Aju altar tuꞌn tcub patit storac tibaj
30
Ax icx binchama jun altar tuꞌn tcub patit storac tibaj. Binchama tiꞌj tzeꞌ chꞌiꞌx acacia, 2 cab xcꞌachub twitz, cab xcꞌachub tnukbil ex jun var twaꞌl; junx cyjel twitz tucꞌil tnukbil, ex cyiklix cyib ke tcach tiꞌj. 3 Loꞌtzin cuba kꞌan pwak tbanilxix tibaj, ex loꞌtzin oca cyiꞌj cycyajil pacꞌ ttxlaj ex cyiꞌj ke tcach, ex loꞌtzin jawa jun adorn ttziꞌyile te tibaj, kꞌan pwak ttxꞌotxꞌil. 4 Cyiꞌj cabe tbutxꞌ te jun pacꞌ tjakꞌxi adorn, kꞌon oca cab argoy kꞌan pwak cytxꞌotxꞌil, ex cabe cyiꞌj cabetl tbutxꞌ tiꞌj juntl pacꞌ, tuꞌntzun cyex ke tzeꞌ tolin cyiꞌj cyuj, akeju che ajbel tuꞌn t-xi tanut. 5 Binchama ke tzeꞌ lu tiꞌj tzeꞌ chꞌiꞌx acacia, ex loꞌtzin oca kꞌan pwak cyiꞌj. 6 Cbeltzun tkꞌoꞌna altar lu tiꞌjtzi xbalun te makbil. Atzun cbel tkꞌoꞌna tumlal cax cꞌubl nleye ex tumlal tmaksil, jatum cꞌoquel ncꞌulbaꞌn wibe tucꞌila. 7 Cbel tpatun Aarón storac at tcꞌocꞌjal tibaj altar lu cycyakil prim oc cyxi tbinchaꞌn ke candil. 8 Ax icx te kale, oc cyoc ttxakoꞌn ke candil, cbel tpatun storac. Tuj tcyakil tabkꞌiyil cucx cbantel jlu nwitze. 9 Miꞌn cub cykꞌoꞌne juntl wik storac tibaj altar lu, mi jun chojbil patun in cub, mi oyaj tiꞌj twitz awal; ax icx miꞌn cub cykoꞌne oyaj tiꞌj taꞌl twitz uva tibaj. 10 Cbantel najsbil il tuꞌn Aarón jun maj tuj abkꞌi, oc tcub tkꞌoꞌn tchcꞌel alumaj cxel kꞌot te chojbil il cyibaj tcach altar lu. Tuj tcyakil tabkꞌiyil te jumajx cucx cbantel najsbil il tibaj altar lu jun maj tuj abkꞌi. A jlu xjanxix nwitze, akine Cymane.Aju pwak tuꞌn t-xi cykꞌoꞌn xjal tuꞌn cycolpet
11 Tzaj tmaꞌn Kman te Moisés cyjaꞌ: 12 Oc tjaw tiꞌna cyajlal aj Israel, teyle te junjun cye ctzajel tkꞌoꞌn jun chojbil te weye tuꞌn tclet tchwinklal, tuꞌntzun miꞌn cycyim tuꞌn cꞌixbisabl oc cybaj tajlaꞌna. 13 Teyle junjun aju cjawil tajlal ctzajel tkꞌoꞌn jun tal sak pwak te chojbil te weye; a jlu mij talil aju sak pwak in ajben tuj njaye. Aju sak pwak lu, chꞌixmi mey ons talil. 14 Cycyakil keju otok jaw cyajlal cxelx keꞌ cyiꞌj keju otok che japun twiꞌ winkin abkꞌi, ctzajel cykꞌoꞌn te weye aju chojbil lu, 15 ex oc ttzaj tkꞌoꞌn teyle junjun aju chojbil te weye tuꞌn tclet tchwinklal, mya mas nim cchjetel tuꞌn kꞌinun ex mya mas chꞌin cchjetel tuꞌn meba; ax tajlal cchjetel cyuꞌn, jun tal sak pwak. 16 Cjawil tchmoꞌna aju sak pwak ctzajel cykꞌoꞌn aj Israel tuꞌn tclet cychwinklal, ex cxel tkꞌoꞌna tuꞌn tajben tuj ja xbalun te mojbabl tibil. Tuꞌntzun jlu che tzajel nnaꞌne ke aj Israel, ka otok tzaj cykꞌoꞌn chojbil tuꞌn tclet cychwinklal.
