ex cycyakil ke macbil che ajbel tiꞌj, aju tcubil aꞌ tucꞌix tkꞌukbil, 10 ke cyxbalun pal, ke xbalun xjan te Aarón, ke xbalun che ajbel cye tcyꞌajal oc cyajben weye, 11 aju aseyt cꞌajbel te xjansabl ex aju storac at tcꞌocꞌjal tuꞌn tajben tuj Lugar Xjan. Cbantel tcyakil jlu cyuꞌn ic tzaꞌnx o txi nmaꞌne teya, chi Kman Dios.Aju kꞌij te ojlabl
12 Tzaj tmaꞌntl Kman te Moisés cyjaꞌ: 13 Chi Kman, chicuya cye aj Israel: Ax toc che ojlale cyuj ke kꞌij te ojlabl, porque atzun jun techal tiꞌj yol cyaj bant tiꞌj wuꞌne cyucꞌile ex cyucꞌil cyiyjile che ul itzꞌj te tibajxi, tuꞌntzun tel cynicꞌe tiꞌj akine Cymane in chin xjansante cyeye. 14 Cyjaꞌtzun, che ojlale tuj kꞌij te ojlabl tuꞌnju xjan te kꞌij lu te cyeye. Alcye jun mintiꞌ ma tzꞌocx t-xoꞌn kꞌij lu, ax toc cymel. Alcye jun ma tzꞌakꞌnan tuj kꞌij lu, biꞌx cꞌelex lajet tuꞌntzun miꞌn ttentl cyxol t-xjalil. 15 Kak kꞌij che akꞌnale. Atzunju twukin kꞌij, kꞌij te ojlabl, xjansamaj te weye. Nok alcyexcu ma tzꞌakꞌnan tuj kꞌij te ojlabl ax toc cymel. 16 Akeye aj Israel, cynimanxe kꞌij te ojlabl ex cyicꞌsan cube kꞌij lu, ax icx cyuꞌn cyiyjile che ul itzꞌj te tibajxi. A jlu jun yol cyjel bant tiꞌj wuꞌne cyucꞌile te jumajx. 17 Atzun jun techal tuꞌn tten kxol akine ex akeye aj Israel, porque tuj kak kꞌij bant cyaꞌj ex txꞌotxꞌ wuꞌne; ex tuj twukin kꞌij xi ncoline akꞌuntl ex in ojlane, chi Dios.
18 Tej tbaj yolin Kman tucꞌil Moisés twi witz Sinaí, e tzaj tkꞌoꞌn cabe tzꞌlom abj te, tzꞌibamaj ke ley cywitz tuꞌnx twi tkꞌab Dios.