Aju tcubil aꞌ kꞌan cꞌuxbil ttxꞌotxꞌil
17 Tzaj tmaꞌntl Kman te Moisés cyjaꞌ: 18 Binchama jun tcubil aꞌ te txꞌajbil, kꞌan cꞌuxbil ttxꞌotxꞌil ex ax kꞌan cꞌuxbil ttxꞌotxꞌil tkꞌukbil. Kꞌon cuba t-xol ja xbalun te mojbabl tibil tucꞌil altar, ex cbelex tkꞌoꞌna aꞌ tuj. 19 Ate Aarón cyucꞌix ke tcyꞌajal cꞌelel cytxꞌjoꞌn cykꞌab ex cykan tuꞌn aꞌ lu. 20 Oc cyocx tuj ja xbalun te mojbabl tibil, cbajel cytxꞌjoꞌn cyib tuꞌn aꞌ tuꞌn miꞌn cycyim, ax icx oc cypon lakꞌeꞌ tiꞌj altar tuꞌn cyajben ex tuꞌn ttzaj cykꞌoꞌn weye aju oyaj patun in cub, 21 cꞌelel cytxꞌjoꞌn cykꞌab ex cykan tuꞌn miꞌn cycyim. A jlu jun ley cucx ctel tuj tcyakil tabkꞌiyil te jumajx te Aarón ex cye tiyjil che ul itzꞌj te tibajxi.
Aju aseyt in ajben te xjansabl
22 Tzaj tmaꞌntl Kman te Moisés cyjaꞌ: 23 Kꞌiꞌntza ke tcꞌocꞌjal tbanilxix jlu: Cablaj libr ttxcꞌomal tzeꞌ mirra tbanilxix, kak libr canela, kak libr tkan ajlaj at tcꞌocꞌjal, 24 ex cablaj libr tcꞌocꞌjal tzeꞌ casia. Che maletel tuꞌnju malbil in ajben tuj njaye. Ax icx kꞌiꞌntza cyaje litr aseyt nneꞌl tiꞌj twitz olivo. 25 Cyiꞌjtzun ke jlu binchama aju aseyt xjan at tcꞌocꞌjal, ic tzaꞌn in bant tuꞌn jun xjal binchal perjum, tuꞌn tjax ket tuj twiꞌ jun pal oc toc toclen. Atzunju aseyt lu cꞌajbel te xjansabl. 26 Atzun jlu cbel tkoꞌna tibaj ja xbalun te mojbabl tibil, tibaj cax cꞌubl nleye, 27 tibaj mes ex cycyakil ke macbil cyoc tiꞌj, tibaj cycubil candil ex cycyakil ke macbil cyoc tiꞌj, tibaj altar patbil storac, 28 tibaj altar patbil oyaj ex cycyakil ke macbil cyoc tiꞌj, tibaj tcubil aꞌ ex tibaj tkꞌukbil. 29 Cyjaꞌtzun che oquel te xjanxix tuꞌna. Nok alcyexcu ma tzꞌoc tacl cyiꞌj, biꞌx cxjansetel.
30 Ax icx cbel tkoꞌna aseyt lu tibaj twi Aarón ex cyibaj cywiꞌ ke tcyꞌajal, tuꞌntzun cyxjanset tuꞌn cyoc te pal te weye. 31 Cxel tmaꞌna cye aj Israel cyjaꞌ: Atzun aseyt lu cꞌajbel te xjansabl tuj tcyakil tabkꞌiyil te jumajx, tuꞌn tjax ket tuj twiꞌ jun xjal oc toc toclen. 32 Miꞌn cub cykoꞌne tibaj nok alcyex jun xjal mya tiyjil pal, ex miꞌn cub cybinchaꞌne aseyt ic tzaꞌn jlu. Aju aseyt lu xjan ex cykꞌon oque te xjan. 33 Ka at jun ma cub binchante aseyt ic tzaꞌn jlu, ex ka ma cub tkꞌoꞌn tibaj nok alcyex jun xjal, biꞌx cꞌelex lajet tuꞌntzun miꞌn ttentl cyxol t-xjalil, chi Kman.
Aju storac
34 Tzaj tmaꞌntl Kman te Moisés cyjaꞌ: Kꞌintza ke tcꞌocꞌjal lu: Tkꞌolil tzeꞌ estacte, ke xlec at cycꞌocꞌjal, tkꞌolil tzeꞌ gálbano ex storac tbanil. Junx cꞌelel cyalil tuꞌna. 35 Cyiꞌjtzun ke jlu binchama storac tbanilxix ex xjan. Cbajel t-smoꞌna wen ic tzaꞌn in bant tuꞌn jun xjal binchal perjum, cxel tkꞌoꞌna chꞌin atzꞌan tuj ex cꞌoquel te xjan. 36 Cbajel tcheꞌna chꞌin ex niꞌj cꞌoquel tuꞌna. Cbeltzun tkꞌoꞌna twitz cax cꞌubl nleye tuj ja xbalun te mojbabl tibil jatum cbel nyecꞌun wibe twitza. Aju storac lu xjanxix cꞌoquel te cyeye. 37 Miꞌn cub cybinchaꞌne storac ic tzaꞌn jlu tuꞌn tajben cyuꞌne. Weye jlu ex xjan te cyeye. Akine Cymane. 38 Ka at jun ma cub binchante storac ic tzaꞌn jlu tuꞌn t-achin tiꞌj tcꞌocꞌjal, biꞌx cꞌelex lajet tuꞌn miꞌn ttentl cyxol t-xjalil.